ତୀମଥିଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
ତିମତି ତା଼ଣା ପା଼ୱୁଲ ରା଼ଚାମାନି ର଼ ଲମ୍ବର ଆ଼କୁ
ମୂଲୁ ହା଼ଡା
ମୂଲୁ ପତି ତିମତି ର଼ ଲମ୍ବର ଆ଼କୁ, ପାଣ୍ତ୍ୱିଆ଼ତି ପା଼ୱୁଲ ତା଼ଣାଟି ତାନି ସୀସୁ ତିମତିକି ରା଼ସ୍କି ଆ଼ହାମାନେ । ଜୀସୁ କ୍ରୀସ୍ତ ଜାର୍ନାଆ଼ତି ୬୧-୬୪ ବାର୍ସା ଡା଼ୟୁ ର଼ ଲମ୍ବର ତିମତି ରା଼ସ୍କି ଆ଼ହାମାଣ୍ମ୍ବିନେ । ଈଦି ପା଼ୱୁଲତି ଜୀୱୁ ରା଼ନି ବେ଼ଲାତା ରା଼ସ୍କି ଆ଼ହାମାଣ୍ମ୍ବିନେ । ପା଼ୱୁଲ ତିମତି ତଲେ ହା଼ରେକା ଜାଟୁ ମାଚେସି, ଏ଼ୱାସି ହା଼ରେକା ଦେବା ତିମତିଇଁ ମୀର୍ଏସି ଇଞ୍ଜିଁ ଇଞ୍ଜାଁ ମାନେସି ପିଲିପି ୨:୨୨; ୧ତିମ ୧:୨, ୧:୧୮ ।
ଈଦି ପା଼ୱୁଲ ରା଼ଚାମାନି ସା଼ରିଗଟା ଆ଼କୁ ବିତ୍ରାଟି କୁଲମିତି ପିସାନା ର଼ ମାଣ୍ସିଇଁ ୱେସିମାନେ । ଅ଼ଡ଼େ ତୀନିଗଟା ଆ଼କୁ ତିମତି ରୀ ଲମ୍ବର ଆ଼କୁ, ତିତସ, ଅ଼ଡ଼େ ପିଲିମନ । ର଼ ଲମ୍ବର ତିମତିତା କୁଲମିତି ହା଼ରେକା ପ୍ରା଼ତାନା କିନି ମେ଼ରାତି କାତା ୨:୧-୧୫, କୁଲମିତି କାଜା ଲ଼କୁତି ଜ଼ଗେତି କାତା ୩:୧-୧୩ଅ଼ଡ଼େ ମିଚି ଜା଼ପ୍ନାରି କାତାତା ଜାଗ୍ରାତା କିନି କାତା ରା଼ସ୍କି ଆ଼ହାମାନେ ୧:୩-୧୧; ୪:୧-୫; ୬:୨-୫ । ପା଼ୱୁଲ ତିମତିଇଁ ଏ଼ନିକିହିଁ କୁଲମିତି ନେହିଁ ସା଼ଲୱି କିନାସି ଆ଼ହାଲି ଜା଼ପ୍ହି ମାଚେସି ଏ଼ କାତା ରା଼ସ୍କି ଆ଼ହାମାନେ ।
ତିମତି ର଼ ଲମ୍ବର ଆ଼କୁତା ହା଼ରେକା ପା଼ଣା ପା଼ଟୁୟାଁ ମାନୁ, ଏ଼ୱି କୁଲମିତି ସା଼ଲୱି କିନାରାଇଁ ନୀଞ୍ଜୁ ୱିଏତି କୁଲମିକାଣି ନେହିଁକିଁ ଜାତ୍ନୁ କିହାଲି ସା଼ୟେମି କିନୁ ।
ପତିତା ମାନାୟି
୧. ପା଼ୱୁଲ ତିମତିଇଁ ଜହରା କିହାଁ ମା଼ଟ୍ନାୟି । ୧:୧-୨
୨. ପା଼ୱୁଲ ତିମତିଇଁ ମିଚି ଜା଼ପ୍ନାରି କାତାତା ଜାଗ୍ରାତା କିନାୟି । ୧:୩-୧୧
୩. ପା଼ୱୁଲ କ୍ରୀସ୍ତ ତାକି ଏଚେକା ନେହିଁ ତ଼ସାମାନେସି ଏ଼ଦାଆଁ ୱେସାନା ଆ଼କୁତି ରା଼ଚିନାୟି । ୧:୧୨-୧୯
୪. ପା଼ୱୁଲ ତିମତିଇଁ ପ୍ରା଼ତାନାତି ପା଼ଣାପା଼ଟୁ ଅ଼ଡ଼େ ସା଼ଲୱି କିନାରି କାତା ଜା଼ପ୍ହାମାନେସି । ୨–୩
୫. ପା଼ୱୁଲ ତିମତିକି ଏଚେକା ଡା଼ୟୁତି କାତା ୱେସାନା ଆ଼କୁ ରା଼ଚିନାଣି ରା଼ପ୍ନାୟି । ୪–୬
୧
୧ ନା଼ନୁ ପା଼ୱୁଲ, ମା଼ ଗେଲ୍ପାନି ମାହାପୂରୁ ଅ଼ଡ଼େ ବା଼ର୍ସୁ ହୀନି କ୍ରୀସ୍ତ ଜୀସୁ ହୁକୁମି ତଲେ ପାଣ୍ତ୍ୱି ଆ଼଼ହାମାନାତେଏଁ ।
୨ ନାମୁତା ନା଼ ଦାର୍ମୁତି ଜୀୱୁତି ମୀର୍ଏଣାତି ତିମତି; ଆ଼ବା ମାହାପୂରୁ ମା଼ ପ୍ରବୁ ଜୀସୁ କ୍ରୀସ୍ତ ତା଼ଣାଟି ଜୀୱୁନ଼ନାୟି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ନିଙ୍ଗେତାକି ଆୟାପେ ।
ମିଚି ଜା଼ପ୍ନାରି ତା଼ଣାଟି ଜାଗ୍ରାତା
୩ ନା଼ନୁ ମାକିଦନିୟାତା ହାଜିମାଚାଟି ମିଙ୍ଗେ ୱେସାମାଞ୍ଜାତି ଲେହେଁ, ନୀନୁ ଏପିସିୟ ଗା଼ଡ଼ାତା ଡ଼ୟାମୁ ଏମ୍ବାଆଁ ଏଚରଜା଼ଣା ଲାଗେଏତି କାତା ଜା଼ପ୍ହିମାନେରି ଏମ୍ବାଟି ଏ଼ୱାରାଇଁ କା଼ହି କିମୁ,
୪ କ଼ହୁୟାଁ ଇଞ୍ଜାଁ ରା଼ଆଗାଟି ଆକୁ ଆ଼ବାୟାଁ ଦ଼ର୍କାଣି ଆହ୍ଆପେରି ଇଞ୍ଜିଁ ଏ଼ୱାରାଇଁ ୱେହ୍ମୁ, ଏ଼ ବାରେ ନାମୁ ତାକି ମାହାପୂରୁତି କାମାତାକି ଆ଼ଆନା ସାମା ବା଼ଦିବା଼ଦା କିୱିକିନେ ।
୫ ସୁଦୁ ହିୟାଁ, ନେହିଁ ଅଣ୍ପୁ ଅ଼ଡ଼େ କୁଟୁ ହିଲାଆ ନାମୁଟି ହ଼ଚିମାନି ଜୀୱୁ ନ଼ନାଣି ଜାଗ୍ରାତା କିହାଲିତାକି ନା଼ନୁ ଈ ହୁକୁମି ହୀହିମାଞ୍ଜାଇଁ ।
୬ ଏଚରଜା଼ଣା ଈ ବାରେ କାତାତି ବା଼ଣା ଆ଼ହାନା ଉଜେଏତି କାତା ଆସାନା ଏଟ୍କା ଜିରୁ ହାଜିମାନେରି;
୭ ଏ଼ୱାରି ମେ଼ରା ଜା଼ପ୍ନାତମି ଇଞ୍ଜିଁ ଅଣ୍ପିନେରି, ସାମା ଏ଼ୱାରି ଏ଼ନାଆଁ ୱେହ୍ନେରି, ଅ଼ଡ଼େ ଏ଼ନାଆଁ ଜାଣ୍ତେନାଙ୍ଗା ଜା଼ପ୍ନେରି, ଏ଼ଦାଆଁ ତା଼ମ୍ବୁଏ ତେଲ୍ହଅରି ।
୮ ମା଼ମ୍ବୁ ପୁଞ୍ଜାମାନମି; ମେ଼ରାତି ନେହିଁକିଁ ଲେ଼ମ୍ବିସାରେ, ଏ଼ଦି ନେହେଁ ।
୯ ସାମା ମେ଼ରା ଦାର୍ମୁଗାଟି ଲ଼କୁତାକି କିୱିଆ଼ଆନା, ଜାହାରା ମ଼ନ, ଅ଼ଡ଼େ ମା଼ନୱି ଆ଼ଆଗାଟାରି, ଦାର୍ମୁ ହିଲାଆ ଗାଟାରି, ଅ଼ଡ଼େ ପା଼ପୁ ଗାଟାରି, ଲାଗେଏତାରି, ଦାର୍ମୁତି ନାମାଆଗାଟାରି, ତାଲି ତାଞ୍ଜିଇଁ ପା଼ୟିନାରି, ଲ଼କୁଣି ପା଼ୟିନାରି,
୧୦ ଦା଼ରି କିନାରି, ଆ଼ବା ଆ଼ବାୟାଁ ଦ଼ହ କିୱିଆ଼ନାରି, ଲ଼କୁଣି ପାର୍ନାରି, ମିଚି ସା଼କି ହୀନାରି, ଅ଼ଡ଼େ ମିଚି କାତାତାକି ପାର୍ମାଣା କିନାରାକି, ଅ଼ଡ଼େ ଆମ୍ବାଆରି ନେହିଁ ଜା଼ପ୍ନାଣି, ତାକି ନିଙ୍ଗିନେରି, ଏ଼ଦାଆଁତାକି ମେ଼ରା ମା଼ନୱି ଆ଼ଆଗାଟାରାକି ହୀପ୍କି ଆ଼ହାମାନେ,
୧୧ ଈଦି ନା଼ ତା଼ଣା ହେର୍ପି ଆ଼ହାମାନାୟି ହା଼ରେକା ନେହେଁ ମାହାପୂରୁତି ଗାୱୁରମିଗାଟି ନେହିଁ କାବ୍ରୁତି ଜା଼ପ୍ନି ଲେହେଁ ଆ଼ନେ ।
ମାହାପୂରୁତି କାର୍ମା ତାକି ଜହରା
୧୨ ନାଙ୍ଗେ କାମାତା ବା଼ଡ଼୍ୟୁ ହୀହାମାଞ୍ଜାନି ମା଼ ପ୍ରବୁ କ୍ରୀସ୍ତ ଜୀସୁଇଁ ଜହରା କିହିମାଇଁ, ଏ଼ନାଆଁତାକି ଇଚିହିଁ ନାଙ୍ଗେ ଏ଼ୱାସି ମା଼ନିଗାଟାତି ଇଞ୍ଜିଁ ଅଣ୍ପାନା ସେ଼ବା କାମା ହେର୍ପା ମାଞ୍ଜାନେସି ।
୧୩ ଆ଼ତିଜିକେଏ ତଲି ନା଼ନୁ ଜୀସୁଇଁ ନିନ୍ଦା କିନାତେଏଁ, ଡଣ୍ତ ହୀନାତେଏଁ, ଅ଼ଡ଼େ ଲାଗେଏ କିନାତେଏଁ ମାଚେଏଁ; ସାମା ନା଼ନୁ ନାମା ହିଲାଆତାକି ବୁଦି ହିଲାଆଲେହେଁ ଏ଼ଦାଆଁ କିହିମାଚେଏଁ ଇଞ୍ଜିଁ କାର୍ମା ବେଟାଆ଼ତେଏଁ;
୧୪ ଅ଼ଡ଼େ ମା଼ ପ୍ରବୁତି କାର୍ମା କ୍ରୀସ୍ତ ଜୀସୁ ତା଼ଣାଟି ନାମୁ ଅ଼ଡ଼େ ଜୀୱୁ ନ଼ନି ତା଼ଣାଟି ନାଙ୍ଗେତାକି ହା଼ରେକା ଆୟାତେ ।
୧୫ ପା଼ପୁ ଗାଟାରାଇଁ ଗେଲ୍ପାଲିତାକି କ୍ରୀସ୍ତ ଜୀସୁ ଦାର୍ତିତା ୱା଼ତେସି, ଈ ବ଼ଲୁ ସାତା ଅ଼ଡ଼େ ବାରେୱାକି ଆବିନାୟି ଅ଼ଡ଼େ ନାମିନାୟି; ଏ଼ ପା଼ପୁ ଗାଟାରି ବିତ୍ରାଟି ନା଼ନୁ ବାରେକିହାଁ କାଜା ପା଼ପୁ ଗାଟାତେଏଁ
୧୬ ଆ଼ତିଜିକେଏ ଆମିନି ଗାଟାରି ୱା଼ହିମାନି ଦିନାତା କା଼ଲାକା଼ଲାତି ଜୀୱୁ ବେଟାଆ଼ହାଲି ଜୀସୁ କ୍ରୀସ୍ତ ତା଼ଣା ନାମିନେରି, ଏ଼ୱାରି ନ଼କିତା ତ଼ସ୍ପି ଆ଼ହାଲି ନା଼ନୁ ର଼ କାଜା ପା଼ପୁ ଗାଟାତେଏଁ, ନା଼ ତା଼ଣା ଏ଼ୱାସି ଏ଼ନିକିଁ ତାନି କା଼ଲେଏତି ଅ଼ର୍ହିନାଣି ତ଼ହ୍ନେସି ଏ଼ଦାଆଁତାକି ନା଼ନୁ କାର୍ମା ବେଟା ଆ଼ତେଏଁ ।
୧୭ ଏଚେଲାୱା ନା଼ସା ଆ଼ଆଗାଟାୟି ଇଞ୍ଜାଁ ତ଼ଞ୍ଜାଆ଼ଆଗାଟି ରଣ୍ତିଏ ମାହାପୂରୁ ଆମ୍ବାଆସି କା଼ଲାକା଼ଲାତି ରାଜା ଏ଼ୱାଣାକି ମା଼ନି ଅ଼ଡ଼େ ଗାୱୁରମି କା଼ଲାକା଼ଲା ତାକି ଆ଼ପେ । ଆ଼ମେନ୍ ।
୧୮ ତିମତି, ନା଼ ମୀର୍ଏଣାତି, ନିଙ୍ଗେତାକି ତଲି ୱେସିମାଞ୍ଜାତି ଲେହେଁ ନା଼ନୁ ନିଙ୍ଗେ ଈ ହୁକୁମି ହୀହିମାଞ୍ଜାଇଁ, ଏ଼ନିକିଁ ନୀନୁ ଈ ବାରେ କାତାତଲେ ନେହିଁ ଜୁଜୁ କିହାଲି ଆ଼ଡିଦି ।
୧୯ ଦାର୍ମୁ ଅ଼ଡ଼େ ନାମୁ ନେହିଁ ଅଣ୍ପୁ ଆହ୍ମୁ; ଏ଼ଦାଆଁ ପିସା ମାନାକି ଏଚରଜା଼ଣାତି ନାମୁ ଲେହେଁତି ଜା଼ଜା ଡୀହା ହାଜାମାନେ,
୨୦ ଏ଼ୱାରି ବିତ୍ରାଟି ହୁମନାୟ, ଅ଼ଡ଼େ ଆଲେକ୍ଜାଣ୍ତାର ମାନେରି, ଏ଼ଦାଆଁତାକି ନା଼ନୁ ଏ଼ୱାରାଇଁ ସୟତାନ କେୟୁତା ହେର୍ପିତେଏଁ, ଏ଼ନିକିଁ ଈ ରିଆରି ପା଼ଣା ବେଟାଆ଼ହାନା ମାହାପୂରୁଇଁ ନିନ୍ଦା କିଅରି ।