96
Ala kava neꞌmo agiꞌaleꞌmo alino asaga huno ateꞌniya gemae
1 Ala kava nefeꞌmo saufa yokemo hiyo. Muki ma mopafi vayaꞌmogimo Ala kava nefekeꞌmo yokemo hiyo.
2 Ala kava nefeꞌmo yokemo hutetapa agiꞌaleꞌmo alitapa asaga hiyo. Lagufamo alino katino lateꞌniye, hutapa muki afinaꞌae afinaꞌaeꞌmo aeta hakalo hutapa hapa paiyo.
3 Ala agiꞌamo amitetapaeꞌmo aliꞌyaꞌmo aliꞌniya kavaꞌaenagi lokiya kavaꞌmo huꞌniya kavaꞌaenagi huta muki vayaꞌaifeꞌmo ava gemo hutapa hapa paiyo.
4 Ala kava neꞌmo maiꞌniyaꞌmofeꞌmo magoꞌe hutapa agiꞌaleꞌmo alitapa asaga hiyo. Aigofe gotiꞌapimogimo alagi aeno apakaseꞌniyaꞌmofeꞌmo agaefekeꞌmo magoꞌe hutapa koli nehutapa mono hiyo.
5 Muki alu nofi vaya alu nofi vayaꞌai gotiꞌapimogimo aigofe gotigi maiꞌnayaꞌmonanafa Ala kava neꞌmoꞌa kokuꞌnaꞌmo alo huꞌniye.
6 Ha le konali yaꞌamo haneꞌnigeno kini vekamo maiꞌniye. Lokiya vekamo maiꞌnigeꞌa hapaꞌye huꞌnigeꞌapaeꞌmo neꞌagaya vekamo maiꞌniye.
7 Muki ma mopafi vayaꞌmogitapae, huꞌna, Ala kava neꞌmo agiꞌaleꞌmo alitapa asaga hutetapa ha le konali yaꞌaleꞌe lokiyaꞌaleꞌefeꞌmo agiꞌaleꞌmo alitapa asaga hiyo.
8 Ala agiꞌamo haneꞌniyaꞌmofeꞌmo agiꞌaleꞌmo alitapa asaga hutetapa ofalinimo alinita agaetegamo eyo.
9 Aote kavaꞌmo nehutapaekeꞌmo Ala kava nefeꞌmo mono hiyo. Muki ma mopafi vayaꞌmogitapamo agaefekeꞌmo atete hutapa maiyo.
10 Muki alu nofi vaya alu nofi vayaꞌaifeꞌmo, Ala kava neꞌmoꞌa yagaino neꞌmaiye, hutapa hapa paiyo. Mopamo alino lokiya vaino ateteno maleꞌniyanageno afaꞌa hanegaiye. Agaemo fatago kavaꞌmo nehunoꞌaeꞌmo muki vayaꞌmo alino fako huno apategaiye.
11 Kokuꞌnaꞌmogamo kamogaga aigenoꞌao mopamoꞌeꞌmo amogaga aino. Solovala aniꞌmogaꞌe solovala anipiꞌmo maiꞌnaya yaꞌmogiꞌeꞌmo alopa gefatiꞌmo huteꞌa apamogaga aiyo.
12 Hoyamogaꞌe hoyafiꞌmo haneꞌnaya neꞌyaꞌmogiꞌeꞌmo lapamogaga aiyo. Yahaofilaga yosamoꞌa alopa gefatiꞌmo huteno amogaga aigiye.
13 Ala kava neꞌmo muki ma mopafi vayaꞌaiteꞌmo yagaino apatesiyafeꞌmo eminegaiye. Agaemo alagi alagepa fatago kavaꞌmo huno muki ma mopafi vayaꞌaiteꞌmo yagaino apategaiye.