12
1 ꤊꤢ꤬ꤛꤢ꤭ ꤘꤣ ꤢꤨ꤭ ꤤ꤬ꤞꤛꤥꤚꤛꤢꤊꤟꤢ꤬ ꤜꤢꤨ꤭ ꤚꤢꤪ ꤢ꤬ ꤞꤢꤧꤊꤚꤟꤢꤦ꤭ ꤔꤌꤣ꤬, ꤢ꤬ ꤗꤟꤥ꤬ꤔꤟꤤ ꤟꤢꤪ ꤒꤟꤢꤧ꤬ꤞꤢꤧꤋꤢꤨ꤬ꤞꤢꤧꤑꤢꤩ꤭꤯
ꤊꤢ꤬ꤛꤢ꤭ ꤘꤣ ꤢꤨ꤭ ꤤ꤬ꤞꤛꤥꤚꤛꤢꤊꤟꤢ꤬ ꤜꤢꤨ꤭ ꤚꤢꤪ ꤢ꤬ ꤡꤟꤢꤨ꤭ꤒꤥ꤬ ꤔꤌꤣ꤬, ꤢꤧ꤬ ꤗꤢ꤬ ꤊꤢ꤬ꤛꤢ꤭ꤕꤢꤧꤍꤢꤪ꤯
2 ꤡꤢꤪꤗꤢ꤬ꤚꤛꤢ꤬ ꤗꤛꤢꤘꤢꤨ꤬ꤔꤟꤤ ꤊꤢ꤬ꤛꤢ꤭ꤚꤛꤢ꤯
ꤢ꤬ ꤕꤜꤤ ꤊꤢ꤬ꤛꤢ꤭ ꤘꤣ ꤢ꤬ ꤊꤚꤢꤩ꤬ꤗꤟꤢꤩ꤬ꤗꤢꤨ꤭ꤗꤟꤛꤢ ꤢꤨ꤭꤯
3 ꤊꤢ꤬ꤛꤢ꤭ ꤗꤟꤢꤩ꤬ ꤒꤟꤢꤧ꤬ꤗꤢꤨ꤭ꤗꤟꤛꤢ ꤔꤌꤣ꤬ꤗꤢ꤬, ꤢ꤬ ꤥ꤬ꤊꤜꤟꤢꤪ꤬ꤥ꤬ꤗꤢ꤬ ꤙꤢꤧ ꤔꤢ ꤒꤥ꤬꤯
ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤗꤢ꤬, ꤢ꤬ ꤥ꤬ꤊꤜꤟꤢꤪ꤬ꤥ꤬ꤗꤢ꤬ ꤒꤢ꤬ꤔꤛꤢ꤭ꤚꤛꤢ꤯
4 ꤗꤢꤩ꤭ ꤘꤣ ꤢ꤬ꤒꤟꤢꤧ꤬ꤊꤢ꤬ꤓꤢꤪ꤬ꤥ꤬ꤔꤛꤢ꤭ꤚꤛꤢ ꤔꤌꤣ꤬, ꤢ꤬ꤞꤛꤢꤔꤢ ꤢ꤬ꤠꤟꤢꤧ꤬ ꤊꤜꤝꤟꤥ꤭ꤓꤛꤢ꤬ꤔꤟꤤ ꤋꤢꤨ꤬ꤊꤜꤝꤟꤥ꤭ꤓꤢꤧ꤭꤯
ꤗꤢꤩ꤭ ꤘꤣ ꤢ꤬ ꤗꤟꤢꤩ꤬ꤒꤢ꤬ꤚꤟꤢꤧ꤭ꤔꤟꤤ ꤢ꤬ꤠꤟꤢꤧ꤬ ꤔꤌꤣ꤬, ꤢ꤬ꤞꤛꤢꤔꤢ ꤒꤟꤢꤧ꤬ꤏꤢꤧ꤭ꤗꤢꤨ꤭ꤗꤟꤛꤢ ꤥ꤬ ꤘꤣ ꤢ꤬ꤠꤟꤢꤧ꤬ꤊꤚꤝꤤꤊꤟꤤꤊꤢꤨ꤭꤯
5 ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤢ꤬ꤒꤟꤢꤧ꤬ꤒꤢ꤬ꤐꤛꤢꤩ꤬ꤥ꤬ꤔꤟꤢꤩ꤬ ꤔꤌꤣ꤬ꤗꤢ꤬ ꤢ꤬ꤒꤥ꤭ꤢ꤬ꤙꤢꤧ꤬꤯
ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤘꤛꤢꤩꤞꤢꤧꤑꤢꤩ꤭ꤡꤝꤟꤥ ꤜꤢ꤬ꤟꤥ꤭ ꤕꤚꤢꤧ ꤢꤨ꤭꤯
6 ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤢ꤬ꤍꤟꤥ ꤗꤢ꤬, ꤢ꤬ ꤤ꤬ꤏꤢꤧ꤭ꤞꤛꤢꤩ꤭ ꤢꤨ꤭꤯
ꤊꤢ꤬ꤛꤢ꤭ꤡꤢꤪꤡꤢꤦ ꤢ꤬ꤒꤟꤢꤧ꤬ꤟꤢꤩꤙꤢꤧ꤬ ꤗꤢ꤬, ꤢ꤬ ꤗꤟꤢꤩ꤬ꤏꤤ꤬ꤕꤜꤢꤧ ꤢꤨ꤭꤯
7 ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤞꤛꤢꤩ꤭ꤊꤛꤢ꤭ ꤚꤢꤪ ꤢ꤬ ꤥ꤬ꤗꤟꤢꤩꤊꤛꤢ꤭ꤕꤜꤢꤦ ꤡꤢꤪ꤯
ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤢ꤬ꤟꤤ꤬ꤖꤢꤨꤖꤛꤢ꤭ꤖꤢꤨ ꤊꤟꤢꤦ ꤥ꤬ꤊꤜꤟꤢꤪ꤬ꤥ꤬ꤗꤢ꤬꤯
8 ꤊꤢ꤬ꤛꤢ꤭ ꤘꤣ ꤢ꤬ ꤥ꤬ꤓꤝꤟꤥ꤭ꤕꤚꤟꤢꤧ꤬ ꤒꤟꤢ꤭ꤒꤟꤢꤩ꤬ ꤔꤌꤣ꤬ꤗꤢ꤬, ꤢꤨ꤭ ꤓꤢꤨ꤬ꤞꤢꤧꤔꤟꤤ ꤜꤢꤨ꤭꤯
ꤊꤢ꤬ꤛꤢ꤭ ꤘꤣ ꤢ꤬ꤞꤢꤧꤕꤜꤢꤪ꤬ꤊꤢ꤬ ꤔꤌꤣ꤬ꤗꤢ꤬, ꤢꤨ꤭ ꤒꤢ꤬ꤔꤟꤢꤩ꤬ꤕꤢ꤬ꤒꤤ ꤜꤢꤨ꤭꤯
9 ꤊꤢ꤬ꤛꤢ꤭ ꤘꤣ ꤢ꤬ꤗꤢꤧ꤬ꤞꤢꤧ꤬ ꤥ꤬ ꤊꤟꤌꤣ꤭ ꤢꤨ꤭ ꤒꤥ꤬ ꤚꤢꤪ ꤢ꤬ ꤕꤚꤟꤢꤧ꤬ꤗꤟꤢꤩ꤬ꤒꤟꤢꤧ꤬ꤖꤢꤨ ꤥ꤬ ꤕꤚꤢꤧ ꤒꤣ꤬ꤕꤚꤟꤢꤧ꤬ ꤔꤌꤣ꤬,
ꤢ꤬ꤚꤛꤢꤜꤣ꤮ ꤊꤜꤢꤪ꤭ ꤔꤢ ꤊꤢ꤬ꤛꤢ꤭ ꤘꤣ ꤢ꤬ ꤡꤟꤛꤢꤩ ꤢ꤬ꤔꤟꤢꤩ ꤖꤢꤨ ꤢ꤬ ꤓꤝꤟꤥ꤭ꤋꤢꤨ꤬ꤊꤜꤢꤪꤋꤢꤨ꤬ꤊꤜꤛꤢ꤭ ꤒꤣ꤬ꤕꤚꤟꤢꤧ꤬ ꤒꤢ꤬ꤘꤣ꤬ꤚꤢꤪ ꤢ꤬ ꤜꤟꤢꤩꤢꤩ꤬ꤜꤟꤢꤩꤥ꤭ ꤥ꤬ꤒꤥ꤬꤯
10 ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤗꤛꤢꤋꤝꤢꤧ꤬ꤚꤛꤢꤔꤟꤤ ꤢ꤬ꤒꤟꤢꤧ꤬ꤖꤢꤨꤒꤟꤢꤧ꤬ꤜꤟꤛꤢꤩ꤬꤯
ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤢ꤬ꤒꤟꤢꤧ꤬ꤞꤢꤧꤐꤟꤢꤪ꤬ ꤔꤌꤣ꤬ ꤢ꤬ꤡꤟꤛꤢꤩ꤭ꤢ꤬ꤡꤟꤢꤦ꤬ ꤕꤢ꤭ꤕꤚꤢꤧ ꤘꤣ ꤢ꤬ꤒꤟꤢꤧ꤬ꤖꤢꤨꤒꤟꤢꤧ꤬ꤜꤟꤛꤢꤩ꤬ ꤢ꤬ꤑꤢꤩ꤭ ꤕꤚꤢꤧ꤯
11 ꤊꤢ꤬ꤛꤢ꤭ꤊꤚꤟꤢꤦ꤭ ꤗꤢ꤬, ꤢ꤬ꤜꤟꤢꤩꤢꤩ꤬ꤜꤟꤢꤩꤥ꤭ ꤥ꤬ꤜꤣꤥ꤬ꤙꤢ꤭꤯
ꤊꤢ꤬ꤛꤢ꤭ ꤗꤟꤢꤩ꤬ ꤒꤟꤢꤧ꤬ꤒꤌꤣ꤭ꤘꤢꤩ꤭ ꤗꤢ꤬, ꤢ꤬ ꤋꤢꤨ꤬ꤊꤜꤢꤪꤔꤟꤢꤪ꤭ ꤥ꤬ꤒꤥ꤬꤯
12 ꤊꤢ꤬ꤛꤢ꤭ꤗꤢꤨ꤭ꤗꤟꤛꤢ ꤜꤟꤢꤪ꤭ꤕꤜꤤ꤭꤮ ꤗꤢ꤬, ꤢ꤬ ꤞꤢꤧꤐꤟꤢꤦ ꤊꤢ꤬ꤛꤢ꤭ꤡꤟꤛꤢꤩ꤭ꤚꤤ꤬ꤡꤟꤛꤢ ꤡꤛꤣꤕꤟꤢꤦꤖꤢꤩ꤬ꤔꤟꤤ ꤢꤨ꤭ꤒꤟꤢꤧ꤬ ꤔꤌꤣ꤬ꤒꤢ꤬ꤟꤢꤩ꤬꤯
ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤒꤢ꤬ꤟꤢꤩ꤬ ꤗꤢ꤬, ꤢ꤬ꤞꤛꤢꤔꤢ ꤞꤢꤪ꤬ꤗꤟꤢꤪ ꤘꤣ ꤢ꤬ꤚꤝꤟꤤ ꤏꤢꤒꤟꤢ꤭ꤐꤟꤢ꤭ ꤒꤢ꤬ꤔꤛꤢ꤭ꤚꤛꤢ ꤚꤢꤪ ꤢ꤬ꤞꤢꤧ꤬ꤓꤢꤩ꤬ꤖꤥ꤭ꤓꤢꤩ꤬ ꤔꤌꤣ꤬ꤒꤢ꤬ꤟꤢꤩ꤬꤯
13 ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤘꤣ ꤢ꤬ ꤟꤢꤩꤙꤢꤧ꤬ ꤗꤢꤨ꤭ꤗꤟꤛꤢꤚꤤ꤬ꤡꤟꤛꤢ ꤢꤨ꤭ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ꤕꤟꤛꤢꤗꤟꤢꤩ꤬ꤏꤢꤧ꤭ ꤔꤟꤤꤘꤛꤢꤩꤕꤚꤢꤧ ꤢ꤬ꤔꤟꤢꤩ꤯
ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤏꤤ꤬ꤕꤜꤢꤧꤊꤛꤢ꤭ ꤔꤢ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭꤯
14 ꤊꤢ꤬ꤛꤢ꤭ ꤘꤣ ꤢ꤬ ꤟꤢꤩꤙꤢꤧ꤬ ꤍꤟꤥꤚꤛꤢ ꤔꤌꤣ꤬, ꤢ꤬ ꤊꤟꤢꤦ ꤔꤟꤤꤙꤢꤧ꤬ꤘꤢꤦ꤬ ꤋꤝꤥꤊꤢꤧ꤬ ꤘꤣ ꤢ꤬ꤚꤛꤢ꤯
ꤊꤢ꤬ꤛꤢ꤭ ꤘꤣ ꤢ꤬ ꤗꤟꤢꤩ꤬ ꤒꤟꤢꤧ꤬ꤚꤛꤢ ꤔꤌꤣ꤬, ꤢ꤬ ꤊꤟꤢꤦ ꤔꤟꤤꤙꤢꤧ꤬ ꤋꤝꤥꤊꤢꤧ꤬ ꤘꤣ ꤢ꤬ꤞꤢ꤭ꤚꤛꤢ꤭꤯
15 ꤊꤢ꤬ꤛꤢ꤭ꤙꤢꤪ꤭ꤙꤛꤢꤩ꤬ ꤋꤢꤨ꤬ꤊꤜꤢꤪꤕꤚꤛꤢꤩ꤭ ꤒꤢ꤬ꤔꤟꤢꤩ꤬ ꤔꤟꤤꤘꤛꤢꤩ ꤢ꤬ꤔꤟꤢꤩ ꤔꤢ ꤢ꤬ ꤗꤟꤢꤩ꤬ꤒꤟꤢꤧ꤬ ꤔꤌꤣ꤬ ꤢ꤬ꤒꤥ꤭꤯
ꤊꤢ꤬ꤛꤢ꤭ꤞꤤꤖꤢꤧ ꤔꤟꤤꤘꤢ꤭ ꤢꤨ꤭ ꤒꤟꤢꤧ꤬ꤘꤛꤢꤩꤞꤢꤧꤑꤢꤩ꤭ꤡꤝꤟꤥ ꤜꤢꤨ꤭꤯
16 ꤙꤤ ꤊꤢ꤬ꤛꤢ꤭ꤙꤢꤪ꤭ꤙꤛꤢꤩ꤬ ꤋꤢꤨ꤬ꤊꤜꤢꤪꤕꤚꤛꤢꤩ꤭ ꤞꤢꤧꤕꤜꤢꤪ꤬ꤘꤢꤨ꤬ ꤢ꤬ꤋꤢꤧ꤭ꤔꤌꤣ꤬, ꤢꤨ꤭ ꤞꤢꤧꤑꤢꤩ꤭ ꤒꤣ꤬ꤖꤟꤌꤣꤒꤌꤣ꤭꤯
ꤙꤤ ꤢꤨ꤭ ꤕꤢ꤬ꤡꤟꤛꤢꤩ ꤊꤢ꤬ꤛꤢ꤭ꤜꤤ꤬ꤗꤛꤢ꤭ ꤢ꤬ꤋꤢꤧ꤭ꤔꤌꤣ꤬, ꤢ꤬ ꤘꤛꤢꤒꤢ꤬ꤊꤜꤝꤥ꤬ꤏꤢꤦ꤬ꤊꤛꤢ꤭ ꤕꤚꤢꤧ꤯
17 ꤊꤢ꤬ꤛꤢ꤭ꤡꤢꤪ ꤋꤛꤢꤞꤢꤧ ꤗꤢ꤬, ꤢ꤬ ꤟꤢꤩꤡꤢꤪ꤯
ꤊꤢ꤬ꤛꤢ꤭ꤊꤢ꤬ ꤋꤛꤢꤞꤢꤧ ꤗꤢ꤬, ꤢ꤬ ꤟꤢꤩꤜꤢ꤬ꤟꤥ꤭꤯
18 ꤍꤟꤥ ꤙꤢꤪ꤭ꤙꤛꤢꤩ꤬ ꤗꤢ꤬, ꤢ꤬ꤓꤛꤢ꤭ ꤞꤛꤢꤔꤢ ꤔꤢꤧ꤯
ꤍꤟꤥ ꤞꤤꤖꤢꤧ ꤗꤢ꤬, ꤢ꤬ ꤗꤟꤢꤩ꤬ꤏꤤ꤭ꤗꤟꤢꤩ ꤢꤨ꤭ꤒꤟꤢꤧ꤬ꤏꤢꤧ꤭꤯
19 ꤍꤟꤥꤡꤢꤪꤒꤟꤢꤩ꤬ ꤚꤢꤪ ꤢ꤬ ꤥ꤬ꤊꤜꤟꤢꤪ꤬ꤗꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬꤯
ꤍꤟꤥꤜꤢ꤬ꤟꤥ꤭ ꤚꤢꤪ ꤢ꤬ ꤥ꤬ꤜꤟꤌꤣ꤭ ꤒꤢ꤬ꤕꤜꤟꤣ꤬ꤖꤢꤨ ꤕꤚꤢꤧ꤯
20 ꤒꤟꤢꤧ꤬ꤜꤢ꤬ꤟꤥ꤭ꤜꤢ꤬ꤟꤛꤢ꤬ ꤥ꤬ ꤘꤣ ꤕꤚꤟꤢꤧ꤬ꤊꤚꤢꤩ꤬ꤗꤟꤢꤩ꤬ꤗꤢꤨ꤭ꤗꤟꤛꤢ ꤒꤟꤢꤧ꤬ ꤢ꤬ꤞꤢꤧꤕꤜꤢꤪ꤬ꤊꤢꤨ꤭꤯
ꤊꤢ꤬ꤛꤢ꤭ ꤗꤟꤢꤩ꤬ꤊꤚꤟꤢꤦ꤭ꤊꤜꤢꤧ꤭ ꤒꤟꤢꤧ꤬ ꤔꤌꤣ꤬ꤗꤢ꤬, ꤢ꤬ ꤞꤢꤧꤊꤚꤟꤢꤦ꤭꤯
21 ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤗꤢ꤬, ꤒꤟꤢꤧ꤬ꤗꤢꤨ꤭ꤗꤟꤛꤢ ꤟꤛꤢ꤭ꤙꤢꤧ꤬ꤡꤟꤛꤢ ꤜꤢꤨ꤭ ꤒꤥ꤬꤯
ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤗꤢ꤬, ꤢ꤬ ꤋꤛꤢꤙꤢꤧ꤬ ꤒꤢ꤬ꤗꤥ꤭ ꤡꤢꤪ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭꤯
22 ꤡꤢꤪꤗꤢ꤬ꤚꤛꤢ꤬ ꤞꤢꤧꤐꤟꤢꤪ ꤊꤢ꤬ꤛꤢ꤭ ꤜꤢ꤬ꤟꤥ꤭꤯
ꤢ꤬ ꤗꤛꤢꤗꤟꤥ꤬ꤔꤟꤤ ꤊꤢ꤬ꤛꤢ꤭ ꤡꤢꤪꤔꤢꤍꤟꤥ꤯
23 ꤊꤢ꤬ꤛꤢ꤭ꤜꤤ꤬ꤗꤛꤢ꤭ ꤙꤢꤩ꤬ꤢꤟꤌꤣꤘꤛꤢꤩ ꤢ꤬ꤒꤟꤢꤧ꤬ꤞꤢꤧꤑꤢꤩ꤭꤯
ꤊꤢ꤬ꤛꤢ꤭ꤒꤢ꤬ꤊꤢꤧ꤬ ꤢꤧꤓꤥ꤭ꤓꤢꤩ꤬ꤜꤟꤌꤣ꤭ꤘꤛꤢꤩ ꤢ꤬ꤒꤟꤢꤧ꤬ꤗꤟꤢꤩ꤬ꤒꤢ꤬ꤊꤢꤧ꤬꤯
24 ꤊꤢ꤬ꤛꤢ꤭ꤢꤛꤢꤡꤢꤦ ꤊꤟꤢꤦ ꤓꤝꤟꤥ꤭ꤘꤢꤨ꤬ꤔꤟꤤ ꤕꤢ꤭꤯
ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭ ꤊꤟꤢꤦ ꤓꤝꤟꤥ꤭ ꤕꤚꤢꤧ ꤢꤨ꤭ꤡꤟꤢꤦ꤯
25 ꤞꤢꤧꤕꤜꤢꤪ꤬ꤊꤟꤢꤨꤊꤟꤛꤢ꤭ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ꤕꤛꤢꤩꤗꤟꤢꤩ꤬ꤊꤛꤢ꤭ ꤢꤨ꤭ꤞꤢꤧꤕꤜꤢꤪ꤬꤯
ꤍꤟꤥꤗꤟꤥ꤬ꤍꤟꤥꤚꤛꤢ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ ꤞꤢꤧꤊꤚꤟꤢꤦ꤭ꤞꤢꤧꤜꤟꤢꤪ꤭ ꤜꤢꤨ꤭꤯
26 ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤗꤢ꤬, ꤢ꤬ ꤐꤟꤢꤨ꤭ ꤕꤢꤩ ꤢ꤬ꤋꤥ꤭ ꤊꤜꤛꤢ꤯
ꤊꤢ꤬ꤛꤢ꤭ꤚꤤ꤬ꤡꤟꤛꤢ ꤗꤢ꤬, ꤢ꤬ ꤡꤛꤣꤊꤜꤛꤢ ꤔꤌꤣ꤬ꤒꤣ꤬ꤙꤥ꤭ ꤞꤢꤨ꤭ꤞꤢꤦꤔꤟꤤ ꤋꤛꤢꤩ꤭ꤞꤛꤢꤘꤢꤦ꤬ ꤜꤢꤨ꤭꤯
27 ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭ ꤔꤌꤣ꤬, ꤢ꤬ ꤏꤢꤦꤢꤩ꤬ ꤊꤟꤌꤣ꤭ ꤢ꤬ꤒꤟꤢꤧ꤬ꤗꤟꤤ꤬ꤐꤛꤢꤩ꤬ ꤒꤥ꤬꤯
ꤊꤢ꤬ꤛꤢ꤭ꤊꤚꤟꤢꤦ꤭ ꤔꤌꤣ꤬, ꤢ꤬ ꤊꤟꤢꤦ ꤘꤢꤨ꤬ꤐꤟꤢ ꤕꤢ꤭꤯
28 ꤊꤜꤛꤢꤡꤢꤪꤊꤜꤛꤢꤒꤟꤢꤩ꤬ ꤘꤛꤢꤩ ꤔꤢ꤬ꤘꤢꤨ꤬ꤜꤢꤧ꤭ꤓꤢꤨ꤭ ꤥ꤬ꤗꤟꤥ꤬ꤥ꤬ꤖꤝꤤ꤭ꤔꤟꤤ ꤢꤨ꤭꤯
ꤊꤜꤛꤢ ꤔꤌꤣ꤬ꤒꤣ꤬ꤙꤥ꤭ ꤗꤢ꤬, ꤢ꤬ ꤞꤢꤨ꤭ꤡꤛꤣ ꤢꤨ꤭ ꤘꤣ ꤒꤟꤢꤧ꤬ꤞꤛꤢꤩ꤭ ꤒꤥ꤬꤯