10
1 Vǎ puố̤vyá̤ thǐ꤮, thyáphú Cò́marya ki me̤lwóhteka̤ pé̤ Israelphú tahenuôrò, vǎ thè́plòshyo nyacò́ rò vǎ kwǐcò́bè̌ pé̤ nyacò́ dố èthǐ agně cò́.
2 Vǎ thè́gně tǎ̤te̤ lò̌ èthǐ ari-akyǎ akhu-akhyě, vǎ ki hésoluô̌ pé̤ thǐ ná èthǐ ari-akyǎ hénuôma aní̤ prè́. Èthǐ thè́plòshyo myápṳ̌ lṳ̂krwǒ me̤tǒ nyacò́ Cò́marya thè́plò tadû́rò bètǒ lṳ̂krwǒ me̤ phútěnuô èthǐ thè́gně lahyǎ to.
3 Cò́marya dyacò́dyate̤ ǔ aklyáaklǒ nuô èthǐ thè́gněplǒ to. Má̤tôkhónuô, èthǐ myápṳ̌ me̤htya ní̤dyédû lahyǎ ná èthǐklyáèthǐklǒ prè́. Phúnuôrò Cò́marya dyacò́dyate̤ ǔ aklyáaklǒ yěnuô èthǐ thè́plòthè́zṳ̂́ krwǒme̤ kuô̌ǔ taki꤮ to.
4 Thyáphú Cò́marya ki dyacò́dyate̤ lò̌ kayǎ dố a zṳ̂́e Krístu nuôtahe agněnuôrò, Krístu me̤htuô̌kyǎ plû́lò̌hò́ tè̤thyótè̤thya a tè̤taze-one tahe hò́.
Tè̤me̤lwóhteka̤ Yěnuôma Kayǎ Pwǒ̤꤮ Tôprè̤ Agně
5 Mosè rǎ pé̤ kayǎ dố a lṳ̂krwǒ me̤bè́ tè̤thyótè̤thya rò a htwǒhtya kayǎcò́kayǎte̤ dố Cò́marya anyěhyǎ tahe ari-akyǎ, rò a rǎ rò a hé, “Kayǎ dố a krwǒlṳ̂me̤ lốbǎ lò̌lò̌꤮ tè̤thyótè̤thya yětahenuô, a ki htwǒprè̤ tacṳ́prè̤ pǎ,” a rǎ rò a hé phúnuô.
6 Manárò kayǎ dố Cò́marya dyacò́dyate̤ è ná a tè̤zṳ̂́tè̤nyá̤ khukhyě tahenuô, a tǒbè sudyǎní̤, “Ǔpě kíré̤ htya (È́tǎ̤ Krístu) dố mò́khupě?” phúnuôto.
7 Htuô̌to a bè sudyǎní̤, “Ǔpě kíré̤ hítǎ̤ dố Luô̤̌ké̤nédò̌ (Rò me̤htwǒprè̤ ka̤khyě Krístu dố tè̤thyě) pě?” phúnuôto.
8 Manárò, Cò́marya dyacò́dyate̤ ǔ aklyáaklǒ nuôma a hé phútě? Rò a hé, “Cò́marya alǎ̤angó̤ ophû tatò cò́ ná nè̤ cò́. A o prè́ bí nè̤ khǎuphálo̤nuô prè́, a o prè́ bí nè̤ thè́plòkǔ nuôprè́.” Nuôma má̤hò́ tè̤zṳ̂́ a tè̤thè́krṳ̂̌mila dố pè̤ dônyǎ pé̤ thǐyě nuôhò́.
9 Ki nè̤ ò́lya̤ ná nè̤khǎu rò nè̤ ki hé ná Jesǔ ma Byacè tôprè̤ rò nè̤ ki zṳ̂́e dố nè̤ thè́plòkǔ ná Cò́marya me̤htwǒprè̤ ka̤khyě Jesǔ dố tè̤thyě kihénuô, nè̤ ki ní̤bè tè̤siplè́ka̤ pǎ.
10 Me̤těhérò, kayǎ dố a zṳ̂́e dố a thè́plòkǔ tahenuô, Cò́marya ki dyacò́dyate̤ lǔ. Htuô̌rò kayǎ dố a ò́lya̤ ná akhǎu tahenuô, a ní̤bèhò́ tè̤siplè́ka̤ hò́.
11 Lisǎsè̌kǔ hé Jesǔ ari-akyǎ, “Ǔpě bèbè, dố a zṳ̂́enyá̤e lǔ tahenuô, a ki tuố̤dố tè̤ lé̤thè́plòpyé akhǎlé̤ nuô a o takhyá꤮ to.”
12 Me̤těhérò Judaphú ná Judaphú má̤to tahenuô a lé̤khólé̤khye lǔnuô, a o ná tôcô꤮ to. Lò̌꤮ prè̤ zṳ̂́etè̤phú yětahe nuôma a Byacè oró̤lǔ tôprè̤꤮ tuô̌ prè́. Kayǎ dố a kwǐhtya lǔ tè̤me̤cwó̤ tahenuô, a sò̌ri tǎ̤pòtǎ̤pè̤̌ pé̤ cò́ èthǐ cò́.
13 Me̤těhérò, phú lisǎsè̌ hé, “Ǔpěpě꤮ bèbè dố a kwǐhtya tè̤me̤cwó̤ dố Byacè a o tahenuô, Byacè Cò́marya ki me̤lwóhteka̤ lǔ pǎ.”
14 Ki me̤phúnuôrò, èthǐ tè̤zṳ̂́ ki oto hérò a cuố kwǐhtyacyá̤ tè̤me̤cwó̤ dố Byacè Jesǔ a o phútě? Ki èthǐ ní̤huô̌nò́ to hérò a cuố zṳ̂́ecyá̤ Byacè Jesǔ phútě? Prè̤dônyǎdyáso pé̤ èthǐ ki oto hérò èthǐ cuốní̤huô̌cyá̤ phútě?
15 Ǔ ki plwǒhyǎ prè̤dônyǎ dyáso pé̤ èthǐ to hérò èthǐ cuố dônyǎ hésocyá̤ pé̤ ǔ phútě? Lisǎsè̌kǔ hé, “Kayǎ dố a phyéhyǎ pé̤ tè̤thè́krṳ̂̌mila tahe akhǎduô nuô atwó̤ nyacò́.”
16 Manárò Israelphú tahenuô a phyésûlò̌ tè̤thè́krṳ̂̌mila pwǒ̤꤮ tôprè̤ to. Me̤těhérò, Prè̤pro̤ Isaiah hé, “Kố꤮ Byacè, maǔpě kíré̤ zṳ̂́ekuô̌ pè̤ tè̤ritè̤kyǎ yěnuô pě?”
17 Me̤phúnuôrò, tè̤zṳ̂́ ma a o dố tè̤ní̤huô̌ tè̤ritè̤kyǎ alo̤ hyǎ prè́. Dố ǔ dônyǎhéso pé̤ Krístu ari-akyǎ akhu-akhyěrò, ǔ ní̤huô̌nò́ kuô̌ tè̤ritè̤kyǎ prè́.
18 Manárò vǎ ki sudyǎ, “Ma èthǐ ní̤huô̌nò́ kuô̌ nyǎto è̌?” Vǎ ki hé, èthǐ ní̤huô̌nò́ vǎ. Lisǎsè̌kǔ hé,
“Èthǐ ngó̤pra̤ cuố lò̌hò́ dố hekhusǐbalò̌ hò́. Èthǐ alǎ̤angó̤ yěnuô a cuốtuố̤ lò̌hò́ dố hekhu tadû hò́.”
19 Vǎ ki sudyǎ khyěthyá, Israelphú tahe ma a thè́gněplǒkuô̌ nyǎ ǔ to è̌? Kayǎ dố a hésû ré̤lố ǔ nuôma Mosè hò́ rò a hé phúyě,
“Myěcôruô dố thǐ tane̤du kuô̌ lǔ to tahenuô, vǎ ki sò̌ri èthǐ rò nò̌thè́khwè́kuô̌ ná thǐ pǎ. Vǎ ki sò̌ri myěcôruôphú dố a thè́gněplǒbè́ kuô̌ vǎ to tahe rò vǎ nò̌thè́plòdu ná thǐ pǎ.”
20 Dốkhyě rò Prè̤pro̤ Isaiah hékhû̌héhǎ lốpó̤ cò́ rò a hé,
“Judaphú má̤to dố a yácû́ myápṳ̌kuô̌ vǎ to tahenuô, a myáhtyehò́ vǎ hò́, rò vǎ oluô̌htya pé̤ Judaphú má̤to tahe dố a pṳ̌ sudyǎkuô̌ vǎ to tahe hò́.”
21 Manárò, Prè̤pro̤ Isaiah rǎní̤ Israelphú tahe ari-akyǎ rò a hé,
“Vǎ o taritaryǎ opò̤́myásû̌sû vǎkayǎ ki ka̤khyětǒ khyěthyá dố vǎo tônyě꤮ mò̤́hé cò́, manárò èthǐ ní̤dǎ lahyǎ vǎngó̤ to, a khuklò́pryě̤ lahyǎ prè́.”