130
Mono notegamo ugefe nehaiya vayaꞌmo kateꞌmo nehaiꞌapaeꞌmo nehaya yokemae
1 Ala kava neo, huꞌna, muki yaꞌmoꞌa aino nati kaeꞌnigeꞌna afepilaga maiꞌneꞌnaeꞌmo kagaefekeꞌmo keya aeꞌna ge nehuve.
2 Ala kava nene, huꞌna, geꞌnimo afiyo. Naha mao, huꞌna keya aeꞌna ge nehuva geꞌnimo kagetafo huka afiyo.
3 O Gotiyo, huꞌna, hosu kavatimo alika fako huka lateteka miyatimo lamiꞌnanesinana Ala kava nene, huꞌna, ina laꞌmo afaꞌa aeno kasalo paeyesine.
4 Magoke vekamoꞌa alagi aeno kasalo opaeyesinaꞌmonanafa kagaefeꞌmo koli huteꞌa mono hisayafeꞌmo hosu kavatimo alika neꞌatalane.
5 Nagaemo Ala kava neꞌmoꞌa naha maesiyafeꞌmo agava maiꞌneꞌna geꞌaekeꞌmo nagesa afiteꞌna agava maiꞌneꞌnaeꞌmo navayagunagu nehuve.
6 Neꞌyagaiya vayaꞌmogi hani huꞌniya yaꞌmo hano hisigeno ha le yaꞌmo afole aisiyafeꞌmo nehapaigeꞌa agava neꞌmaiya kava huꞌna Ala kava nefeꞌmo magoꞌe huꞌna agava neꞌmauve. He, agava neꞌmaiya kava huꞌna aeꞌna apakaseꞌna Ala kava nefeꞌmo magoꞌe huꞌna agava neꞌmauve.
7 Isaleli vayaꞌmogitapae, huꞌna, Ala kava nefeꞌmo lapakesamo afitetapa lapa maesiyafeꞌmo lapavayagunagu hutapa maiyo. Ala kava neꞌmoꞌa vayaꞌaeꞌmo hau huno neꞌapateyanageno olapatalegaiye. Agaemo muki alu hosu kavapatiꞌe alu hosu kavapatiꞌeꞌmo miya faino hatu maeno neꞌapateyaꞌmofeꞌmo ani kavafeꞌmo lapakesa afitetapa lapavayagunagu hutapa maiyo.
8 Agaemo agaiꞌa Isaleli vayaꞌamo muki alu hosu kavapatiꞌe alu hosu kavapatiꞌeꞌmo miya faino hatu maeno apategaiye.