18
Ilainjamoo Dee Mee Bange Anatu Kingi Bealo Lenge Dupwana Poropeta Akali Dupwa Pipya Kareyami
1 Yuu gii lapo epo papeyamopa ee kana rema apu epa nayamo gii dusipa ro, leya.
2 Dopa leyasa Ilainja kata nyuo peya.
Dokopa yuu Samaria lopo siyamo doko soo andakiya.
3 Dokopa kiŋi Ayapeme akali mende kiŋinya anda dokona mupwa ingyuo karenge Opetaya lenge doko kee lao nyiya. (Opetaya baa suu pingi keyange suu pyao ateŋa lao Anatu lakando karenge.
4 Dokopa enda Jesapele dokome Anatunya poropeta akali dupwa pyao kumakayamopa akali Opetaya dokome akali andete (100) nyiya. Nyepala kananda lapona gurupu lama wasapala pingyu akalisa kingi paki (50) ingyapala palena lapala ipwa nengepe maipapu piya.)
5 Dopa piyamo dokopa kiŋi Ayapeme Opetaya lamaiyuo, Mena dongepe osepe dupwana rambi lapo kapa nao kararami lao ipwa guu lao epengepe ipwa ponape peparae dupwana mende silyape lao koto kando bwua, leya. Lapala lao, Mende ramo nambwana mena dupwana lapo pyao naa naramba, leya.
6 Nakamba mendali mendalipi yuu anjarename paramba lao lao mendakinya palyapala kata nyuo wakale wakale peyambi.
7 Dokopa Opetaya enye katasa peyamopa aopa Ilainja epeyamo kando nyiya. Nyepala baame Ilainjaŋa lao lenge kambu kandapala baa epeyamo dokona pangu isa siya. Sepala baame piso soo lao, Doko angi embase? leya.
8 Dokopa baame isingi lao, Waa, namba Ilainjaŋa. Namba dae epanyeŋe lao embena kamongo doko lamaila puu, leya.
9 Dokopa Opetayame isingi lao, Nambame aki yulu koo pipusa embame randa dokona pyambwalana suu pyao kiŋi Ayapeme pyao kumakana lao letese? leya.
10 Embena Anatu lete karenge Kamongo dokona kingi lalu lao lao yuu muu dupwa peparaena awali lao kiŋi dokome emba koto papipya. Yuu gii mendepape isingi akali dokome emba yuu dokona kara naeŋe lao lamaiyamopa Ayapeme baa doko angiŋi lao lalu lao lena leto, leya.
11 Dokopa dee epapu embame namba emba dae epo karene lao baa lamaila pupili lao suu pilisi? leya.
12 Nambame emba yaki nyuo parono yuu gii dokopa Kamongona Imambu dokome yuu kanda nange mendena emba nyuo lanyuo para ramo doko apa pirase? Dokopa emba dae karenge lao Ayape lamairu dokopa baa epo emba kotaramopa kara narene kandapala namba pyao kumakara. Namba wamba wane dokopa piso suu pingi keyange palyuo yuu peparae Kamongo lakando ateŋa lao karenge kandale doko emba suu pyaa, leya.
13 Lapala dee lao, Enda Jesapele dokome Kamongona poropeta akali dupwa pyao kumakaya dokopa nambame akali andete mendaki (100) nyepala kananda lapona gurupu lama wasapala pingyu akalisa kingi paki (50) ingyapala yalu pyuo palena lapala nenge ipwape maipapu piyu doko emba see naese? leya.
14 Dokona baame namba pyao kumakasaraŋa embame namba apa pyuo emba dae epo karene lao lamaila puu lao letese? leya.
15 Dokopa Ilainjame isingi lao, Kamongo Porai Wakasa namba yulu pyakamingi dokona kingi lao lalu lao leto. Namba range kiŋi baa petamo dokona paro, leya.
16 Leyamosa Opetayame kiŋi Ayape peteyamo dokona papala lamaiyamopa kiŋi Ayapeme kata nyuo Ilainja kandala epeya.
17 Dokopa Ayapeme Ilainja kandapala dopa leya, Isaraele dokona randa andake palyuo karene doko emba epelene dokose, leya.
18 Dokopa Ilainjame isingi lao, Nambame randa epena lao pii nange, leya. Embapa embena rakanepa yuu Isaraele dokona randa palyuo karambinyi. Emba mee bange anatu lao kingimi wasingi Bealo doko lakandapala Kamongona mawa pii dupwana kamba lao karene, leya.
19 Lapala, Yuu kyau Kamele dokona Isaraele wambu dupwa peparae kee lao sukusa sukusa pipala namba kandala epena lape. Epo dokopa mee bange anatu kingimi wasisi kingi Bealo lenge dokona poropeta akali andete kisima dee akalisa kingi paki (450) dusipape dee mee bange enda anatu Asera lenge dokona poropeta akali andete kisima (400) kuini Jesapeleme paka pyao sipyamo karaminyi dupwa lanyuo epena leya.
20 Leyamosa kiŋi Ayapeme Isaraele wambu peparaepe dee mee bange anatu kingi Bealo lenge dokona poropeta akali dupwa peparaepe yuu kyau Kamele lenge dokona kee lao nyuo sukusa sukusa piya.
21 Dokopa Ilainjame wambu dupwa peteyaminyi dokona papala dopa leya. Nakama suu pingi lama manjo karo anjokorape mendaki palyaramisi? Kamongo doko Anatu ramo baa lakandalapape. Dee Bealo doko Anatu ramo baa lakandalapape, leya. Dopa leyamopape wambu dupwame pii kuki mende laa nayami.
22 Dokopa Ilainjame lao, Nakama mee bange anatu lao lakandenge kingi Bealo lenge poropeta akali malu (450) karaminyi. Dopa pipyamopape Kamongona poropeta dokona namba iki pyarepala pupyamo karo, leya.
23 Lapala mena bulamakao kali lama nyelapape. Nyepala mende mee bange anatu lenge kingi Bealo dokona poropeta akali dupwana mende nyuo pyao kunjo kuki kuki pipala isa dokona ketae retapala isare kaiyuo palya nana. Namba mena bulamakao kali mende dokome dopako piru, leya.
24 Dokopa mee bange kingi Bealo anatu lao lakandenge poropeta dupwame nakamana anatu doko kando ateŋa larami. Laraminyi dokopa namba Kamongo kando ateŋa laro. Dokopa mendeme isingi yano pyakalyoŋo lao isare jera doko baa Anatuŋu, leya.
Dokopa wambu peparaeme isingi lao, Doko kapaŋa, leyami.
25 Lapala dee Ilainjame mee bange Bealo lakandenge poropeta dupwa kando lao, Nakama malu dokona mena kali doko nyepala wambo rapa rapa pipwape. Pipala isa dokona isare kaiyuo palya napala nakamana mee bange anatu kando ateŋa lalapape, leya.
26 Leyamo dokopa nakamana mena minyakamyuo epeyaminyi doko nyepala wambo rapa rapa piyami. Pipala mee bange anatu kingi Bealo lenge doko kando ateŋa lao kareyaminyi pao yuu kwuaya. Dopa piyasa nakama pii ketae lao, Bealo namwa kando isingi yano pyakape, lao kana pyare leyaminyi dokona awali lao mee wamya lyuo lao kareyami. Kareyaminyipape mee bange anatu kingi Bealo dokona piso isingi mende laa naya.
27 Dokopa yuu gii korokama dokopa Ilainjame mee bange anatu kingi Bealo dokona poropeta dupwa kando minyako pyuo mora pii lao lao anatu Bealo dokona ateŋa poraiyuo pyalapape. Mende ramo baa korakama kombeya pilyamo panda mee kamanda pase panda baa kata londe mendasa pupyase. Panda baa luu palase dokona nakamame baa pyaleto minyalyuo nyeraminyi, leya.
28 Leyamo dokopa poropeta dupwame ateŋa pii ketae lao wamba mena pyao kiso maiyuo yulu palenge doko suu pyao wua kema dupwame nakama range poko pyao kareyaminyi pao ranjama epeya.
29 Epeyamo dokopa nakama pii kara pao ketae lao dee pii koo kae lao lao kareyaminyi pao alemanji ingiya. Ingiyamopape ateŋa isingi yano pyaope mende pii naya dee pii kuki mendepe leyamo siyaminde daako.
30 Dokopa Ilainjame wambu dupwa kando lao, Namba karo dakena repeta epena, leya. Leyamosa wambu peparae baa kareya dokona pao malu palyiyami. Dokopa baame Kamongona kana pyare lasi wambarae kwaeyamo doko kamba rolo pyare lao wasiya.
31 Wasapala dokopa Kamongo dokome kingi Isaraele akali Jekope lao maiyamo dokona para piyamo rara akalisa ipisu lama (12) dusipana mendaki mendaki lao baame kana akalisa ipisu lamako (12) nyiya.
32 Nyepala kana dusipame Kamongo mena pyao kiso maiyuo lakandenge kana pyare lasi doko kamba pyare lao piya. Pipala suu nyuo awali leya. Doo suu nyiyamo dokona ipwa bakete lama make lita akalisa ipisu kisima ingyuo kulimbwaramo doko kapa isa pao seraŋa lao piya.
33 Dopa pipala enakana kana pyare lasi dokona isa ketae reteya. Retapala mena doko pyao kunjo kuki kuki pipala isa dokona ketae lambuo lae pyuo reteya. Retapala baame lao, Ipwa pee kuki kisima kamuo simbwapala kulimbuo mena dokona piso dee isa dokona piso pinya, leya. Leyamuli pyuo piyami.
34 Dokopa baame lao, Kambako pinya, leya. Leyamosa kambako piyami. Dokopa yuu mendaki kamba konda pyuo pinya, leya. Dokopa nakamame dopale piyami.
35 Dokopa ipwa doko kana pyare lasi dokona makando lupyapala suu nyisi dokona soo simbwaya.
36 Dokopa mena pyao kiso maingi yuu gii alemanji dokopa kana pyare lasi dokona poropeta Ilainja repeta papala ateŋa lao, O Kamongo, Jekope, Aisake, Aporakamemoo dusipana Anatu, namba embena kendemande yulu pyakange dokome embena mawa pii lapinyili pyuo dapwa pyakapu dokonape epapu emba Isaraele wambunya Anatuŋu laope pakanya palyuo lasaka pepe.
37 Isingi yano pyakape. Kamongo, isingi yano pyakape. Dokona lao wambu dapwame emba Kamongo Anatu nakama emba rangena ingyuo kamba kapu kyuo nyiinyi dokoŋo lao soo nyinyale, leya.
38 Leyamo dokopa Kamongo dokome isare isa peyamosa mena pyao kiso maiyamo dokope rao isa dupwape rao kana dupwape rao pipala mee yuu nyisa wangu dupwana rapala ipwa suu nyuo awali lasinya siyamo dupwa sokwapala olo rali piya.
39 Doko wambu dupwame kandapala nakama yuu dokona pangu sepala lao, Kamongo doko Anatu. Kamongo baa iki doko Anatu, leyami.
40 Dokopa Ilainjame mee bange kingi Bealo lakandenge poropeta dupwana mendalipi nyisa paa nana lao nakamame minyarapala pyao nyinya leya. Dokopa wambu dupwame pyao nyiyaminyi dokopa Ilainjame yuu ipwa Kisone dokona minyuo papala peparae pyao kumakaya.
Panyi Pyuo Otapala Apu Epeya
41 Dokopa enakana Ilainjame kiŋi Ayape lamaiyuo lao, Namba apunda repeta oo lao ipyamo silyuŋu. Epapu emba nenge nala puu, leya.
42 Dopa leyamo dokopa Ayape baa nenge nala peyamopa Ilainja baa yuu kyau Kamele lenge dokona ketae pulyuo peya. Papala wapambu karapala banya ayemba ponga nao mona kando peteya.
43 Pisipala banya kendemande akali mende lamaiyuo lao, Papala ipwa kota dorena kandena, leya.
Leyamosa kendemande akali dokome pao kandapala dee kapu kyuo epo lao, Namba bange mende kanda nalyo, leya. Dokopa Ilainjame yuu yanda ipingi nyepo kandala penako leya.
44 Yuu yanda ipingi dokona kendemande akali doko pao kapu kyuo epapala lao, Ipwa kota dokona piso kopa kuki lama sipyamo kandapu doko andake daa mee akalinya kingi dopale ingyuo sipyamo kandalono, leya.
Dokopa Ilainjame kendemande akali doko lamaiyuo lao, Kiŋi Ayape baa apu dokome kata rokwasaraŋa banya mena oseme ipyuo papingi uliuli doko nyepala apu epa nalyamo dakepa wambo anda piso pena lena, leya.
45 Leyamo dokopa yuu gii kuki lamana aopa kopa dupwa pupuro kondo kondo lapala yake yambe pyao dee poo raiya minyapala apu reeko kanda soo epeya. Dokopa kiŋi Ayape banya mena oseme ipyuo papingi uliuli doko nyepala yuu Jeserele dokona kapu kyuo anda range peya.
46 Dokopa Anatunya porainya renge dokome Ilainja keta epeyamopa kandokondali pyuo banya komau awali lao gii lao wapupala kiŋi Ayape peyamo dokona baa wambo makando kata pao yuu Jeserele kame kambu dokona peya.