20
1 ꤊꤢ꤬ꤛꤢ꤭ ꤥ꤭ꤏꤛꤥ꤬ ꤎꤢ꤬ꤕꤛꤤꤓꤛꤢꤩ꤭ꤐꤟꤢ꤭ ꤔꤌꤣ꤬, ꤢ꤬ ꤕꤢ꤬ꤡꤟꤛꤢꤩꤤ꤬ꤏꤛꤢꤩ ꤢꤨ꤭꤯
ꤊꤢ꤬ꤛꤢ꤭ ꤥ꤭ꤢꤧ ꤓꤛꤢꤩ꤭ꤏꤤꤕꤚꤟꤢꤩ ꤔꤌꤣ꤬, ꤢ꤬ ꤗꤟꤢꤩ꤬ ꤒꤢ꤬ꤚꤢꤦ꤭ꤒꤢ꤬ꤕꤛꤢ꤭ ꤢꤨ꤭꤯
ꤊꤢ꤬ꤛꤢ꤭ ꤗꤟꤢꤩ꤬ꤞꤢꤦ ꤒꤟꤢꤧ꤬ ꤖꤢꤨꤛꤢꤩ꤭ ꤒꤢ꤬ꤟꤢꤩ꤬ꤔꤌꤣ꤬, ꤢ꤬ꤒꤟꤢꤧ꤬ꤞꤤꤒꤟꤢꤧ꤬ꤖꤢꤧ ꤥ꤬ꤒꤥ꤬꤯
2 ꤋꤝꤤ ꤢ꤬ꤒꤟꤢꤧ꤬ꤞꤢꤧꤕꤜꤢꤪ꤬ꤘꤢꤨ꤬ ꤜꤟꤤ꤬ꤊꤢ꤬ꤞꤝꤤ ꤔꤌꤣ꤬, ꤢ꤬ꤞꤛꤢꤡꤢꤪꤔꤢ ꤢꤛꤢ꤭ꤞꤤ꤭ ꤊꤟꤢꤪꤒꤢ꤬ꤍꤟꤢꤧ꤬꤯
ꤔꤟꤢꤧ꤬ ꤊꤤ꤬ ꤗꤟꤢꤩ꤬ꤞꤢꤧꤕꤜꤢꤪ꤬ꤘꤢꤨ꤬ ꤋꤝꤤ ꤟꤢꤩꤗꤢ꤬, ꤢ꤬ ꤊꤟꤢꤦ ꤗꤟꤢꤩ꤬ꤞꤛꤢꤩ꤭ ꤔꤟꤢꤧ꤬ ꤕꤢ꤭꤯
3 ꤊꤢ꤬ꤛꤢ꤭ ꤘꤣ ꤢ꤬ꤊꤜꤛꤢꤩꤢ꤬ꤍꤢ꤭ ꤊꤟꤌꤣ꤭ꤢꤨ꤭ ꤒꤥ꤬ꤔꤌꤣ꤬, ꤢꤨ꤭ ꤘꤛꤢ꤬ꤘꤢꤨ꤬ꤐꤟꤢꤦꤑꤟꤢ ꤜꤢꤨ꤭꤯
ꤜꤟꤢꤪ꤭꤮ ꤊꤢ꤬ꤛꤢ꤭ꤙꤢꤪ꤭ꤙꤛꤢꤩ꤬ ꤋꤢꤨ꤬ꤊꤜꤢꤪꤕꤚꤛꤢꤩ꤭ ꤒꤢ꤬ꤟꤢꤩ꤬ ꤔꤌꤣ꤬, ꤢ꤬ꤊꤜꤛꤢꤩꤐꤢꤨ꤭ ꤔꤛꤢ꤬ꤡꤢꤪ ꤜꤢꤨ꤭꤯
4 ꤊꤢ꤬ꤛꤢ꤭ꤒꤢ꤬ꤊꤜꤢꤩ꤭, ꤓꤢ ꤊꤟꤌꤣ꤭ꤢꤨ꤭ ꤢ꤬ꤕꤚꤢꤧ ꤙꤤ ꤢꤨ꤭ ꤒꤥ꤭ꤓꤢ ꤢ꤬ꤏꤛꤣꤋꤢꤧ꤭ ꤔꤌꤣ꤬ꤒꤥ꤬꤯
ꤙꤤ ꤕꤚꤌꤣꤋꤢꤧ꤭ ꤔꤌꤣ꤬, ꤢ꤬ ꤡꤛꤣꤗꤛꤢꤕꤟꤢꤨ꤭ ꤖꤛꤢꤩꤊꤟꤢ꤬ ꤊꤟꤌꤣ꤭ꤢꤨ꤭ ꤒꤢ꤬ꤘꤣ꤬ꤚꤢꤪ, ꤢ꤬ ꤗꤛꤢꤓꤛꤢꤩ꤬ ꤊꤟꤌꤣ꤭ꤢꤨ꤭ ꤒꤟꤢꤧ꤬ꤞꤢꤧ꤬ꤒꤟꤢꤧ꤬ꤖꤥ꤭ ꤒꤣ꤬ꤖꤥ꤬꤮ ꤒꤥ꤬꤯
5 ꤕꤚꤟꤢꤧ꤬ꤜꤟꤢꤨ꤬ꤊꤢ꤬ꤛꤢ꤭ ꤢ꤬ꤒꤟꤢꤧ꤬ꤒꤢ꤬ꤐꤛꤢꤩ꤬ꤥ꤬ꤔꤟꤢꤩ꤬ ꤘꤣ ꤢ꤬ꤞꤢꤧꤕꤜꤢꤪ꤬ꤊꤢꤨ꤭ ꤔꤌꤣ꤬ꤗꤢ꤬, ꤢ꤬ꤞꤛꤢꤔꤢ ꤓꤛꤢꤩ꤭ꤊꤜꤢꤦ꤬ꤐꤟꤢ꤭ ꤘꤣ ꤘꤛꤢꤥ꤭ ꤚꤢꤪ ꤢ꤬ꤐꤢꤨ꤭ꤒꤥ꤬ ꤔꤌꤣ꤬ꤟꤢꤪ꤯
ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤑꤢꤩ꤭ꤕꤜꤥ꤭ꤖꤢꤧ ꤔꤌꤣ꤬, ꤢ꤬ ꤊꤟꤢꤦ ꤕꤟꤢꤨ꤭ꤞꤢꤧꤑꤢꤩ꤭ꤔꤟꤤꤘꤢꤦ꤬ ꤜꤢꤨ꤭ ꤕꤢ꤭꤯
6 ꤊꤢ꤬ꤛꤢ꤭ꤢꤧꤕꤚꤟꤢꤧ꤬ ꤟꤢꤩꤏꤥ꤬ꤓꤢꤩ꤬ꤜꤟꤌꤣ꤭ ꤘꤛꤢꤩ ꤢ꤬ꤒꤟꤢꤧ꤬ꤗꤟꤥ꤬ ꤘꤣ ꤢ꤬ꤜꤟꤢꤪ꤭ꤕꤟꤢꤩꤡꤟꤛꤢ ꤒꤥ꤬꤯
ꤊꤟꤢꤦꤚꤟꤢꤩ ꤗꤛꤢꤓꤛꤢꤩ꤬ ꤊꤢ꤬ꤛꤢ꤭ ꤘꤣ ꤢ꤬ ꤡꤢꤪꤔꤢꤍꤟꤥ ꤔꤌꤣ꤬ ꤢ꤬ꤐꤢꤨ꤭ ꤒꤥ꤬꤯
7 ꤊꤢ꤬ꤛꤢ꤭ꤡꤢꤪꤒꤟꤢꤩ꤬ ꤞꤢꤨ꤭ꤡꤛꤣ ꤢꤨ꤭ ꤘꤣ ꤒꤟꤢꤧ꤬ꤥ꤬ꤓꤝꤟꤥ꤭ꤕꤚꤟꤢꤧ꤬ ꤡꤢꤪꤒꤟꤢꤩ꤬꤯
ꤢ꤬ꤖꤢꤨꤢ꤬ꤜꤟꤛꤢꤩ꤬ ꤊꤚꤝꤥ꤭ꤔꤟꤤꤙꤢꤧ꤬ ꤊꤟꤌꤣ꤭ ꤒꤟꤢꤧ꤬ꤏꤢꤪ꤭ꤚꤤ꤬꤯
8 ꤙꤤ ꤋꤝꤤ ꤥ꤬ꤔꤛꤢ꤭ꤥ꤬ ꤘꤣ ꤢ꤬ꤋꤢꤨ꤬ꤊꤜꤛꤢꤓꤢꤧ꤭ꤓꤛꤢ꤬ꤜꤣ꤭ꤋꤢꤨ꤬ ꤚꤢꤪ ꤢ꤬ ꤟꤢꤩꤙꤢꤧ꤬ꤓꤌꤣ꤭ꤟꤢꤩꤙꤢꤧ꤬ꤕꤜꤢꤦ ꤕꤢꤩ ꤢꤨ꤭ ꤢ꤬ꤋꤢꤧ꤭ꤔꤌꤣ꤬,
ꤢ꤬ ꤙꤢꤩ꤭ꤖꤢꤧꤡꤟꤛꤢ ꤢꤨ꤭ ꤗꤟꤢꤩ꤬ ꤒꤟꤢꤧ꤬ꤚꤛꤢ ꤔꤢ ꤒꤟꤢꤧ꤬ꤗꤢꤨ꤭ꤗꤟꤛꤢ꤯
9 “ꤠꤢ꤭ꤞꤢꤧꤕꤜꤢꤪ꤬ꤚꤛꤢ ꤕꤚꤢꤧ, ꤠꤢ꤭ ꤒꤟꤢꤧ꤬ꤞꤢꤦ ꤥ꤬ꤒꤥ꤬,” ꤢꤨ꤭ ꤟꤢꤩꤙꤢꤧ ꤖꤢꤨꤔꤌꤣ꤬ ꤒꤣ꤬ꤕꤚꤟꤢꤧ꤬꤮ ꤒꤥ꤬꤯
10 ꤜꤢꤨ꤬ꤋꤛꤢ ꤘꤣ ꤢ꤬ ꤜꤟꤛꤢ꤬ꤓꤌꤣ꤬ ꤒꤥ꤭ꤙꤢꤧ꤬ ꤒꤥ꤬,
ꤡꤟꤥ꤭ ꤘꤣ ꤢ꤬ꤒꤥ꤭ꤒꤥ꤬ ꤒꤢ꤬ꤟꤢꤩ꤬ꤔꤌꤣ꤬, ꤡꤢꤪꤗꤢ꤬ꤚꤛꤢ꤬ ꤞꤢꤧꤐꤟꤢꤪꤜꤟꤢꤪ꤭ ꤔꤛꤢꤩ꤭ꤡꤣ꤬꤯
11 ꤕꤢ꤬ꤡꤟꤢꤧꤖꤢꤨ ꤡꤢꤪ ꤙꤢꤧ꤬ꤙꤢꤧ꤬, ꤘꤣ ꤢꤧ꤬ꤞꤤ꤭ ꤗꤟꤢꤩ꤬ꤒꤟꤢꤧ꤬ ꤋꤢꤨ꤬ꤋꤛꤢꤩ꤭, ꤢꤨ꤭ ꤞꤢꤧꤑꤢꤩ꤭ꤡꤟꤛꤢ ꤢꤧ꤬ꤞꤤ꤭ꤞꤢꤧꤕꤜꤢꤪ꤬꤯
ꤘꤣ ꤢꤧ꤬ꤞꤤ꤭ ꤢ꤬ꤒꤟꤢꤧ꤬ꤊꤢ꤬ꤓꤢꤪ꤬ꤥ꤬ꤔꤛꤢ꤭ ꤋꤢꤨ꤬ꤋꤛꤢꤩ꤭, ꤢꤧ꤬ꤞꤤ꤭ ꤗꤢ꤬ ꤢ꤬ ꤞꤢꤧꤕꤜꤢꤪ꤬ꤗꤝꤟꤥ꤭ꤕꤜꤤ꤭ ꤟꤟꤢꤧ꤭, ꤢ꤬ ꤡꤢꤪꤡꤢꤦ ꤟꤟꤢꤧ꤭ ꤔꤌꤣ꤬ ꤞꤢꤧꤑꤢꤩ꤭ꤡꤟꤛꤢ ꤕꤚꤢꤧ꤯
12 ꤋꤢ꤭ꤜꤢꤧ꤬ ꤘꤣ ꤢ꤬ꤜꤤ꤭, ꤗꤢꤧ꤬ꤞꤢꤧ꤬ ꤘꤣ ꤢ꤬ꤜꤤ꤭ ꤔꤌꤣ꤬ꤗꤢ꤬, ꤡꤢꤪꤗꤢ꤬ꤚꤛꤢ꤬ ꤙꤛꤢꤜꤟꤛꤢ꤬ ꤜꤟꤢꤪ꤭ꤕꤜꤤ꤭꤯
13 ꤔꤟꤢꤧ꤬ ꤊꤤ꤬ ꤥ꤬ꤗꤛꤢꤩ꤭ ꤒꤢ꤬ꤘꤢꤦ꤬ꤘꤢꤦ꤬ ꤟꤢꤩꤗꤢ꤬, ꤔꤟꤢꤧ꤬ ꤊꤟꤢꤦ ꤏꤥ꤭ꤚꤟꤛꤢ꤬ ꤕꤢ꤭꤯
ꤔꤟꤢꤧ꤬ ꤊꤤ꤬ ꤥ꤬ꤞꤢ꤭ꤊꤜꤛꤢ꤭ ꤚꤟꤛꤢ꤬ꤒꤟꤢꤧ꤬ ꤟꤢꤩꤗꤢ꤬, ꤔꤟꤢꤧ꤬ꤜꤟꤢꤩꤢꤩ꤬ꤜꤟꤢꤩꤥ꤭ ꤊꤟꤢꤦ ꤥ꤬ꤜꤣꤥ꤬ꤙꤢ꤭꤯
14 ꤕꤚꤟꤢꤧ꤬ꤤ꤬ꤕꤚꤟꤤ꤬ ꤟꤢꤩꤜꤢ꤬ꤟꤛꤢ꤭ ꤔꤢ, “ꤢ꤬ꤚꤛꤢ ꤒꤥ꤬, ꤢ꤬ꤍꤟꤢꤨ꤬ꤘꤢꤨ꤬ ꤏꤢꤦ꤭ꤜꤢꤦ꤭꤯”
ꤢ꤬ ꤤ꤬ꤕꤚꤟꤤ꤬ꤍꤟꤢꤨ꤬ꤊꤢꤪ꤬ꤔꤟꤤ ꤓꤌꤣ꤭ ꤒꤟꤢ꤭ꤤ꤭ꤒꤟꤢꤧ꤬ ꤚꤢꤪ ꤢ꤬ ꤡꤛꤣꤓꤢꤨ꤬ꤞꤢꤧ ꤔꤟꤤ ꤘꤛꤢꤩ꤯
15 ꤓꤢꤧ꤭ ꤥ꤬ꤢꤧ, ꤜꤟꤢꤪꤍꤟꤢꤨ꤬ꤘꤢꤨ꤬ ꤥ꤬ꤕꤜꤢꤨ꤬꤯
ꤕꤚꤟꤢꤧ꤬ꤞꤢꤧꤋꤢꤨ꤬ꤞꤢꤧꤑꤢꤩ꤭ ꤢ꤬ꤍꤟꤥ ꤗꤢ꤬, ꤢ꤬ ꤍꤟꤢꤨ꤬ꤕꤚꤟꤤ꤬ꤘꤢꤨ꤬ꤜꤣ ꤊꤜꤢꤪ꤭ꤕꤢ꤭ ꤔꤢ ꤒꤟꤢꤧ꤬ ꤔꤌꤣ꤬ꤒꤢ꤬ꤟꤢꤩ꤬꤯
16 ꤊꤢ꤬ꤛꤢ꤭ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤊꤤ꤬ ꤢꤪꤜꤟꤛꤢ꤬ ꤔꤢ ꤢ꤬ ꤕꤜꤢꤕꤢꤩ ꤊꤢ꤬ꤛꤢ꤭ ꤘꤣ ꤔꤟꤢꤧ꤬ ꤞꤢꤧꤑꤢꤩ꤭ ꤔꤢꤪ꤭ ꤜꤢꤨ꤭ ꤒꤥ꤬ ꤒꤣ꤬ꤕꤚꤟꤢꤧ꤬ꤕꤚꤟꤢꤧ꤬ ꤢ꤬ꤏꤢꤨ꤬ ꤕꤢ꤭ ꤟꤢꤩꤗꤢ꤬, ꤖꤛꤢꤩꤥ꤬ꤗꤢ꤬ ꤊꤛꤢ꤭ ꤜꤢꤨ꤭ꤡꤟꤢ꤬ꤊꤜꤢꤪ꤭ ꤔꤌꤣ꤬꤯
ꤖꤛꤢꤩ ꤥ꤬ ꤒꤟꤌꤣ ꤘꤣ ꤢ꤬ ꤕꤜꤢꤙꤢꤧ ꤋꤛꤢꤩ꤭ꤞꤛꤢ ꤢ꤬ꤏꤢꤨ꤬ ꤔꤌꤣ꤬ ꤔꤤ꤯
17 ꤏꤢꤧ꤬ꤢꤩ꤬ ꤘꤣ ꤜꤢ꤬ꤟꤥ꤭ꤢꤩ꤬ ꤢꤨ꤭ꤋꤢꤨ꤬ ꤔꤌꤣ꤬ꤗꤢ꤬, ꤢ꤬ꤠꤤ꤬꤯
ꤘꤣ꤮ ꤋꤛꤢꤩ꤭ꤒꤢ꤬ꤘꤢꤦ꤬ ꤔꤌꤣ꤬, ꤢ꤬ ꤊꤟꤢꤦ ꤙꤢꤧ꤬ꤕꤟꤛꤢꤙꤢꤧ꤬ꤏꤢꤧ꤭ ꤞꤛꤢꤔꤢ ꤢ꤬ꤊꤟꤛꤢ꤭ꤊꤢꤨ꤭ ꤙꤢ꤭ꤒꤢ꤬ꤕꤤ ꤔꤢ ꤜꤟꤢꤪꤒꤢ꤬ꤗꤢ꤯
18 ꤕꤚꤟꤢꤧ꤬ꤘꤛꤢꤩꤞꤢꤧꤑꤢꤩ꤭ꤡꤝꤟꤥ ꤊꤤ꤬ꤥ꤬ ꤟꤢꤩꤗꤢ꤬, ꤒꤟꤢꤧ꤬ꤒꤢ꤬ꤚꤤ꤬ ꤓꤝꤟꤥ꤭ꤓꤛꤢ꤬ꤖꤢꤧꤓꤛꤢ꤬꤯
ꤙꤤ ꤓꤛꤢ꤬ꤏꤢ ꤒꤛꤢ꤬ꤟꤤ ꤒꤟꤢꤧ꤬ꤏꤢ ꤒꤥ꤬ ꤔꤌꤣ꤬, ꤔꤟꤤꤘꤢ꤭ꤚꤟꤢꤩ ꤕꤚꤟꤢꤧ꤬ꤞꤤꤖꤢꤧ ꤢ꤬ꤒꤟꤢꤧ꤬ꤐꤟꤢꤨ꤭ꤊꤜꤛꤢꤐꤟꤢꤨ꤭ꤊꤜꤥ꤭꤯
19 ꤊꤢ꤬ꤛꤢ꤭ ꤘꤣ ꤢ꤬ ꤘꤛꤢ ꤢꤨ꤭ꤐꤟꤥ꤬ ꤔꤌꤣ꤬, ꤢ꤬ ꤘꤛꤢꤏꤥ꤬ꤜꤟꤌꤣ꤭ꤜꤟꤢꤪ꤭ ꤒꤟꤢꤧ꤬ꤘꤢꤪꤢꤟꤌꤣ꤯
ꤖꤢꤨꤔꤌꤣ꤬ꤚꤢꤪ ꤡꤛꤣꤙꤢꤪꤞꤛꤥ ꤒꤢꤧ꤭ ꤔꤢ ꤊꤢ꤬ꤛꤢ꤭ ꤋꤢ꤭ꤢꤨ꤬ꤐꤟꤢꤧ꤭ ꤗꤟꤢꤩ꤯
20 ꤊꤢ꤬ꤛꤢ꤭ ꤘꤣ ꤢ꤬ ꤤ꤬ꤏꤢꤪ꤭ꤔꤟꤤ ꤗꤟꤌꤣꤖꤢꤧ꤭ ꤔꤌꤣ꤬, ꤢ꤬ ꤊꤟꤢꤦ ꤞꤛꤢꤩ꤭ꤊꤛꤢ꤭ ꤕꤚꤛꤢ꤭,
ꤞꤛꤢꤔꤢ ꤗꤤ꤬ꤊꤢꤪ꤭ ꤕꤟꤤ꤭ꤊꤛꤢ꤭ ꤘꤣ ꤒꤟꤢꤧ꤬ꤋꤤꤒꤢ꤬ꤚꤟꤢꤦ꤬ ꤢ꤬ꤊꤢꤨ꤭ ꤔꤌꤣ꤬ꤕꤢ꤭꤯
21 ꤏꤛꤣꤋꤢꤧ꤭ ꤒꤥ꤭ ꤟꤤꤒꤥ꤬ ꤚꤢꤪ ꤔꤟꤤꤙꤢꤧ꤬ꤜꤢꤧ ꤢꤨ꤬ꤡꤢꤧ꤭ ꤘꤣ ꤗꤟꤌꤣꤖꤢꤧ꤭ ꤥ꤬ ꤔꤌꤣ꤬, ꤘꤣꤋꤛꤢꤩ꤭ꤒꤢ꤬ꤘꤢꤦ꤬ ꤗꤢ꤬, ꤢ꤬ ꤓꤝꤟꤥ꤭ꤙꤝꤤ ꤔꤢ ꤘꤣ ꤜꤢꤨ꤭ꤑꤢꤩ꤭ ꤒꤥ꤬꤯
22 “ꤠꤢ꤭ ꤗꤟꤢꤩ꤬ꤜꤟꤛꤢꤩ꤭ꤊꤟꤢ꤬ꤋꤛꤢꤩ꤭ ꤏꤢꤦ꤬ ꤔꤢ ꤒꤟꤢꤧ꤬ꤗꤢꤨ꤭ꤗꤟꤛꤢ ꤕꤢ꤭,” ꤟꤢꤩ ꤒꤢꤧ꤭ ꤖꤢꤨꤔꤌꤣ꤬ ꤗꤟꤢꤩ꤯
ꤥ꤬ꤕꤟꤢꤪꤗꤛꤢꤏꤢꤦ꤭ ꤡꤢꤪꤗꤢ꤬ꤚꤛꤢ꤬ ꤔꤌꤣ꤬, ꤢ꤬ ꤊꤟꤢꤦ ꤗꤟꤢꤩ꤬ꤏꤤ꤬ꤕꤜꤢꤧ ꤔꤟꤢꤧ꤬ ꤕꤢ꤭꤯
23 ꤡꤢꤪꤗꤢ꤬ꤚꤛꤢ꤬ ꤞꤢꤧꤐꤟꤢꤪ ꤜꤢꤨ꤬ꤋꤛꤢ ꤘꤣ ꤢ꤬ꤜꤟꤛꤢ꤬ꤓꤌꤣ꤬ ꤒꤥ꤭ꤙꤢꤧ꤬ ꤒꤥ꤬꤯
ꤡꤝꤟꤢꤧ ꤘꤣ ꤢ꤬ꤒꤥ꤭ꤒꤥ꤬ ꤔꤌꤣ꤬꤮ ꤗꤢ꤬, ꤢ꤬ꤒꤥ꤭ ꤡꤢꤪꤗꤢ꤬ꤚꤛꤢ꤬ ꤢ꤬ꤞꤢꤧꤕꤜꤢꤪ꤬ ꤒꤥ꤬ꤒꤥ꤬꤯
24 ꤡꤢꤪꤗꤢ꤬ꤚꤛꤢ꤬ ꤙꤟꤌꤣ꤭ꤒꤥ꤭ ꤕꤢꤩ ꤕꤚꤟꤢꤧ꤬ꤜꤟꤢꤨ꤬ ꤋꤢ꤭ꤘꤟꤌꤣ꤬ ꤋꤢꤧ꤭꤯
ꤒꤣ꤬ꤕꤚꤟꤢꤧ꤬꤮ ꤢꤨ꤭ ꤞꤢꤧꤑꤢꤩ꤭ꤡꤟꤛꤢ ꤒꤟꤢꤧ꤬ ꤘꤣ ꤢ꤬ ꤊꤟꤢꤦꤚꤟꤢꤩ ꤓꤝꤟꤥ꤭ꤓꤛꤢ꤬ ꤔꤢ ꤢꤧ꤬ꤞꤤ꤭ ꤔꤌꤣ꤬ ꤒꤥ꤬꤯
25 ꤊꤢ꤬ꤛꤢ꤭ ꤘꤣ ꤢ꤬ ꤢꤪꤜꤟꤛꤢ꤬ ꤒꤢ꤬ꤕꤜꤟꤌꤣꤒꤢ꤬ꤕꤜꤛꤢꤩ꤭ ꤔꤢ ꤢ꤬ ꤊꤟꤢꤦ ꤘꤛꤢꤩ ꤡꤢꤪꤗꤢ꤬ꤚꤛꤢ꤬ ꤒꤣ꤬ꤡꤣ꤬ꤡꤣ꤬ ꤔꤌꤣ꤬, ꤢ꤬ꤞꤛꤢꤔꤢ ꤒꤟꤢꤧ꤬ꤖꤢꤨꤒꤟꤢꤧ꤬ꤜꤟꤛꤢꤩ꤬ ꤔꤟꤤꤊꤛꤢ꤭ ꤟꤢꤪ ꤒꤢ꤬ꤡꤟꤛꤢ꤭ ꤔꤌꤣ꤬ꤟꤢꤪ꤯
ꤙꤤ ꤢ꤬ ꤒꤢ꤬ꤔꤟꤢꤩ꤬ꤒꤟꤌꤣꤔꤟꤤ ꤋꤛꤢꤩ꤭ꤞꤛꤢ ꤢ꤬ꤒꤟꤢꤧ꤬ꤢꤪꤜꤟꤛꤢ꤬ ꤢ꤬ꤋꤢꤧ꤭ꤔꤌꤣ꤬, ꤢ꤬ ꤒꤟꤢ꤭ꤔꤥ꤬ꤜꤢ꤭ꤊꤛꤢ꤭ ꤟꤢꤪ꤯
26 ꤋꤝꤤ ꤘꤣ ꤢ꤬ꤞꤤꤖꤢꤧ ꤤ꤬ꤡꤛꤢꤩꤊꤛꤢ꤭ ꤊꤢ꤬ꤛꤢ꤭ꤚꤤ꤬ꤡꤟꤛꤢ꤯
ꤢ꤬ ꤤ꤬ꤊꤚꤢꤧꤓꤢꤩ꤬ꤕꤜꤤ꤭ ꤊꤛꤢ꤭ꤜꤟꤢꤪ꤭ ꤢꤧ꤬ꤞꤤ꤭꤯
27 ꤕꤚꤟꤢꤧ꤬ꤜꤟꤢꤨ꤬ꤞꤢꤧꤕꤜꤢꤪ꤬ ꤢ꤬ꤒꤟꤢꤧ꤬ꤒꤢ꤬ꤔꤟꤢꤩ꤬ ꤛꤢꤩ꤭ꤔꤌꤣ꤬, ꤢ꤬ ꤞꤛꤢꤔꤢ ꤗꤤ꤬ꤊꤢꤪ꤭ ꤒꤣ꤬ꤗꤢꤩ꤭ ꤘꤣ ꤡꤢꤪꤗꤢ꤬ꤚꤛꤢ꤬ ꤘꤛꤢꤩ ꤜꤢꤨ꤭꤯
ꤢ꤬ ꤕꤟꤢꤨ꤭ ꤞꤢꤧꤑꤢꤩ꤭ꤡꤟꤛꤢꤜꤟꤢꤪ꤭ ꤋꤛꤢꤩ꤭ꤞꤛꤢꤘꤢꤦ꤬ ꤢ꤬ꤒꤟꤢꤧ꤬ꤒꤢ꤬ꤔꤟꤢꤩ꤬ ꤘꤢꤪꤢꤟꤌꤣꤘꤢꤪꤙꤤ ꤒꤢ꤬ꤟꤢꤩ꤬꤯
28 ꤋꤝꤤ ꤘꤣ ꤢ꤬ ꤗꤟꤥ꤬ꤔꤟꤤ ꤢ꤬ꤊꤢ꤬ꤛꤢ꤭ ꤔꤢ ꤒꤟꤢꤧ꤬ꤗꤟꤥ꤬ ꤘꤣ ꤢ꤬ꤜꤟꤢꤪ꤭ꤕꤟꤢꤩꤡꤟꤛꤢ ꤒꤥ꤬ ꤚꤢꤪ ꤢ꤬ ꤡꤢꤪꤔꤢꤍꤟꤥ ꤔꤌꤣ꤬ꤗꤢ꤬, ꤢ꤬ ꤊꤟꤢꤦ ꤕꤣ ꤒꤟꤢ꤭ꤕꤜꤢꤩ꤬ꤟꤛꤢ꤭ꤔꤟꤤ ꤒꤟꤢꤧ꤬꤯
ꤢ꤬ꤒꤟꤢꤧ꤬ꤕꤣꤒꤢ꤬ꤚꤤ ꤛꤢꤩ꤭, ꤢ꤬ ꤥ꤬ꤊꤜꤟꤢꤪ꤬ꤥ꤬ꤗꤢ꤬ ꤔꤢ ꤒꤟꤢꤧ꤬ꤗꤟꤥ꤬꤯
29 ꤕꤚꤟꤢꤧ꤬ꤔꤢ꤬ꤡꤟꤢꤧꤖꤢꤨ ꤢ꤬ꤒꤢ꤬ꤚꤛꤢꤩ꤭ꤘꤢꤨ꤬ꤒꤢ꤬ꤚꤛꤢꤩ꤭ꤓꤢꤨ꤭ ꤗꤢ꤬ ꤢ꤬ꤟꤢꤧ꤭ꤢ꤬ꤚꤢꤩ꤬꤯
ꤗꤟꤌꤣꤕꤚꤟꤢꤧ ꤋꤢꤨ꤬ꤜꤟꤌꤣ꤬ꤙꤢꤨ꤭ ꤘꤣ ꤢ꤬ꤒꤟꤢꤧ꤬ꤞꤤꤖꤢꤧꤥ꤬ ꤔꤌꤣ꤬ꤗꤢ꤬, ꤢꤨ꤭ ꤘꤛꤢ꤬ꤘꤢꤨ꤬ꤐꤟꤢꤦꤑꤟꤢ ꤜꤢꤨ꤭꤯
30 ꤊꤢ꤬ꤛꤢ꤭ ꤘꤣ ꤢꤨ꤭ ꤕꤜꤤꤊꤚꤟꤢꤦ꤭ ꤜꤢꤨ꤭ ꤔꤌꤣ꤬ꤗꤢ꤬, ꤢ꤬ ꤠꤤ꤭ꤊꤛꤢ꤭ ꤊꤛꤢ꤭ ꤢ꤬ꤒꤟꤢꤧ꤬ꤗꤢꤨ꤭ꤗꤟꤛꤢ꤯
ꤕꤜꤤ ꤊꤢ꤬ꤛꤢ꤭ ꤘꤣ ꤢ꤬ ꤗꤟꤢꤩ꤬ꤞꤢꤦꤒꤟꤢꤧ꤬ ꤔꤌꤣ꤬ꤗꤢ꤬, ꤢ꤬ ꤗꤟꤢꤩ꤬ꤒꤢ꤬ꤊꤜꤛꤢ꤬ꤊꤟꤢ꤬ ꤜꤢꤨ꤭ꤞꤢꤧꤕꤜꤢꤪ꤬꤯