12
ཆོས༌ཚོགས༌གུན༌ལ༌ མང༌ང༌ ནགས༌ སྟནས༌།
12:1 ནེ༌ 19a
1 ཧ༌ལམ༌ ཏེན༌ན༌ ཏུས༌ལ༌ གྱལ༌པོ༌ ཧེ༌རོ༌དཱའི༌ ཆོས༌ཚོགས༌སི༌ ཏད༌པ༌ཅན༌ ཁ༌ཅིག༌ག༌ ནགས༌ ལྟན༌ཅེས༌ གོ༌ཟུག༌།
2 ཁོའེ༌, ཡོ༌ཧཱ༌ནན༌ནི༌ ཨ༌ཅོ༌ ཡ༌ཀོབ༌ ར༌འི༌ ཉམ༌པོ༌ སད༌ཅུགས༌།
3 ཏེ༌ ལས༌གུན༌ནི༌ ཡ༌ཧུ༌དཱ༌པ༌གུན༌ ཐད༌པོ༌ ཆའ༌ ཐོང༌ཏེ༌ གྱལ༌པོའེ༌ པི༌ཏྲར༌རའང༌ ཟུམ༌ཅུགས༌ ༼ཏེ༌བོ༌ པེ༌སག༌གི༌ ཏུས༌ཆེན༌ནི༌ ཏུས༌ལ༌ བྱུང༌༽།
4 པི༌ཏྲར༌ ཟུམས༌ཏེ༌ སྟིང༌ནེ༌ ཧེ༌རོ༌དཱའི༌ ཁོང༌ ཙོན༌ཁང༌ངི༌ ནང༌ང༌ ཀག༌ཅུགས༌, ཡང༌ སྲུང༌ཅེས༌ལ༌ མག༌མི༌ ཞི༌ཅན༌ནི༌ སྡེ༌ ཞིའ༌ ཁག༌ ཀལས༌། ཧེ༌རོ༌དཱའི༌ པེ༌སག༌གི༌ ཏུས༌ཆེན༌ནི༌ སྟིང༌ནེ༌ པི༌ཏྲར༌ མི༌མངས༌སི༌ དུན༌ལ༌ ཁྱོངས༌ཏེ༌ ཁོང༌ང༌ ཁྲིམས༌ ཆད༌ཨིན༌ སམ༌།
5 པི༌ཏྲར༌ ཙོན༌ནི༌ ནང༌ང༌ ཡོད༌ ཟ༌ནེ༌, ཆོས༌ཚོགས༌པོའེ༌ སྙིང༌ ཏག༌པ༌ནེ༌ དཀོན༌མཆོག༌ག༌ ཁོང༌ངི༌ ཕིའ༌ མོས༌ལམ༌ ཞུའད༌པིན༌།
6 ཧེ༌རོ༌དཱའི༌ པི༌ཏྲར༌ མི༌མངས༌སི༌ དུན༌ལ༌ ཁྲིམས༌ཅད༌དི༌ ཕིའ༌ ཁྱོང༌ངི༌ སང༌ ཚན༌ ཅིག༌གི༌ སྔུན༌ལ༌, ལྕག༌ཐག༌ ཉིས༌ལ༌ ཏགས༌ཏེ༌ ཁོང༌ མག༌མི༌ ཉིས༌སི༌ པར༌ལ༌ ཉིད༌ལ༌ སོང༌ཏེ༌ ཡོད༌པིན༌, ཡང༌ ཙོན༌ཁང༌ངི༌ སྒོའེ༌ཀ༌ མག༌མི༌གུན༌ སྲུངས༌ཏེ༌ ཡོད༌དི༌ ཏུས༌,
7 ཧུན༌མེད༌ལ༌ དཀོན༌མཆོག༌གི༌ ཕོ༌ཉ༌ཞིག༌ ཏེ༌ཀ༌ སྐྱོད༌པ༌, ཏེ༌ནང༌ གང༌པོ༌ འོད༌དི༌ གངས༌། ཏེ༌ ཕོ༌ཉ༌བོའེ༌ པི༌ཏྲར༌ སྐུལ༌ལ༌ ཛད༌ཏེ༌ ཁོང༌ང༌ ཉིད༌ཚད༌ ཡང༌ མོལས༌, "གྱོགས༌པ༌ ལོངས༌" པི༌ཏྲར༌རི༌ ལག༌པའ༌ ཏག༌ཁན༌ནི༌ ལྕག༌ཐག༌པོ༌ བུད༌།
8 ཏེ༌ནེ༌ ཕོ༌ཉའེ༌ པི༌ཏྲར༌ལ༌ མོལས༌, "རང༌ངི༌ སྐྱེ༌རགས༌ ཅིང༌ ཡང༌ པ༌བུ༌ གོན༌།" པི༌ཏྲར༌རི༌ ཏེན༌ན༌བོ༌ ཅོས༌, ཡང༌ ཕོ༌ཉའེ༌ ཁོང༌ང༌ མོལས༌, "རང༌ངི༌ ཙ༌ཟར༌ གོན༌ ཡང༌ ངའེ༌ གྱབ༌ནེ༌ ཡོང༌།"
9 པི༌ཏྲར༌ ཕོ༌ཉའེ༌ སྟིང༌རང༌ནེ༌ ཙོན༌ཁང༌ནེ༌ ཕི༌ལོག༌ག༌ སྐྱོདས༌, ཁོའེ༌ ཕོ༌ཉའེ༌ ཛད༌ཁན༌གུན༌ ཞལ༌ཟིགས༌ཤིག༌ ཨིན༌ནོག༌ སམ༌, ཏེ༌ ཚང༌མ༌ ངོས༌པོའ༌ བྱུང༌ཏེ༌ ཨིན༌ཁན༌བོ༌ དེན༌ མ༌ཤེས༌།
10 ཁོང༌ ཉིས༌ཀོ༌ སྒོ༌སྲུང༌པ༌ ཏང༌པོ༌ དང༌ ཉིས༌པའེ༌ དུན༌ནེ༌ སོང༌ཏེ༌ ལྕགས༌སི༌ གྱས༌སྒོའེ༌ཀ༌ ལེབ༌, ཀ༌བོ༌ གྱལ༌ས༌ ཆོགས༌ལ༌ བེའད༌པིན༌། ཁོང༌གུན༌ནི༌ ཕིའ༌ ཏེ༌ སྒོ༌བོ༌ ཁོ༌རང༌ བེ༌སོང༌, ཁོང༌གུན༌ སྒོ༌ནེ༌ བིང༌ཏེ༌ གྲུལ༌ཨིན༌ སོང༌, ཡང༌ སྲང༌ངི༌ ཇུག༌ག༌ ལེབ༌བ༌ཅིག༌, ཕོ༌ཉ༌བོ༌ ཧུན༌མེད༌ལ༌ ཁོང༌ངི༌ དུན༌ནེ༌ སྟོརས༌།
11 ཏེ༌ནེ༌ པི༌ཏྲར༌ལ༌ ཧ༌གོ༌ཏེ༌ མོལས༌, "ཏ༌ ང༌ ཅའང༌ ཐེ༌ཚོམས༌ མེ༌རག༌, དཀོན༌མཆོག༌གི༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛད༌ཏེ༌ ཧེ༌རོ༌དཱ༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཅུས༌ངན༌ནེ༌ ང༌ ཐར༌ ཅུག༌ག༌ ཛདས༌།"
12 པི༌ཏྲར༌རི༌ བྱུང༌ཁན༌གུན༌ ཧ༌གོའ༌ཅིག༌, ཁོང༌ ཡོ༌ཧཱ༌ནན༌ ཀ༌བོའ༌ མར༌ཀུས༌སའང༌ ཟེར༌རད༌པིན༌ ཁོའེ༌ ཨ༌མ༌ མིར༌ཡམ༌མི༌ ཁང༌པ༌ སྐྱོདས༌། ཏེ༌རུ༌ སྤུན༌ མང༌པོ༌ ཛོམས༌ཏེ༌ མོས༌ལམ༌ ཞུའད༌པིན༌།
13 པི༌ཏྲར༌རི༌ ཕི༌ལོག༌གི༌ སྒོ༌ རྡུངས༌པ༌, རོ༌དཱ༌ ཟེར༌ཁན༌ནི༌ ཡ༌ཏོ༌ བུ༌མོ༌, སྒོ༌ ཕེའ༌ལ༌ ཡོངས༌།
14 ཁོའ༌ པི༌ཏྲར༌རི༌ སྐད༌ ཤེས༌པ༌ འི༌ཟམ༌ ཐད༌པོ༌ སོང༌ ཁོའེ༌ སྒོ༌ མ༌ཕེའ༌ གྱུག༌ཨིན༌ ལོགས༌ཏེ༌ སོང༌ཏེ༌, "པི༌ཏྲར༌ ཕི༌ལོག༌ག༌ སྒོའེ༌ཀ༌ ཡོངས༌ཏེ༌ རག༌" ཟེརས༌།
15 སྤུན༌གུན༌ནི༌ ལན༌ཏངས༌, "ཁྱོ༌རང༌ སྙོས༌ཏེ༌ ཨིན༌ནོག༌།" ཨིན༌ནའང༌ ཏེ༌ བུ༌མོ༌བོའེ༌ འུ༌ཙུག༌ ཏངས༌ཏེ༌ དེན༌བ༌ ཁོང༌ པི༌ཏྲར༌ ཨིན༌རག༌ ཟེར༌པ༌ ཁོང༌གུན༌ནི༌ ཟེརས༌, "པི༌ཏྲར༌རི༌ ཕོ༌ཉའ༌ ཨིན༌གྲོ༌།"
16 ཨིན༌ནའང༌ པི༌ཏྲར༌རི༌ སྒོ༌ རྡུང༌ཨིན༌ དུགས༌ ཡང༌ སྒོ༌ ཕེས༌པ༌ པི༌ཏྲར༌ ཐོང༌ཏེ༌ ཁོང༌གུན༌ ཧ༌ལས༌།
17 པི༌ཏྲར༌རི༌ ལག༌པ༌ ཉམ༌པོ༌ ཅུབ༌ཅད༌ཅེས༌ལ༌ སྟགས༌ ཅོས༌, ཡང༌ ཁོང༌ དཀོན༌མཆོག༌གི༌ ཙོན༌ཁང༌ནེ༌ ཕིང༌ང༌ ཛད༌ཁན༌ནི༌ སྐོར༌ ཤད༌ད༌ ཛདས༌། ཡང༌ "ཡ༌ཀོབ༌ དང༌ སྤུན༌གུན༌ལ༌ འི༌གུན༌ ཤོད༌" མོལ༌ཏེ༌ ཁོང༌རང༌ ཞན༌ ནས༌ས༌ཞིག༌ག༌ སྐྱོདས༌།
18 ནམ༌ལངས༌ས༌ཅིག༌ པི༌ཏྲར༌ མེད༌པ༌, ཁོང༌ ཉམ༌པོ༌ ཅི༌ སོང༌ སམ༌ཏེ༌ མག༌མི༌གུན༌ལ༌ ཧི༌ལིངས༌ སྲན༌ཏྲེ༌ ཞུགས༌།
19 ཧེ༌རོ༌དཱའི༌ པི༌ཏྲར༌ ཀ༌རུང༌ས༌ གྱལ༌ལ༌ ཅོས༌ཏེ༌ ཙལ༌ཅུགས༌, ཨིན༌ནའང༌ ཁོང༌ངི༌ སྐོར༌ལ༌ ཅའང༌ གྱུས༌ མ༌སོང༌པ༌ ཁོའེ༌ སྒོ༌ སྲུང༌པ༌གུན༌ལ༌ ཏྲི༌སོ༌ ཏངས༌ཏེ༌ ཁོང༌གུན༌ སད༌ཅེས༌སི༌ བཀའ༌ ཏངས༌།
གྱལ༌པོ༌ ཧེ༌རོ༌དཱ༌ ཤི༌།
12:19b ནེ༌ 25
ཏེ༌ནེ༌ ཧེ༌རོ༌དཱ༌, ཡ༌ཧུ༌དཱ༌ནེ༌ ཀཱེ༌སར༌རིའ༌ སོང༌ཏེ༌ ཏེ༌རུ༌ ཏུས༌བན༌ཤིག༌ དུགས༌།
20 ཏ༌ ཧེ༌རོ༌དཱ༌ལ༌ ཏཱ༌ཡིར༌ དང༌ སི༌དཱོན༌ནི༌ མི༌གུན༌ ཉམ༌པོ༌ མ༌སྲན༌ཏྲེ༌ སྲོ༌ ཡོད༌པིན༌། ཏེ༌ ཡུལ༌ལི༌ འུ༌སྐྱོང༌གུན༌ སྤེ༌ར༌ ཏང༌ང༌ལ༌ ཡོངས༌, ཡང༌ གྱལ༌པོའེ༌ ལོ༌ཁྱེལ༌ཅན༌ནི༌ ལོན༌པོ༌ བ༌ལས༌ཏུས༌སི༌ ཆོགས༌སྐྱོར༌ ཐོབས༌ཏེ༌ ཞི༌དེ༌ ཁྱོང༌ཅེས༌སི༌ ཕིའ༌ ཞུ༌ཝ༌ ཕུལས༌, ཅིའ༌ཟེར༌ན༌ ཟ༌རྒྱུ༌ ཉོ༌ཅེས༌ལ༌ ཁོང༌གུན༌ ཧེ༌རོ༌དཱའི༌ ཡུལ༌ལི༌ཀ༌ རག༌ལས༌ཏེ༌ ཡོད༌པིན༌།
21 ལྡམ༌ཁན༌ནི༌ ཞག༌ག༌ ཧེ༌རོ༌དཱའི༌ གྱལ༌པོའེ༌ ཀོས༌ལག༌ གོན༌ཏེ༌ རང༌ངི༌ ཁྲིས༌སི༌ཀ༌ དུགས༌ཏེ༌ མི༌མངས༌ལ༌ སྤེ༌ར༌ ཏངས༌།
22 ཏེ༌ མི༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, "འི༌ སུང༌སྐད༌བོ༌ མི༌ མན༌པ༌ དཀོན༌མཆོག༌གི༌ ཨིན༌ནོག༌།"
23 ཧེ༌རོ༌དཱ༌ མི༌མངས༌གུན༌ནི༌ དཀོན༌མཆོག༌ག༌ སྟོད༌པ༌ མ༌ཕུལ༌ལ༌ ཁོའ༌ སྟོད༌པ༌ ཕུལ༌ཅེས༌པོའ༌ ཐད༌ པ༌སང༌ ཏེན༌ན༌མལ༌ལ༌ དཀོན༌མཆོག༌གི༌ ཕོ༌ཉའེ༌ ཁོའ༌ ཆད༌པ༌ སལས༌, ཡང༌ བུ༌ཙིག༌གི༌ ཁོའེ༌ ཟུགས༌པོ༌ ཀུ༌ལེ༌ ཀུ༌ལེ༌ ཁོ༌ ཤི༌ཤི༌ ཚག༌པ༌ ཟོས༌།
24 ཨིན༌ནའང༌ དཀོན༌མཆོག༌གི༌ བཀའ༌ གྱས༌ཏེ༌ ཕེལ༌ཨིན༌ སོང༌།
25 བཱར༌ན༌བས༌ དང༌ ས༌འུལ༌ལི༌ པེ༌ནེ༌ རོགས༌ ཀལ༌ཁན༌བོ༌ ཆོས༌ཚོགས༌སི༌ འུ༌སྐྱོང༌གུན༌ལ༌ སྟདས༌། ཏེ༌སྟིང༌ནེ༌ ཁོང༌གུན༌ མར༌ཀུས༌ ཟེར༌ཁན༌ནི༌ ཡོ༌ཧཱ༌ནན༌ ཁྲིད༌ཏེ༌ ཡེ༌རུ༌ཤ༌ལེམ༌ནེ༌ ལོགས༌ཏེ༌ སྐྱོདས༌།