Nan Whayuway Chamag Gway Illistan Lukas
Nan Mipangkop Sannaja Nibyu
Sa'ad nan nangisuyat sannaja nibyu as Lukas gway osa chu'tur gway namati an Hesus san nugwan. Angsan nan ingwhakana mipangkop san inggwa'inggwan Apu Hesus ja insuyusuyuna nu nan uchumay nangisuyat mipangkop an Hesus manipud san nipaakammugwan nan mijana'an Juan gway Manghohonjag ja as Hesus ingkana san nipangatuwana ad langit. As Lukas ahos nan nangisuyat san pachakus nannaja nibyu gway Chanan Inggwan Chanan Apostoles gway mipangkop san ummachugwan chanan namati san ikad nan nanagkulinan Hesus ad langit. Sa'ad nan nangisuyatana san chugwa nibyu as Teofilo gway anan nan uchumon osaay nangatu gway iRoma.
Sa'ad nannaja Whayuway Chamag gway insuyat Lukas, impaakammuna gway sa'ad as Hesus sija nan Mesias gway ingwhawhagkan Apudyus gway Manaku sasan Hudyu ja losanay taku gway mamati an sija. Insuyatna gway pinilin Apudyus as Hesus as mangipaakammu san Whayuway Chamag sasan whawha'sigwot. Sija nan angsan nan mawhasa sannaja mipangkop san nangachakugwan Hesus san atakutaku gway nan'inayasi nan maserpucha, amamod sasan masa'sa'it, chanan nilno' nan chimunju ja chanan ilaylajusan chanan uchumay taku.
Angsan nan uullit gway ahus nan annaja nibyu as annaana isun chanan antan chanan a'anghel ja nan nallagwaan chanan mampaspastur sasan kernero an Hesus san nijana'ana, nan nataynanan Hesus san Templo san awhanogna, nan wha'nang ja as Lazaro ja chanan agwat mipangkop san whayu taku iSamaria ja nan agwat gway mipangkop san nantaya' gway ana'.
Nan uchumay iwhakawhakan Lukas sannaja nibyu mipangkop san lugwayu, Ispilitun Apudyus, lagsa', nan whachang chanan hubhuwhai san terwhasun Hesus, nan malligwatan Apudyus sasan whersu ja nan mansakanaan chanan namati san managkulinan Apu Hesus.
Chanan Hu'yona
Nan Lugyukin Nan Suyat 1:1-4
Nan Nijana'an Cha Juan Gway Manghohonjag An Hesus 1:5–2:20
Nan Chimpun Nan Awhanog Hesus 2:21-52
Nan Nansuyuwan Juan Gway Manghohonjag 3:1-20
Nan Nahonjakan Hesus, Chanan Nerpugwana Ja Nan Manulisukan Satanas An Sija 3:21–4:13
Nan Nansuyusuyuwan Hesus Ad Galili 4:14–9:50
Nan Nansuyusuyuwan Hesus Manipud Ad Galili Ingkanad Jerusalem 9:51–19:27
Nan Mangudchiyay Chumingkun Hesus Ja Nan Natojana 19:28–23:56
Nan Natakuwan Hesus, Nan Nampaipailana Ja Nan Nipangatuwana Ad langit 24:1-53
1
1 Ipatpatog'uway Teofilo, angsan nan nangisisimo' nangilista san mipangkop sasan aullitan nan na'na'gwa gway inggwan Hesus an chita'u.
2 Nan illistacha manisu sasay ingwhakacha an cha'ami chachay nangila sannachaja san chamchamu ja nangipaakammu san Whayuway Chamag.
3 Ad sija nan, Machajaw gway Teofilo, sa'ad tan inamma' achayon losan nannachaja na'gwa san chamu, simsimmo''uway whayu ahos nu isuyat'u an si'a chanan naurnus gway aullitan nan na'na'gwa
4 tot maakammugwam nan atuttugwaanay mipangkop san Whayuway Chamag gway nipaakammu an cha'aju.
Mipaakammu Nan Mijana'an Juan Gway Manghohonjag
5 Sa'ad san chimpuway as Herod nan alid Judea iningkaw nan pachiyay mangngachan Zacarias gway mitapi san hungkuy chanan papachiyay ipangatan Abias. Ad nan asagwana osa sasan kana' Aaron gway sa'ad nan ngachanna Elisabet.
6 Manisuchaay nalintog san mangilan Apudyus gway pinaticha nan losanay whilin ja lintog Apudyus gway maid kun na'na'gwaniyancha.
7 Ad maid kun ana'cha tan nawhasig as Elisabet ja lumma'pus losan nan tagwoncha.
8 Osa ku erkaw nanterwhasu nan hungkuy Zacarias gway papachi san Templo kun niwhatug nan nanterwhasuwana as osaay pachi san Templo.
9 Sikuchay nan o'oon chanan papachi nan mangwhiwhinnunutcha gwot sa'ad as Zacarias nahunut as lumno' san ingkagwan Apudyus san chayo' nan Templo as mamuur san insenso.
10 Kun anna chanan chachama takuway mallugwayugwayu san pagway san annaay mapuppuuyan nan insenso.
11 Kun nampaila an sija nan anghel Apudyus gway summi'ad san machigwanan nan chachattunan gway pupuuyan san insenso.
12 Kun na'ogjay as Zacarias san nangilana say anghel gwot ummogjat.
13 Gwon anan chay anghel an sija, “Achi'a umogjat Zacarias, chingngorn Apudyus nan lugwayum. Sa'ad as asagwamay Elisabet umana' as laya'i ad Juan nan ingachannu an sija.
14 Ad mallaylajad'a ja humayu nan somsomo'nu as amod ad angsan ahos nan mallaylajad san mijana'ana
15 tan mangngachan napatog as sija san mangilan Apudyus. Ad maserpu achi kun uminum san whajas ancha ngachamman sinatay humutong. Ad nan Ispilitun Apudyus agwad an sija san mihuhugkiyana.
16 Ad angsan nan ijIsraelay manulinona an Apu gway Apudyuscha.
17 Ad umunas sija miwhaun nu san Apu gway agwad nan napigsaay ayobhongana gway isun Elias tot urnusona chanan manaama ja manulinona nan somsomo' chanan achi kun chumngor ta ammancha manomsomo' as isun nan nalintokay taku. Ad mansakanaona chanan taku san umaliyan Apu.”
18 Kun anan Zacarias say anghel, “Ngachan nan mangakammugwa'ay tuttuwa na tan mangorraka' ja madan ahos as asagwa'?”
19 Kun anan chay anghel, “Sa'on as Gabriel gway anna nan ayobhonga' gway nerpu an Apudyus. Ingwhauna' an Apudyus ta iwhaka' ja ipaakammu' an si'a nannaja Whayuway Chamag.
20 Chongyom na, achi'a kun ma'akinga ingkana san chimpuway ma'gwaan nannaja kapu tan achim pun tinuttuwa nan ingwhaka' gway ma'gwa nu miwhatug nan chimpuna.”
21 Anna kunay manuullay chanan taku san lumagwaan Zacarias mataagcha tan patho' ekas sija iingkaw san ingkagwan Apudyus san chayo' nan Templo.
22 Gwot lumagwa kus sija achi kun ma'akinga kun impapagwatnaay na'aapapat an chicha, sija nan inakammuchaay agwad nan inilana gway nerpu an Apudyus ad chayo'. Ad manipud san sachi sissija achi kun ma'akinga as sija.
23 Nappung kunan whatangna san Templo aysan ad ugwacha.
24 Chaan kun meerkagwanan nahukis asagwanaay Elisabet gwot nalluyu'u' ad ugwacha san lima huyan.
25 Kun anana, “Anunu ku chadlu tinuliliya' an Apudyus. Inaanna nan miwhawhaina' sasan taku.”
Mipaakammu Nan Mijana'an Hesu Kristu
26 Mi'anom huyan kusan hukin Elisabet ingwhaun Apudyus nan anghel gway as Gabriel ad Nazaret gway osa ilid Galili
27 san osa whawhallasay chaan pabog gway ni'awherjan san osa laya'iyay mangngachan Josep gway nerpu san kana' Dabid. Ad sa'ad nan ngachan nan whawhallasanna Maria.
28 Kun ummoy nan anghel an Maria kun anana, “Ininon nan whijagnu! Impailan Apudyus nan inawhayuna an si'a! Agwad as Apudyus an si'a.”
29 Gwon nakuyu nan somsomo' Maria san ingwhakan chay anghel kun anana san somsomo'na, “Ngachamma pijaon nina anan?”
30 Kun anan chay anghel an sija, “Achi'a umogjat Maria, piyan'a tan si'a nan pinilin Apudyus.
31 Chongyom na! Mahuki'a ad iyana'nu nan laya'i ad nginadnam as sija as Hesus.
32 Sa'ad as sija mangngachan napatog ja mangngachan as sija Ana' nan Angatuwan. Ad man'aliyon Apudyus as sija as isun Dabid gway nerpugwana.
33 Ad sija nan man'alin chanan kana' Jacob as ingkaingkana. Ad sa'ad nan mantuyajana maid kun mappungana.”
34 Kun anan Maria san anghel, “Ininonma ninaay ma'gwa ama' agwad nanghog an sa'on?”
35 Kun summungwhat nan anghel gway manggwana an sija, “Umali an si'a nan Ispilitun Apudyus ad sa'ad nan ayobhongan nan Angatuwanay Apudyus isun nan hunot gway mangichung an si'a. Sija nan sa'ad nan ijana'nuway maid kun whersuna maagwakan as sija as Ana' Apudyus.
36 Somsom'om as Elisabet gway chokam gwot inghukina nan ana' gway laya'i gway nan madan as sija. Kun mi'anom huyan nan hukina san sana gway nan ma'gwaniyon whasig as sija.
37 Tan maid kun achin Apudyus ma'gwa.”
38 Kun anan Maria, “Annajas sa'on gway mudchachun Apudyus. Ma'gwa an sa'on nan losanay ingwhakam.” Kun aysan nan anghel.
39 Neerkagwanan kun lummiggwat as Maria gwot ina''agwaynaay ummoy nangwhaat san osa ili san ilid Judea gway whibilig.
40 Hummu'nag kun nilumno' san hoyoy cha Zacarias gwot kiningaana as Elisabet.
41 Chingngorn kun Elisabet nan kingan Maria nangkichu chay ana' san husugna. Kun ummoy nan Ispilitun Apudyus an Elisabet.
42 Kun tinowhagna nan kingana an Maria gway manggwana, “Piyan'a san losanay huwhai ja piyan nan ana' gway ijana'nu.
43 Ngachamma inatataku'ay umaliya' lagwaon san inan nan Apu'?
44 Tan chingngor' kun ekay kingam nangkichu san lagsa'na nan ana' san husug'u.
45 Piyan'a tan namati'aay ma'gwa nan ingwhakan Apudyus an si'a.”
Mangajug As Maria San Chaychajaw An Apudyus
46 Kun anan Maria,
“Chaychajagwon nan somsomo''u as Apudyus.
47 Amod nan lagsa''u kapu an Apudyus gway Manaku an sa'on.
48 Tan simsimmo'nas sa'onay mudchachu gway nawhawha nan saadna.
Ad malluki san sana anan nan losanay lunap an sa'onon piyan nan whijag'u
49 kapu san amochay mataakan gway inggwan nan Apigsaanay Apudyus an sa'on.
Tuttuwa machaychajaw as Sija gway maid kun mijisugwana.
50 Ad nan achakuna ipailana an chichaay manchajaw an sija
ingkana san mansinu'nub gway lunapcha.
51 Inggwana nan amochay mataakan kapu san ayobhongana.
Sinibsibta'na chanan nangangatu nan somsomo'na.
52 Impawhawhana chanan papangat san tuyaycha
kun impangatuna nan saad chanan nawhawha.
53 Sa'ad chanan mawhiwhittil inatchana chicha sasan whayu ingkanas nangopcha,
kun sa'ad chanan whawha'nang pinerjawna chicha gway namu'yungawcha.
54 Whinadngana chanan takunaay ijIsrael
as manomsom'ana san achakuna an chicha,
55 isun nan ingwhawhagkana sasan nerpugwan ta'u
gway Abraham ja chanan kana'na as ingkaingkana.”
Nan Nijana'an Juan Gway Manghohonjag
56 Iningkaw as Maria an Elisabet as takangay matuyunghuyan asiyot lumajawa' ugwacha.
57 Niwhatug kunan umana'an Elisabet iyana'na nan laya'i.
58 Kun chingngorn chanan cherragna ja chochogkana gway impailan Apudyus nan amod gway achakuna an sija kun na'ayagsa'cha an sija.
59 Gwot mi'agwayu kus erkawna chay ana' ummoycha san manuglitancha an sija kun ngadnancha otjan chay ana' as Zacarias gway ngachan amana.
60 Gwon anan inana, “Wha'on! Juan nan mingachan an sija.”
61 Kun anancha an sija, “Maid kun osa sasan chochogkajus mangngachan amasnat.”
62 Gwot impapagwatcha san imacha an Zacarias nu ngachan nan whayugwona mingachan san ana'na.
63 Nan'ochaw kus sija as mallistaana, illistanaay “Juan nan ngachanna.” Kun nataagcha losan.
64 Sachi kun nakaninga as sija kun nanapapat gway nanchaychajaw an Apudyus.
65 Kun ummogjat losan chanan cherragcha ad san losanay whibilig gway ili san Judea sija ekay ana'anancha nan mipangkop sannaja na'gwa.
66 Ad nan losanay nangngor simmosimmo'cha gway manggwana, “Ngachan nin nan ma'gwaan nannaja ana'?” Tan agwad an sija as Apudyus.
67 Ad sa'ad as Zacarias gway amana ummoy nan Ispilitun Apudyus an sija kun ingwhakana ananon,
68 “Machajaw as Apudyus gway Apudyus chanan ijIsrael
kapu tan ummalina whinadngan ja gwinajagwajaan chanan takuna.
69 Kun nangipaalis sija as apigsaanay Manaku an chita'u
gway nerpu san kana' Dabid gway mansilsilwhiyona.
70 Impaiwhakan Apudyus sasan
mangikakadto'ay mansilwhi gway profetana san agwi
71 gway takuwona chita'u sasan ahursu ta'u
ja san pigsan chanan losanay mangisil an chita'u.
72 Ta ipailana nan achakuna gway ingwhawhagkana sasan nerpugwan ta'u
ja tungpayona nan tuyagna gway maid kun lagwing as pangkopna.
73 Sachi nan ingwhawhagkanaay intuyagna an Abraham gway nerpugwan ta'u
74 tot sa'ad san nanakuwana an chita'u san pigsan chanan ahursu ta'u,
ijujanaay maid ogjat ta'uway mansilwhi an sija.
75 Mansilwhi ta'u an sija gway maid kun ma'gwaniyan ja nalintog
san mangilana an chita'u sannaay matattakuwan ta'u.”
76 Kun intuyuy Zacarias gway manggwanaon,
“Ad sa'ad as si'aay ana''u anna,
maagwakan'as profetan nan Angatuwanay Apudyus
tan umununa'a nu nan Apu ta isakanam nan ajona,
77 ta ipaakammuna nan matakuwan chanan takuna
kapu san malligwatana sasan whersucha.
78 Kapu san lajad ja achakun Apudyus an chita'u
ipaalina gway merpud langit nan Mesias gway manaku an chita'u gway mijagwat san init gway chumungit.
79 Umalis sija tot padchaana chanan iingkaw san manghulingot gway umogjat san otoy
ja tot ichayanna chita'u san whayuway somsomo' gway maid kun machanakan.”
80 Kun sa'ad chay ana' chumma'or ja nasom'an ja pummigsa nan pammatina. Iniingkaw as sija san luta gway maid kun ingkaw as taku ingkana san chimpuway nampaila sasan ijIsrael.