5
1 Tan sa'ad nan gwaschi angatuwanay pachi gway napili sasan taku nachutu'an as mansilwhi an Apudyus ta sija nan mangichatun sasan ajam ja losanay ayasin nan chatun gway maatod an Apudyus kapu sasan whersucha.
2 Mawhalinay maanusana chanan na'awhersu kapu san inamaid akammucha kapu tan anna kahos nan ma'awhasuyana.
3 Ad kapu tan ma'awhersus sija maserpu manchatun as sija gway wha'on kus ahus ekay san whersun chanan taku gwon kapu ahos san whersuna.
4 Maid kun osas manutu' san longagna as mangngachan angatuwanay pachi. Ahus as Apudyus as manutu' an sija as isun nan nanutu'ana an Aaron gway ummuna angatuwanay pachi san agwi.
5 Isuna hosay sa'ad as Kristu achina kun inchajaw nan longagna gway nangngachan angatuwanay pachi gwon pinilin Apudyus as sija gway manggwana an sija,
“Si'a nan Ana''u,
san sana nangngachan sa'on nan Amam.”
6 Agwad ahos nan osa nilista san Ukud Apudyus gway anana,
“Si'a nan pachi as ingkaingkana
gway isun nan inapachin Melkisedek.”
7 Sa'ad san chimpun nan nawhijakan Hesus ad asna luta, nallugwayu gway nan'ochaw as tuyung an Apudyus gway mawhalinay mangisaya' an sija san otoy. Nallugwayu an Apudyus gway tinowhagna nan kinganaay naniwhil kun chingngorn Apudyus as sija kapu san nangipawhawhaana san longagna gway mamatpati san whayugwon Apudyus.
8 Ta'on nu Ana' Apudyus as sija kochangnaay nasuyuna nu ininona manggwa san pa'gwan Apudyus an sija kapu san palikatna.
9 Kapu tan inggwana gway ustu'ustu nan impa'gwan Apudyus an sija nangngachan sija nan manaku as ingkaingkana sasan chumngor an sija.
10 Kun inagwakan Apudyus as sija as angatuwanay pachi gway isun nan inapachin Melkisedek.
Nan Tudtuchu San Mangijakay San Pammati
11 Angsan nan whayugwo'ay iwhaka san mipangkop say ingwhaka' gwon mansikab as ipaagwat an cha'aju tan mawhajag nan mangagwatanju.
12 San sana chimpu maserpu cha'aju otjan nan mansuyu gwon maserpuju asin nan agwad mangisuyu an cha'aju san lanuy gway lugyukin nan misuyu ukud Apudyus gway sachi nan maserpuway achayonju jan. Nangngachan aju isun chanan anana' gway sissija sumusu gway wha'on kus ma'akogwer san amnutay ma'an.
13 Tan losanay sissija achayoncha nan lanuy gway mipangkop san atuttugwaan uyang nan akammucha san sussuyu mipangkop san whayu ja lagwing. Isucha chanan anana' gway sissija sumusu.
14 Gwon sasan naotongay taku amnutay ma'an nan anoncha gway impaingsacha nan somsomo'cha mangilasin san whayu ja lagwing.