119
Goti geꞌaeꞌmo ava gemae
1 Vayaꞌmogimo alagepa kavaꞌmo nehuꞌapaeꞌmo vaiꞌmo oꞌaliꞌa Ala kava neꞌmo keꞌaepa geꞌamo akame nehaya vayaꞌmogi Goti aulagaleꞌmo alagepa huꞌa maiꞌnayanageꞌa afaꞌa apamogaga aigae.
2 Avayafatiꞌmo huꞌniya keꞌaepa geꞌamo akame huge agesayafeꞌmo muki apaipafatiꞌmo kahauya huge huꞌa neꞌmaiya vayaꞌmogi Goti aulagaleꞌmo alagepa huꞌa maiꞌnayanageꞌa afaꞌa apamogaga aigae.
3 Apakaemo mago hosu kavaꞌmo osuꞌa Ala kava neꞌmo kateꞌmo umenitata nehae.
4 Kagaemo, lapayamukiki hutapa geꞌnimo akame hiyo, huka huꞌnane.
5 Gekamo alagepa huꞌna afiteꞌna akame hisuvafeꞌmo neꞌnahaiye.
6 Muki gekamo ageteꞌna afisuva afinaꞌmo navagage osugiye.
7 Nagaemo fatago kavaꞌmo huka alika fako huka nehana gekamo alagepa huꞌna afiteꞌnaeꞌmo alagepa fatago naipafatiꞌmo ala kagikamo kamiguve.
8 Avoꞌmo kae maleꞌnaya keꞌaepa gekamo akame huguvanagi alagi nataleka oꞌuvo.
9 Haiya kava huno neya vekamoꞌmo nehiya kavaꞌamo afaꞌa aeno kalo paeno atalegaiye. Agaemo gekamo alagepa huno afisiya kavatetikeꞌmo afaꞌa aeno kalo paeno atalegaiye.
10 Muki naipafatiꞌmo kagesuvafeꞌmo kahauya huꞌnove. Hiyo, huka huꞌnana keꞌaepa gekamo ataleꞌna visuvafeꞌmo oꞌnatalo.
11 Kagaetegamo hosu kavaꞌmo osisuvafeꞌmo gekamo naipafiꞌmo aliꞌna fala ki maleꞌnove.
12 O Ala kava nene, huꞌna, alagi alagepa huka maiꞌnane. Avoꞌmo kae maleꞌnaya keꞌaepa gekamo alika naya malo.
13 Nagaemo navayafatiꞌmo muki gekamo fatago kavaꞌmo huka kavayafatiꞌmo alika fako nehana keꞌaepa gekamo aeꞌna hakalo huꞌna hapa paiꞌnove.
14 Ma mopafi alopa kagemi yafeꞌmo apamogaga neꞌaiya kava huꞌna kavayafatiꞌmo huꞌnana gekamo akame hisuvafeꞌmo namogaga neꞌauve.
15 Namiꞌnana keꞌaepa gekaeꞌmo nagesa afifi huꞌna maige neꞌvana kaꞌmo ageꞌna alagepa huꞌna agege huꞌna maiguve.
16 Nagaemo avoꞌmo kae maleꞌnaya keꞌaepa gekaeꞌmo namogaga aiteꞌna nage okanigiye.
17 Kagaemo aliꞌyakamo neꞌaluva vekakamo magoꞌe huka fiku alika namigeꞌnao ma mopafiꞌmo afaꞌa maiꞌneꞌnaeꞌmo gekamo akame hino.
18 Naulagamo alika ayakeka nategeꞌnao keꞌaepa gekamo ageteꞌna nahau aiguve.
19 Ma mopafiꞌmo nata neꞌna neꞌvisugekaeꞌmo gekamo afisuvafeꞌmo alika fala okika alika nave liyo.
20 Muki afinaꞌmo alika fako nehana keꞌaepa gekamo afisuva naipamo nekaliyaꞌmofeꞌmo naipafiꞌmo nagafu nekiye.
21 Himuꞌnamu kavaꞌmo nehaya vayaꞌaifeꞌmo huka faipa huka apateꞌnana vayaꞌmogimo kakamo ataleꞌa neꞌvagekaeꞌmo ge nehapane.
22 Kavayafatiꞌmo huꞌnana gekamo akame huꞌnovaꞌmofeꞌmo huꞌa faipa huꞌa natege hosu gemo huge nehagi apavayamo alika akani apategeꞌa afaꞌa maiyo.
23 Neꞌyagaiya vayaꞌmogimo fai maiꞌneꞌapaeꞌmo huꞌa faipa huꞌa nateꞌnayaꞌmonanafa aliꞌyakamo neꞌaluva vekamoꞌna avoꞌmo kae maleꞌnaya keꞌaepa gekaeꞌmo nagesa afifi huꞌna maiꞌnove.
24 Kavayafatiꞌmo huꞌnana gekaeꞌmo namogaga neꞌauve. Gekamoꞌmo visuva kaꞌmo alino nave neliye.
25 Nagupi mafaꞌnemo asagauno aiteno mopafiꞌmo maiꞌniye. Lapa maegauve, huka huꞌnana gekamo akame huka alika he tika nato.
26 Nagaemo nehuva kavaꞌnieꞌmo kaha paiꞌnogekaeꞌmo geꞌnileꞌmo aeka atagaina huka naha paiꞌnane. Avoꞌmo kae maleꞌnaya keꞌaepa gekamo alika naya malo.
27 Alika naya malegeꞌna namiꞌnana gemo aepaꞌamo afiꞌna alagepa huꞌna afino. Neꞌalina aliꞌyakamo ageteꞌnaeꞌmo nahau aiꞌnova kavaꞌnieꞌmo hapa paiguve.
28 Kanamo aliꞌnogeno nagupi mafaꞌnemoꞌmo ani hegekana huꞌniye. Lokiya vaiꞌna kategauve, huka huꞌnanaꞌmofeꞌmo lokiya vaika nato.
29 Aigofe kateꞌmo oꞌvisuvafeꞌmo ka akani maleteka keꞌaepa gemo fiku alika namiyo.
30 Lama ge kateꞌmo uguve, huꞌna nagesa afiꞌnove. Alika fako huꞌnana gemo aliꞌna naulagaleꞌmo maleꞌnove.
31 Kavayafatiꞌmo huꞌnana geleꞌmo aliꞌna kamaeꞌnove. O Ala kava nene, huꞌna, navagage yaꞌmo alika oꞌnamiyo.
32 Magoꞌe huka naipa nagesamo alika namisanageꞌnaeꞌmo nagu nagu huꞌna gekamo hiyo, huka laha paiꞌnana gemo akame huꞌna huguve.
33 O Ala kava nene, huꞌna, avoꞌmo kae maleꞌnaya keꞌaepa gekamo alika naya malegeꞌnao oꞌataleꞌna akame hume hume uꞌna hano hisiya afinaꞌeꞌmo akame hino.
34 Alagepa huꞌna nagesamo afisuva yaꞌmo alika namigeꞌnao keꞌaepa gekamo akame hino. He, muki naipafatiꞌmo akame huguve.
35 Hiyo, huka laha paiꞌnana gekaeꞌmo namogaga neꞌauvaꞌmofeꞌmo ani kateꞌmo uꞌneꞌna hisuva naipamo alika kalika nato.
36 Fiku yanageꞌna ma mopafi yafeꞌmo nahaꞌye hugiye. Kavayafatiꞌmo huꞌnana gekamo akame hisuva naipa nagesamo alika namiyo.
37 Alu yaꞌmo aulu haeꞌna neꞌagesugekaeꞌmo alika aika afe leka nato. Kagae kateꞌmo neꞌvisugekaeꞌmo alika he tika nato.
38 Aliꞌyakamo neꞌaluva vekamoꞌnafiꞌmo gekamo alika lokiya vaika ato, kagaefekeꞌmo koli nehuvaꞌmofeꞌmae.
39 Alagepa huka alika fako nehanaꞌmofeꞌmo hosu kavaꞌmo hisugeꞌapaeꞌmo huꞌa faipa huꞌa natesayafeꞌmo koli nehuvanagi naha mao.
40 Namiꞌnana gekaeꞌmo nahaꞌye nehiye. Fatago kavakaletiꞌmo alika he tika nato.
41 O Ala kava nene, huꞌna, kahau huka nato. Huguve, huka huꞌnana kavaꞌmo huka nagufamo alika katika nato.
42 Gekamokeꞌmo naha maegaiye, huꞌna nehuvaꞌmofeꞌmo huno faipa huno neꞌnateya vekamo geꞌaleꞌmo aeꞌna atagaina huꞌna ha paiguve.
43 Alika fako nehana gekaeꞌmo nagesa afiꞌnaeꞌmo, naha maegaiye, huꞌna nehuvaꞌmofeꞌmo lama gekamo navayafatiꞌmo alika oꞌatalo.
44 Ani kava huꞌna maiꞌneꞌnaeꞌmo muki afinaꞌaeꞌmo keꞌaepa gekamo akame hume hume uꞌna maiguve.
45 Namiꞌnana gekamo afisuvafeꞌmo kahauya nehuvaꞌmofeꞌmo kalavusifiꞌmo oꞌmaiꞌna afaꞌa maiguve.
46 Nagaemo kavayafatiꞌmo nehana gemo aliꞌna neꞌyagaiya kini vayaꞌaifeꞌmo aeꞌna hakalo huꞌna hapa paisugenoꞌaeꞌmo navagage osugiye.
47 Nagaemo nahau nayamopafiꞌmo neꞌnahaiya gekaeꞌmo hiyo, huka laha paiꞌnana gekaeꞌmo namogaga aiguve.
48 Nagaemo nahau nayamopafiꞌmo neꞌnahaiya gekaeꞌmo hiyo, huka laha paiꞌnana gekalefeꞌmo nayaꞌmo aliꞌna asaga huteꞌna avoꞌmo kae maleꞌnaya gekaeꞌmo nagesa afifi huꞌna maiguve.
49 Kagaemo aliꞌyakamo neꞌaluva vekamoꞌnaeꞌmo kaha maegauve, huka naha paiꞌnana gekaeꞌmo halate kagesamo afika ho huvo. Ani gekaeꞌmo nagesamo afiꞌnaeꞌmo, alagi afole aigiye, huꞌna huteꞌna navayagunagu huꞌna maisuvafeꞌmo alika he tika nateꞌnane.
50 Gekamoꞌmo alagepa huꞌna maisuva yaꞌmo alino namiꞌniyaꞌmofeꞌmo kana yaꞌmo neꞌalugenoꞌaeꞌmo naipamoꞌmo falu nehiye.
51 Apakiꞌapileꞌmo aliꞌa asaga huꞌa neꞌapataya vayaꞌmogimo kigi yokalo gegeꞌmo huꞌa neꞌnatayaꞌmonanafa keꞌaepa gekamo oꞌataleꞌnove.
52 O Ala kava nene, huꞌna, akeyaꞌvilagamo gekamo alika fako nehana gekaeꞌmo nagesamo afiꞌna ho huteꞌna naipamo aliꞌna falu huꞌna neꞌatove.
53 Hosu vayaꞌmogimo keꞌaepa gekamo ago amagiꞌa neꞌatalayaꞌmofeꞌmo naipamoꞌmo atete nehiye.
54 Nata neꞌna eꞌna maiꞌnova noꞌnifiꞌmo avoꞌmo kae maleꞌnaya keꞌaepa gekamo yoke huꞌnove.
55 O Ala kava nene, huꞌna, haniꞌilagamo kagikaeꞌmo nagesamo afiꞌna ho nehuꞌnaeꞌmo keꞌaepa gekamo akame nehuve.
56 Namiꞌnana gekamo akame huꞌnovaꞌmofeꞌmo ani yaꞌmo aliꞌnove.
57 O Ala kava nene, huꞌna, kagaemo hetamaꞌnimo maiꞌnane. Nagaemo gekaleꞌmo yagaiꞌneꞌna akame huguve, huꞌna huꞌnove.
58 Nagaemo muki naipafatiꞌmo, fiku naha maeka namiyo, huꞌna kaha paiꞌnove. Nahau huꞌna lapategauve, huka laha paiꞌnana kava huka kahau huka nato.
59 Nagaemo kavaꞌnieꞌmo nagesa afiteꞌnaeꞌmo aiꞌna afe leꞌna kavayafatiꞌmo huꞌnana gemo akame huꞌnove.
60 Hiyo, huka laha paiꞌnana gemo akame hisuvafeꞌmo afaꞌa oꞌmaiꞌna malage huꞌna he tiꞌna akame huꞌnove.
61 Hosu vayaꞌmogimo nofitetiꞌmo kiꞌa nateꞌnayaꞌmonanafa keꞌaepa gekaeꞌmo nage okaniꞌniye.
62 Kagaemo fatago kavaꞌmo huka alika fako nehanaꞌmofeꞌmo haniꞌilaga folaguꞌmo he tiꞌna kahao ke hegauve.
63 Nagaemo kagaefeꞌmo koli nehaya vayaꞌeꞌmo magokepiꞌmo lokaeta maiꞌnone. Apamiꞌnana geleꞌmo yagaiꞌa ateꞌneꞌa akame nehaya vayaꞌeꞌmo magokepiꞌmo lokaeta maiꞌnone.
64 O Ala kava nene, huꞌna, kahau huka neꞌapatana kavakamoꞌmo ma mopafiꞌmo havai teꞌniye. Avoꞌmo kae maleꞌnaya keꞌaepa gekamo alika naya malo.
65 O Ala kava nene, huꞌna, Kaha maegauve, huka huteka ani kava huka aliꞌyakamo neꞌaluva vekamo magoꞌe huka naha maeꞌnane.
66 Nagaemo hiyo, huka huꞌnana gekaeꞌmo nagesamo afiꞌna fatago nehuvaꞌmofeꞌmo alagepa naipa nagesamo alika namiyo.
67 Kayoꞌmo oꞌnamiꞌnanageꞌnaeꞌmo hogoteꞌna gekamo ago ataleꞌnovaꞌmonanafa hemenimo gekamo akame nehuve.
68 Alagepa kavaꞌmo huteka alagepa vekamo yagu yaga kaipa vekamo maiꞌnananagi avoꞌmo kae maleꞌnaya keꞌaepa gekamo alika naya malo.
69 Himuꞌnamu kavaꞌmo nehaya vayaꞌmogi aigofe nava gemo huteꞌa huꞌa faipa huꞌa nateꞌnayaꞌmonanafa muki naipafatiꞌmo namiꞌnana gekamo akame huguve.
70 Apaipamo yafakana huno haneꞌnigeꞌa afiꞌa aeto nosayaꞌmonanafa keꞌaepa gekaeꞌmo amuse nehuve.
71 Kayoꞌmo namiꞌnanageꞌnaeꞌmo gekamo afiꞌnovaꞌmofeꞌmo kayoꞌmoꞌa alagepa huno naha maeꞌniye.
72 Kavayafatiꞌmo huꞌnana keꞌaepa gekamoꞌmo tauseni monimo ago aeno agaseꞌniyaꞌmofeꞌmo gekaeꞌmo magoꞌe huno neꞌnahaiye.
73 Kagaemo kayatetiꞌmo nagupi mafaꞌnemo alo huka nateteka nagufamo alo huka nateꞌnane. Hiyo, huka laha paiꞌnana gemo afisuva nagesamo namiyo.
74 Nagaemo gekamoꞌa naha maegaiye, huꞌna huteꞌna navayagunagu huꞌnovaꞌmofeꞌmo kagaefeꞌmo koli nehaya vayaꞌmogi nageteꞌapaeꞌmo apamogaga aigae.
75 O Ala kava nene, huꞌna, afiꞌnovana alika fako nehana kavaꞌmo alagepa kavaꞌmo haneꞌnigeka gekamo akame huteka naha maesanafeꞌmo kana yaꞌmo alika namiꞌnane.
76 Kagaemo aliꞌyakamo neꞌaluva vekamoꞌnaeꞌmo naha paiꞌnana gekamo akame huka alagepa huka kahau huka nateteka naipamo alika falu huka nato.
77 Keꞌaepa gekaeꞌmo namogaga neꞌauvaꞌmofeꞌmo kahau huka nategeꞌnao afaꞌa maino.
78 Apakiꞌapileꞌmo aliꞌa asaga huꞌa neꞌataya vayaꞌmogimo nagaetegamo hosu kavaꞌmo huꞌnayaꞌmofeꞌmo apavagage hisiya yaꞌmo alika apamiyo. Nagaetegamo hosu kavaꞌmo huꞌnayaꞌmonanafa namiꞌnana keꞌaepa gekaeꞌmo nagesa afifi huꞌna maiguve.
79 Kagaefeꞌmo koli huteꞌa kagaemo kavayafatiꞌmo huꞌnana keꞌaepa gekamo afiꞌnaya vayaꞌmo alika aika atagineka apategeꞌapao nagaetegamo eyo.
80 Nagaemo avoꞌmo kae maleꞌnaya keꞌaepa gekaleꞌmo aeꞌna hapaisuva naipa nagesamo alika namigeꞌnao navagage osisiyafeꞌmo akame hino.
81 Nagufamo alika katika natesanafeꞌmo lusi kava huno nahauꞌnigeno lokiyaꞌnimo ago hano huꞌniyaꞌmonanafa kaha maegauve, huka huꞌnana gekaeꞌmo nagesamo afiteꞌna navayagunagu nehuve.
82 Gekamo afole aisiyaꞌaeꞌmo aulu heꞌna ageꞌna maiꞌnogeno naulagafatiꞌmo nagafu nekiye. Hainu afinaꞌmo naha maeteka naipamo alika falu huka nategane.
83 Nagaemo afu agufaletiꞌmo alo huꞌnaya ani kekana huꞌna maiꞌnove. Halinamo neꞌaigenoꞌaeꞌmo vaiꞌniya ani kekana huꞌna maiꞌnovaꞌmonanafa avoꞌmo kae maleꞌnaya keꞌaepa gekaeꞌmo nage okaniꞌna nagesamo neꞌafuve.
84 Na magi afinaꞌmo aliꞌyakamo neꞌaluva vekamoꞌnamo kana yaꞌmo aliꞌna maiguve. Hainu afinaꞌmo apaini huꞌa neꞌnataya vayaꞌmo alika fako huka apateteka kayoꞌmo apamigane.
85 Ala apaki aliteꞌa apakufamo avaleliꞌa nehaiya vayaꞌmogimo kelifiꞌmo asagauꞌna aisuvafeꞌmo kelimo kafi maleꞌnae. Ani kavaꞌmo keꞌaepa gekamo akame nosaya kavaꞌmo haneꞌniye.
86 Kagaemo muki hiyo, huka laha paiꞌnana gekamo alagi lama gemo haneꞌniye. Apakaetegamo hosu kavaꞌmo osuꞌnovaꞌmonanafa apaini huꞌa neꞌnatae. Naha mao.
87 Ma mopafiꞌmo maiꞌnogeꞌapaeꞌmo aliꞌa hano huꞌa natalesayafeꞌmo huꞌnageꞌnaeꞌmo hogoꞌamo faligefeꞌmo nehuꞌnaeꞌmo namiꞌnana keꞌaepa gekamo oꞌataleꞌnove.
88 Nagaemo kavayafatiꞌmo huꞌnana keꞌaepa gekamo akame hisuvafeꞌmo muki afinaꞌaeꞌmo kahau kayamopafiꞌmo nekahaiya kavakaletiꞌmo alika he tika nato.
89 O Ala kava nene, huꞌna, gekamo alagi asagauno oꞌaigiyaꞌmonanafa kokuꞌnapiꞌmo lokiya vaino haneme haneme uno haneno hano osugiye.
90 Kagaemo muki afinaꞌmo gekamo akame huka afole aiteꞌa faliteꞌa hume hume neꞌvaya vayaꞌaitegamo alagepa kavaꞌmo nehane. Kagaemo ma mopamo faika ateꞌnanageno haneme haneme eno hemenimo haneꞌniye.
91 Muki yaꞌamo alo huꞌnanageno keꞌaepa gekamo akame huno haneme haneme eno hemeniꞌeꞌmo afaꞌa haneꞌniye. Muki yaꞌamogimo aliꞌyakamo neꞌaliye.
92 Nagaemo keꞌaepa gekaeꞌmo namogaga oꞌaiꞌnovesinana kana yaꞌmo aliꞌneꞌnaeꞌmo ago faliꞌnovesine.
93 Namiꞌnana keꞌaepa gekaeꞌmo muki afinaꞌaeꞌmo nage okanigiye. Gekaletiꞌmo alagepa huꞌna maisuva yaꞌmo alika namiꞌnanaꞌmofeꞌmae.
94 Nagaemo namiꞌnana keꞌaepa geeꞌmo kahauya huꞌnovaꞌmofeꞌmo nagaemo kagaika vekamo maiꞌnovanagi nagufamo alika katika nato.
95 Hosu kavaꞌmo nehaya vayaꞌmogimo namagisageꞌna falisuvafeꞌmo nagava maiꞌnayaꞌmonanafa kavayafatiꞌmo huꞌnana keꞌaepa gekaeꞌmo nagesa afifi huꞌna maiguve.
96 Nagaemo ageꞌnovana muki haino hapaiꞌniya yaꞌmo ago hano huꞌnigeꞌna ageꞌnove. Hano huꞌniyaꞌmonanafa keꞌaepa gekamoꞌmo yofo yaꞌamoꞌmo alopa yaꞌmo haneꞌniye.
97 Nagaemo keꞌaepa gekaeꞌmo lusi kava huno nahau nayamopafiꞌmo nahauꞌniye. Neteꞌe uneꞌeꞌmo gekaeꞌmo nagesa afifi huꞌna maiꞌnove.
98 Muki afinaꞌmo kagaemo hiyo, huka huꞌnana keꞌaepa gekamo nagaeꞌeꞌmo magokepi lokaeno haneꞌniyaꞌmofeꞌmo keꞌaepa gekaletiꞌmo alika naya neꞌmalanageꞌnaeꞌmo nagaemo afiteꞌna ageꞌnova kavaꞌmoꞌa kame vayaꞌnimogi afiteꞌa ageꞌnaya kavaꞌapimo ago aeno agaseꞌniye.
99 Kavayafatiꞌmo huꞌnana gekaeꞌmo nagesa afifi huꞌna maiꞌnovaꞌmofeꞌmo nagaemo gemo aepaꞌamo afiꞌnova kavaꞌnimoꞌa tisa vayaꞌnimogi afiꞌnaya kavaꞌapimo ago aeno agaseꞌniye.
100 Namiꞌnana keꞌaepa gemo akame nehuvaꞌmofeꞌmo nagaemo gemo aepaꞌamo afiꞌnova kavaꞌnimoꞌa kosuna vayaꞌmogi gemo aepaꞌamo afiꞌnaya kavaꞌapimo ago aeno agaseꞌniye.
101 Gekamo akame huteꞌna muki hosu kateꞌmo oꞌvisuvafeꞌmo naiyamo kalavusi huꞌna ateꞌnove.
102 Kagaikamo alika naya maleꞌnanaꞌmofeꞌmo alika fako nehana gekamo oꞌataleꞌnove.
103 Nagaemo gekamo neꞌna afi geꞌnogeno haga nahauꞌniye. Gekamo hagaꞌamoꞌmo kevegeve anumoꞌmo nehiya hagaꞌamo ago aeno agaseno haga nehiye.
104 Namiꞌnana keꞌaepa gemoꞌa gemo aepaꞌamo neꞌafuva kavaꞌmo alino namiꞌniyaꞌmofeꞌmo muki aigofe geeꞌmo alagi oꞌnahauꞌniye.
105 Gekamoꞌmo lamugana huno haneꞌnenoꞌaeꞌmo aeno ha nelegeꞌna umenitata nehuve. Gekamoꞌmo aeno ha leno visuva kaꞌmo alino nave neliye.
106 Nagaemo, Alika fako nehana gekamo fatago gemo akame huguve, huꞌna nagoꞌyamo ataleꞌna ago kaha paiꞌnove.
107 O Ala kava nene, huꞌna, lusi kana yaꞌmo aliꞌnovanagi kaha maegauve, huka huꞌnana gekalefeꞌmo alika he tika nato.
108 Kahao ke hovanagi kagaefeꞌmo nahau nayamopafiꞌmo nahauꞌnigeꞌna navayafatiꞌmo hisuva gemo ofalinigana huꞌna kamisuva yaꞌmo aliyo. Kagaemo alika fako nehana gemo alika naya malo.
109 Nagaemo muki afinaꞌmo afaꞌa neꞌmauva yaꞌnimo atalesuva kavategamo maiꞌnovaꞌmonanafa keꞌaepa gekaeꞌmo nage okaniꞌniye.
110 Hosu vayaꞌmogimo natafausiyafeꞌmo aneꞌaimo hanagi maleꞌnayaꞌmonanafa namiꞌnana keꞌaepa gekamo amagiꞌna oꞌataleꞌnove.
111 Mafaꞌneꞌapimogimo afoꞌapimogi kagemi yaꞌapimo neꞌaliya kava huꞌna kavayafatiꞌmo huꞌnana keꞌaepa gemo aliꞌnovanageno hetamaꞌnimo hanege hanege huno hanegaiye. Ani gekaeꞌmo naipafiꞌmo namogaga neꞌauve.
112 Avoꞌmo kae maleꞌnaya keꞌaepa gemo akame hume hume uꞌna falisuva afinaꞌmo hano hisiyafeꞌmo naipamo aliꞌna he tiꞌna ateꞌnove.
113 Nagaemo lole apakesamo neꞌafiya vayaꞌaifeꞌmo alagi oꞌnahauꞌniyaꞌmonanafa keꞌaepa gekaeꞌmo nahau nayamopafiꞌmo nahauꞌniye.
114 Nagaemo kagaepiꞌmo fala kiꞌna maiꞌnogeka kagaemo haleguꞌnimo maiꞌnane. Gekamo alagi afole aigiye, huꞌna huteꞌna navayagunagu huꞌna maiꞌnove.
115 Hosu kavaꞌmo nehaya vayaꞌmogitapae, huꞌna, nagaetegatiꞌmo ataletapa viyo. Gotiꞌnimoꞌmo hiyo, huno huꞌniya gemo akame huguve.
116 Alagepa huꞌna afaꞌa maisuvafeꞌmo kaha maegauve, huka huꞌnana gekalefeꞌmo nayateꞌmo aliyo. Afole aisiya kavafeꞌmo navayagunagu nehuvaꞌmofeꞌmo fiku yanageno navagage hugiye.
117 Nayateꞌmo aliyo, lageso osuꞌna afaꞌa maiguve. Afaꞌa maiꞌneꞌna muki afinaꞌmo avoꞌmo kae maleꞌnaya keꞌaepa gekamo akame huguve.
118 Muki vayaꞌmogi avoꞌmo kae maleꞌnaya keꞌaepa gekamo amagiꞌa neꞌatalaya vayaꞌmo kakameꞌyamo neꞌapamine. Apakaemo aigofe kavaꞌmo nehuꞌapaeꞌmo apakaiꞌapieꞌmo humi neꞌapatae.
119 Goli yafaꞌmo atafiꞌmo kaeꞌnagenoꞌaeꞌmo oꞌaniꞌyaꞌamo leno afole aiꞌnigeꞌa aliꞌa neꞌatalaya kava huka hosu vayaꞌmo alika neꞌatalanaꞌmofeꞌmo kavayafatiꞌmo huꞌnana keꞌaepa gekaeꞌmo nahau nayamopafiꞌmo nahauꞌniye.
120 Nagaemo kagaefeꞌmo koli nehugenoꞌaeꞌmo nagufamoꞌmo atete neꞌnahaiye. Alika fako nehana kavakaeꞌmo koli nehuve.
121 Nagaemo alagepa huꞌna aliꞌna fako huꞌna apateteꞌna fatago kavaꞌmo huꞌnove. Kana yaꞌmo aliꞌa neꞌnamiya vayaꞌai apayapiꞌmo maisuvafeꞌmo alagi nataleka oꞌuvo.
122 Anonaꞌnilefeꞌmo eka naimuꞌyaleꞌmo maigeꞌnao alagepa huꞌna maino. Fiku yanageꞌa ala apaki aliteꞌa apakufamo avaleliꞌa nehaiya vayaꞌmogi kana yaꞌmo aliꞌa namigayanagi naha mao.
123 Nagufamo alika katika natesanafeꞌmo aulu heꞌna agege fatago kavakalefeꞌmo gekamo agesuvafeꞌmo aulu haeꞌna agege huꞌna ageꞌna maiꞌnogeno naulagafatiꞌmo nagafu nekiye.
124 Kahau huka neꞌapatana kava huka kahau huka nateteka avoꞌmo kae maleꞌnaya keꞌaepa gekamo alika naya malo.
125 Nagaemo aliꞌyakamo neꞌaluva vekamo maiꞌnove. Nagaemo kavayafatiꞌmo keꞌaepa gekamo hugeꞌna gekamo aepaꞌamo afisuva kavaꞌmo alika namiyo.
126 O Ala kava nene, huꞌna, apakaemo keꞌaepa gekamo ago aeꞌa ati kaeꞌnayaꞌmofeꞌmo aliꞌyakamo alisana afinaꞌmo afole aiꞌniye.
127 Gekamo aeꞌa ati kaeꞌnayaꞌmofeꞌmo hiyo, huka huꞌnana gekalefeꞌmo nahauꞌniya kavaꞌmoꞌa hogote goli yafafeꞌmo nahauꞌniya kavaꞌmo ago aeno agaseꞌniye.
128 Gekamo aeꞌa ati kaeꞌnayaꞌmofeꞌmo muki kavatefeꞌmo namiꞌnana keꞌaepa gekaeꞌmo, fatago gemo haneꞌniye, huꞌna nagesamo afiteꞌna aigofe kavafeꞌmo alagi oꞌnahauꞌniye.
129 Kavayafatiꞌmo huꞌnana keꞌaepa gekaeꞌmo nahau neꞌauva gemo haneꞌniyaꞌmofeꞌmo nagupi mafaꞌnemoꞌmo akame nehiye.
130 Gekamoꞌmo vayaꞌai apaipafiꞌmo faleno haitenoꞌaeꞌmo aeno ha nele. Negi vayaꞌmogi gekamo afiteꞌapaeꞌmo ge aepaꞌamo afigae.
131 Hiyo, huka huꞌnana gekaeꞌmo naga teꞌnigeꞌnaeꞌmo navayamo aka hulina ha ha huꞌnove.
132 Kagikaeꞌmo hapau apayamopafiꞌmo hapauꞌniya vayaꞌaitegamo nehana kava huka nagaefeꞌmo kahau huka nato.
133 Kagaemo gekaletiꞌmo alika ho huka nateteka hosu kavaꞌmoꞌa yagaino oꞌnatesiyafeꞌmo nataleka oꞌuvo.
134 Namiꞌnana keꞌaepa gekamo akame hisuvafeꞌmo kana yaꞌmo aliꞌa namiꞌnaya kavapatiꞌmo hatu maeka nato.
135 Kaugosafatiꞌmo ha le yakamoꞌa aliꞌyakamo neꞌaluva vekamoꞌnaleꞌmo aeno ha leno. Avoꞌmo kae maleꞌnaya keꞌaepa gekamo alika naya malo.
136 Vayaꞌmogimo keꞌaepa gekamo akame nosayaꞌmofeꞌmo lusi kava huno naunu nelamiye.
137 O Ala kava nene, huꞌna, fatago vekamo maiꞌneka alagepa fatago kavaꞌmo huka alika fako huka neꞌatane.
138 Kavayafatiꞌmo hiyo, huka huꞌnana keꞌaepa gekamo fatago gemo alagi lama gemo haneꞌniye.
139 Kame vayaꞌnimogi gekaeꞌmo apake kaniꞌniyaꞌmofeꞌmo nayamukiki nehuva kavaꞌnimoꞌa atagana huno leno nasaga liꞌniye.
140 Gekamo alagi alagepa gemo haneꞌniyaꞌmofeꞌmo aliꞌyakamo neꞌaluva vekamoꞌnamo gekaeꞌmo nahau nayamopafiꞌmo nahauꞌniye.
141 Ala vekamo oꞌmaiꞌnogeꞌapaeꞌmo nagaefeꞌmo ina agufa neꞌmo maiꞌniye, huꞌa nehayaꞌmonanafa namiꞌnana keꞌaepa gekaeꞌmo alagi nage okaniꞌniye.
142 Fatago kavakamoꞌmo hanege hanege huno muki afinaꞌaeꞌmo hanegaiye. Keꞌaepa gekamo alagi lama gemo haneꞌniye.
143 Hanageke yaꞌmo nagaeteꞌmo afole aiꞌnigeno nagafu kiꞌniyaꞌmonanafa hiyo, huka huꞌnana gekaeꞌmo namogaga neꞌauve.
144 Kavayafatiꞌmo huꞌnana keꞌaepa gekamo fatago kavaꞌamoꞌmo alagi hanege hanege huno muki afinaꞌaeꞌmo hanegaiye. Kagaemo gemo aepaꞌamo afisuva kavaꞌmo alika namigeꞌnao afaꞌa maino.
145 Nagaemo muki naipafatiꞌmo, Ala kava nene, huꞌna, geꞌnimo afiyo, avoꞌmo kae maleꞌnaya keꞌaepa gekamo akame huguve, huꞌna kagaefeꞌmo ge nehuve.
146 Nagaemo, Nagufamo alika katika nategeꞌnao kavayafatiꞌmo huꞌnana keꞌaepa gekamo akame hino, huꞌna kagaefeꞌmo ge nehuve.
147 Ko otiꞌnigeꞌnaeꞌmo he tiꞌna, naha mao, huꞌna ge nehuve. Gekamo afole aigiye, huꞌna navayagunagu huꞌna maiꞌnove.
148 Nagaemo gekaeꞌmo nagesa afifi huꞌna maisuvafeꞌmo haniꞌilagamo nau okaleꞌna afaꞌa maiꞌnove.
149 O, Ala kava nene, huꞌna, kahau kayamopafiꞌmo kahauꞌniya kavakaletiꞌmo geꞌnimo afiyo. Alagepa huka alika fako nehana kavakaletiꞌmo alika he tika nato.
150 Hosu kavaꞌmo nehaya vayaꞌmo nahaopaleꞌmo eꞌnae. Apakaemo keꞌaepa gekamo hanetegeꞌapaeꞌmo afagiꞌaleꞌmo maiꞌnae.
151 O Ala kava nene, huꞌna, kagaemo nahaopaleꞌmo maiꞌnanagenoꞌaeꞌmo muki gekamo hiyo, huka huꞌnana gekamo alagi lama gemo haneꞌniye.
152 Nagaemo akeyaꞌvilagamo kavayafatiꞌmo huꞌnana keꞌaepa gekamo faika ateꞌnanaꞌmofeꞌmo muki afinaꞌmo afaꞌa hanegaiye, huꞌna ago afiꞌnove.
153 Nagaemo keꞌaepa gekaeꞌmo nage okaniꞌniyaꞌmofeꞌmo kana yaꞌmo aliꞌnovanagi kagesamo afiteka hatu maeka nato.
154 Agotileꞌmo he tika maiꞌneka naha maeka hatu maeka nato. Kaha maegauve, huka huꞌnana gekalefeꞌmo alika he tika nato.
155 Hosu vayaꞌmogimo avoꞌmo kae maleꞌnaya keꞌaepa gekaeꞌmo kahauya nosayaꞌmofeꞌmo apakufamo alika katika apatesanafeꞌmo afagiꞌaleꞌmo maiꞌnae.
156 O Ala kava nene, huꞌna, Lusi kava huka kahau huka apatege apatege huka kahau huka neꞌapatane. Alagepa huka alika fako nehana kavakaletiꞌmo alika he tika nato.
157 Asole vayaꞌmogi apaini huꞌa natege kame huꞌa natege huꞌa maiꞌnayaꞌmonanafa kavayafatiꞌmo huꞌnana keꞌaepa gekamo ataleꞌna oꞌuꞌnove.
158 Hosu kavaꞌapimo aeꞌa ati kaeꞌnaya vayaꞌmogi gekamo akame nosayaꞌmofeꞌmo apakeꞌnogenoꞌaeꞌmo naipamoꞌmo kana huꞌniye.
159 Namiꞌnana keꞌaepa gekaeꞌmo nahau nayamopafiꞌmo nahauꞌniya kavaꞌnieꞌmo kagesamo afiyo. Kahau kayamopafiꞌmo kahauꞌniya kavakaletiꞌmo alika he tika nato.
160 Akeyaꞌvilaga aepa faiꞌniya afiꞌnatetiꞌmo haneꞌniya gekamo alagi lama gemo haneꞌniye. Muki gekamo alika fako nehana gekamoꞌmo hanege hanege huno muki afinaꞌaeꞌmo hanegaiye.
161 Ala vayaꞌmo neꞌyagaiya vayaꞌmogi apaini huꞌa neꞌnataya kavaꞌapimo aepa vekamo oꞌmaiꞌnovaꞌmonanafa gekaekeꞌmo koli nehuve.
162 Vayaꞌmogi kame huꞌa aeꞌa apakaseteꞌa alopa kagemi yaꞌmo aliteꞌapaeꞌmo apamogaga neꞌaiya kava huꞌna gekaeꞌmo namogaga neꞌauve.
163 Aigofe geeꞌmo alagi oꞌnahauꞌniyaꞌmonanafa keꞌaepa gekaeꞌmo nahau nayamopafiꞌmo nahauꞌniye.
164 Fatago kavaꞌmo huka alika fako nehanaꞌmofeꞌmo muki afinaꞌae afinaꞌaeꞌmo seveniꞌa afinaꞌmo kahao ke nehove.
165 Keꞌaepa gekaeꞌmo hapau apayamopafiꞌmo hapauꞌniya vayaꞌmogi alagepa huꞌa maiꞌnageno apaipamoꞌmo falu nehiyanageno mago yaꞌmoꞌa apavalelino asagauno aisiya yaꞌmo ohaneꞌniye.
166 Ala kava nene, huꞌna, nagufamo alika katika natesanafeꞌmo navayagunagu huꞌna maiꞌneꞌna hiyo, huka huꞌnana gemo akame nehuve.
167 Nagupi mafaꞌnemoꞌa kavayafatiꞌmo huꞌnana keꞌaepa gekamo akame nehigenoꞌaeꞌmo lusi kava huno nahau nayamopafiꞌmo neꞌnahaiye.
168 Muki nehuva kavaꞌaꞌnimo kaulagaleꞌmo haneꞌniyaꞌmofeꞌmo namiꞌnana keꞌaepa gekaꞌe kavayafatiꞌmo huꞌnana keꞌaepa gekaꞌeꞌmo akame nehuve.
169 O Ala kava nene, huꞌna, lokiya vaiꞌna ge nehuva geꞌnimo afiyo. Lapa maegauve, huka huꞌnana gekalefeꞌmo gemo aepaꞌamo afisuva kavaꞌmo alika namiyo.
170 Aukaya nehuva geꞌnimo afiyo. Lapa maegauve, huka huꞌnana gekalefeꞌmo hatu maeka nato.
171 Kagaemo avoꞌmo kae maleꞌnaya keꞌaepa gekamo alika naya neꞌmalanaꞌmofeꞌmo ala kagikamo kamiguve.
172 Muki gekamo hiyo, huka huꞌnana gekamo fatago gemo haneꞌniyaꞌmofeꞌmo navayafatiꞌmo gekamo aeꞌna hakalo huꞌna hapa paiguve.
173 Namiꞌnana keꞌaepa gekamo lekana pai maleꞌnovaꞌmofeꞌmo kayatetiꞌmo naha mao.
174 O, Ala kava nene, huꞌna, nagufamo alika katika natesanafeꞌmo naga nete. Keꞌaepa gekaeꞌmo namogaga neꞌauve.
175 Afaꞌa maisuva yaꞌmo alika namigeꞌnao ala kagikamo kamino. Alika fako huka nateteka naha mao.
176 Nagaemo hiyo, huka huꞌnana gekaeꞌmo nage okaniꞌniyaꞌmofeꞌmo kahauya huka nago. Lageso huꞌniya sipisipigana huꞌna kataleꞌna uꞌnovanagi aliꞌyakamo neꞌaluva vekamo kahauya huka nageka navato.