78
Isaleli vayaꞌai hosu kavaꞌapieꞌmo apava gemae
1 Vayaꞌnimogitapae, huꞌna, aliꞌna lapaya malegefeꞌmo huvanagi geꞌnimo afiyo. Gemo lapa paigefeꞌmo huvanagi mani gemo alagepa hutapa afiyo.
2 Akeyaꞌvilaga kavafeꞌmo aeꞌna kalafefa gemo huꞌna aepaꞌaeꞌmo lapa paiguve.
3 Laginago vayaꞌmogi laha paiꞌnageta afiꞌnona gemo halate lapa paiguve.
4 Lagaemo aeta ati okaeta Ala kava neꞌmoꞌa lokiya kavaꞌaꞌe hapau aiꞌnaya kavaꞌaꞌefeꞌmo ava gemo huta mafaꞌnetieꞌmo hapa paiteta henagaꞌamo afole aisaya mafaꞌnetieꞌmo hapa paigune.
5-6 Agaemo Isaleli vayaꞌaifeꞌmo keꞌaepa geꞌamo hapa paiꞌniya agufa gemo huno Yekopu aginago vayaꞌaifeꞌmo ma kava hiyo, huno hapa paiꞌniye. Laginago vayaꞌaifeꞌmo, keꞌaepa geꞌnimo mafaꞌnetapimo alita apaya malegeꞌapao aliꞌa apatesaya mafaꞌneꞌapimogi afiteꞌapaeꞌmo mafaꞌneꞌapieꞌmo halate hapa paiyo, huno hapa paiꞌniye.
7 Afiteꞌapaeꞌmo Gotifeꞌmo apakesamo afiꞌa fatago huteꞌa Gotiꞌa huꞌniya kavafeꞌmo apake okaniꞌa keꞌaepa geꞌamo akame hugae.
8 Apakinago vayaꞌmogimo himuꞌnamu kavaꞌmo huteꞌa geꞌamo oꞌafiꞌa Gotifeꞌmo apakesamo afiꞌa fatago osuꞌa ataleꞌa uꞌnae. Fiku yanageꞌa apakaeꞌeꞌmo ani kavaꞌmo huꞌa maigae.
9 Ifalemi nofi vayaꞌmogimo atiꞌapimo aliteꞌa uꞌnayaꞌmonanafa kame osuꞌa ataleꞌa aiꞌa atagi neꞌa eꞌnae.
10 Apakaemo Goti kotalake geꞌamo akame osuꞌa keꞌaepa geꞌamo ago amagiꞌa ataleꞌnae.
11 Huꞌniya aune kavafeꞌmo ago apake kaniꞌniye.
12 Agaemo afoꞌapimogi apaulagaleꞌmo Isipi kotega Sovani koteꞌmo aune kavaꞌmo huꞌniye.
13 Solovala aniꞌmoꞌa folagapatiꞌmo aino akaka vaelino ani anagamo haino hanete ani afelagamo lamino hanete huꞌnigeꞌa folagapatiꞌmo uꞌnae.
14 Agaemo felugamo hiyaꞌmo uno hogoteno apavalelino uꞌniya kava huno haniꞌilagaꞌeꞌmo ata vaiꞌmo leno halelino uno hogoteno apavalelino uꞌniye.
15 Agaemo kaꞌme koteꞌmo aniꞌmo ohaneꞌniya koteꞌmo yafaꞌmo amagino apalo atiꞌnigeno afepatiꞌmo alopa aniꞌmo haineno asagauno aiꞌnigeꞌa neꞌnae.
16 Yafapatiꞌmo alopa aniꞌmo emineꞌnigeꞌa nege nege huꞌa maiꞌnae.
17 Huꞌniyaꞌmonanafa kaꞌme kotegamo hogote vekamo anaga vekalegamo magoꞌe magoꞌe huꞌa hosu kavaꞌmo huteꞌa geꞌamo ago amagiꞌa ataleꞌnae.
18 Gotifeꞌmo, lahauꞌniya neꞌyaꞌmo alika lamiyo, huꞌa amalageka huꞌnae.
19 Apakaemo Gotifeꞌmo huꞌa faipa huꞌa ateteꞌapaeꞌmo, Gotiꞌa kaꞌme koteꞌmo alopa neꞌyaꞌmo afaꞌa lamigifiye, huꞌa huꞌnae.
20 Agaemo yafaꞌmo amagiꞌnigeno alopa aniꞌmo eminetenoꞌaeꞌmo ani aniꞌmo afaꞌa heꞌniye. Ani kavaꞌmo huꞌniyaꞌmonanafa neꞌyaꞌe afumo ameꞌaꞌeꞌmo afaꞌa lamigifiye, huꞌa huꞌnae.
21-22 Huꞌa huꞌnayaꞌmofeꞌmo Ala kava neꞌmoꞌa afitenoꞌaeꞌmo lusi kava huno aipamo leno apateꞌniye. Yekopu vayaꞌmo atamoꞌmo emineno leno apasaga liꞌniye. Lagufamo alino katino lategaiye, huꞌa apakesa afiꞌa fatago osuꞌnayaꞌmofeꞌmo aipamo leno apateꞌniye.
23-24 Apakesa afiꞌa fatago osuꞌnayaꞌmonanafa kokuꞌnafeꞌmo aika akaka vao, huno huꞌnigeno aino akaka vaeꞌnigeno koꞌmo aigekana huno mago neꞌyaꞌmo agiꞌamo mana neꞌyaꞌmo asagauno aiꞌnigeꞌa aliꞌa neꞌnae.
25 Gotiꞌa enisole vayaꞌmogi neꞌyaꞌmo ma mopafi vayaꞌmo alino apamiꞌnigeꞌa ago aliꞌa neꞌa apamu huꞌnae.
26 Agaemo, yasimo aliyo, huno huꞌnigeno yegemo haine neꞌeya kotegatiꞌmo yasimo aliꞌniye. Himamuꞌaletiꞌmo yasimo aliyo, huno huꞌnigeno aluga aluga haopalegatiꞌmo yasimo aliꞌniye.
27 Yasimoꞌmo nama anagaꞌmo mumusopakana huno lekana opaisaya agufa nama anagaꞌmo apavalelino eꞌnigeꞌa eꞌa ani kahaepagana huꞌa asagauꞌa aiꞌnae.
28 Maiꞌnaya folagapiꞌmo asagauꞌa aige muki seli noteꞌmo asagauꞌa aige huꞌa asagauꞌa aiꞌnae.
29 Agaemo hapauꞌniya neꞌyaꞌmo alino apamiꞌnigeꞌa aliꞌa neꞌa apamu huꞌnae.
30-31 Neꞌyaꞌmo afaꞌa alino lamigifiye, huꞌa huteꞌa amalageka huteꞌa apakesamo afiꞌa fatago osuꞌnayaꞌmofeꞌmo apamiꞌniya neꞌyaꞌmo neꞌa oꞌnakaiꞌa apavayafiꞌmo haniliꞌnagenoꞌaeꞌmo Gotiꞌa aipamo leno apateteno Isaleli vayapatiꞌmo hogote lokiya vayaꞌageꞌmo ago apamagiꞌnigeꞌa faliꞌnae.
32-33 Ani kavaꞌmo huꞌniyaꞌmonanafa agaetegamo magoꞌe magoꞌe huꞌageꞌmo hosu kavakeꞌmo huꞌa maiꞌnae. Aune kavaꞌmo huꞌniyaꞌmonanafa apakesa afiꞌa fatago osuꞌnayaꞌmofeꞌmo afa aliꞌya aliteꞌa koli hume hume uꞌa faliꞌnae.
34 Apamagiꞌnigeꞌa faliꞌnageꞌapaeꞌmo mago vayaꞌamogimo apaipamo aliꞌa afe leꞌa Gotiꞌmo agesayafeꞌmo lokiya vaiꞌa kahauya huꞌnae.
35 Apakaemo, Gotiꞌa yagaino nelateya vekamo maiꞌniye. Lokiya vekamoꞌa laha neꞌmaeya vekamo maiꞌniye, huꞌa halate apakesamo afiꞌnae.
36 Kanale vekamo maiꞌniye, huꞌa huꞌnayana apaipafatiꞌmo apakesamo afiꞌa osuꞌnafa apavayaꞌaletikeꞌmo aigofe gemo huꞌnae.
37 Agaetefeꞌmo apaipamo kanale osigeꞌa kotalake geꞌamo ago amagiꞌa ataleꞌnae.
38 Ani kavaꞌmo huꞌnayaꞌmonanafa hau ayamopafiꞌmo hauꞌniya vekamo maiꞌniyaꞌmofeꞌmo muki vayaꞌamo kamiti oꞌapamagiꞌnifa hosu kavaꞌapigeꞌmo alino ataleꞌniye. Muki afinaꞌmo aipamo lege lege huno maiꞌniyaꞌmonanafa ataleteno aipamo leno apateꞌniya kavaꞌaꞌeꞌmo ataleꞌniye.
39 Agaemo, Vayatafaꞌmo maiꞌnae. Apava musa neꞌaiya yaꞌmo malage huno hano nehiya kava huꞌa neꞌmaiye, huno agesa afiꞌniye.
40 Muki afinaꞌmo kaꞌme kotegamo maiꞌneꞌapaeꞌmo geꞌamo ago amagiꞌa ataleꞌnagenoꞌaeꞌmo aipamoꞌmo kana huꞌniye.
41 Apakaemo muki afinaꞌmo Gotiꞌmo amalageka huge Isaleli vayaꞌai aote Gotiꞌapimo kaꞌamo akani malege huꞌa maiꞌnae.
42 Apakaemo himamuꞌaletiꞌmo huꞌniya kavaꞌaeꞌmo ago apake kanige kame vayaꞌai apayapatiꞌmo apakufamo alino katino apateꞌniya kavaꞌaeꞌmo ago apake kanige huꞌnigeꞌa apakesamo oꞌafiꞌnae.
43 Hogoteno himamuꞌaletiꞌmo aune kavaꞌmo Isipi kotegamo mago Sovani koteꞌmo huꞌniya kavafeꞌmo apakesamo oꞌafiꞌnae.
44 Agaemo alopa aniꞌe aise aniꞌeꞌmo alino kola aniꞌmo hamaleno ateꞌnigeꞌa Isipi vayaꞌmogimo oꞌneꞌnae.
45 Agaemo asole kosiꞌmo alino apateꞌnigeꞌa eꞌa hapaege esoꞌmo alino apateꞌnigeꞌa eꞌa muki mopaꞌapileꞌmo haneꞌniya yaꞌmo aliꞌa hosu huꞌa atege huꞌnae.
46 Agaemo mago kafamo alino apateꞌnigeꞌa eꞌa hoyaꞌapifiꞌmo haneꞌniya neꞌyaꞌmo nege akenuꞌmo alino apateꞌnigeꞌa eꞌa hoyaꞌapifiꞌmo hakale maleꞌnaya neꞌyaꞌmo nege huꞌnae.
47 Agaemo ko mopa koꞌmo alino ataleꞌnigeno emineno alagamo neꞌaeya nofiꞌapimo amagino falu atiꞌniye. Agaemo haniꞌilagamo ko mopagana huno lao yaꞌmo alino ataleꞌnigeno emineꞌnigeno alagamo neꞌaeya yosa hoyaꞌapimo falu teꞌniye.
48 Agaemo ko mopa koꞌmo alino ataleꞌnigeno emineno pulumakaꞌapimo apamagiꞌnigeꞌa faliꞌnae.
49 Gotiꞌa aipamo leno apatege hai vaino apatege huteno hanageke yaꞌmo alino apamiꞌnigeno apakafu kiꞌniye. Ani kava huꞌa enisole vayaꞌmogimo apamagiꞌnageꞌa faliꞌnae.
50 Aipamo leno apatetenoꞌaeꞌmo afaꞌa apakeno oꞌapataleꞌnifa apamagiꞌnigeno kaita hapauꞌnigeꞌa ago faliꞌnae.
51 Agaemo Isipi kotega vayaꞌai muki yege mafaꞌneꞌapimo kamiti apamagiꞌnigeꞌa ago faliꞌnae.
52 Apamagiꞌniyaꞌmonanafa sipisipimo apavaleliꞌa neꞌvaya kava huno vayaꞌamo kaꞌme kotegamo apavalelino uꞌniye.
53 Alagepa huno yagaino apateꞌnigeꞌa koli osuꞌa afaꞌa uꞌnayaꞌmonanafa solovala aniꞌmoꞌa kame vayaꞌapimo ago aeno apati kaeꞌniye.
54 Apavalelino uno aote mopaleꞌmo himamuꞌaletiꞌmo aliꞌniya aveleꞌmo apateꞌniye.
55 Agaemo alu nofi vaya alu nofi vayaꞌmo ago alino hapa faitaleno mopaꞌapimo hapafaleno hakino apamiteno seli noꞌapifiꞌmo alino apateꞌniye.
56 Ani kavaꞌmo huꞌniyaꞌmonanafa hogote anaga vekamo Gotiꞌa amalageka huteꞌa himuꞌnamu kavaꞌmo huteꞌa ma kavaꞌmo hiyo, huno huꞌniya gemo ago amagiꞌa ataleꞌnae.
57 Afoꞌapimogi himuꞌnamu kavaꞌmo huteꞌa ataleꞌnaya kava huꞌa maiꞌneꞌa kayagiꞌniya kevemo hetalageno kahaufilagamo neꞌviya kava huꞌa ataleꞌa hosu kateꞌmo uꞌnae.
58 Apakaemo aveꞌale aveꞌaleꞌmo aigofe gotiꞌapimogifeꞌmo mono huꞌnagenoꞌaeꞌmo aipamo leno apateꞌniye. Aigofe gotiꞌapimo auneꞌamo alo hu maleꞌneꞌa mono huꞌnagenoꞌaeꞌmo hosu aipamo kaliꞌniye.
59 Gotiꞌa apaketenoꞌaeꞌmo aipamo leno apateteno agaiꞌa vayaꞌamo akameꞌya apamiꞌniye.
60 Agaemo Sailo kotega seli mono nopiꞌmo neꞌmaiya nopatiꞌmo ataleno uꞌniye.
61 Agaiꞌa vayaꞌamo hapa oꞌmaeno kame vayaꞌapimo alino apateꞌnigeꞌa eꞌa kame huꞌa aeꞌa apakaseteꞌa kotalake gemo hu maleꞌniya kesimo kumaya aliniꞌa uꞌnae. Ani kesimo apakaeꞌeꞌmo ohaneꞌniya kava huno himamuꞌaꞌe ha le konali yaꞌaꞌeꞌmo apakaeꞌeꞌmo ohaneꞌniye.
62 Agaemo agaiꞌa vayaꞌaifeꞌmo aipamo leno apateteno kame vayaꞌapimo alino apateꞌnigeꞌa eꞌa naipeletiꞌmo apaiꞌnae.
63 Kame huteꞌapaeꞌmo neya vayaꞌapimo kamiti apaiꞌnageꞌa faliꞌnageꞌapaeꞌmo aꞌmafaꞌneꞌapimo veleꞌmo oꞌmaiꞌa afaꞌa maiꞌnae.
64 Kame vayaꞌapimogimo mono huꞌa neꞌapataya vayaꞌapimo kamiti apaiꞌnageꞌapaeꞌmo aꞌneꞌapimogimo yulagefa oꞌaige aviꞌya huꞌa oꞌapatege huꞌnae.
65 Ani kavaꞌmo huꞌa maiꞌnagenoꞌaeꞌmo apaupatiꞌmo he netiya kava huno Ala kava neꞌmo he tiꞌniye. Lokiya vekamoꞌa nofi alagafati aniꞌmo netenoꞌaeꞌmo alopa gefatiꞌmo ge nehiya kava huno Ala kava neꞌmo malage huno he tiꞌniye.
66 Malage huno kame vayaꞌamo alino hapa faino apataleꞌnigeno apavagage huꞌnigeꞌa uꞌa maiꞌnae.
67-68 Agaemo vayaꞌaleꞌmo yagaiꞌa apatesayafeꞌmo Yosefe aginago vayapatiꞌmo lekana paino oꞌapateno apataleno uno Ifalemi nofi vayapatiꞌmo lekana paino oꞌapateno apataleno uno Yuta nofi vayapatikeꞌmo lekana paino apateteno Saiyoni aveeꞌmo hauꞌniya avemo lekana paino ateꞌniye.
69 Agaemo ani aveleꞌmo mono noꞌamo avegana huno ki maleꞌniye. Ma mopamo lokiya vaino haneꞌniya kava huno noꞌamo lokiya noꞌmo ki maleꞌniye.
70-71 Agaemo Yuta nofi vayapatiꞌmo Neviniꞌmo lekana paino ateteno sipisipileꞌmo yagaino maiꞌniya kotegatiꞌmo avalelino uno Isaleli vayaꞌaiteꞌmo yagaino apatesiya kini vekamo ateꞌniye.
72 Ateꞌnigeno Neviniꞌa aliꞌyaꞌalefekeꞌmo agesamo afiteno alagepa huno yagaino apateꞌniye.