18
E Babilon ka punga
1 Lamur tana utna ne, a oroi ning a angelo maleng i han purum misaot na langit. I tong akes a rakrakai a warkurai pa anuna matatar i atalapor a rakrakan hanua.
2 Pa i woiwoi ana tnan elngena mang,
“A tnan hanua Babilon ka punga! Ka punga!
I hanot a pukna ana motla,
pa a rumai a mumun anuna laulau a ingunla,
pa a rumai a mumun anuna manila ning la dur
pa a rumai a mumun anuna inagoila ning la dur pa la bilbilor.
3 Ka punga, anasa na tarai miting na matanitu rop la ka gang pas a rakrakai a wain ana nuna pamuk a toltolla.
Na king mite na rakrakan hanua la tol a pamuk a toltol taum onoi.
Pa na tena siusiurai mite na rakrakan hanua la leklek ana galis a gongon
miting na nuna keskes na leklek.”
4 A longor maleng a elngen takai misaot na langit i atongi larne,
“Anuk a tarai, mulor purum kusuni,
sakana mulor kes taum onoi ana nuna toltol laulaula,
sur gong mulo otleng mulo kilang a akadikla ning i kibasi.
5 Anasa anuna toltol laulau i galis kol pa i tuk pas ot a langit,
pa e God ka nuk akes anuna laulau a titolla.
6 A toltol ning i toli tetek mulo, dir toli ulak teteki,
a utna ning i tol tari tetek mulo, dir kelesi arlar ana naur a dihna teteki.
A kap ning i agang tar mulo onoi,
dir abukus tari ana naur a dihna sur dir agangi onoi.
7 Dir saran a tnan kankan pa a tnan bal maris tana,
ir galis arlar ana tnan matatar pa a keskes na leklek ning i tong akesi.
I nuki ono i ot mang,
‘Iau a kwin, pa a kes ana nuk a keskes a kwin.
Bel iau a lao,
bel ar bal maris lar pas.’
8 I maining a akadikla ne, a minat, a bal maris pa a munurak
lar hanot teteki ana ning a pukakiar sot ka.
Pa dir tun seni ting na iah
anasa a Leklek e God i rakrakai kol,
esaning i saran tar a warkurai na arkeles teteki.
9 “Na king mite na rakrakan hanua, ning la tol a laulauna taum ana pamuk a hane ning, pa la ka kibas taum a nuna na gongon miting na nuna keskes na leklek, ning lar oroi a sasawan na iah ning di tun a hane ning ono, lar bal maris pa lar tangis.
10 Lar tur bakbak tar kama kusuni, anasa la matatan a kankan ning dir akadiki onoi. Pa lar atongi mang,
‘A tnan hanua Babilon ka laulau. Ka laulau!
E Babilon, a rakrakai a hanua!
Ana diono na bonot a minit sot ka, anuma warkurai na arkeles ka hanot tetek u.’
11 “Na tena siusiurai mite na rakrakan hanua lar tangis pa lar bal maris onoi, anasa bel ma tik ir lou anunla ututnala na siusiuran.
12 A ututnala na siusiurai larne: a gol, a silwa, na wakak a hatat ning a matana i abit, pa na kabaruruan, pa na wakak a kaen, na kaen ning i arlar ana sar a taus, na kaen ning i silika pa na kubar a kaen, pa na rakai ning i toboh wakak, pa a urmatana ngas a utna ning di toli ana kom a elepan, pa ana wakak a rakaila ning a matana i abit, pa a bras, a aen pa a wakak a hatat ning di atongi ana mabel.
13 Pa dingla na ututnala ning i toboh wakak, pa naur a utna ning i toboh wakak di atong diau ana sinamon pa mira, pa a paura di tuni pa sasawana i toboh wakak ning di atongi ana insens, pa a wain, a wel na oliw, a palawa pa a witla, pa a bulumakaula pa na sipsip, na hos pa na karis ono, pa a tarai ning lar titol na tena titol oros.
14 “Na tena siusiurai lar atongi mang, ‘Na ututnala ning u mang kol suri ka rorom. Anum a gongonla pa num na matatar, la otleng la ka rorom kusun u, pa bel ulak ma ur oroi tar la.’
15 Na tena siusiurai ning la sira siuran a ututnala ne, ning e Babilon i angis la ana galis a gongon, lar tur bakbak tar kama kusuni, anasa lar matatan a kankan ning di akadiki onoi. Lar bal maris, lar tangis,
16 pa lar woiwoi mang,
‘A tnan hanua Babilon ka laulau! Ka laulau!
I mermer ana wakak a kaenla, ning i pepol pa i kubar,
pa di amermeri ana gol, pa na wakak a hatat ning a matana i abit pa na wakak a kabaruruan.
17 Ana diono na bonot a minit ka, di alaulau rop sen anuma galis a gongon!’
“Pa na kiapten rop pa la ning la han taltal ana sip, na tena titol miting na sipla, pa la ning la kibas a mani miting na titol ana sipla, lar tur bakbak kusuni.
18 Ning lar oroi a sasawan na iah ning di tun e Babilon ono, lar woiwoi mang, ‘Esi na hanua i arlar taum ana wakak a hanua ne i itna kol?’
19 Lar sapran a kubus saot na pukulunla pa lar bal maris, lar tangis pa lar woiwoi mang,
‘A tnan hanua Babilon ka laulau! Ka laulau!
La ning la kibas a mani miting na sipla,
la leklek ana nuna na galis a gongon!
Diono na bonot a minit ka, pa ka laulau rop!
20 Mulo saot na langit, mulor gas ono!
Pa tarai ane God pa na aposel pa na propet, mulor gas!
E God i saran a warkurai a arkeles teteki ana ututnala ning i toli o mulo.’ ”
21 Pa ning a rakrakai a angelo i kibas pas a tnan hat, i itna arlar ana hat ning di sira gini a witla ono, pa i minggen parung seni salatasi pa i atongi mang,
“Dir minggen tosngen sen a tnan hanua Babilon arlar ana hat ne,
pa bel ulak ma dir oroi i.
22 A elngen na tena tol saksak pa na tena wus kaur pa na tena wus tawuru pa na tinangis ana gitala,
bel ulak ma dir longor tari ting napirim.
Bel ulak ma ta tena titol ana kuna ir kes taum hom.
Pa bel ulak ma dir longor tar a tinangis ana hat ning di sira gini a witla ono.
23 Bel ulak ma ta talapor ana lam
ir sasai ting napirim.
Bel ulak ma dir longor tar
a elngen ta tona tinaulai, a barman pa a basbas ting napirim.
Lanigo anum na tena siusiurai la na tatatnan leklek te na rakrakan hanua.
U ben rongon pas na tarai miting na matanitu rop ana numa kapil.
24 A suluk a propetla pa na tarai ane God,
pa la rop otleng ning di um kol la te na rakrakan hanua,
di pastetek a sulukinla tumo e Babilon.”