12
དཀོན༌མཆོག༌གི༌ ཁོང༌རང༌ངི༌ ཕྲུ༌གུ༌གུན༌ སྐྱོང༌ང༌ ཛདས༌།
12:1 ནེ༌ 13
1 ཏེ༌བོའེ༌ཕིའ༌ ང༌དང༌གུན༌ལ༌ ཏད༌པའེ༌ ནང༌ང༌ མི༌ཚེ༌ པུད༌ཁན༌ནི༌ མི༌ཚོགས༌ ཆེན༌མོ༌ཞིག༌གི༌ སྐོར༌ཏེ༌ ཡོད༌པ༌, ང༌དང༌ངི༌ ཏད༌པའེ༌ ནང༌ང༌ གྲུལ༌ མ༌ཅུག༌ཁན༌ དང༌ ལ༌མོ༌ ཉམ༌པོ༌ ཁྲིལ༌ཁན༌ནི༌ སྡིག༌པ༌ གུན༌ ཕངས༌ཏེ༌ དཀོན༌མཆོག༌གི༌ གྲལ༌གྲིག༌ ཅོའ༌ ཛད༌ཁན༌ནི༌ བང༌གྱུགས༌པོ༌ ང༌དང༌གུན༌ནི༌ སྙིང༌རུས༌ ཉམ༌པོ༌ ཏང༌ཨིན༌།
2 ང༌དང༌གུན༌ནི༌ མིག༌གུན༌ ཡེ༌ཤུའི༌ཀ༌ བོར༌ཨིན༌, ཀ༌བོའེ༌ ང༌དང༌གུན༌ལ༌ གོ༌ཁྲིད༌ ཛད༌ཏེ༌ ང༌དང༌གུན༌ནི༌ ཏད༌པ༌བོ༌ ཕུན༌སུམ༌ཚོགས༌པ༌ གྱུར༌ ཅུག༌ག༌ ཛད༌དད༌། ཁོང༌ང༌ སྲུངས༌ཏེ༌ ཡོད༌ཁན༌ནི༌ སྐྱིད༌པོའེ༌ ཐུག༌གྱུས༌ ཡོད༌ པ༌སང༌, ཁྲེལ༌བ༌ མ༌སམ༌མ༌ སྙིང༌རུས༌ ཉམ༌པོ༌ ཁོང༌ངི༌ རྐྱང༌ཤིང༌ངི༌ རྡུག༌ངལ༌བོ༌ ནམས༌ས༌ ཛདས༌། དག༌ས༌ ཁོང༌ དཀོན༌མཆོག༌གི༌ ཞུགས༌ཁྲིས༌སི༌ ཡས༌པ༌ ཆོགས༌ལ༌ རྩི༌ཝ༌ཅན༌ནི༌ ནས༌ས༌བོའེ༌ཀ༌ ཞུགས༌ཏེ༌ ཡོད༌ཏེ༌ ཨིན༌ནོག༌།
3 སམ༌བ༌ སལ༌ལའང༌ སྡིག༌ཅན༌ མི༌གུན༌ནི༌ ནགས༌ ལྟན༌ཁན༌གུན༌ སྙིང༌རུས༌ ཉམ༌པོ༌ སྲན༌ན༌ ཛད༌ཁན༌ནི༌ ཡེ༌ཤུའི༌ སྐོར༌ལ༌, ཏེ༌ནེ༌ ཁྱོ༌ཞ༌གུན༌ སྲན༌ཏྲེ༌ ངལ༌མི༌ངལ༌ ཡང༌ ཁྱོ༌ཞའེ༌ རེ༌ཝ༌བོ༌ ཕང༌མི༌ཕང༌!
4 སྡིག༌པའེ༌ གྱབ༌གལ༌ལ༌ ནོལ༌ཨིན༌, ཁྱོ༌ཞ༌གུན༌ལ༌ ཏ༌རུང༌ ཚག༌པ༌ ཤི༌ཅེས༌སི༌ རྡུག༌ངལ༌བོ༌ མ༌བྱུང༌ང༌ ཨིན༌ནོག༌།
5 ཁོང༌རང༌ངི༌ ཕྲུ༌གུ༌གུན༌ལ༌ སྤོས༌པ༌ སལ༌ཨིན༌ དཀོན༌མཆོག༌གི༌ མོལ༌ཁན༌བོ༌ ཁྱོ༌ཞ༌གུན༌ནི༌ ཞེད༌དའ༌?,
"ངའེ༌ ཕྲུ༌གུ༌, གཙོ༌བོའེ༌ སྐྱོང༌ང༌ ཛད༌ཅེས༌པོའ༌ སྣང༌མེད༌ མ༌ཅོ༌ཤིག༌
ཡང༌ ཁོང༌ངི༌ ཆད༌པ༌ སལ༌ལ༌ ཛད༌ ཟ༌ནེ༌,
སེམས༌ ཆགས༌ཏེ༌ རེ༌ཝ༌བོ༌ མ༌ཕང༌ཤིག༌།
6 ཅིའ༌ཟེར༌ན༌ གཙོ༌བོའེ༌ ཅེས༌པ༌ ཛད༌ཁན༌གུན༌ལ༌ སྐྱོང༌ང༌ ཛད༌ད༌ནོག༌
ཡང༌ ཁོང༌རང༌ངི༌ ཕྲུ༌གུ༌ ཐེ༌ཁན༌གུན༌ལ༌ ཆད༌པ༌ སལ༌ལ༌ ཛད༌ད༌ནོག༌། "
7 དཀོན༌མཆོག༌གི༌ སྐྱོང༌ཅེས༌པོའ༌, ཁྱོ༌ཞ༌གུན༌ནི༌ སྙིང༌རུས༌ ཅོ༌ ཟ༌ནེ༌, ཁོང༌ངི༌ ཁྱོ༌ཞའ༌ ཁོང༌རང༌ངི༌ ཕྲུ༌གུ༌ ཙོགས༌ ཐེའ༌ ཛད༌ཁན༌བོ༌ ཨིད༌ཏུ༌ ཅོ༌ཤིག༌། ཨ༌བའེ༌ མ༌སྐྱོང༌ཁན༌ནི༌ ཕྲུ༌གུ༌ཞིག༌ སུ༌ ཡོད༌ཀྱག༌?
8 སྐྱོང༌ཅེས༌པོ༌ ཚང༌མའེ༌ཀ༌ བྱུང༌ང༌ནོག༌། དཀོན༌མཆོག༌གི༌ མ༌སྐྱོང༌ཁན༌གུན༌ ཁོང༌ངི༌ དེན༌བའེ༌ ཕྲུ༌གུ༌གུན༌ མན༌པ༌, ན༌ལུ༌གུན༌ ཨིན༌ནོག༌།
9 ཞན༌ ང༌དང༌གུན༌ སྐྱོང༌ཁན༌ ཇིག༌རྟེན༌ནི༌ ཨ༌བ༌གུན༌ལ༌ ང༌ཏི༌ རྩི༌ཝ༌ ཅོའ༌ནོག༌, ཏེ༌ནེ༌ ཙམ༌ཤིག༌ མང༌ང༌ ང༌དང༌གུན༌ ང༌དང༌རང༌ངི༌ ཐུག༌ཉིད༌དི༌ ཡབ༌བ༌ སྟད༌ མ༌གོས༌? ཏེ༌ཟུག༌ ཅོ༌ན༌ ཏུས༌གྱུན༌ སོན༌ཏེའ༌ ལུས༌ཨིན༌།
10 ཇིག༌རྟེན༌ནི༌ ཨ༌བ༌གུན༌ནི༌ ཏུས༌ ཉུ༌ངུན༌ཞིག༌གི༌ ཕིའ༌ ང༌དང༌གུན༌ལ༌ སམ༌བ༌ གྱལ༌ལ༌ ཉམ༌པོ༌ སྐྱོང༌ང༌ནོག༌། ཨིན༌ནའང༌ དཀོན༌མཆོག༌གི༌ ང༌དང༌རང༌ངི༌ ཕན༌ཐོགས༌སི༌ ཕིའ༌ ང༌དང༌གུན༌ སྐྱོང༌ང༌ ཛད༌ད༌ནོག༌, ཏེ༌བོ༌ ཛད༌ཅེས༌སི༌ གྱུན༌ཚན༌ ནི༌, ཁོང༌ དམ༌པ༌ ཨིན༌ཁན༌བོ༌ ང༌དང༌ ཉམ༌པོ༌ བགོའ༌ ཛད༌ཅེས༌པོ༌ ཨིན༌ནོག༌།
11 སྐྱོང༌ཅེས༌སི༌ ཏུས༌པོ༌ སྐྱིད༌པོ༌ མན༌པ༌ རྡུག༌ངལ༌ཅན༌ཞིག༌ ཡོང༌ང༌ནོག༌། ཨིན༌ནའང༌ སྟིང༌ནེ༌ འི༌ཙོགས༌སི༌ ལམ༌མི༌ ནང༌ང༌ ལོབ༌ཇོང༌ ཐོབ༌ཁན༌གུན༌ལ༌ དྲང༌པོ༌ དང༌ ཞི༌དེའེ༌ བྲས༌བུ༌གུན༌ སྨིན༌ཨིན༌།
12 ཏེན༌ན༌བོའེ༌ཕིའ༌ ངལ༌ཁན༌ནི༌ ལག༌པ༌ དང༌ འུ༌ཐུགས༌ པིག༌མོ༌ གུན༌ ཤེད༌ཅན༌ ཅོ༌ཤིག༌།
13 འུ༌ཐུགས༌ དང༌ ཞ༌འོ༌ གུན༌ ཐུའ༌ མ༌ཆའ༌ ཤེད༌ཅན༌ གྱུར༌ཅེས༌སི༌ ཕིའ༌ ལམ༌ དྲང༌པོའེ༌ཀ༌ གྲུལ༌ཤིག༌།
དཀོན༌མཆོག༌གི༌ མོལ༌ཁན༌གུན༌ ཉན༌ཅེས༌ལ༌ ཞུ༌ཝ༌།
12:14 ནེ༌ 29
14 མི༌ཚང༌མ༌ ཉམ༌པོ༌ ཞི༌དེ༌ ནང༌ང༌ དུག༌ཅེས༌སི༌ རྩོན༌གྲུས༌ ཅོ༌ཤིག༌, དམ༌པ༌ མི༌ཚེ༌ཞིག༌ ཕུད༌ཤིག༌། དམ༌པ༌ མ༌དུག༌ཁན༌གུན༌ལ༌ གཙོ༌བོ༌ ཇལ༌ཐུབ༌བ༌ མ༌ནོག༌།
15 དཀོན༌མཆོག༌གི༌ ཐུག༌རྗེ༌ མ༌ཐོབ༌བ༌ སུ༌ཞིག༌གའང༌ ལུས༌ མི༌ལུས༌ཤེས༌ལ༌ ནང༌སྟག༌ ཅོ༌ཤིག༌། ཡང༌ ཏུག༌གི༌ པ༌ཀྲག༌ ངན༌པ༌ གྱས༌ཏེ༌ ནགས༌ ལྟན༌ཅེས༌ དང༌ མང༌པོའ༌ ལས༌ངན༌གུན༌ ཅོ༌ མི༌ཅུག༌ཅེས༌ལ༌ ཤང༌ ཅོ༌ཤིག༌།
16 སུ༌ཞིག༌གིའང༌ ལུས༌བྲེལ༌ ངན༌པའེ༌ སྕོད༌ལམ༌ ཡ༌ ཨི༌སུ༌ ཙོགས༌ལ༌ ཏད༌པ༌ མེད༌ཁན༌ནི༌ མི༌ཚེ༌ མི༌ཕུད༌ཅེས༌ལ༌ ཏན༌ཏན༌ ཅོ༌ཤིག༌, ཀ༌བོའེ༌ ཁོ༌རང༌ངི༌ གོ༌མ༌ སྐྱེས༌ཁན༌ནི༌ ཐོབ༌ཏང༌གུན༌ ཚེན༌དར༌ ཅིག༌གི༌ ཁར༌ཇིའི༌ ཕིའ༌ ཙོངས༌།
17 ཁྱོ༌ཞ༌གུན༌ལ༌ གྱུས༌ཡོད༌ཏེ༌ ཨིན༌ནོག༌, སྟིང༌ནེ༌ ཨི༌སུའ༌ ཁོ༌རང༌ངི༌ ཨ༌བའེ༌ ཅིན༌ལབས༌པོ༌ གོས༌ ཟ༌ནེ༌ ཨ༌བའེ༌ ཁོའ༌ མ༌ཏངས༌། ཞན༌ ཁོའེ༌ གྱོད༌པ༌ ཅོས༌ཏེ༌ མ༌སྲན༌ཏྲེ༌ ངུ༌ཨིན༌ ཞུ༌ཝ༌ ཕུལ༌ནའང༌, ཁོའ༌ ཁོ༌རང༌ངི༌ ཨ༌བའེ༌ ཐག༌ཅད༌དི༌ ནང༌ང༌ གྱུར༌ཇ༌ ཁྱོང༌ མ༌ཉན༌།
18 ཁྱོ༌ཞ༌གུན༌ ཏེ༌ རི༌བོའི༌ཀ༌ ལེབས༌ཏེ༌ མ༌ནོག༌ ཀ༌ཟུག༌ ཨིས༌ར༌ཨེལ༌པ༌གུན༌ སི༌ནཱའི༌ ཟེར༌ཁན༌ནི༌ རི༌, མེ༌ བར༌ཨིན༌, མུན༌ནག༌ དང༌ ཐིབ༌ཐིབ༌ ཇིག༌ཤེས༌ ཡང༌ ལུང༌ཚུབ༌ གུན༌ནི༌ ཀབས༌ཁན༌བོའེ༌ཀ༌ ལེབ༌།
19 ཏེན༌ན༌ ནས༌ས༌བོའེ༌ཀ༌ ཨིས༌ར༌ཨེལ༌པ༌གུན༌ལ༌ ཏུང༌སྐད༌ ཀྲག༌པོ༌ དང༌, མ༌ ཇིགས༌ནང༌ཅན༌ནི༌ སུང༌སྐད༌ཅིག༌ ཚོར༌པ༌, ཁོང༌གུན༌ནི༌ དཀོན༌མཆོག༌ག༌ ཡང༌སྐྱར༌ མི༌མོལ༌ཅེས༌ལ༌ ཇུ༌ཇུ༌ ཞུས༌།
20 ཅིའ༌ཞུ༌ན༌ དཀོན༌མཆོག༌གི༌ བཀའ༌, "གལ༌ཏེས༌ སེམས༌ཅན༌ཞིག༌གིའང༌ འི༌ རི༌བོའ༌ ཐུག༌ན༌, ཏེ༌ སེམས༌ཅན༌བོའ༌ རྡོའ༌ གྱབས༌ཏེ༌ སད༌གོས༌," མོལ༌ཁན༌བོ༌ ཁོང༌གུན༌ནི༌ ལེན༌མ༌ཐུབ༌།
21 རི༌བོའི༌ཀ༌ ཇིགས༌ནང༌ཅན༌ བྱུང༌ཁན༌གུན༌ ཐོང༌ཏེ༌, མོ༌ཟེས༌སི༌ མོལས༌ "ངའ༌ མ༌སྲན༌ཏྲེ༌ ཇིགས༌ཏེ༌ དར༌ར༌རག༌།"
22 ཨིན༌ནའང༌ ཁྱོ༌ཞའ༌ ཟི༌ཡོན༌ ཟེར༌ཁན༌ནི༌ རི༌, ནམ༌ཁའེ༌ ཡེ༌རུ༌ཤ༌ལེམ༌མི༌ ནང༌ང༌ ལེབས༌ཏེ༌ ཨིན༌ནོག༌, ཀ༌བོ༌ སོན༌པོ༌ དཀོན༌མཆོག༌ ཞུག༌སི༌ གྱལ༌ས༌བོ༌ ཨིན༌, ཀ༌རུ༌ ཀྲངས༌ཀ༌ མེད༌ཁན༌ནི༌ ཕོ༌ཉ༌གུན༌ སྐྱིད༌པོ༌ ཅོ༌ཅེས༌ལ༌ ཛོམ༌ཨིན༌ ཨིན༌ནོག༌།
23 ཁྱོ༌ཞ༌གུན༌ དཀོན༌མཆོག༌གི༌ གོ༌མ༌ སྐྱེས༌ཁན༌ནི༌ ཕྲུ༌གུ༌གུན༌ ཛོམས༌སེ༌ ནང༌ང༌ ལེབས༌ཏེ༌ ཨིན༌ནོག༌, ཀ༌གུན༌ནི༌ མིང༌གུན༌ ནམ༌ཁའེ༌ ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌། ཁྱོ༌ཞའ༌, མི༌ཚང༌མའེ༌ཀ༌ ཁྲིམས༌ཅད༌ད༌ ཛད༌ཁན༌ དཀོན༌མཆོག༌ ཁོང༌རང༌ ཡོད༌ས༌, ཡང༌ དྲང༌པོ༌ མི༌གུན༌ནི༌ སེམས༌ཉིད༌ ཡོད༌ས༌ ལེབས༌ཏེ༌ ཨིན༌ནོག༌, ཀ༌གུན༌ལ༌ ཕུན༌སུམ༌ཚོགས༌པ༌ ཛདས༌།
24 ཁྱོ༌ཞ༌གུན༌ དཀོན༌མཆོག༌ དང༌ མི༌གུན༌ནི༌ པར༌ལ༌ ཆད༌དོན༌ སོ༌མའེ༌ བར༌མི༌, ཡེ༌ཤུའི༌ སྐུན༌དུན༌ལ༌ ལེབ༌, ཁོང༌ངི༌ སྐུ༌ཁྲག༌ ཕོས༌ཁན༌བོའེ༌, ཨ༌བེལ༌ལི༌ ཁྲག༌ ཙོགས༌ལ༌ སྲོག༌གི༌ ཚབས༌ལ༌ སྲོག༌ལེན༌ཅེས༌ མན༌པ༌, ཤགས༌པ༌ ཛད༌ཅེས༌སི༌ ཕིའ༌ མོལ༌ལ༌ ཛདས༌།
25 དཀོན༌མཆོག༌གི༌ མོལ༌ལ༌ ཛད༌ཁན༌བོའ༌ མིང༌ནའང༌ མི༌ཉན༌ཅེས༌ནེ༌ ཤང༌ ཅོ༌ཤིག༌། གལ༌ཏེས༌ ཨིས༌ར༌ཨེལ༌པ༌གུན༌ནི༌ ཇིག༌རྟེན༌པའ༌ ལོན༌ཁྱོང༌ཁན༌, མོ༌ཟེས༌སི༌ སྤང༌པུད༌ཁན༌གུན༌ལ༌ ནང༌མེད༌ ཅོ༌ཅེས༌པོའེ༌, ཁོང༌གུན༌ ཏེ༌ ཁྲིམས༌ཅད༌ནེ༌ ཤོར༌ མ༌ཉན༌ན༌ ཨིན༌ན༌, ཏེ༌ནེ༌ གལ༌ཏེས༌ ང༌དང༌ངི༌ ནམ༌ཁའ༌ནེ༌ ཞལ༌ཏ༌ སལ༌ཁན༌བོའ༌ ནང༌མེད༌ ཅོ༌ན༌, ང༌དང༌གུན༌ ཀ༌ཟུག༌གི༌ ཐར༌ཐུབ༌ཨིན༌།
26 དཀོན༌མཆོག༌གི༌ རི༌ སི༌ནཱའི༌ ཀ༌ནེ༌ མོལ༌ ཟ༌ནེ༌, ཁོང༌ངི༌ སུང༌སྐད༌དི༌ ཇིག༌རྟེན༌བོ༌ སྐུལ༌ལ༌ ཛདས༌། ཨིན༌ནའང༌ དག༌ས༌ ཁོང༌ངི༌ ཞལ༌ཆད༌ཞིག༌ ཅོའ༌ ཛདས༌, "ཡང༌ ལན༌ཅིག༌ ངའེ༌ ཇིག༌རྟེན༌ ཅིག༌པོ༌ མན༌པ༌ ནམ༌ཁའེ༌ ནང༌ང༌ ཡོད༌ཁན༌གུན༌ནའང༌ སྐུལ༌ཨིན༌། "
27 "ཡང༌ ལན༌ཅིག༌" མོལ༌ཁན༌ནི༌ ཏོན༌བོ༌ ནི༌, སྐུལ༌ཉན༌ཁན༌གུན༌ མེད༌ཁན༌ ཛད༌ཨིན༌, ཡང༌ན༌ དཀོན༌མཆོག༌གི༌ ཛད༌ཁན༌ ཚང༌མ༌། ཏེན༌ན༌བོའེ༌ཕིའ༌ སྐུལ༌མ༌ཉན༌ཁན༌གུན༌ ཅིག༌པོ༌ ལུས༌ཨིན༌།
28 ང༌དང༌གུན༌ལ༌ མ༌ནེ༌ སྐུལ༌མི༌ཉན༌ཁན༌ནི༌ གྱལ༌སྲིད༌ཞིག༌ ཐོབ༌ཨིན༌ ཡོད༌ པ༌སང༌, ང༌དང༌གུན༌ནི༌ ཐུག༌རྗེ༌ཆེ༌ ཞུ༌ཨིན༌, ཡང༌ ཇིགས༌ དང༌ རྩི༌ཝ༌ ཆེན༌མོ༌ ཉམ༌པོ༌ ཅོལ༌ཏེ༌ དཀོན༌མཆོག༌ ཐུག༌ཉེས༌ ཤུག༌ཨིན༌།
29 ཅིའ༌ཟེར༌ན༌ ང༌དང༌གུན༌ནི༌ "དཀོན༌མཆོག༌པོ༌ ནི༌, མེད༌ཁན༌ ཅོ༌ཁན༌ནི༌ མེ༌ ཙོགས༌ ཨིན༌ནོག༌།"