12
སེམས༌ཉིད༌དི༌ ཁྱུད༌།
12:1 ནེ༌ 11
1 ཏ༌ ངའེ༌ སྤུན༌གུན༌ དམ༌པའེ༌ ཐུག༌ཉིད༌དི༌ ང༌དང༌གུན༌ལ༌ སལ༌ལ༌ ཛད༌ཁན༌ནི༌ ཁྱུད༌གུན༌ནི༌ སྐོར༌ལ༌, ཁྱོ༌ཞའེ༌ ཧ༌གོ༌བོ༌ ནོར༌ཁྲུལ༌ཅན༌ཞིག༌ མི༌ཡོང༌ཅེས༌སི༌ དོད༌པ༌ ཅོའད༌།
2 ཏད༌པ༌ མེད༌ཁན༌ ཨིན༌ ཟ༌ནེ༌, ཁྱོ༌ཞ༌གུན༌ སྤེ༌ར༌ ཏང༌ མ༌ཉན༌ཁན༌ནི༌ སྐུན༌དྲ༌གུན༌ནི༌ ལམ༌ ནོར༌ཁན༌ནི༌ཀ༌ ཁྲིད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
3 ཏེ༌བོའེ༌ཕིའ༌ སུ༌ཞིག༌གིའང༌ དཀོན༌མཆོག༌གི༌ ཐུག༌ཉིད༌དི༌ ནང༌ང༌ ཡེ༌ཤུའ༌ ངན༌ ཏབ༌ མི༌ཉན༌ ཡང༌ དམ༌པའེ༌ ཐུག༌ཉིད༌ ཅིག༌པོ༌ གྱུད༌ཏེ༌ མ༌སྟོགས༌, སུ༌ཞིག༌གིའང༌ ཡེ༌ཤུ༌ ཚང༌མའེ༌ གཙོ༌བོ༌ ཞུགས༌ཏེ༌ ཨིན༌ནོག༌ ཟེར༌ མི༌ཉན༌ཅེས༌པོ༌ ངའེ༌ ཁྱོ༌ཞ༌གུན༌ལ༌ གྱུས༌ ཆ༌ཅུག༌ཉིན༌རག༌།
4 ཐུག༌ཉིད༌དི༌ ཁྱུད༌ སྣ༌ཚོགས༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཨིན༌ནའང༌ ཏེ༌ ཚང༌མའེ༌ བྱུང༌ས༌བོ༌ ཐུག༌ཉིད༌ ཁོ༌རང༌ ཨིན༌ནོག༌།
5 ཞབ༌སྟོག༌ སྣ༌ཚོགས༌ཤིག༌ ཡོད༌ཏེ༌ ཨིན༌ནོག༌, ཨིན༌ནའང༌ ང༌དང༌གུན༌ནི༌ གཙོ༌བོ༌ ཅིག༌གི༌ ཞབ༌སྟོག༌ ཞུའ༌ནོག༌།
6 དཀོན༌མཆོག༌གི༌ ཕིའ༌ ང༌དང༌ངི༌ ལས༌ སྣ༌ཚོགས༌སི༌ ཅོའ༌ནོག༌, ཨིན༌ནའང༌ ང༌དང༌ངི༌ ཅོ༌ཁན༌ནི༌ ལས༌ ཚང༌མའེ༌ ནང༌ང༌ ཏེན༌ན༌ དཀོན༌མཆོག༌པོའེ༌ ཆག༌ལས༌ ཛད༌ད༌ནོག༌།
7 ཅིག༌ དང༌ ཅིག༌ག༌ རོགས༌ ཅོ༌ཉན༌ཅེས༌ལ༌, ཐུག༌ཉིད༌དི༌ ཁྱུད༌ ང༌དང༌ རེ༌རེའ༌ དཀོན༌མཆོག༌གི༌ སལ༌ལ༌ ཛད༌ད༌ནོག༌།
8 ཏེན༌ན༌ ཐུག༌ཉིད༌བོ༌ གྱུད༌ཏེ༌, མི༌ཞིག༌ག༌ ཁ༌ད༌ ཤེས༌རབས༌ཅན༌ ཏང༌ ཉན༌ཅེས༌སི༌ ཁྱུད༌, ཡང༌ཞིག༌ག༌ ཏེན༌ན༌ ཐུག༌ཉིད༌བོ༌ གྱུད༌ཏེ༌, མིག༌སལ༌ལི༌ ཡོན༌ཏན༌ནི༌ ལོན༌བོ༌ སལ༌ལ༌ ཛད༌ད༌ནོག༌།
9 ཏེན༌ན༌ ཐུག༌ཉིད༌བོའེ༌ ཅིག༌ག༌, ཨིད༌ཤེས༌ ཆེན༌མོ༌ དང༌ ཞན༌ཞིག༌ག༌, ཕན༌ཅུག༌ཅེས༌སི༌ ཁྱུད༌ གུན༌ སལ༌ལ༌ནོག༌།
10 ཁོང༌ངི༌ མི༌ཞིག༌ག༌ ཧ༌ལས༌ཤེས༌སི༌ ལྟས༌གུན༌ ལྟན༌ཅེས༌སི༌ ཁྱུད༌, ཞན༌ཞིག༌ག༌ ལུང༌སྟན༌ ཏང༌ཅེས༌སི༌ ཁྱུད༌, ཞན༌ཞིག༌ག༌ ལོན༌བོ༌ དཀོན༌མཆོག༌གི༌ ཐུག༌ཉིད༌དི༌ ཆོགས༌ནེ༌ ཨིན༌ནོག༌ག༌ མ༌ནོག༌ ལྟ༌ཉན༌ཅེས༌སི༌ ཁྱུད༌པོ༌, ཞན༌ཞིག༌ག༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌སི༌ ཁྱུད༌ དང༌ ཞན༌ཞིག༌ག༌ ཏེ༌ སྐད༌གུན༌ གྱུར༌ཅེས༌སི༌ ཁྱུད༌གུན༌ སལ༌ལ༌ ཛད༌ད༌ནོག༌།
11 ཨིན༌ནའང༌ ཏེ༌ ཁྱུད༌གུན༌ ཏེན༌ན༌ ཐུག༌ཉིད༌ ཅིག༌ཅིག༌པོའེ༌ སལ༌ལ༌ ཛད༌ད༌ནོག༌། མི༌ རེ༌རེའ༌ ཀ༌ཟུག༌ ཁྱུད༌རིག༌ ཐོབ༌ཨིན༌, ཏེ༌བོ༌ ཁོང༌ ཅིག༌པོའེ༌ ཐག༌ཅད༌ད༌ ཛད༌ད༌ནོག༌།
ཟུགས༌པོ༌ ཅིག༌ག༌ ཁག༌ མང༌པོ༌།
12:12 ནེ༌ 31
12 ཞན༌ མིའི༌ ཟུགས༌པོའ༌ ཡན༌ལག༌ མང༌པོ༌ཞིག༌ ཡོད༌ནའང༌, ཁག༌ ཚང༌མའེ༌ ཟུགས༌པོ༌ ཆ༌ཚང༌ཞིག༌ གྲུབ༌བ༌ནོག༌། ཏེན༌ན༌ ཙོགས༌ལ༌ ཆོས༌ཚོགས༌གུན༌ མ༌ཤི༌ཀའེ༌ སྐུ༌ཟུགས༌ ཨིན༌ནོག༌།
13 ང༌དང༌ ཁ༌ཅིག༌ ཡ༌ཧུ༌དཱ༌པ༌ ཡང༌ ཁ༌ཅིག༌ ཡ༌ཧུ༌དཱ༌པ༌ མ༌ནོག༌། ཁ༌ཅིག༌ ཚེ༌ཡོག༌ ཡང༌ ཁ༌ཅིག༌ རང༌ཝང༌ཅན༌ ཨིན༌ནོག༌། ཨིན༌ནའང༌ དམ༌པའེ༌ ཐུག༌ཉིད༌དི༌ ནང༌ང༌ ང༌དང༌ རེ༌རེའ༌ ཁྲུས༌སལ༌ལ༌ ཛད༌ཅེས༌པོའེ༌ ང༌དང༌གུན༌ ཟུགས༌པོ༌ ཅིག༌ ཨིན༌ནོག༌། ཏ༌ ང༌དང༌ རེ༌རེའེ༌ ཏེན༌ན༌ ཐུག༌ཉིད༌ ཅིག༌པོའེ༌ ཀ༌ནེ༌ ཐུང༌ཨིན༌ ཨིན༌ནོག༌།
14 འོ༌ན༌, ཟུགས༌པོ༌བོའ༌ ཡན༌ལག༌ ཅིག༌ མན༌པ༌ མང༌པོ༌, སོ༌སོ༌ རིག༌ ཡོད༌ཏེ༌ ཨིན༌ནོག༌།
15 གལ༌ཏེས༌ རྐང༌པའེ༌ ཟེར༌ན༌, "ང༌ ཟུགས༌པོའེ༌ ཡན༌ལག༌ མན༌ ཅིའ༌ཟེར༌ན༌ ང༌ ལག༌པ༌ མན༌།" ཅི༌ ཏེ༌བོའེ༌ རྐང༌པ༌ ཟུགས༌པོའེ༌ ཁག༌ཤིག༌ ལུས༌ས༌ མ༌ནོག༌ག༌?
16 ཡང༌ གལ༌ཏེས༌ ནམ༌ཅོག༌གི༌ ཟེར༌ན༌, "ང༌ ཟུགས༌པོའེ༌ ཡན༌ལག༌ མན༌ ཅིའ༌ཟེར༌ན༌ ང༌ མིག༌ མན༌", ཅི༌ ཏེ༌བོའེ༌ ནམ༌ཅོག༌པོ༌ ཟུགས༌པོའེ༌ ཁག༌ཤིག༌ ལུས༌ས༌ མ༌ནོག༌ག༌?
17 གལ༌ཏེས༌ ཟུགས༌པོ༌ གང༌མ༌ མིག༌ ཨིན༌པིན༌ན༌, ཀ༌ཟུག༌གི༌ ཁྱོ༌ཞ༌གུན༌ནི༌ ཚོར༌ཨིན༌། ཡ༌ གལ༌ཏེས༌ ཁྱོ༌ཞ༌གུན༌ནི༌ ཟུགས༌པོ༌ གང༌མ༌ ནམ༌ཅོག༌ ཨིན༌པིན༌ན༌, ཏེ༌ནེ༌ ཀ༌ཟུག༌གི༌ ཁྱོ༌ཞ༌གུན༌ནི༌ ཏྲི༌མ༌ ཚོར༌ཨིན༌།
18 ཨིན༌ནའང༌ ང༌དང༌གུན༌ནི༌ ཟུགས༌པོ༌བོའ༌ ཏན༌ཏན༌ལ༌ ཡན༌ལག༌ མང༌པོ༌ཞིག༌ ཡོད༌ཏེ༌ ཨིན༌ནོག༌། ཡང༌ དཀོན༌མཆོག༌གི༌ ཏེ༌ ཡན༌ལག༌གུན༌ ཁོང༌ངི༌ ཐུག༌གོངས༌ ནང༌ཞིན༌ལ༌, རང༌རང༌ངི༌ ནས༌སའེ༌ཀ༌ བོར༌ར༌ ཛད༌ཏེ༌ ཨིན༌ནོག༌།
19 གལ༌ཏེས༌ ཟུགས༌པོ༌བོའ༌ ཡན༌ལག༌ ཅིག༌ མ༌ནེ༌ མེད༌པིན༌ན༌, ཏེ༌ནེ༌ ཀ༌ཟུག༌ ཡམ༌ཚན༌ཞིག༌ མེད༌གྲོ༌།
20 འོ༌ན༌, ཡན༌ལག༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཨིན༌ནའང༌ ཟུགས༌པོ༌ ཅིག༌།
21 མིག༌གི༌ ལག༌པའ༌ མ༌ནེ༌ མི༌ཟེར༌, "ང༌ ཁྱོ༌རང༌ གོ༌ཤེས༌ མེ༌རག༌།" གོའི༌ རྐང༌པའ༌ མ༌ནེ༌ མི༌ཟེར༌, "ང༌ ཁྱོ༌རང༌ངི༌ སྒོས༌དོམ༌ མེད༌།"
22 ངོས༌པོ༌བོ༌ ནི༌ འུ༌ཐུགས༌ ཐོང༌ཁན༌ དང༌ ཁག༌ཅན༌ མན༌ཁན༌ནི༌ ཟུགས༌པོའེ༌ ཡན༌ལག༌གུན༌ ཚང༌མའེ༌སང༌ སྒོས༌དོམ༌ཅན༌བོ༌ ཨིན༌ནོག༌།
23 ཡང༌ རྩི༌ཝ༌ ཉུ༌ངུན༌ཅན༌ དང༌ ལྟན༌ མི༌གོ༌ཤེས༌ཅན༌ནི༌ ཟུགས༌པོའེ༌ ཁག༌གུན༌ལ༌ ང༌དང༌གུན༌ནི༌ སྣང༌སྟག༌ ཆེན༌མོ༌ ཉམ༌པོ༌ ཀོས༌ལག༌ སྐོན༌ཏེ༌ གྱལ༌ལ༌ སྣང༌སྟག༌ ཅོས༌ཏེ༌ སྐྱོབས༌ཏེ༌ བོར༌ར༌ནོག༌།
24 ལྟན༌ནའང༌ གྲིག༌ཅེས༌ཅན༌ནི༌ ཞན༌ ཡན༌ལག༌གུན༌ལ༌, ཏེ༌ཙོགས༌སི༌ མིག༌སལ༌ལི༌ སྣང༌སྟག༌ གོས༌ས༌ མ༌ནོག༌། ཏེ༌ནེ༌ དཀོན༌མཆོག༌གི༌ རྩི༌ཝ༌ ཉུ༌ངུན༌ཅན༌ནི༌ ཡན༌ལག༌གུན༌ལ༌ མང༌ང༌ རྩི༌ཝ༌ དང༌ ལྟ༌སྟོག༌ ཏང༌ཅུགས༌ཏེ༌ ཟུགས༌པོ༌ གང༌མ༌ ཉམ༌པོ༌ གྲངས༌པོ༌ བོར༌ར༌ ཛད༌ཏེ༌ ཨིན༌ནོག༌།
25 ཏེ༌བོ༌ ཅིག༌ དང༌ ཅིག༌ག༌ ལྟ༌སྟོག༌ ཅོ༌ཅེས༌ མ༌ཚད༌, ཐུས༌མི༌ ཚང༌མའེ༌ ནང༌ང༌ ཐུན༌བྲེལ༌ ཡོང༌ཅེས༌ལ༌ ཅོའ༌ ཛད༌ཏེ༌ ཨིན༌ནོག༌།
26 གལ༌ཏེས༌ ཡན༌ལག༌ ཅིག༌ག༌ ཟུ༌མོ༌ ཡོང༌ན༌, ཞན༌ ཡན༌ལག༌ ཚང༌མའང༌ ཏེ༌བོ༌ ཉམ༌པོ༌ རྡུག༌ངལ༌ ཐོང༌ང༌ནོག༌, ཡང༌ གལ༌ཏེས༌ ཡན༌ལག༌ ཅིག༌ག༌ རྩི༌ཝ༌ ཐོབ༌ན༌, ཏེ༌བོ༌ ཉམ༌པོ༌ ཞན༌ ཡན༌ལག༌ ཚང༌མེའང༌ ཐད༌པོ༌ ཅོའ༌ནོག༌།
27 ཏ༌ ཁྱོ༌ཞའ༌ ཚང༌མ༌ ཛོམས༌ཏེ༌, མ༌ཤི༌ཀའེ༌ སྐུ༌ཟུགས༌པོ༌ ཨིན༌ནོག༌, ཡང༌ ཁྱོ༌ཞའ༌ རེ༌རེ༌ ཏེ༌བོའེ༌ ཡན༌ལག༌གུན༌ ཨིན༌ནོག༌།
28 དཀོན༌མཆོག༌གི༌ ཆོས༌ཚོགས༌སི༌ ཕིའ༌, ལྡམ༌མ༌ ཛད༌ཁན༌ནི༌ ཡན༌ལག༌ ཁ༌ཅིག༌ འི༌གུན༌ ཨིན༌ནོག༌།
ཏང༌པོ༌བོ༌, མ༌ཤི༌ཀའེ༌ སྐུ༌ཚབས༌གུན༌,
ཉིས༌པ༌བོ༌, ལུང༌སྟོན༌པ༌གུན༌,
སུམ༌པ༌བོ༌, ལོབ༌པོན༌གུན༌,
ཏེ༌ནེ༌ ཧ༌ལས༌སི༌ ལྟས༌ ལྟན༌ཁན༌གུན༌,
ཏེ༌ནེ༌ ཕན༌ཅུག༌ ཉན༌ཅེས༌སི༌ ཁྱུད༌ ཡོད༌ཁན༌གུན༌,
ཏེ༌ནེ༌ ཅིག༌ དང༌ ཅིག༌ག༌ རོགས༌ ཅོ༌ཁན༌གུན༌,
ཏེ༌ནེ༌ ཆོས༌ཚོགས༌ གོ༌སྐྱོང༌ཅེས༌སི༌ ཁྱུད༌ ཡོད༌ཁན༌གུན༌,
ཏེ༌ནེ༌ མ༌ཤེས༌ཁན༌ནི༌ སྐད༌གུན༌ནི༌ ནང༌ང༌ སྤེ༌ར༌ ཏང༌ ཉན༌ཅེས༌སི༌ ཁྱུད༌ ཡོད༌ཁན༌གུན༌།
29 ཅི༌ ང༌དང༌ ཚང༌མ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌གུན༌ ཨིན༌ན༌? ཅི༌ ང༌དང༌ ཚང༌མ༌ ལུང༌སྟོན༌པ༌གུན༌ ཨིན༌ན༌? ཅི༌ ང༌དང༌ ཚང༌མ༌ ལོབ༌པོན༌གུན༌ ཨིན༌ན༌? ཅི༌ ང༌དང༌ ཚང༌མ༌ལ༌ ཧ༌ལས༌ཤེས༌སི༌ ལྟས༌ ཅོ༌ཅེས༌སི༌ ཝང༌ ཡོད༌ད༌?
30 ཅི༌ ང༌དང༌ ཚང༌མ༌ལ༌ ཕན༌ཅུག༌ ཉན༌ཅེས༌སི༌ ཁྱུད༌ ཡོད༌ད༌? ཅི༌ ང༌དང༌ ཚང༌མ༌ལ༌ མ༌ཤེས༌ཁན༌ནི༌ སྐད༌གུན༌ནི༌ ནང༌ང༌ སྤེ༌ར༌ ཏང༌ ཉན༌ཅེས༌སི༌ ཁྱུད༌ ཡོད༌ད༌? ཅི༌ ང༌དང༌ ཚང༌མ༌ལ༌ མ༌ཤེས༌ཁན༌ནི༌ སྐད༌དི༌ སྐད༌གྱུར༌ ཅོ༌ཐུབ༌ཅེས༌སི༌ ཁྱུད༌ ཡོད༌ད༌?
31 ཆོས༌ཚོགས༌ལ༌ ཚང༌མའེ༌སང༌ ཕན༌ཐོགས༌ མང༌ང༌ ཏང༌ཉན༌ཅེས༌སི༌ ཁྱུད༌གུན༌ ཁྱོ༌ཞའ༌ ཐོབ༌ཅེས༌སི༌ དོད༌པ༌ བོར༌གོ༌ཤེས༌ ཨིན༌ནོག༌།
ཨིན༌ནའང༌ ཏ༌ ངའེ༌ ཁྱོ༌ཞ༌གུན༌ལ༌ མི༌ཚེ༌ ཕུད༌ཚུལ༌ ཚང༌མའེ༌ ནང༌ནེ༌ གྱལ༌ཤོག༌ ཨིན༌ཁན༌བོ༌ ལྟན༌ཨིན༌།