23
ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤗꤢ꤬ ꤕꤚꤟꤢꤧ꤬ꤊꤟꤛꤢꤩ꤭ ꤞꤤꤗꤟꤤ ꤘꤣ ꤢ꤬ꤚꤛꤢ
ꤋꤝꤤꤘꤢ꤬ꤠꤤ꤬ ꤢ꤬ꤒꤟꤢꤧ꤬ꤤ꤬ꤚꤥ꤭꤯
1 ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤗꤢ꤬ ꤕꤚꤟꤢꤧ꤬ꤊꤟꤛꤢꤩ꤭ ꤠꤢ꤭ ꤞꤛꤢꤔꤢ ꤢꤨ꤭ ꤊꤟꤛꤢꤩ꤭ ꤞꤤꤗꤟꤤ꤯
ꤠꤢ꤭ ꤜꤥ꤬ꤙꤢꤧ꤬ ꤕꤢ꤭ ꤡꤢꤪ ꤒꤣ꤬ꤡꤣ꤬꤮ ꤒꤥ꤬꤯
2 ꤢ꤬ ꤘꤛꤢꤩꤥ꤬ꤗꤛꤢꤩ꤭ ꤠꤢ꤭ ꤘꤣ ꤗꤟꤤ꤬ꤞꤌꤣ꤭ꤜꤢꤧ꤭ꤋꤢꤨ꤬꤯
ꤢ꤬ ꤞꤢꤨ꤭ꤡꤛꤣ ꤠꤢ꤭ ꤘꤣ ꤓꤛꤢꤩ꤭ꤊꤜꤥ꤭ ꤓꤝꤤ ꤞꤢꤧꤘꤥ꤭ ꤢ꤬ꤓꤢꤦ꤭꤯
3 ꤢ꤬ ꤘꤛꤢꤩꤏꤛꤥ꤬ꤓꤛꤢ꤬ꤏꤢꤪ꤭ꤓꤛꤢ꤬ ꤠꤢ꤭ꤞꤢꤧꤓꤝꤟꤥ꤭ꤕꤚꤟꤢꤧ꤬ ꤢ꤬ꤟꤢꤧ꤭ꤚꤢꤩ꤬꤯
ꤘꤣ ꤢ꤬ꤗꤝꤟꤤ꤬ꤒꤝꤟꤥꤗꤝꤟꤤ꤬ꤚꤛꤢ ꤢ꤬ꤋꤢꤨ꤬ꤢ꤬ꤋꤛꤢꤩ꤭, ꤢ꤬ ꤞꤢꤨ꤭ꤡꤛꤣ ꤠꤢ꤭ ꤘꤣ ꤊꤜꤛꤢꤡꤢꤪꤊꤜꤛꤢꤒꤟꤢꤩ꤬꤯
4 ꤠꤢ꤭ ꤡꤛꤣꤒꤟꤌꤣ ꤡꤢꤪ ꤘꤣ ꤒꤟꤢꤧ꤬ꤋꤤꤒꤟꤢꤧ꤬ꤜꤟꤢꤪ꤬ ꤒꤟꤢꤧ꤬ꤞꤛꤢꤩ꤭ꤒꤟꤢꤧ꤬ꤗꤟꤢꤩ ꤋꤢ꤭ꤜꤟꤢꤩ ꤡꤢꤪ ꤙꤢꤧ꤬ꤙꤢꤧ꤬, ꤔꤟꤢꤧ꤬ ꤥ꤬ꤒꤟꤣꤊꤟꤌꤣ꤭ ꤔꤢ ꤠꤢ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭, ꤠꤢ꤭ ꤞꤢꤧꤤ꤬ꤏꤢꤩ꤭ ꤒꤣ꤬ꤡꤣ꤬꤮ ꤒꤥ꤬꤯
ꤔꤟꤢꤧ꤬ꤤ꤬ꤗꤟꤢꤦ꤭ ꤔꤢ ꤔꤟꤢꤧ꤬ꤤ꤬ꤓꤛꤢꤙꤥ꤭ ꤗꤟꤢꤩ꤬ꤗꤟꤥ꤬ꤔꤟꤤ ꤠꤢ꤭꤯
5 ꤔꤟꤢꤧ꤬ ꤒꤢ꤬ꤚꤤ꤬ꤒꤢ꤬ꤚꤛꤢ꤭ ꤜꤣꤙꤢ꤭ ꤕꤢꤩ ꤠꤢ꤭ ꤏꤢꤧ꤬ꤢꤩ꤬ꤏꤢꤧ꤬ꤥ꤭ ꤘꤣ ꤕꤚꤟꤢꤧ꤬ꤞꤢꤧꤓꤢꤩ꤬ ꤠꤢ꤭ ꤒꤢ꤬ꤟꤢꤩ꤬ ꤢ꤬ꤗꤢꤧ꤬ꤞꤢꤧ꤬ꤑꤢꤩ꤭꤯
ꤔꤟꤢꤧ꤬ ꤕꤜꤟꤢꤪ ꤕꤢꤩ ꤠꤢ꤭ꤋꤢꤨ꤬ꤊꤜꤢꤪ ꤔꤢ ꤗꤢꤢꤨ꤭ꤓꤛꤢꤩ꤭, ꤠꤢ꤭ꤙꤢꤩ꤭ꤜꤟꤢꤪ ꤒꤟꤢ꤭ꤕꤟꤢꤪ꤬ꤒꤟꤢ꤭ꤕꤟꤢꤧ꤭ ꤡꤢꤪ꤯
6 ꤒꤟꤢꤧ꤬ꤒꤝꤟꤥꤒꤟꤢꤧ꤬ꤚꤛꤢ ꤔꤢ ꤒꤟꤢꤧ꤬ꤗꤟꤥ꤬ꤒꤟꤢꤧ꤬ꤕꤟꤢꤩ꤭ ꤊꤟꤢꤦ ꤊꤚꤝꤥ꤭ꤜꤟꤢꤦ꤬ ꤗꤟꤢꤜꤢ꤬ꤊꤥ꤭ ꤊꤟꤌꤣ꤭ꤘꤢꤦ꤬ ꤠꤢ꤭ ꤘꤣ ꤠꤢ꤭ꤒꤟꤢꤧ꤬ꤥ꤬ꤓꤝꤟꤥ꤭ꤕꤚꤟꤢꤧ꤬ ꤒꤣ꤬ꤓꤢꤦ꤭ꤊꤢ꤬ꤛꤢ꤭ ꤢ꤬ꤊꤢꤨ꤭ ꤕꤢ꤭꤯
ꤠꤢ꤭ ꤊꤟꤢꤦ ꤥ꤬ ꤘꤣ ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤢ꤬ꤟꤤ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤒꤢ꤬ꤜꤢꤧ꤬ꤊꤚꤢꤧ ꤕꤢ꤭꤯