106
Isaleli vayaꞌmogi hosu kavaꞌmo huꞌnaya kavafeꞌmo apava gemae
1 Ala kava neꞌmo agiꞌaleꞌmo alitapa asaga hiyo. Alagepa vekamo maiꞌniyaꞌmofeꞌmo hao ke heyo. Muki afinaꞌmo hau huno apatege apatege huno neꞌmaiye.
2 Ina lagimo huꞌniya kavafeꞌmo ava gemo hugae. Alagepa kavaꞌmo lusi kanale kavaꞌmo huꞌniyaꞌmofeꞌmo ina lagimo ani kavaꞌmo huꞌa agiꞌaleꞌmo aliꞌa asaga hugae.
3 Geꞌamo afiteꞌa akame huꞌa muki afinaꞌmo alagepa kavaꞌmo nehaya vayaꞌmogimo Goti aulagaleꞌmo alagepa huꞌa maiꞌnayanageꞌa afaꞌa apamogaga aigae.
4 Ala kava nene, huꞌna, Vayakamo hapa maesana afinaꞌmo nagaeꞌefeꞌmo kagesamo afiyo. Apakufamo alika katika apatesana afinaꞌmo nagaeꞌeꞌmo nagufamo alika katika nato.
5 Naha maegeꞌnao vayakamo alagepa huꞌa maisageꞌna apaketeꞌnaeꞌmo apakaegiꞌeꞌmo magokepi namogaga aiteꞌna vayakaꞌeꞌmo Goti vayaꞌamo maiꞌnone, huꞌna huteꞌna magokepi lamogaga aigune.
6 Laginago vayaꞌmogimo hosu kavakeꞌmo huꞌa maiꞌnaya kava huta hosu kavakeꞌmo huta maiꞌnone.
7 Laginago vayaꞌmogi Isipi kotegamo maiꞌnagenoꞌaeꞌmo Gotiꞌa lokiya aune kavaꞌmo huꞌniyana ageꞌa aeto osuꞌnae. Hau huno apateꞌniya kavafeꞌmo alagepa huꞌa apakesamo oꞌafiꞌnafa ago apake kaniꞌniye. Apakaemo solovala aniteꞌmo uꞌa avaꞌyi huteꞌaeꞌmo anaga hogote vekalegamo hosu kavaꞌmo huteꞌa geꞌamo ago amagiꞌa ataleꞌnae.
8 Amagiꞌa ataleꞌnayaꞌmonanafa lapa maegauve, huno huꞌniya gemo akame huno himamuꞌamo alino apave lisiyafeꞌmo apakufamo alino katino apateꞌniye.
9 Agaemo solovala anifeꞌmo, aika kaka vao, huno huꞌnigeno aino akaka vaeꞌnigeno aniꞌmo folagapiꞌmo hau huꞌniya mopaleꞌmo apavalelino uꞌniye.
10 Agaemo kame vayaꞌai apayapatiꞌmo apakufamo ago alino katino apatetenoꞌaeꞌmo ani kava huno kame vayaꞌapilegatiꞌmo apavalelino eꞌnigeꞌa eꞌa afaꞌa maiꞌnae.
11 Aniꞌmoꞌa kame vayaꞌapimo ago aeno apati kaeꞌnigeꞌa muki vayaꞌamo ago faliꞌnae.
12 Ani kava huꞌnigeꞌapaeꞌmo geꞌaeꞌmo apakesamo afiꞌa fatago huꞌnae.
13 Huꞌnayaꞌmonanafa huꞌniya kavafeꞌmo ago apake kaniꞌnigeꞌapaeꞌmo agaefeꞌmo na kava hisune, huꞌa afi okeꞌneꞌa afa kavaꞌmo huꞌnae.
14 Kaꞌme kotega maiꞌneꞌaeꞌmo hosu hapaꞌye huꞌnigeꞌa Gotiꞌmo amalageka huꞌa ateꞌnae.
15 Agaefeꞌmo lamiyo, huꞌa ge huꞌnaya gemo afiꞌniyaꞌmonanafa kaitaꞌmo apamiꞌnigeꞌa ago faliꞌnae.
16-17 Kaꞌme kotega maiꞌneꞌaeꞌmo Moseseꞌe Ala kava neꞌmo aliꞌyaꞌamo neꞌaliya vekamo Eloniꞌefeꞌmo, aetana laga oseꞌnaꞌaꞌmofeꞌmo yagaitana olateꞌao, huꞌa huꞌnageno mopamo aino akaka vaeꞌnigeꞌa Neteniꞌe afamo anagaꞌaꞌenagi Amilamiꞌe afamo anagaꞌaꞌenagi huꞌa asagauꞌa aiꞌnageno aino akaniteno aeno apati kaeꞌniye.
18 Kokuꞌnapatiꞌmo atamo emineno hosu kavaꞌmo huteꞌa anakame huꞌnaya vayaꞌeꞌmo alagi leno apasaga liꞌniye.
19 Alu afinaꞌmo apakaemo goli yafatetiꞌmo pulumakamo auneꞌamo alo huteꞌa mono huꞌnae.
20 Apakaemo ani kava huꞌa ha le konali Gotiꞌmo ataleꞌa agae aimuꞌyaleꞌmo kahaumo neꞌneya pulumakamo auneꞌalefeꞌmo mono huꞌnae.
21 Gotiꞌa lokiya aune kavaꞌmo Isipi kotegamo huteno apakufamo alino katino apateꞌniya kavafeꞌmo ago apake kaniꞌniye.
22 Agaemo Isipi kotegamo aune kavaꞌmo huteno solovala aniteꞌeꞌmo lokiya kavaꞌmo huꞌnigeꞌapaeꞌmo hapau aiꞌnae.
23 Henagaꞌamo Gotiꞌa aipamo leno apatetenoꞌaeꞌmo vayaꞌnimo aliꞌna apagoꞌya lagauꞌna apatalegauve, huno nehigenoꞌaeꞌmo aliꞌyaꞌamo alisiyafeꞌmo Gotiꞌa lekana paino ateꞌniya vekamo Moseseꞌa nunumu huno apatetenoꞌaeꞌmo apamagisiya kaꞌmo ago akani maleꞌnigeno Gotiꞌa afaꞌa apateꞌniye.
24 Apateteno alagepa mopamo lapamiguve, huno huꞌniyana apakesamo afiꞌa fatago osuꞌnayaꞌmofeꞌmo ina agufa mopamo haneꞌniye, huꞌa huteꞌa alagepa mopaeꞌmo ohapauꞌniye.
25 Apakaemo seli noꞌapifiꞌmo maiꞌneꞌaeꞌmo Goti geꞌamo akame osuꞌa ge nege nege huꞌageꞌmo maiꞌnae.
26-27 Ani kava huꞌa maiꞌnagenoꞌaeꞌmo ani vayaꞌaifeꞌmo kaꞌme kotegamo lapamagiteꞌna henagaꞌamo lapakinago vayaꞌmo alagepa mopaꞌapiletiꞌmo aliꞌna hapa faitalesugeꞌa alu vayaꞌai kotegamo uꞌa falige falige huꞌa maigae, huno hapa paiꞌniye.
28 Henagaꞌamo Piyo kotega aigofe gotiꞌapimo agiꞌamo Malifeꞌmo mono huteꞌa aunemeꞌamo ohaneꞌniya aigofe gotiꞌa ofalinimo amiteꞌa amiꞌnaya ofalini yaꞌmo aliꞌa neꞌnae.
29 Ani kava huꞌnagenoꞌaeꞌmo Ala kava neꞌmoꞌa aipamo leno apateteno alopa kaitaꞌmo apamiꞌniye.
30 Apamiꞌnigeno Finiyasiꞌa he tino hosu kavaꞌmo huꞌnaya vayaꞌmo apamagiꞌnigeꞌa faliꞌnageno Gotiꞌa magoꞌe huno kaitaꞌmo alino oꞌapamino ataleꞌniye.
31 Finiyasiꞌa ani alagepa kavaꞌmo huꞌnigenoꞌaeꞌmo Gotiꞌa naulagaleꞌmo fatago kavaꞌmo huꞌniye, huno hu maleꞌniyanageno fatago kavaꞌamo muki afinaꞌmo hanege hanege huno hanegaiye.
32-33 Apakaemo Melima kotegamo yafapatiꞌmo aniꞌmo emineꞌniya kotegamo hosu kavaꞌmo huꞌnagenoꞌaeꞌmo Gotiꞌa aipamo leno apateꞌniye. Hosu kavaꞌmo huꞌnagenoꞌaeꞌmo Moseseꞌa hosu aipamo kaliꞌnigeno agesamo oꞌafiꞌneno malage huno hosu gemo huꞌnigeno Gotiꞌa kana yaꞌmo alino amiꞌniye.
34 Henagaꞌamo Gotiꞌa, alu nofi vayaꞌmo muki vayaꞌamo apamagigeꞌa faliyo, huno huꞌniya gemo oꞌafiꞌnae.
35 Oꞌafiꞌa alu nofi vayaꞌai aꞌmafaꞌneꞌapimo alige aꞌmafaꞌneꞌapimo apamige huꞌa maiꞌneꞌapaeꞌmo hosu kavaꞌapimo akame huꞌa maiꞌnae.
36 Aigofe gotiꞌapimogifeꞌmo mono huꞌnayaꞌmofeꞌmo Gotiꞌa apamagiꞌniye.
37-38 Apakaemo mafaꞌneꞌapiꞌe aꞌmafaꞌneꞌapiꞌeꞌmo apamagiꞌa hosu apaune vayaꞌmo ofalinimo apamiꞌnae. Apakaemo mago kavaꞌmo osuꞌnaya nute mafaꞌneꞌapimo apamagiteꞌa Kenani vayaꞌai aigofe gotiꞌapimogimo aliꞌa apamiꞌnae. Apamagiꞌnaya mafaꞌneꞌapimogi kolaꞌmoꞌa mopamo alagi alino hosu huno ateꞌniye.
39 Apakaemo Gotiꞌa apakameꞌya amiteꞌa hosu kavaꞌmo huteꞌa apakaiꞌapimo aliꞌa hosu huꞌa apateꞌnae.
40 Ani kava huꞌnagenoꞌaeꞌmo Ala kava neꞌmoꞌa agaiꞌa vayaꞌaifeꞌmo aipamo leno apateteno ohauꞌniye.
41 Hapa oꞌmaeno afaꞌa apakeno apataleꞌnigeꞌapaeꞌmo alu nofi vayaꞌmo kame vayaꞌapimogimo eꞌa yagaiꞌa apateꞌnae.
42 Kame vayaꞌapimogi yagaiꞌa apateꞌnageꞌa apaiyafiꞌmo maiꞌneꞌa geꞌapimo akame huꞌnae.
43 Agaemo asole afinaꞌmo apakufamo alino katino apateme apateme eꞌniyaꞌmonanafa apakameꞌya amiteꞌa hosu kavaꞌmo huteꞌapaeꞌmo hanageke yaꞌmo aliꞌnae.
44 Ani kava huꞌa maiꞌnayaꞌmonanafa agaefeꞌmo keya aeꞌa ge huꞌnageno hau huno apateꞌniye.
45 Kotalake gemo huguve, huno hu maleꞌniya geꞌaeꞌmo agesamo afiꞌniye. Apakaefeꞌmo hau huno apateteno halate agesamo afiꞌniye.
46 Agaemo kalavusi aliꞌyateꞌmo apavaleli uꞌa apateꞌnaya vayaꞌaifeꞌmo hapa paiꞌnigeꞌa hapau huꞌa apateꞌnae.
47 O Gotiyo, huꞌna, Ala kava netimogae, lagufamo alika katika lateteka alu nofi vayaꞌai apayapatiꞌmo lavaleka alika anupa huka lategetao kaote kagikaleꞌmo alita asaga huta ateteta kahao ke heteta lamogaga aino.
48 Isaleli vayaꞌai Gotiꞌapimo agiꞌaleꞌmo alitapa asaga hiyo. Hemenimo agiꞌaleꞌmo alitapa asaga hutetapa muki afinaꞌefeꞌmo agiꞌaleꞌmo alitapa asaga hiyo. Muki vayaꞌamogitapamo he, lama ge hutapa hiyo. Agiꞌaleꞌmo alitapa asaga hiyo.
Gotiꞌa hosu kavategatiꞌmo apakufamo alino katino neꞌateya kavafeꞌmo ava gemo huꞌniya gemae