42
Kamongona Kendemande Doko
1 Kamongome lao,
Nambana kendemande nambame baa porainyi pyambungi.
Nambame baa rombo palyapala baa kando raeko maingi.
Baa keta nambana imambu dokome maralyiyu.
Dokopa baame wambu rara peparae yulu rolae dokona polo lamaira.
2 Baame pii porakai ketae palyuo laa nara.
Dee yuu taone dupwana kata dupwana pii rekyae lao lao kara nara.
3 Baame angi kwaeyamo doko kokwa see nara.
Dee lambe kuki rao seramo doko kunjinyi nemba nara.
Baame pii lao rolenge kulisa ingyuo sulu singi doko wambu keta palyara.
4 Baame keyange mende piraŋa lao soo manji nyepala karara.
Baame isa yuunya lao rolo lenge renge doko minyalyara.
Yuu nanesa range dupwame banya mana pii doko langinya lao mata kui lapala isaro karaminyi.
5 Anatu baame yake doko pyuo wasapala minyuo panguya.
Baame isa yuu dake pyuo wasapala dokona lenge renge bange soo pelyamo dupwa pyuo wasiya.
Baame wambu dupwa poporambaiye pyambuo lete renge maiyuo piya.
Dokona lao dakepa Kamongo Anatu dokome banya kendemande akali doko lamaiyuo lao,
6 Namba Kamongo dokome emba kee lapala
isa yuu dakena lao rolare ingyaraŋa lao porai renge jiyu.
Emba keta nambame wambu peparae pipya kana minyuo lalu lao lenge pii laro.
Emba ketako nambame wambu rara peparae dupwa keta yanga paupau lanyi pyambwaro.
7 Embame lenge koo dupwa lenge ranyi reto
dee karapusi ingyuo iminjinginya petaminyi dupwa kiiramo nyuo piri ingyara.
8 Namba iki doko embena Kamongo Anatu.
Bange anatu lenge dupwa namba kingi lenge dokona role pyao laa narami.
Nambame kingimi wasisi dupwa nambana lakandenge panda dokona lakandena lao panda serakami naro.
9 Renge lapo dopa pyuo paralyamo lao wambo pipa nayamopa langiyunu dupwa dakepa kinyi angingyuo pipyamo kandelyaminyi.
Enenge piramo dupwa
kamame wambo pipa naramopa dakepa nambame langiruwale.
Kenane Lakando Pingi Doko
10 Kamongo kando kenane enenge pyalapape.
Yuu muu peparaena wambu dupwame baa lakando kenane pyalapape.
Nakama lapo ipwa kotana piso papiyaminyi dupwame baa lakandalapape.
Ipwa kota dupwana lete bange silyaminyi dupwame baa lakandalapape.
Yuu nanesape dee dupwana wambu palaminyi dupwa peparaepeme kenane pyalapape.
11 Yuu muiyanepe taone dokona singipi dupwame Anatu lakandena.
Wambu yuu Keta rangeme baa lakandena.
Dee yuu taone Sela range wambupi dupwame
yuu kyau ketae dorena karo rae wakasa maiyuo pii porakai lao baa lakandena.
12 Yuu nanesa range wambu
nakamame Anatu baa kamame ulupili dokona lakando palyuo pena.
13 Kamongo ami yanda singi porai paka nao kyawame suu lao yanda pela panya karengenyili piru karamo.
Baa yanda pinya mata kui lapala rapa rapa piru karamo.
Baame yanda lakana lao pyuo karamo.
Banya porai renge doko dopakaleŋe lao yanda pimwai dupwa pyao lasaka pira.
Anatumi Banya Wambu Dupwa Nyisaro Lao Lalu Lao Leya
14 Anatumi lao,
Yuu gii andarele namba romo napyuo kareyo.
Nambana wambu dupwa kando yano pyao pii mende lamai nayo.
Dopa piyunupape epapu yuu gii angi mende piru doko epelyamo.
Doko nambame enda wane mata pilyamo ee lenge dopale ingyuo ee lao karo.
15 Nambame yuu kyau kuki epengepe dupwa pyao kokwa sinyi nembo karo dokopa
isako isape dupwa yanda nanyi pyambwaro.
Dopa pyuo yuu lama lamana ipwa epenge dupwa muiyane penda penda ingyuo nembo
dee ipwa pete dupwa sokwanyi nembo piru.
16 Nambana wambu lenge koo dupwa kata laminyaronopa
nakama kata wamba kando paa nange kyakasa dupwana pao kararami.
Dopa pyuo nakama iminjinginya petaminyi doko yanganyi reto
nakamana lenge kambu dorena yuu pulyuo lupyuo pingi dupwa pyao rambikwanyi reto piru.
Doo leto dapwa nambana lalu lao lenge pii letoŋo.
Nambame yaki nyerono kando lao minyaro kararo.
17 Wambu lapo mee bange anatu dupwa mona maiyuo
dee isa kanapeme anatu yale ingyuo wasapala nakamana anatuŋu letaminyi dupwape
peparae isale ingyuo karo elya renge nyerami.
Isaraele Wambu Dupwa Mana Nyii Nao Isa Peyami
18 Kamongo dokome lao,
Kalepoe wambu dupwa selapa.
Nakama lenge koo dupwa repeta suu lao kandalapa.
19 Nambana kendemande lenge koo ingyapyamopape kamame lenge koo mende karase?
Dee nambana wai pii minyakao pena leyono akali doko kalepoe ingyapyamopape mendali kalepoe mende karase?
20 Isaraele nakama angi malu mee pipyamo kandami.
Kandaminyipape dokona aki renge mende mana nyilyamisi?
Nakama kale kata sepala pii silyaminyi.
Siminyipape aki renge angi doko soo nyimisi?
21 Kamongo Anatu baame wambu kyawa lete nyelana suu pyao mona nyilyamo.
Dokona lao banya mana piipi mawa piipi dupwa ketae nembo
banya wambu dupwame rape rape lamili lao suu piya.
22 Dopa lao suu piyamopape wambu rara wakale dupwame Isaraele wambunya yuupi bangepe pyao kokwa soo waa nyiyami.
Waa nyepala nakamame Isaraele wambu dupwa karapusi palena lao kii palyuo yalu piyami.
Dopa piyaminyipa mendeme nakama kyawa lete nyela eparami ingya naya.
23 Nakama mendeme pii dake sakamiramisi?
Dakepa piso pao rengya nakama mondo lao seramisi?
24 Isaraele wambu dupwa apimi yanda pimwai dupwa keta maiyase?
Doko Kamongo kando yanda pimwaiyuo koo piyamano dokome maiya.
Namwa baame piso palyuo pimili laope panda banya mana pii simili lao suu pyapyamo kata doko yaki nyuo kaeyamanosa
Kamongome namwa yaki nyiya.
25 Dokona lao baame namwa banya imbu singi porai doko nakanjo soo kandalapase lao piya.
Dee yanda porai wakasa dokona randa nyelapase lao piyako.
Banya imbu singi doko Isaraele peparae keta isare ingyuo raeyo reya.
Dopa piyamopape doo piyamo doko soo nyii nayama.
Namwa doko mende pyamo lao soo nyii nayamako.