18
སྙིང༌རུས༌ཅན༌ནི༌ ཨ༌ནེ༌ མ༌རང༌མོ༌།
18:1 ནེ༌ 8
1 ཞག༌ཤིག༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ སུན༌ མ༌སུན༌ན༌ ཏུས༌གྱུན༌ མོས༌ལམ༌ ཞུ༌གོ༌ཤེས༌ལ༌ ལབ༌ཞ༌ སལ༌ཨིན༌ རུངས༌ཤིག༌ ཤད༌ད༌ ཛདས༌།
2 "གྱལ༌ས༌ཞིག༌གི༌ ནང༌ང༌ དཀོན༌མཆོག༌ག༌ མི༌ཇིགས༌ཁན༌ ཡང༌ མི༌གུན༌ལ༌ རྩི༌ཝ༌ མེད༌ཁན༌ནི༌ ཁྲིམས༌པོན༌ཞིག༌ ཡོད༌པིན༌།
3 ཏེན༌ན༌ གྱལ༌སའེ༌ ནང༌ང༌ ཨ༌ནེ༌ མ༌རང༌མོ༌ཞིག༌ ཞག༌ཏང༌ ཁོའེ༌ཀ༌ ཡོངས༌ཏེ༌ ཞུ༌ཝའ༌ ཕུལ༌ལད༌པིན༌, 'ང༌ ངའེ༌ གྲ༌འོའེ༌ ཀ༌ནེ༌ འོས༌པའེ༌ ཁྲིམས༌ཅད༌ ཅོའ༌ ཛད༌།'
4 ཁྲིམས༌པོན༌ནི༌ ལན༌ མང༌པོ༌ ཁོའེ༌ ཞུ༌ཝའ༌ སྣང༌ང༌ མ༌ཏངས༌ ཨིན༌ནའང༌ སྟིང༌ཇུག༌ག༌ ཁོའེ༌ སམ༌, 'ང༌ དཀོན༌མཆོག༌ག༌ མི༌ཇིགས༌ཁན༌ ཡང༌ མི༌གུན༌ལ༌ རྩི༌ཝ༌ མེད༌ཁན༌
5 ཨིན༌ནའང༌ འི༌ ཨ༌ནེ༌ མ༌རང༌མོ༌བོའེ༌ ང༌ སྣང༌ང༌ ཚེར༌ཅུག༌པ༌, ངའེ༌ ཁོའ༌ འོས༌པའེ༌ ཁྲིམས༌ཅད༌ ཏང༌ཨིན༌, ཏེ༌ མ༌ནེ༌ ཁོ༌ ཞག༌ཏང༌ ཡོངས༌ཏེ༌ ང༌ འུན༌ལ༌ ཐུག༌ཅུག༌གོག༌'།"
6 གཙོ༌བོའེ༌ མོལས༌, "ཁྲིམས༌པོན༌, འོས༌པ༌ མ༌ཅོ༌ཁན༌ནི༌ རུངས༌པོའེ༌ ཀ༌ནེ༌ ལབ༌ཞའ༌ ལེན༌།
7 དཀོན༌མཆོག༌གི༌ ཉིན༌ཚན༌ མེད༌པ༌ ཁོང༌ང༌ མོས༌ལམ༌ ཞུ༌ཁན༌, ཁོང༌ངི༌ ལྡམས༌མ༌ ཛད༌ཁན༌གུན༌ལ༌ འོས༌པའེ༌ ཁྲིམས༌ཅད༌ མི༌ཛད༌ད༌? ཅི༌ དཀོན༌མཆོག༌གི༌ ཁོང༌གུན༌ལ༌ རོགས༌ ཅོའ༌ལ༌ གོར༌ཅུག༌ག༌ ཛད༌ཨིན༌ན༌?
8 ངའེ༌ ཁྱོ༌ཞའ༌ ཟེར༌རད༌, གྱོགས༌པ༌ ཁོང༌གུན༌ལ༌ འོས༌པའེ༌ ཁྲིམས༌ཅད༌ སལ༌ཨིན༌། ཨིན༌ནའང༌ མི༌རིགས༌སི༌བུ༌ ཡོང༌ངི༌ ཏུས༌ལ༌ ཁོའ༌ ཇིག༌རྟེན༌ནི༌ཀ༌ ཏད༌པ༌ཅན༌ ཐོབ༌ཨིན༌ན༌?"
ཕ༌རུ༌ཤི༌པ༌ དང༌ ཁྲལ༌ལེན༌ཁན༌ནི༌ རུངས༌།
18:9 ནེ༌ 14
9 རང༌ དྲང༌པོ༌ ཨིན༌ཁན༌བོའེ༌ཀ༌ ལོ༌ཁྱེལ༌ ཡང༌ ཞན༌ ཚང༌མ༌ ཐུ༌ཤོག༌ སམ༌ཁན༌ ཁ༌ཅིག༌ག༌, གཙོ༌བོ༌ ཡེ༌ཤུའི༌ འི༌ རུངས༌པོ༌ ཤད༌ད༌ ཛདས༌,
10 "མི༌ ཉིས༌ ཆོད༌ཁང༌ང༌ མོས༌ལམ༌ ཞུའ༌ལ༌ སོང༌, ཅིག༌པོ༌ ཕ༌རུ༌ཤི༌པ༌ ཡང༌ ཅིག༌པོ༌ ཁྲལ༌ནེན༌ཁན༌ །
11 ཕ༌རུ༌ཤི༌པ༌བོ༌ ལངས༌ཏེ༌ ཁོ༌རང༌ངི༌ སྐོར༌ལ༌ མོས༌ལམ༌ ཞུས༌, 'དཀོན༌མཆོག༌, ང༌ ཉེ༌རང༌ངི༌ ཞན༌ མི༌གུན༌ ཡང༌ན༌ ཅག༌པ༌, མི༌ངན༌པ༌, ལོག༌ཡེམ༌ ཅོ༌ཁན༌, ཡ༌ འི༌ ཁྲལ༌ནེན༌ཁན༌བོ༌ ཙོགས༌ མི༌ཛད༌ཅེས༌ལ༌ ངའེ༌ ཐུག༌རྗེ༌ཆེ༌ ཞུའད༌།
12 ངའ༌ རྡུན༌ཞག༌གི༌ ནང༌ང༌ ལན༌ ཉིས༌ རོ༌ཟཱ༌ དུག༌གད༌, ཡང༌ ངའེ༌ ཡོང༌གོ༌ ཚང༌མའེ༌ རྕུ༌ ཁག༌པོ༌ ཉེ༌རང༌ང༌ ཕུལ༌ལད༌'།"
13 "ཨིན༌ནའང༌ ཁྲལ༌ནེན༌ཁན༌བོ༌ ཞན༌གུན༌ནི༌ སང༌ ཐག༌རིང༌ང༌ ལངས༌ཏེ༌ གོ༌ སྒུས༌ཏེ༌ ནམ༌ཁའ༌ མ༌ལྟའ༌, ཀྲང༌ རྡུང༌ཨིན༌ མོས༌ལམ༌ ཞུས༌, 'ཀྱེ༌ དཀོན༌མཆོག༌, ང༌ སྡིག༌ཅན༌ལ༌ སྙིང༌རྗེ༌ ཛད༌'།"
14 "ངའེ༌ ཁྱོ༌ཞའ༌ ཟེར༌རད༌, དཀོན༌མཆོག༌གི༌ སྐུན༌དུན༌ལ༌ ཕ༌རུ༌ཤི༌པ༌བོ༌ མན༌པ༌ འི༌ མི༌བོའ༌ ཤགས༌པ༌ ཐོབ༌ཏེ༌ ཁོ༌རང༌ངི༌ ཁང༌པ༌ ལོགས༌ཏེ༌ སོང༌ ཅིའ༌ཟེར༌ན༌ ཀྲག༌པོ༌ ལྟན༌ཁན༌ ཚང༌མ༌ པས༌མོ༌ ཅོའ༌ ཛད༌ཨིན༌ ཡང༌ ཁོ༌རང༌ པས༌མོ༌ བོར༌ཁན༌བོའ༌ རྩི༌ཝ༌ སལ༌ལ༌ ཛད༌ཨིན༌།"
གཙོ༌བོ༌ ཡེ༌ཤུའི༌ ཕྲུ༌གུ༌ ཆུ༌ངུན༌གུན༌ལ༌ ཅིན༌ལབས༌ སལས༌།
18:15 ནེ༌ 17
15 ཞག༌ཤིག༌ ཕ༌མ༌གུན༌ནི༌ ཕྲུ༌གུ༌ ཆུ༌ངུན༌གུན༌ གཙོ༌བོ༌ ཡེ༌ཤུའི༌ ཆག༌རྩེའ༌ ཛད༌ཏེ༌ ཅིན༌ལབས༌ སལ༌ཅེས༌ལ༌ ཁྱོངས༌། ཏེ༌བོ༌ ཐོང༌ང༌ཅིག༌ ལོབ༌ཕྲུགས༌གུན༌ནི༌ ཕ༌མ༌གུན༌ལ༌ ཡེ༌ཤུའ༌ འོབ༌གྱལ༌ ལྟན༌ པ༌སང༌ ཁའ༌སྐྱེས༌།
16 ཨིན༌ནའང༌ ཡེ༌ཤུའི༌ ཕྲུ༌གུ༌གུན༌ ཁོང༌རང༌ ཡོད༌ས༌ བོད༌ད༌ ཛད༌ཏེ༌ མོལས༌, "ཕྲུ༌གུ༌ ཆུ༌ངུན༌གུན༌ སྒག༌ མ༌སྒག༌ག༌ ང༌ ཡོད༌ས༌ ཡོང༌ཅུག༌, འི༌ཙོགས༌གུན༌ནི༌ ཕིའ༌ དཀོན༌མཆོག༌གི༌ གྱལ༌སྲིད༌པོ༌ ཨིན༌།
17 ངའེ༌ ཁྱོ༌ཞའ༌ དེན༌བ༌ ཟེར༌རད༌, དཀོན༌མཆོག༌གི༌ གྱལ༌སྲིད༌ ཕྲུ༌གུ༌ ཆུ༌ངུན༌གུན༌ ཙོགས༌ལ༌ ཕྲུ༌གུ༌ ཆུ༌ངུན༌གུན༌ ཙོགས༌ལ༌ ལེན༌ཏེ༌ མ༌ནེ༌ ཏེ༌ནང༌ང༌ ཞུགས༌ མི༌ཉན༌།"
མི༌ ཆུག༌པོ༌ཞིག༌གི༌ རུངས༌།
18:18 ནེ༌ 30
18 ཡ༌ཧུ༌དཱ༌པའེ༌ སྤོན༌བོ༌ཞིག༌གི༌ གཙོ༌བོ༌ ཡེ༌ཤུའ༌ ཏྲིས༌, "ལོབ༌པོན༌ ཟང༌པོ༌ལེ༌, ཐའ༌མེད༌པའེ༌ མི༌ཚེ༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ ཅི༌ ཅོ༌གོས༌?"
19 ཡེ༌ཤུའི༌ ཁོའ༌ ཏྲིའ༌ ཛདས༌, "ཅི༌ཕིའ༌ ཁྱོ༌རང༌ངི༌ ངའ༌ ཟང༌པོ༌ ཟེར༌རད༌? དཀོན༌མཆོག༌ ཅིག༌པོ༌ མ༌སྟོག༌ སུའང༌ ཟང༌པོ༌ མན༌།
20 ཁྱོ༌རང༌ངི༌ བཀའ༌རྒྱ༌གུན༌ ཤེས༌ས༌ནོག༌: རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌, མི༌ མ༌སད༌, རྐུ༌མ༌རྐུ༌, སྤང༌པོ༌ ཟུན༌བ༌ མ༌ཏང༌, རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌། "
21 ཁོའེ༌ ཡེ༌ཤུའ༌ ཟེརས༌, "ཏེ༌ ཚང༌མ༌ ངའེ༌ ཆུང༌ཏུས༌ནེ༌ ཕར༌ལ༌ སྲུངས༌ཏེ༌ ཨིན༌"
22 ཏེ༌བོ༌ སན༌ན༌ཅིག༌ ཡེ༌ཤུའི༌ ཁོའ༌ མོལས༌, "ཏ༌རུང༌ ཁྱོ༌རང༌ང༌ ཅོ༌གོ༌ཤེས༌ ཅིག༌ ལུས༌ཏེ༌ དུག༌། སོང༌ ཡང༌ ཁྱོ༌རང༌ངི༌ གྱུ༌ནོར༌ ཚང༌མ༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏོང༌, ནམ༌ཁའེ༌ ནང༌ང༌ ཁྱོ༌རང༌ང༌ བང༌ཛོད༌ ཐོབ༌ཨིན༌། ཏེ༌ནེ༌ ཡོངས༌ཏེ༌ ངའེ༌ གྱབ༌ནེ༌ བྲོངས༌།"
23 ཏེ༌བོ༌ ཚོར༌ར༌ཅིག༌, ཁོའ༌ ཚེར༌ཁ༌ སྲན༌ཏྲེ༌ ཡོངས༌ ཅིའ༌ཟེར༌ན༌ ཁོ༌ མ༌ཆུག༌པོ༌ ཡོད༌པིན༌།
24 ཡེ༌ཤུའི༌ ཁོའ༌ ཟིགས༌ཏེ༌ མོལས༌, "ཆུག༌པོ༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌ ཙམ༌ཤིག༌གི༌ ཀགས༌པོ༌ མ༌ནོག༌།"
25 ཏན༌ཏན༌, མི༌ ཆུག༌པོ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌སི༌ སང༌ ཁབ༌བི༌ མིག༌ནེ༌ རྔ༌བོང༌ བིང༌ཅེས༌པོ༌ ལ༌མོ༌ ཆེན༌།"
26 ཏེ༌བོ༌ ཚོར༌ཁན༌གུན༌ནི༌ ཁོང༌ང༌ ཏྲིས༌, "ཏེ༌ནེ༌ སུའ༌ ཐར༌པ༌ ཐོབ༌ཨིན༌།"
27 ཡེ༌ཤུའི༌ ལན༌སལས༌, "མིའ༌ ཅོ༌ མི༌ཉན༌ཅེས༌པོ༌ དཀོན༌མཆོག༌ག༌ ཛད༌ ཉན༌ན༌ནོག༌།"
28 པི༌ཏྲར༌རི༌ ཡེ༌ཤུའ༌ ཟེརས༌, "ཟིགས༌སའང༌ ང༌ཞའེ༌ ཅི༌ཚང༌མ༌ ཕངས༌ཏེ༌ ཉེ༌རང༌ང༌ བྲངས༌པིན༌"
29 ཁོང༌ངི༌ ཁོང༌གུན༌ལ༌ མོལས༌, "ངའེ༌ ཁྱོ༌ཞའ༌ དེན༌བ༌ ཟེར༌རད༌, དཀོན༌མཆོག༌གི༌ གྱལ༌སྲིད༌དི༌ ཕིའ༌ ཁང༌པ༌ ཡ༌ ན༌མའ༌ ཡ༌ ཨ༌ཅོ༌ནོ༌ ཡ༌ ཕ༌མ༌ ཡ༌ ཕྲུ༌གུ༌ ཕངས༌ཁན༌ ཚང༌མ༌ལ༌,
30 འིན༌ན༌ མི༌ཚེ༌ ནང༌ང༌, ཏེ༌གུན༌ནི༌ ལྡབ༌ མང༌པོ༌ མ༌ཚད༌ དཀོན༌མཆོག༌གི༌ གྱལ༌སྲིད༌དི༌ ཏུས༌ལ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།"
གཙོ༌བོ༌ ཡེ༌ཤུའི༌ ལན༌ སུམ༌པ༌ ཁོང༌རང༌ ཀྲོང༌ཤེས༌སི༌ ལུང༌སྟན༌ སལ༌ལ༌ ཛདས༌།
18:31 ནེ༌ 34
31 གཙོ༌བོ༌ ཡེ༌ཤུའི༌ ཁོང༌ངི༌ ལོབ༌ཕྲུགས༌ ཅུག༌ཉིས༌པོ༌ སོ༌སོ༌ ཁྱེར༌ཏེ༌ མོལས༌, "ང༌དང༌གུན༌ ཀེན༌ལ༌ ཡེ༌རུ༌ཤ༌ལེམ༌མ༌ ཆ༌ཅེས༌ ཨིན༌ནོག༌, ཡང༌ ལུང༌སྟོན༌པ༌གུན༌ནི༌ མི༌རིགས༌སི༌བུའི༌ སྐོར༌ལ༌ བྲིས༌ཁན༌ ཚང༌མ༌ དྲན༌དྲ༌ གྲུབ༌ཨིན༌།
32 ཁོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ལག༌ག༌ སྟད༌ཨིན༌ ཡང༌ ཁོང༌གུན༌ནི༌ ཁོའ༌ ཁྲེལ༌བ༌ ལྟན༌ཏེ༌, ཆིལ༌མག༌ དང༌ རྟལ༌ལྕག༌ གྱབས༌ཏེ༌ སད༌ཨིན༌།
33 ཡང༌ ཞག༌ སུམ༌པའེ༌ ཞག༌ག༌ ཡང༌སྐྱར༌ སོན༌ཏེའ༌ ལང༌ཨིན༌།"
34 ཨིན༌ནའང༌ ལོབ༌ཕྲུགས༌གུན༌ལ༌ ཁོང༌ངི༌ མོལ༌ཁན༌གུན༌ ཅའང༌ ཧ༌མ༌གོ༌། ཏེ༌ སྤེ༌རའེ༌ ཏོན༌གུན༌ སང༌ཝའེ༌ ནང༌ང༌ བོར༌པ༌ ཁོང༌གུན༌ལ༌ ཧ༌གོ༌ མ༌ཐུབ༌།
ཞ༌ར༌ ལྩང༌ཁན༌ཞིག༌ ཕན༌ཅུག༌ག༌ ཛདས༌།
18:35 ནེ༌ 43
35 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌, ཡེ༌རི༌ཀོའེ༌ ཉེ༌མོའ༌ ཡོད༌ ཟ༌ནེ༌, ཞ༌ར༌ཞིག༌ ལམ༌མི༌ ཐའ༌མ༌ ལྩང༌ཨིན༌ དུགས༌ཏེ༌ ཡོད༌པིན༌།
36 ཏེ༌ཀ༌ནེ༌ མི༌ཚོགས༌ཤིག༌ ཆེན༌ ཡོད༌ཁན༌བོ༌ ཚོར༌ཏེ༌ ཁོའེ༌ ཁོང༌གུན༌ལ༌ ཅི༌ ཨིན༌ནོག༌ ཟེར༌ཏེ༌ ཏྲིས༌?
37 ཁོང༌གུན༌ནི༌ ཟེརས༌, "ན༌ཙ༌རེད༌པ༌ ཡེ༌ཤུ༌ སྐྱོད༌ཨིན༌ ཨིན༌ནོག༌།"
38 ཏེ༌ནེ༌ ཁོའེ༌ ཀུ༌ཅོ༌ ཏང༌ཨིན༌ ཟེརས༌, "ཡེ༌ཤུ༌, གྱལ༌པོ༌ དཱ༌བིད༌དི༌ པུར༌གྱུད༌ ངའེ༌ཀ༌ སྙིང༌རྗེ༌ ཛད༌།"
39 སྔུན༌ལ༌ ཆའ༌ཁན༌གུན༌ནི༌ ཁོའ༌ ཁའ༌སྐྱེས༌ཏེ༌ ཅུབ༌ཅོད༌ ཟེརས༌, ཨིན༌ནའང༌ ཁོའེ༌ མང༌ང༌ ཀུ༌ཅོ༌ ཏངས༌ཏེ༌ ཟེརས༌, "གྱལ༌པོ༌ དཱ༌བིད༌དི༌ པུར༌གྱུད༌, ངའེ༌ཀ༌ སྙིང༌རྗེ༌ ཛད༌དའང༌།"
40 ཡེ༌ཤུ༌ སྲུང༌ང༌ ཛདས༌ ཡང༌ ཞ༌ར༌བོ༌ ཁོང༌ངི༌ དུན༌ལ༌ ཁྱོང༌ཅེས༌ལ༌ མོལས༌། ཁོ༌ ཡེ༌ཤུའི༌ དུན༌ལ༌ ལེབ༌བ༌ཅིག༌, ཁོང༌ངི༌ ཁོའ༌ ཏྲིའ༌ ཛདས༌,
41 "ངའེ༌ ཁྱོ༌རང༌ངི༌ ཕིའ༌ ཅི༌ ཅོ༌།"
ཁོའེ༌ ཟེརས༌, "གཙོ༌བོ༌ལེ༌, ངའ༌ ཡང༌སྐྱར༌ ཐོང༌ ཅུག༌ག༌ ཛད༌།"
42 ཡེ༌ཤུའི༌ ཁོའ༌ མོལས༌, "ཁྱོ༌རང༌ངི༌ ཐོང༌ཅེས༌སི༌ ཁྱུད༌པོ༌ ལེན༌, ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌།"
43 ཏེན༌ན༌མལ༌ལ༌ ཁོའ༌ ཐོང༌ཐུབ༌, དཀོན༌མཆོག༌ག༌ སྟོད༌པ༌ ཕུལ༌ཨིན༌ ཡེ༌ཤུའ༌ བྲངས༌ཏེ༌ སོང༌། མི༌ཚང༌མའེ༌ ཏེ༌བོ༌ ཐོང༌ང༌ཅིག༌ ཁོང༌གུན༌ནིའང༌ དཀོན༌མཆོག༌ག༌ སྟོད༌པ༌ ཕུལས༌།