20
Satane Baa Ee Kana Malu (1,000) Karapusi Palyara Ingiya
1 Enakana nambame aŋala mende yake dokona piso epeyamo kandeyono dokopa baa yuwale kata soo puu penge dokona kii dokope dee puu sane londe mendepe kingi rakana palyaro kareya.
2 Baame kau wambarae Satane doko kupyuo nyepala ee kana 1,000 puu mainyi palyiya.
3 Aŋala dokome baa yuwale kata soo puu penge dokona Satane pyao pyano kii palyapala ee kana 1,000 dusipana isa wambu dupwa dee kunji pyao kara nana lapala bange pyakerasindeme upi lanyi palyiya. Enakana dee yuu gii kuki lama neta epapala papyuo karara ingiya.
4 Enakana Anatumi rombo palyiyamuli pyuo wambu keta kote larami dupwa nakamana kote pii lao petenge isa dupwana peteyaminyi kandeyo. Dee wambu malu Yesunya yulu minyuo Anatunya pii boo pyao leyamisa ayemba puku piyami dupwana imambu kandeyo. Dee nakama role pyao kareyami dupwa mena koo dokona dee baa dopale isa bange wasiyami dokona kingi laa nao menana make nakamana enamba kingipi dupwana pyasi pali nayamopa kareyami. Nakama Koraisapa role pyao isa yuu ee kana 1,000 ingyuo iso kararami ingiya.
5 Dupwa isa wambu kanda soo lopo eparami ingiyamo kandeyo. Menge kumuyami dupwa lenge raa nao pao ee kana 1,000 epo para ingiya.
6 Kanda soo lopo eparami dusipa raeme kumuo parami. Kumungi renge mende doko nakama keta pali nara. Nakama Anatu Koraisapana purisi akali ingyapala nakamba role pyao ee kana 1,000 isa yuunya wambu iso kararami.
Satane Nyuo Anameya Doko
7 Ee kana 1,000 epo paparamo dokopa Satane kata lumbuo yaki nyeramo neta epara.
8 Epapala Satane baame yuu Goko Mekokopa dolapona wambu Anatunya kingi epe nasingi yuu muu peparaena pisirami dupwape kando nupi sepala nakama nyuo kiminjapala yanda pinya lao mapinyi retara ingiya. Dokopa dokona akali kareyami dupwa ipwa pota kee kana mendeme yaka lao kanda nara dopale ingyuo kareyami kandeyo.
9 Dokopa nakama raeyapala Anatunya wambu palyuo karenge pandape dee anda taone Anatu mona retenge dolapope nyuo sukusa palyaro kararaminyipa yake dokona piso isare rao epo nakama rao otara ingiya.
10 Dokopa Satane wambu dupwa pipa panga soo kareyamo doko Anatumi nyuo isare rao lulya kaso karenge andake dokona pyao nembara ingiya. Baape mena koo dee poropeta kyambo lenge dokope isare dokona rao karalu kararami ingiya.
Kote Ama Andake Lao Oto Lara Doko
11 Enakana kiŋinya petenge isa reeko kakepamendena mendali peteyamo kandeyo. Banya lenge kambu dokona yake yuupa dolapo mee ingyuo rali piyambinyipa dee kanda narami ingiya.
12 Dokopa wambu kumasi koo epengepe peparae kiŋinya petenge isa siyamo dokona roya kareyaminyi kandeyo. Dokopa buku lapo kumuyami dupwa aki mende pyuo kareyami lao buku dupwana pyasi paleyamopa kando kote larami buku dusipa lumbuyami. Dee mende letena palenge buku doko lumbuyaminyi kandeyo. Dokopa kareyaminyi dupwa buku leyamuli pyuo kote lao roleyami.
13 Enakana ipwa kotana kumuo peyami dupwa neta epeyami. Dee yuunya kumasi dupwape imambu kumuo penge panda dokona peyami dupwape neta epeyamiyoko. Epapala aki yulu mende piyami lao dupwana minyuo kote lao roleyami.
14 Dokopa kumungi renge dokope dee Satane panda karenge dupwape isare andake dokona pyambuyami. (Isare andake rao singi dokona parami dupwa dee kamba kumarami.)
15 Wambu letena renge palenge buku dokona kingi pali nayamo dupwa isarena pyao nembeyami.