2
ཏད༌པ༌ཅན༌གུན༌ནི༌ཀ༌ དམ༌པའེ༌ ཐུག༌ཉིད༌ བབས༌།
2:1 ནེ༌ 13
1 པེན༌ཏི༌ཀོས༌སི༌ ཏུས༌ཆེན༌ནི༌ ཞག༌ག༌ ཁོང༌ ཚང༌མ༌ ཁང༌པ༌ཞིག༌གི༌ ནང༌ང༌ ཛོམས༌ཏེ༌ ཡོད༌ ཟ༌ནེ༌
2 ཧུན༌མེད༌ལ༌ ནམ༌ཁའ༌ནེ༌ ལུང༌རག༌ ཀྲག༌པོའེ༌ སྐད༌ ཙོགས༌ཤིག༌ ཡོངས༌ཏེ༌ ཁོང༌ ཚང༌མ༌ ཛོམས༌ཏེ༌ ཡོད༌ཁན༌ནི༌ ཁང༌པ༌བོ༌ གང༌།
3 ཏེ༌ནེ༌ ཁོང༌གུན༌ལ༌ མེ༌ མེ༌ལྡབ༌ ཙོགས༌ མང༌པོ༌ ཐོང༌ ཀ༌གུན༌ སོ༌སོ༌ བེས༌ཏེ༌ ཁོང༌ རེ༌རེ༌ཀ༌ བབས༌།
4 ཁོང༌ ཚང༌མ༌ དམ༌པའེ༌ ཐུག༌ཉིད༌དི༌ གངས༌ ཡང༌ ཐུག༌ཉིད༌དི༌ ཁོང༌གུན༌ལ༌ ཁྱུད༌ སལ༌ཅེས༌པོའེ༌, ཁོང༌གུན༌ནི༌ སྐད༌ སོ༌སོའེ༌ ནང༌ང༌ སྤེ༌ར༌ ཏང༌ཅེས༌ གོ༌ཟུག༌།
5 ཏེ༌ཏུས༌ལ༌ དཀོན༌མཆོག༌ག༌ ཏད༌པ༌ ཅོ༌ཁན༌ནི༌ ཡ༌ཧུ༌དཱ༌པ༌གུན༌ ཇིག༌རྟེན༌ནི༌ ཆོགས༌ ཚང༌མ༌ནེ༌ ཡོངས༌ཏེ༌, ཡེ༌རུ༌ཤ༌ལེམ༌མ༌ ཛོམ༌ཏེ༌ ཡོད༌པིན༌།
6 ཏེ༌ སྐད༌གུན༌ ཚོར༌ར༌ཅིག༌ མི༌ མང༌པོ༌ ཛོམ༌, ཡང༌ ཚང༌མ༌ ཧ༌ལས༌ཏེ༌ ཧན༌གྲང༌ སོང༌ ཅིའ༌ཟེར༌ན༌ ཁོང༌ ཚང༌མའེ༌ ཁོ༌རང༌གུན༌ནི༌ སྐད༌དི༌ ནང༌ང༌ ལོབ༌ཕྲུགས༌གུན༌ནི༌ སྤེ༌ར༌ ཏང༌ཨིན༌ ཚོར༌།
7 ཁོང༌གུན༌ མ༌སྲན༌ཏྲེ༌ ཧ༌ལས༌ཏེ༌ ཅིག༌ དང༌ ཅིག༌ག༌ ཟེརས༌, "ཉོན༌ཤིག༌, འི༌ སྤེ༌ར༌ ཏང༌ཁན༌ ཚང༌མ༌ གཱ༌ལིལ༌ལི༌པ༌ མ༌ནོག༌ག༌?
8 ཏེ༌ནེ༌ ཀ༌ཟུག༌གི༌ ཁོང༌གུན༌ནི༌ ང༌དང༌ རེ༌རེ༌ སྐད༌དི༌ ནང༌ང༌ སྤེ༌ར༌ ཏང༌ཨིན༌ ཚོར༌ར༌ནོག༌།
9 ང༌དང༌གུན༌ནི༌ ཕྲོའ༌ པར༌ཐ༌པ༌, མེད༌ཡེའ༌པ༌, ཨེ༌ལམ༌པ༌, མེ༌སོ༌པོ༌ཏོ༌མིའ༌པ༌, ཡ༌ཧུ༌དཱ༌པ༌, ཀ༌པ༌དོ༌ཀི༌ཡཱ༌པ༌, པོན༌ཏུས༌པ༌, ཨ༌སི༌ཨཱ༌པ༌,
10 ཕིརིག༌འེ༌ཡཱ༌པ༌, པམ༌ཕིལ༌ཡཱ༌པ༌, ཨི༌ཇིབ༌པ༌, ཀི༌རིན༌ནི༌ ཉེ༌མོ༌ ཡོད༌ཁན༌ནི༌ ལིབ༌ཡཱ༌པ༌, རོམ༌མི༌ གྱལ༌སའེ༌ བེས༌པ༌,
11 ༼ཡ༌ཧུ༌དཱ༌པ༌ དང༌ ཡ༌ཧུ༌དཱ༌པའེ༌ ཆོས༌ལ༌ ཏད༌པ༌ ཁྱོང༌ཁན༌ ཡ༌ཧུ༌དཱ༌པ༌ མན༌ཁན༌གུན༌༽ ཡང༌ ཀེརེ༌ཏ༌པ༌ དང༌ ཨ༌ར༌བིའ༌པ༌ གུན༌ ཡོད༌ཏེ༌ མ༌ནོག༌ག༌? ཨིན༌ནའང༌ ང༌དང༌གུན༌ལ༌ འི༌ མི༌གུན༌ནི༌ ང༌དང༌རང༌ངི༌ སྐད༌དི༌ ནང༌ང༌ དཀོན༌མཆོག༌གི༌ ཧ༌ལས༌ཤེས༌སི༌ ཆག༌ལས༌གུན༌ ཤད༌ཨིན༌ ཚོར༌ཨིན༌ ཨིན༌ནོག༌།"
12 ཁོང༌ ཚང༌མ༌ ཧ༌ལས༌ཏེ༌ ཐེ༌ཚོམས༌ སོང༌ཏེ༌ ཅིག༌ དང༌ ཅིག༌ག༌, "འི༌ ནས༌ལུག༌གི༌ དོན༌བོ༌ ཅི༌ ཨིན༌ནོག༌?" ཟེར༌ཨིན༌ ཏྲིས༌།
13 ཞན༌ ཁ༌ཅིག༌གི༌ ཁྲེལ༌གོད༌ ཏང༌ཨིན༌ ཟེརས༌, "འི༌གུན༌ ཆང༌ མང༌པོ༌ ཐུངས༌ཏེ༌ ར༌རོས༌ཏེ༌ ཨིན༌ནོག༌།"
སྐུ༌ཚབས༌ པི༌ཏྲར༌རི༌ མི༌ཚོགས༌ལ༌ ཧ༌གོ༌ཅུག༌ག༌ ཛདས༌།
2:14 ནེ༌ 41
14 ཏེ༌ནེ༌ པི༌ཏྲར༌ སྐུ༌ཚབས༌ རྕུག༌ཅིག༌པོ༌ ཉམ༌པོ༌ མི༌ཚོགས༌སི༌ དུན༌ལ༌ སྐྱོད༌ཏེ༌ སྐད༌ ཆེན༌མོའེ༌ ནང༌ང༌ མོལས༌, "ཡ༌ཧུ༌དཱ༌པ༌ དང༌ ཡེ༌རུ༌ཤ༌ལེམ༌མ༌ དུག༌ཁན༌ གུན༌ ངའེ༌ ཟེར༌ཅེས༌ཅན༌བོའ༌ གྱལ༌ལ༌ ཅོས༌ཏེ༌ ཉོན༌ཤིག༌། འི༌ བྱུང༌ཁན༌གུན༌ ངའེ༌ ཁྱོ༌ཞའ༌ ཧ༌གོ༌ཅུག༌ཨིན༌,
15 ཁྱོ༌ཞའེ༌ འི༌ མི༌གུན༌ ར༌རོས༌ཏེ༌ ཨིན༌ནོག༌ སམ༌ཁན༌བོ༌ དྲང༌པོ༌ མ༌ནོག༌, ལྟོས༌ཤིག༌གའང༌ ང༌ཏོག༌གི༌ ཆུ༌ཚོད༌ དགུ༌པ༌ མ༌ནེ༌ ཆ༌ མི༌དུག༌།
16 ཨིན༌ནའང༌ ཏུས༌ མང༌པོའེ༌ སྔུན༌ལ༌ འི༌བོའེ༌ སྐོར༌ལ༌ ལུང༌སྟོན༌པ༌ ཡོ༌ཨེལ༌ལི༌ མོལས༌,
17 "གཙོ༌བོ༌ དཀོན༌མཆོག༌གི༌ མོལས༌, 'ཐའ༌མའེ༌ ཏུས༌ལ༌
ངའེ༌ ང༌རང༌ངི༌ སེམས༌ཉིད༌ མི༌ཚང༌མའེ༌ཀ༌ ལུག༌ཨིན༌,
ཡང༌ ཁྱོ༌ཞའེ༌ བུ༌ཚ༌ དང༌ བུ༌མོ༌ གུན༌ནི༌ ལུང༌སྟན༌ ཏང༌ཨིན༌།
ཁྱོ༌ཞའེ༌ ཞོན༌ནུ༌གུན༌ནི༌ ཞལ༌ཟིགས༌ ཐོང༌ཨིན༌,
ཡང༌ ཁྱོ༌ཞའེ༌ རྒད༌པོ༌གུན༌ལ༌ ཉི༌ལམ༌ ཐོང༌ཨིན༌།
18 ཡང༌ ངའེ༌ ཏེན༌ན༌ ཏུས༌ལ༌ ངའེ༌ ཡོག༌པོ༌
དང༌ ཡོག༌མོ༌ གུན༌ནི༌ཀའང༌ ང༌རང༌ངི༌ སེམས༌ཉིད༌ ལུག༌ཨིན༌,
ཡང༌ ཏེ༌གུན༌ནི༌ ལུང༌སྟན༌ ཏང༌ཨིན༌།
19 ངའེ༌ ནམ༌ཁའེ༌ ནང༌ང༌ ཧ༌ལས༌ཤེས༌སི༌ ལས༌ དང༌
ཇིག༌རྟེན༌ནི༌ཀ༌ སྟགས༌ གུན༌ ལྟན༌ཨིན༌,
ཏེ༌གུན༌ ཁྲག༌, མེ༌ དང༌ ཏུད༌པ༌ ནག༌པོ༌ གུན༌ ཨིན༌།
20 གཙོ༌བོའེ༌ ཀྲག༌ཅན༌ དང༌ སྤལ༌ཅན༌ ཞག༌པོ༌ བྱུང༌ངི༌ སང༌
སྔུན༌ལ༌ ཉི༌མ༌ མུན༌གྲིག༌ ཆེན༌
ཡང༌ ཟླ༌ཝ༌ ཁྲག༌ ཙོགས༌ མར༌པོ༌ གྱུར༌ཨིན༌།
21 ཨིན༌ནའང༌ གཙོ༌བོའེ༌ ཚན༌ ཁུར༌ཁན༌ ཚང༌མའ༌
ཐར༌པ༌ ཐོབ༌ཨིན༌ །
22 "ཏ༌ ཁྱོ༌ཞའ༌ ཨིས༌ར༌ཨེལ༌པ༌གུན༌ ངའེ༌ སྤེ༌ར༌ ཉོན༌ཤིག༌། ཁྱོ༌ཞ༌གུན༌ལ༌ གྱུས༌ཨིན༌ནོག༌ དཀོན༌མཆོག༌གི༌ ཡེ༌ཤུ༌ གྱུད༌ཏེ༌ ཧ༌ལས༌ཤེས༌སི༌ ཛད༌པ༌, ལྟས༌ དང༌ སྟགས༌ གུན༌ ཛད༌ཏེ༌ ཁོང༌ངི༌ ན༌ཙ༌རེད༌པ༌ ཡེ༌ཤུ༌ ཀལ༌ལ༌ ཛད༌ཏེ༌ ཨིན༌ཁན༌བོ༌ ལྟན༌ན༌ ཛདས༌།
23 དཀོན༌མཆོག༌གི༌ བྱུང༌ཅེས༌ཅན༌གུན༌ ཁྱེན༌ཏེ༌ ཁོང༌རང༌ངི༌ ཐབས༌ ནང༌ཞིན༌ ཡེ༌ཤུ༌ ཁྱོ༌ཞ༌གུན༌ནི༌ ལག༌ག༌ སྟད༌ཅུགས༌ ཡང༌ དཀོན༌མཆོག༌གི༌ ཁྲིམས༌ ཁའ༌ མ༌ཉན༌ཁན༌གུན༌ནི༌ རོགས༌ ཉམ༌པོ༌ ཁྱོ༌ཞ༌གུན༌ནི༌ ཁོང༌ རྐྱང༌ཤིང༌ངི༌ཀ༌ རྐྱང༌ཅུགས༌ཏེ༌ སདས༌།
24 ཨིན༌ནའང༌ དཀོན༌མཆོག༌གི༌ ཁོང༌ ཤི༌ཏེ༌ རྡུག༌ངལ༌ལི༌ ནང༌ང༌ ལུས༌ མ༌ཤུག༌ག༌ སོན༌ཏེའ༌ ལང༌ང༌ ཛདས༌, ཅིའ༌ཞུ༌ན༌ ཤི༌ཅེས༌སི༌ ཝང༌ངི༌ ཁོང༌ ཟུམས༌ཏེ༌ མ༌ནེ༌ བོར༌ མི༌ཉན༌།
25 སུང༌རབས༌སི༌ ནང༌ང༌ གྱལ༌པོ༌ དཱ༌བིད༌དི༌ མ༌ཤི༌ཀའེ༌ སྐོར༌ལ༌ མོལ༌དུག༌,
"ངའ༌ ཐོང༌, གཙོ༌བོ༌ ངའེ༌ དུན༌ལ༌ ཏུས༌གྱུན༌ ཞུགས༌ཏེ༌ དུག༌།
ཁོང༌ ངའ༌ རོགས༌ ཛད༌ད༌ ང༌ ཉམ༌པོ༌ ཞུགས༌ པ༌སང༌
ང༌ ཅའང༌ ཇིགས༌གོས༌ མེད༌།
26 ཏེན༌ན༌བོའེ༌ཕིའ༌ ངའེ༌ སེམས༌ ཐད༌པོ༌ ཨིན༌,
ཡང༌ ངའེ༌ ལྕེ༌ ཉེ༌རང༌ང༌ སྟོད༌པ༌ ཕུལ༌ལད༌།
མ༌ཚད༌ ཞི༌དེ༌ ཉམ༌པོ༌ ངའེ༌ ཟུགས༌པོའང༌ རེ༌ཝ༌ ཡོད༌,
27 ཅིའ༌ཟེར༌ན༌ ཉེ༌རང༌ངི༌ ངའེ༌ སེམས༌ཉིད༌པོ༌
ཤི༌ཁན༌གུན༌ནི༌ ཕྲོའ༌ ཕངས༌ཏེ༌ བོར༌ར༌ མི༌ཛད༌,
ཡ༌ ཉེ༌རང༌ངི༌ དམ༌པའེ༌ ཞབ༌སྟོག༌པ༌བོ༌ རུལ༌ ཅུག༌ག༌ མི༌ཛད༌།
28 ཉེ༌རང༌ངི༌ ངའ༌ སོན༌ཏེ༌ ལང༌ཅེས༌སི༌ ལམ༌བོ༌ ལྟན༌ན༌ ཛད༌,
ཉེ༌རང༌ ང༌ ཉམ༌པོ༌ ཞུག༌ཤེས༌པའེ༌, ངའ༌ གའ༌མོའེ༌ གང༌།"
29 "ཡ༌ཧུ༌དཱ༌པའེ༌ སྤུན༌གུན༌, ང༌དང༌ངི༌ ཕ༌མེས༌པོ༌ གྱལ༌པོ༌ དཱ༌བིད༌ ཤི༌, སྤུར༌བོ༌ སྤུར༌ཁང༌ང༌ སུབས༌ ཡང༌ ཁོང༌ངི༌ སྤུར༌ཁང༌བོ༌ དག༌སའང༌ ང༌དང༌ངི༌ ཕྲོའ༌ ཡོད༌ཁན༌བོ༌ ངའེ༌ ཏན༌ཏན༌ ཟེར༌ ཐུབ༌ཅེས༌རག༌།
30 ཨིན༌ནའང༌ ཁོང༌ ལུང༌སྟོན༌པ༌ ཨིན༌པིན༌, ཡང༌ དཀོན༌མཆོག༌གི༌ ཁོང༌ ཉམ༌པོ༌ ཞལ༌ཆད༌ ཛད༌ཁན༌ ནང༌ཞིན༌ ཁོང༌ངི༌ པུར༌གྱུད༌ནེ༌ ཅིག༌ ཁོང༌ངི༌ ཞུགས༌ཁྲིས༌སི༌ཀ༌ སྟག༌ག༌ ཛད༌ཅེས༌པོའང༌ གྱུས༌ ཡོད༌པིན༌།
31 གྱལ༌པོ༌ དཱ༌བིད༌དི༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ བྱུང༌ཅེས༌གུན༌ ཐོང༌ཏེ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཅེས༌པོ༌ ལུང༌སྟན༌ སལ༌ཏེ༌ མོལས༌, 'ཁོང༌ ཤི༌ཁན༌གུན༌ནི༌ ཕྲོའ༌ ཕངས༌ཏེ༌ བོར༌ར༌ མ༌ཛདས༌, ཡ༌ ཁོང༌ངི༌ སྐུ༌ཤ༌ རུལ༌ ཅུག༌ག༌ མི༌ཛད༌'།"
32 "ཏེན༌ན༌ ཡེ༌ཤུ༌, དཀོན༌མཆོག༌གི༌ སོན༌ཏེའ༌ ལང༌ང༌ ཛདས༌, ང༌ཞ༌གུན༌ནི༌ ཏེ༌བོ༌ སྤང༌པོ༌ ཏང༌ངད༌།
33 ཁོང༌ང༌ དཀོན༌མཆོག༌གི༌ ཆག༌ ཡས༌པའ༌ དུག༌ཅེས༌སི༌ སྤལ༌ ཐོབ༌, ཡང༌ ཡབ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ དམ༌པའེ༌ ཐུག༌ཉིད༌ སལ༌ལ༌ ཛད༌ཁན༌བོ༌ ཡེ༌ཤུའི༌ ང༌ཞའ༌ ཚང༌མ༌ལའང༌ སལ༌ལ༌ ཛད༌ཨིན༌ ཨིན༌ནོག༌, ཡང༌ ཏེ༌བོ༌ ཁྱོ༌ཞའེ༌ དག༌ས༌ ཐོང༌ཨིན༌ ཡང༌ ཚོར༌ཨིན༌ ཨིན༌ནོག༌།"
34-35 "གྱལ༌པོ༌ དཱ༌བིད༌ ནམ༌ཁའ༌ མ༌ཁྱེར༌ནའང༌ ཁོའེ༌ མོལས༌,
"'གཙོ༌བོ༌ དཀོན༌མཆོག༌གི༌ ངའེ༌ གཙོ༌བོའ༌ མོལས༌,
ངའེ༌ ཁྱོ༌རང༌ངི༌ གྲ༌འོ༌ ཚང༌མ༌,
ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌,
ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།'
36 ཏེན༌ན༌བོའེ༌ཕིའ༌ ཨིས༌ར༌ཨེལ༌པ༌ ཚང༌མ༌ལ༌ ཏན༌ཏན༌ ཧ༌གོ༌གོས༌: ཏེན༌ན༌ ཡེ༌ཤུ༌ ཀ༌བོ༌ ཁྱོ༌ཞ༌གུན༌ནི༌ རྐྱང༌ཤིང༌ང༌ རྐྱངས༌, གཙོ༌བོ༌ དཀོན༌མཆོག༌གི༌ ཁོང༌ ཁོང༌ངི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ དང༌ གཙོ༌བོ༌ ཉིས༌ཀོ༌ ཛདས༌།
37 པི༌ཏྲར༌རི༌ སྤེ༌ར༌གུན༌ ཚོར༌ར༌ཅིག༌ ཁོང༌གུན༌ སྙིང༌ང༌ དའ༌ ཟུག༌ཁན༌ ཙོགས༌ སྐྱོ༌མོ༌ སོང༌ཏེ༌, ཁོང༌གུན༌ནི༌ པི༌ཏྲར༌ དང༌ ཞན༌ སྐུ༌ཚབས༌གུན༌ལ༌ ཞུས༌, "སྤུན༌གུན༌, ང༌ཞའེ༌ ཅི༌ ཅོ༌གོས༌?"
38 པི༌ཏྲར༌རི༌ ལན༌སལས༌, "ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ ཐོབ༌ཅེས༌སི༌ ཕིའ༌ རང༌རང༌ངི༌ སྡིག༌པའེ༌ཀ༌ གྱོད༌པ༌ ཅོས༌ཏེ༌ ཡེ༌ཤུ༌ མ༌ཤི༌ཀའེ༌ ཚན༌ནི༌ ནང༌ང༌ ཁྲུས༌ལེན༌། ཏེ༌ནེ༌ ཁྱོ༌ཞ༌གུན༌ལ༌ དམ༌པའེ༌ ཐུག༌ཉིད༌དི༌ ཅིན༌ལབས༌ ཐོབ༌ཨིན༌།
39 འི༌ ཞལ༌ཆད༌པོ༌ ཁྱོ༌ཞའ༌, ཁྱོ༌ཞའེ༌ པུར༌གྱུད༌ དང༌ ཡ༌ཧུ༌དཱ༌པ༌ མན༌ཁན༌ གུན༌ནི༌ ཕིའ༌ ཨིན༌ནོག༌, ཀ༌གུན༌ལ༌ ང༌དང༌ངི༌ གཙོ༌བོ༌ དཀོན༌མཆོག༌གི༌ ཁོང༌རང༌ངི༌ མི༌གུན༌ གྱུར༌ཅེས༌ལ༌ བོད༌ད༌ ཛདས༌།
40 ཏེ༌ནེ༌ པི༌ཏྲར༌རི༌ ལབ༌ཞ༌ མང༌པོ༌ སལ༌ཨིན༌ སྤང༌པུད༌ཏེ༌ སྙིང༌ནེ༌ ཞུ༌ཝ༌ ཕུལ༌ཨིན༌ མོལས༌, "འི༌ མི༌རབས༌ ངན༌པའ༌ ཕོག༌ཅེས༌སི༌ ཆད༌པ༌ནེ༌ ཁྱོ༌ཞ༌རང༌གུན༌ སྐྱོབ༌ཤིག༌།"
41 ཁོའེ༌ ཆོས༌ཤད༌ཁན༌བོའ༌ ཏད༌པ༌ ཅོ༌ཁན༌གུན༌ནི༌ ཁྲུས༌ལེནས༌, ཡང༌ ཏེ༌ ཞག༌ག༌ མ༌ཤི༌ཀའེ༌ཀ༌ ཏད༌པ༌ ཅོ༌ཁན༌ སྟོང༌སུམ༌ ཟོད༌ཅིག༌ ཆོས༌ཚོགས༌སི༌ ཕྲོའ༌ ཐེའ༌ ཛདས༌།
ཏད༌པ༌ཅན༌གུན༌ནི༌ བྲེལ༌ ཅོ༌ཅེས༌།
2:42 ནེ༌ 47
42 ཁོང༌གུན༌ སྐུ༌ཚབས༌གུན༌ནེ༌ ལབ༌ཞ༌ ལེན༌ཅེས༌, སྤོས༌པ༌ ཏང༌ཅེས༌, ཁར༌ཇི༌ བགོས༌ཏེ༌ ཟའ༌ཅེས༌ ༼ཀ༌བོའེ༌ ནང༌ང༌ གཙོ༌བོ༌ ཡེ༌ཤུ༌ ཨིད༌ཏུ༌ ཅོ༌ཨིན༌ དོན༌ཏང༌ དོན༌ཅེས༌༽ དང༌ མོས༌ལམ༌ ཞུ༌ཅེས༌ གུན༌ མ༌ ཁག༌ཅན༌ སམས༌ཏེ༌ ཏུས༌གྱུན༌ ཛོམ༌མད༌པིན༌།
43 སྐུ༌ཚབས༌གུན༌ནི༌ ཧ༌ལས༌ཤེས༌སི༌ ཛད༌པ༌ དང༌ ལྟས༌ མང༌པོ༌ ལྟན༌ན༌ ཛད༌ཅེས༌པོའེ༌ མི༌ཚང༌མའེ༌, ཇིགས༌སི༌ ནང༌ང༌ དཀོན༌མཆོག༌ག༌ རྩི༌ཝ༌ ཛདས༌།
44 ཏད༌པ༌ཅན༌ ཚང༌མ༌ ལན༌ མང༌པོ༌ ཛོམས༌ཏེ༌, ཅི༌ཚང༌མ༌ ཅིག༌ དང༌ ཅིག༌ ཉམ༌པོ༌ བགོའད༌པིན༌།
45 ཡོད༌ཁན༌ནི༌ ནོར༌གུན༌ ཙོངས༌ཏེ༌ སྒོས༌དོམ༌ ཡོད༌ཁན༌གུན༌ལ༌ བགོས༌ཏེ༌ ཏང༌ངད༌པིན༌།
46 ཁོང༌གུན༌ ཞག༌ཏང༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ ཛོམ༌མད༌པིན༌། ཁང༌པ༌གུན༌ནི༌ ནང༌ང༌ གཙོ༌བོ༌ ཨིད༌ཏུ༌ ཅོ༌ཨིན༌ དོན༌ཀྱིར༌ ཅགས༌ཏེ༌ གའ༌མོ༌ དང༌ ཐད༌པོ༌ ཉམ༌པོ༌ སྙིང༌ ཕེས༌ཏེ༌ ཚང༌མ༌ ཉམ༌པོ༌ བགོས༌ཏེ༌ ཟེན༌,
47 དཀོན༌མཆོག༌ག༌ སྟོད༌པ༌ ཕུལ༌ཨིན༌, མི༌ཚང༌མའེ༌ ཆོགས༌སྐྱོར༌ ཐོབ༌ཅེས༌ལ༌ ཁོང༌གུན༌ནི༌ ཐད༌པོ༌ ཅོས༌། ཐར༌པ༌ ཐོབ༌ཁན༌གུན༌ནི༌ ཀྲངས༌ཀ༌ ཞག༌པ༌སང༌ཞག༌ གཙོ༌བོ༌ ཡེ༌ཤུའི༌ ཕེལ༌ ཅུག༌ག༌ ཛདས༌།