କୁଲମିକି ପା଼ୱୁଲ ରା଼ଚାମାନି ରୀ ଲମ୍ବର ଆ଼କୁ
ତେସଲନିକି କୁଲମିତାକି ପା଼ୱୁଲ ରା଼ଚାମାନି ରୀ ଲମ୍ବର ଆ଼କୁ
ମୂଲୁ ହା଼ଡା
ତେସଲନିକି ରୀ ଲମ୍ବର ଆ଼କୁ ପା଼ୱୁଲ ତା଼ଣାଟି ରା଼ସ୍କି ଆ଼ହାମାନେ ୧:୧ । ତେସଲନିକି ମୂଲୁ ଆ଼କୁ ରା଼ଚିତି ଏଚରଦିନା ଡା଼ୟୁ ଇଚିହିଁ କ୍ରୀସ୍ତ ଜାର୍ନାଆ଼ତି ୫୧ ବାର୍ସା ଡା଼ୟୁ ଈ ଆ଼କୁ ରା଼ସ୍କି ଆ଼ହାମାନେ । ଏଚିବେ଼ଲାତା ପା଼ୱୁଲ କରନ୍ତି କୁଲମିତା ମାଚେସି କାମା ୧୭:୧-୧୦ ।
ତେସଲନିକିତା ମାନି କ୍ରୀସ୍ତାନା ଲ଼କୁ କ୍ରୀସ୍ତ ୱେଣ୍ତେ ୱା଼ନି କାତାତି ନେହିଁକିଁ ପୁନାଆନା ତାମି ଅଣ୍ପୁତା କିଲିବିଲି ଆ଼ହିମାଚେରି । ଏ଼ୱାରି ତା଼ମ୍ବୁ କିୱିତି କାମା ପିସାନା ନିସ୍ତା ଆ଼ତେରି ଇଞ୍ଜାଁ ଅ଼ର କ୍ରୀସ୍ତାନା ଲ଼କୁ ଏ଼ୱାରାଇଁ ସା଼ୟେମି କିହିମାଚେରି ।
ଏଚରଜା଼ଣା କ୍ରୀସ୍ତ ୱେଣ୍ତା ୱା଼ନାଣି ଆଜିମାଚେରି, ଈ କାତା ପୁଞ୍ଜାନା ପା଼ୱୁଲ ଈ ରୀ ଲମ୍ବର ଆ଼କୁ ରା଼ଚିମାନେସି, ଇଚିହିଁ କ୍ରୀସ୍ତ ୱା଼ଆ ନ଼କେଏ ହା଼ରେକା ଲାଗେଏ ପ଼ଲେଏ ଆ଼ହିମାଚେ, ଇଞ୍ଜାଁ ଏ଼ୱାରାଇଁ ବାତିମା଼ଲିହିଁ ରା଼ଚିମାନେସି । ମୀରୁ ନାମୁତା ପାଡାଆ଼ହାନା ମାଞ୍ଜେମାଞ୍ଜୁ, ଦୁକୁ କସ୍ତ ବେଟାଆ଼ହାଲି ଅ଼ର୍ହାଦୁ, ନା଼ ଆଟ୍ହିତାରି ୱା଼ହୁ ତଲେ କାମା କିତିଲେହେଁ ମୀରୁ ଜିକେଏ ନାମୁତି କାମା କିଦୁ ଇଞ୍ଜିଁ ଏ଼ୱାରାଇଁ ବାତିମା଼ଲିହିଁ ରା଼ଚିମାନେସି ।
ପତିତା ମାନାୟି
୧. ପା଼ୱୁଲ ତାଙ୍ଗେ ଅ଼ଡ଼େ ତାନି ଆଟ୍ହିତାରାଇଁ ପୁଣ୍ମ୍ବିକିନାୟି । ୧:୧-୨
୨. ତେସଲନିକି କୁଲମିତାକି ଜହରା ଅ଼ଡ଼େ ପ୍ରା଼ତାନା । ୧:୩-୧୨
୩. ରା଼ନି ଦିନାତି କାତା । ୨:୧-୧୭
୪. ଏ଼ୱାରି ନିସ୍ତା କ଼ପାଟି ଅ଼ଡ଼େ କାମା କିହାଲି ୱେହ୍ନାୟି । ୩:୧-୧୫
୫. କୁଲମିତି ଜହରା କିହାନା ଆ଼କୁତି ରା଼ପ୍ନାୟି । ୩:୧୬-୧୮
୧
୧ ପା଼ୱୁଲ, ସିଲା ଅ଼ଡ଼େ ତିମତି ମା଼ ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣା ମାନି ତେସଲନିକିତି କୁଲମିକି ଆ଼କୁ ରା଼ଚିମାନମି ।
୨ ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣାଟି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ଜୀୱୁ ମିଙ୍ଗେତାକି ଆୟାପେ ।
ଜୀସୁ ୱେଣ୍ଡେ ୱା଼ନାୟି ଅ଼ଡ଼େ ନୀହାଁୟି କିନାୟି
୩ ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି ମୀ ତାକି ମା଼ମ୍ବୁ ବାରେଦିନା ମାହାପୂରୁଇଁ ଜହରା କିନାୟି ଲ଼ଡ଼ାମାନେ, ଏଲେଆ଼ନାୟି ନେହେଁ, ମୀ ନାମୁ ଅ଼ଡ଼େ ରଅତେରି ରଅଣାଇଁ ଜୀୱୁନ଼ନାୟି ଦିନମି ତାକି ଦିନମି ପାଡାଆ଼ହିମାନେ ।
୪ ଏଚେଟିଏ ମୀରୁ ଆମିନି ବାରେ ସା଼ସ୍ତି ଇଞ୍ଜାଁ କସ୍ତ ବେଟା ଆ଼ହାମାଞ୍ଜେରି, ଏମ୍ବାଟି ମୀରୁ ଅ଼ର୍ହାନା ନାମୁତଲେ ମାଞ୍ଜେ ମାଞ୍ଜେରି, ଏ଼ଦାଆଁତାକି ମା଼ମ୍ବୁ ମାହାପୂରୁ କୁଲମିକାଣା ମିଙ୍ଗେ ତାକି ବଡପଣ ଆ଼ହିମାନମି ।
୫ ମାହାପୂରୁତି ଆମିନି ରା଼ଜିତି ତାକି ଦୁକୁ ବେଟାଆ଼ହି ମାଞ୍ଜେରି, ଏ଼ଦିଏମ୍ବାଆଁ ଜ଼ଗେ ଇଞ୍ଜିଁ ତ଼ଞ୍ଜାଆ଼ହାଲି ଈଦିଏ ମାହାପୂରୁତି ନେହିଁ ନୀହାଁୟିତି ପାର୍ମାଣା ।
୬ ଏଚିବେ଼ଲା ମିଙ୍ଗେ କସ୍ତ ହୀହିମାଞ୍ଜାତି ଲ଼କୁକି ବାଦୁଲି ଲେହେଁ କସ୍ତ ହୀନାୟି ଇଞ୍ଜାଁ କସ୍ତ ବେଟାଆ଼ହି ମାଞ୍ଜେରି ମୀରୁ, ମିଙ୍ଗେ ମା଼ ତଲେ ଜ଼ମିକିୟାନମି, ଈଦିଏ ମାହାପୂରୁ ନ଼କିତା ନେହିଁ କାତା;
୭ ଇଚିହିଁ ପ୍ରବୁ ଜୀସୁ ଏଚିବେ଼ଲା ଜାହାରା ବା଼ଡ଼୍ୟୁ ଗାଟି ଦୂତୁୟାଁ ତଲେ ଡ଼ୀଞ୍ଜି ମାନି ହିଚୁ ଗୁଦ୍ୱା ତଲେ ଲାକପୂରୁଟି ତ଼ଞ୍ଜାଆ଼ନେସି ।
୮ ଆମ୍ବାଆରି ମାହାପୂରୁଇଁ ପୁଞ୍ଜାହିଲଅରି, ଅ଼ଡ଼େ ମା଼ ପ୍ରବୁ ଜୀସୁ କ୍ରୀସ୍ତତି ନେହିଁ କାବ୍ରୁ ମା଼ନୱି ଆ଼ଅରି, ଏ଼ୱାରାଇଁ ଏ଼ୱାସି ଏଚିବେ଼ଲା ଡଣ୍ତ ହୀନେସି ।
୯ ଇଚିହିଁ, ଆମିନି ଦିନା ଏ଼ୱାସି ଜାହାରା ଦାର୍ମୁଗାଟାରି ତଲେ ଗାୱୁରମି ବେଟାଆ଼ହାଲି ଇଞ୍ଜାଁ ନାମାମାନି ମାହାପୂରୁ ଲ଼କୁ ତା଼ଣାଟି କାବାଆ଼ନି ସିନାଲେହେଁ ଆ଼ହାଲି ୱା଼ନେସି । ଇଚିହିଁ ମୀରୁ ମା଼ମ୍ବୁ ହୀହାମାଞ୍ଜାନି ସା଼କିତି ନାମାମାଞ୍ଜେରି ।
୧୦ ଏ଼ ଦିନା ଏ଼ୱାରି ଡଣ୍ତ ବେଟାଆ଼ନେରି, ଇଚିହିଁ ପ୍ରବୁତି ଡାଗେଟି ଇଞ୍ଜାଁ ତାନି ବାଡ଼୍ୟୁଗାଟି ଗାୱୁରମିଟି ହେକ ହାଜାନା କା଼ଲାକା଼ଲା ତାକି ନା଼ସା ଆ଼ନେରି ।
୧୧ ଏ଼ଦାଆଁତାକି ମା଼ ମାହାପୂରୁ ଏ଼ନିକିଁ ମିଙ୍ଗେ ହା଼ଟାମାଞ୍ଜାନି ଜ଼ଗେ ଇଞ୍ଜାନେସି, ଏ଼ଦାଆଁତାକି ମା଼ମ୍ବୁ ଜିକେଏ ବାରେବେ଼ଲା ମିଙ୍ଗେତାକି ପ୍ରା଼ତାନା କିହିମାନମି; ଏ଼ନିକିଁ ନାମୁତି ବାରେ କାମା ନେହିଁକିଁ କିହାଲି ଆ଼ଡିଦେରି ।
୧୨ ଏଲେଆ଼ତିହିଁ ମା଼ ମାହାପୂରୁ ଇଞ୍ଜାଁ ପ୍ରବୁ ଜୀସୁ କ୍ରୀସ୍ତତି କାର୍ମାମେହ୍ନାଣି ଲେହେଁ ପ୍ରବୁ ଜୀସୁତି ଦ଼ରୁ ମୀ ତା଼ଣା ଗାୱୁରମି ଆ଼ନେ, ଅ଼ଡ଼େ ମୀରୁ ତାନିତା଼ଣାଟି ଗାୱୁରମି ବେଟାଆ଼ଦେରି ।