127
Mono notegamo ugefe nehaiya vayaꞌmo kateꞌmo nehaiꞌapaeꞌmo nehaya yokemae
1 Ala kava neꞌmoꞌa hapa oꞌmaesiyaꞌmoꞌmo noꞌmo nekiya vayaꞌmogimo afa aliꞌyakeꞌmo aliteꞌa noꞌmo okigae. Ala kava neꞌmoꞌa hapa oꞌmaesiyaꞌmoꞌmo taonifiꞌmo neꞌyagaiya vayaꞌmogi afaꞌageꞌmo neꞌyagaisagenoꞌaeꞌmo taonifiꞌmo hosu kavaꞌmo afole aigiye.
2 Lapakaemo kotilamiyapiꞌmo lapaupatiꞌmo he titapa aliꞌyaꞌmo alime alime utapa haniꞌilagamo notapilegamo etapa avaꞌyi hutetapaeꞌmo lapaipamoꞌmo falu nosigetapa afa aliꞌyaꞌmo neꞌaligenoꞌaeꞌmo neꞌyaꞌmo afole noꞌaiye. Alagepa yatapimo afole noꞌaiyaꞌmonanafa hau ayamopafiꞌmo hauꞌniya vayaꞌamo fiku hapa maeno neꞌapamigeꞌapaeꞌmo apau nekalae.
3 Ala kava neꞌmoꞌa mafaꞌnemo fiku hapa maeno apamiꞌnigeꞌa aliꞌa neꞌapatae. Mafaꞌnemo alagepa miyakana huno neꞌapamiye.
4 Ati vekamoꞌa asole kevemo aliteno maiꞌnisiyana alagepa huno maisiya kava huno neya vekamoꞌa mafaꞌnemo alino apatesiyaꞌmoꞌmo ani kava huno alagepa huno maigiye.
5 Asole keve maleꞌnaya vayaꞌmo maiꞌnaya kava huꞌa asole mafaꞌnemo aliꞌa apateꞌnaya vayaꞌmogimo apamogaga aigae. Kame vayaꞌapimogi agoti huꞌa apatesageꞌapaeꞌmo huꞌa aeꞌa apakasegae.