18
Kʉmalwa kwa Múuji wa Babéeli
1 Ayo ˆyakalooke, maa nkoona murimʉ mʉʉja wɨɨngɨ wookiima fuma kurumwii. Ʉwo ʉjáa watɨɨte wiimiriri mʉkʉʉlʉ, na weerʉ yoosi ɨkamʉrɨkwa nɨ nkongojima ya kɨweerʉ chaachwe.
2 Ʉwo murimʉ mʉʉja ʉkatʉla isóso kwa sawúti nkʉʉlʉ woosea,
“Uwíire, uwíire Babéeli Mʉkʉ́ʉ́lʉ!
Haaha wavɨ́ɨre ihaáma ra marimʉ,
na kaaya ya kɨra murimʉ mʉvɨ,
ihaáma ro kiikala kɨra ndee ˆɨrɨ na njeo sɨ ˆɨsáakwaa nɨ vaantʉ.
3 Sa ɨsɨ joosi ja weerʉ jaanywa,
diváai nkarɨ ya ʉláku wa ʉhéngeeti waachwe.
Novo vatemi va weerʉ vahanguta ne,
na vachurúusi va weerʉ,
viikinkima kwa ngururu ja ʉláku waachwe ˆusiina mɨhaka.”
4 Aho, nkateera sawúti yɨɨngɨ fuma kurumwii yoosea,
“Isunki kʉrɨ yeeye nyuunyu ˆmʉrɨ vaanɨ,
sa mʉdɨɨre kʉva hamwɨ ne uvii waachwe,
kei mʉdɨɨre turya marema yaachwe.
5 Ʉvɨ waachwe wakíingikire mʉnʉmʉʉnʉ fʉʉrʉ kurumwii,
na Mʉlʉʉngʉ akʉ́mbʉkɨɨre ʉvɨ waachwe.
6 Mʉbweeyyiryi ja yeeye ˆvyeene avabweeyya,
murihi kavɨrɨ kwa yara mavɨ ˆabweeyya.
Nduvwii yaachwe mʉsaangiriryi ʉkarɨ,
kavɨrɨ ya kɨra ˆavasaangirirya.
7 Muturikiryi kwa kipíimo kɨkɨra cha ʉsʉʉngʉ ˆavabweeyyirya,
kwiipatɨra nkongojima na usúngaati.
Yeeye iiséaa mutimii waachwe yoosea,
‘Nɨɨnɨ ndɨrɨ mʉtemi muki ichuumbii raanɨ.
Nɨɨnɨ sɨ ndɨrɨ mʉlala tʉkʉ, baa sɨ ndɨrɨ koona makɨva vii kaa tʉkʉ.’
8 Sa jeyyo, marema yaachwe musiinda yarɨ sikʉ imudu,
wulalo, makɨva na njala.
Yeeye rɨɨwa arɨ nɨ mooto,
sa Ijʉva Mʉlʉʉngʉ ˆamʉhɨ́ɨre irya nɨ Mweenengururu.”
9 Vatemi va weerʉ avo ˆvahanguta no bweeyya ʉláku ne, rɨra varɨ no myaa, mpɨɨndɨ ˆvarɨ koona muuki wa kʉlʉngʉrɨra kwaachwe.
10 Kɨɨma varɨ kʉlɨ, sa vookoofa kuturikiriwa kwaachwe kʉnʉ voosea,
“Nɨ mpolaɨ, nɨ mpolaɨ weewe múuji mʉkʉʉlʉ,
Weewe Babéeli múuji ˆʉrɨ na ngururu.
Kʉlʉʉsa irya kwaako kuújire kwa sáa ɨmwɨ vii.”
11 Aho, vachurúusi va weerʉ kʉʉrɨrɨra varɨ no myaa, sa kusiina woowʉla viintʉ vyaavo tʉkʉ.
12 Kusiina ˆarɨ wʉla viintʉ vya saháabu, chʉʉ́ma cha mpía, mawye ya iyoombe ikʉʉlʉ, lúulu, ɨngo ja kɨtáani ˆyabooha, ɨngo ˆjiri gyaa, ɨngo ja haríiri, ɨngo ˆjiri nkʉʉndʉ gyaa, mɨtɨ yoosi ˆɨnyʉ́kɨraa, saama ja mpeembe ja njowu, saama ˆjasongolwa ja mɨtɨ ja iyoombe ikʉʉlʉ, sháaba njirʉ, chʉʉ́ma na marʉmáarʉ,
13 mʉdalasíini, hilíiki, ngʼóóno ˆjinyʉ́kɨraa, manemáane, viintʉ ˆviri na muuki ˆwanyʉkɨra, diváai, makuta ya seitúuni, muchu ˆwabooha, ngáano, ngʼoombe, muundi, faráasi, magáari ˆyarútwaa nɨ faráasi, mɨvɨrɨ na mɨtɨma ya vaantʉ tʉkʉ.
14 Vara vachurúusi sea varɨ, “Jira ndɨɨwa joosi ˆngʼeene mʉtɨma waako wajiméreryaa matɨ jalóokire, usúngaati na kʉtaangɨkana kwaako vyalóokire fuma kwaako na sɨ ʉrɨ vipata kei vii kaa tʉkʉ.”
15 Voovo ˆvawusáa ivi viintʉ de vandoopata usúngaati fuma kwaachwe, kɨɨma varɨ kʉlɨ sa woowa wa uturikiri waachwe, kʉnʉ voorɨra no myaaha,
16 voosea,
“Nɨ mpolaɨ, nɨ mpolaɨ, weewe múuji mʉkʉʉlʉ.
Weewe ˆwiivɨkɨráa ɨngo ja kɨtáani ˆjabooha,
ˆjiri gyaa na ˆjiri nkʉʉndʉ gyaa,
ˆwiihaambáa na saháabu,
mawye ya iyoombe ikʉʉlʉ na lúulu!
17 Kwa mpɨɨndɨ ya isaa rɨmwɨ vii,
usúngaati ˆwamema jei, warɨ́mɨɨre.”
Kɨra mʉlongooli wa méeli, mʉtʉmami wa méeli, vaantʉ ˆvakéraa njɨra na méeli na vaantʉ voosi ˆvapátaa kʉnáálo kwa njɨra ya mayɨya vakɨɨma kʉlɨ.
18 ˆVakoone nkungúúla ya muuki wa ʉra mooto ˆwoolungurirya ʉwo múuji, vakarɨra kwa sawúti nkʉʉlʉ voosea, “Atɨ de kwawaahya kʉva na múuji mʉkʉʉlʉ ja ʉhʉ?”
19 Kiiparɨra varɨ marʉrɨ mitwii yaavo koonekya ʉsʉʉngʉ waavo. Rɨra varɨ no myaa kʉnʉ voosea,
“Nɨ mpolaɨ, nɨ mpolaɨ kʉrɨ weewe múuji mʉkʉʉlʉ,
haantʉ vaantʉ voosi ˆvarɨ na méeli mayiyii,
vasungaata ko tweera usúngaati waako.
Kwa mpɨɨndɨ ya isaa rɨmwɨ vii wachɨ́hɨɨre ihaáma.”
20 Ee kurumu, vyeende sa kʉmalwa kwaachwe.
Valáali na mʉtwe, vatumwi, na vaantʉ va Mʉlʉʉngʉ vyeendi,
sa Mʉlʉʉngʉ amʉhɨ́ɨre irya yeeye,
sa vira viintʉ ˆavabweeyyirya nyuunyu.
21 Aho, maa murimʉ mʉʉja ˆarɨ na ngururu akiinʉla iwye ikʉʉlʉ ja lwaala, akarɨfweita na mayiyii kʉnʉ yoosea,
“Jei no ˆvyeene múuji mʉkʉʉlʉ Babéeli ʉrɨ fweitɨrwa,
aho, sɨ ʉrɨ koonekana tʉkʉ.
22 Baa sawúti ja vaantʉ ˆvávaa mawuumbi, na ja viimbi,
vavai ntoroonya na vavai marimʉ,
sɨ jiri teereka kei kʉrɨ weewe vii kaa tʉkʉ.
Kɨkomi, sɨ kʉrɨ kʉva na mʉcháani yoyoosi ˆarɨ koonekana kʉrɨ weewe vii kaa tʉkʉ,
baa sawúti ya lwaala sɨ ɨrɨ teereka kʉrɨ weewe kei vii kaa tʉkʉ.
23 Kɨweerʉ cha kɨmʉrɨ,
sɨ kɨrɨ koonekana kʉrɨ weewe kei tʉkʉ,
baa siriri ja mʉlóoli na mʉlóolwi,
sɨ jiri teereka kei vii kaa tʉkʉ.
Sa vachurúusi vaako nɨ vakʉ́ʉ́lʉ vajáa kʉrɨ ɨhɨ weerʉ,
kwa ʉsavɨ waako ɨsɨ joosi wajikoovera.
24 Njirii jaachwe ja múuji yoonekana sakami ya valáali na mʉtwe, ya vaantʉ va Mʉlʉʉngʉ,
na sakami ya vaantʉ voosi ˆvasɨɨnjwa kʉrɨ weerʉ.”