3
ཡོ༌ཧཱ༌ནན༌ ཁྲུས༌སལ༌ཁན༌ནི༌ ཆོས༌ཤད༌ད༌ ཛདས༌།
3:1 ནེ༌ 20
1 རོམ༌མི༌ གྱལ༌པོ༌ ཏི༌བིར༌ཡུས༌སི༌ ཝང༌སྲུལ༌ལི༌ ལོ༌ 15 པ༌, ནམ༌ པོན༌ཏིའུ༌ པི༌ལ༌ཏུ༌ ཡ༌ཧུ༌དཱ༌ ཡུལ༌ཇོངས༌སི༌ ཀའ༌ལོན༌, ཧེ༌རོ༌དཱ༌ གཱ༌ལིལ༌ལི༌ ཡུལ༌ཇོངས༌ ལོན༌པོ༌, ཁོའེ༌ ཨ༌ཅོ༌ ཕི༌ལིབ༌ ཨི༌ཏུ༌ར༌ཡཱ༌ དང༌ ཏྲ༌གོ༌ནི༌ཏིས༌ ཡུལ༌ཇོངས༌སི༌ ལོན༌པོ༌, ལི༌སན༌ཡས༌ ཨ༌བི༌ལེ༌ནེ༌ ཡུལ༌ཇོངས༌སི༌ ལོན༌པོ༌
2 ཡང༌ ཨན༌ནཱས༌ དང༌ ཀ༌ཡ༌ཕཱས༌ བླ༌མ༌ ཆེན༌མོའེ༌ ཀོ༌སའེ༌ཀ༌ ཡོད༌དི༌ ཏུས༌ རི༌སྟོང༌ངི༌ ནང༌ང༌ དཀོན༌མཆོག༌གི༌ བཀའ༌ ཟ༌ཀར༌ཡཱའེ༌ བུ༌ཚའ༌ ཡོ༌ཧཱ༌ནན༌ལ༌ ཀལ༌ལ༌ ཛདས༌།
3 ཡོར༌དཱན༌ ལྩངས༌པོའེ༌ ཉེ༌ཁོར༌རི༌ ཡུལ༌ ཚང༌མ༌ལ༌ ཡོ༌ཧཱ༌ནན༌ སྐྱོད༌ཏེ༌ ཤགས༌པ༌ ཐོབ༌ཅེས༌སི༌ ཕིའ༌ སྡིག༌པ༌ ཅོ༌ཁན༌གུན༌ནི༌ཀ༌ གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ ཆོས༌ཤདས༌།
4 ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆའེ༌ ནང༌ང༌ ཡོ༌ཧཱ༌ནན༌ནི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌,
"རི༌སྟོང༌ངི༌ ནང༌ང༌ སྐད༌ ཆེན༌མོ༌ཞིག༌གི༌ མོལ༌ཨིན༌,
'གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོ༌ཤིག༌,
ཡང༌ ཁོང༌ངི༌ ཕེབས༌ལམ༌བོ༌ དྲང༌པོ༌ ཅོ༌ཤིག༌།
5 ལུང༌པ༌ ཚང༌མ༌ སྐང༌ང༌ ཛད༌ཨིན༌།
ཡང༌ རི༌ ཆེན༌མོ༌ དང༌ ཆུ༌ངུན༌གུན༌ མ༌མོ༌ ཛད༌ཨིན༌།
ལམ༌ ཀྱག༌ཀྱོག༌གུན༌ སྲོང༌,
ཡང༌ གང༌ཧོབས༌གུན༌ སྙོམས༌ཏེ༌ ཏིང༌ཏིང༌ ཅོ༌ཤིག༌།
6 ཡང༌ མི༌ཚང༌མའེ༌ དཀོན༌མཆོག༌གི༌ ཐར༌ལམ༌བོ༌ ཇལ༌ཨིན༌'།
7 ཡོ༌ཧཱ༌ནན༌ནི༌ ཁྲུས༌ལེན༌ན༌ ཡོང༌ཁན༌ནི༌ མི༌ཚོགས༌ལ༌ མོལས༌, "ཁྱོ༌ཞའ༌ ཏུག༌རུལ༌ལི༌ པུར༌གྱུད༌གུན༌, ཡོང༌ཅེས༌ཅན༌ནི༌ དཀོན༌མཆོག༌གི༌ ཆད༌པ༌ནེ༌ ཤོར༌ ཟེར༌ཏེ༌ ཁྱོ༌ཞའ༌ སྤང༌ སུའི༌ ཕུདས༌?
8 སྡིག༌པ༌ ཅོ༌ཅེས༌ སྤངས༌ཏེ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ནི༌ བྲས༌བུ༌ སྨིན༌ཅུག༌། ཡང༌ རང༌ དང༌ རང༌ང༌ མ༌ཟེར༌, 'ང༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ པ༌སང༌ ཐར༌ཨིན༌།' ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ འི༌ རྡོའ༌གུན༌ནི༌ ནང༌ནེ༌ ཨབ༌ར༌ཧམ༌མི༌ ཕིའ༌ པུར༌གྱུད༌ ཛད༌ཉན༌ཨིན༌།
9 ཤང༌ ཅོ༌ཤིག༌, སྟ༌རི༌ ནི༌ ལྕང༌མ༌གུན༌ནི༌ རྩའི༌ཀ༌ གྱབ༌ཆོག༌ཆོག༌ དུག༌, བྲས༌བུ༌ ཟང༌པོ༌ མ༌སྨིན༌ཁན༌ནི༌ ལྕང༌མ༌ ཚང༌མ༌ ཅད༌ཏེ༌ མེའེ༌ ནང༌ང༌ ཕང༌ཨིན༌།"
10 མི༌ཚོགས༌པོའེ༌ ཡོ༌ཧཱ༌ནན༌ལ༌ ཏྲིས༌, "ཏ༌ ང༌ཞ༌གུན༌ནི༌ ཅི༌ ཅོ༌གོས༌?"
11 ཡོ༌ཧཱ༌ནན༌ནི༌ ཁོང༌གུན༌ལ༌ མོལས༌, "ཀོས༌ ཉིས༌ ཡོད༌ཁན༌གུན༌ནི༌ ཅིག༌པོ༌ མེད༌ཁན༌གུན༌ལ༌ ཏོང༌ ཡང༌ ཟན༌ ཡོད༌ཁན༌གུན༌ནི༌ མེད༌ཁན༌གུན༌ལ༌ བགོས༌ཏེ༌ ཏོང༌།"
12 ཁྲལ༌ལེན༌ཁན༌གུན༌ནའང༌ ཁྲུས༌ལེན༌ན༌ ཡོངས༌ཏེ༌ ཏྲིས༌, "ལོབ༌པོན༌ལེ༌ ང༌ཞ༌གུན༌ནི༌ ཅི༌ ཅོ༌གོས༌?"
13 ཁོང༌ངི༌ ཁོང༌གུན༌ལ༌ མོལས༌, "ལེན༌གོ༌ཤེས༌སི༌ སང༌ ཐལ༌ཏེ༌ ཁྲལ༌ མ༌ལེན༌།"
14 ཏེ༌ནེ༌ མག༌མི༌ ཁ༌ཅིག༌གི༌ ཡོ༌ཧཱ༌ནན༌ལ༌ ཏྲིས༌, "ང༌ཞ༌གུན༌ནི༌ ཅི༌ ཅོ༌གོས༌?"
ཁོང༌ངི༌ ཁོང༌གུན༌ལ༌ མོལས༌, "ཇིགས༌ནང༌ ལྟན༌ཏེ༌ ཡ༌ ཟུན༌ནི༌ ཉད༌གལ༌ ཀལ༌ཏེ༌ སུ༌ཞིག༌གི༌ ཀ༌ནེ༌ པེ༌ནེ༌ མ༌ལེན༌། རང༌ང༌ ཕོགས༌ ཐོབ༌ཁན༌བོའེ༌ཀ༌ ཚིམས༌ཏེ༌ དུག༌།"
15 མི༌གུན༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ སྐྱོད༌ཅེས༌ལ༌ སྲུངས༌ཏེ༌ ཡོད༌ པ༌སང༌ ཁོང༌གུན༌ནི༌ ཡོ༌ཧཱ༌ནན༌ ཁོང༌རང༌ མ༌ཤི༌ཀ༌ ཨིན༌ མན༌ན༌ཧེ༌ སམ༌མད༌པིན༌།
16 ཡོ༌ཧཱ༌ནན༌ནི༌ མི༌གུན༌ལ༌ མོལས༌, "ངའེ༌ ཁྱོ༌ཞའ༌ ཆུའི༌ཁྲུས༌ ཏང༌ངད༌། ཨིན༌ནའང༌ ངའེ༌ སྟིང༌ནེ༌ སྐྱོད༌ཅེས༌ཅན༌བོ༌, ངའེ༌ སང༌ མང༌ང༌ ཝང༌ཅན༌, ཡང༌ ངའ༌ ཞབ༌ཤི༌ ཙོགས༌ལ༌ ཁོང༌ངི༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌། ཁོང༌ངི༌ དམ༌པའེ༌ ཐུག༌ཉིད༌ དང༌ མེའེ༌ ཁྲུས༌སལ༌ཨིན༌།
17 ཞིང༌བད༌པའེ༌ ཡུལ༌ཐག༌ག༌ ཟར༌ ཉམ༌པོ༌, ཀྲོ༌ དང༌ ཕུག༌མ༌ ཕེས༌ཏེ༌ ཀྲོ༌ ཁོ༌རང༌ངི༌ བང༌ངེ༌ ནང༌ང༌ ཡང༌ ཕུག༌མ༌ མེའེ༌ ནང༌ང༌ སྲག༌ག༌ ཙོགས༌ལ༌ ཁོང༌ངིའང༌ ཁོང༌རང༌ངི༌ མི༌གུན༌ དང༌ མི༌ ངན༌པ༌གུན༌ སོ༌སོའ༌ ཕེའ༌ ཛད༌ཨིན༌།
18 ཡོ༌ཧཱ༌ནན༌ནི༌ མི༌གུན༌ལ༌ ཏེ༌ཙོགས༌ མང༌པོ༌ སྤང༌ ཕུད༌ཨིན༌ནའང༌ གའ༌མོའེ༌ ནས༌ཚུལ༌བོ༌ ཤདས༌།
19 ཨིན༌ནའང༌ ཡོ༌ཧཱ༌ནན༌ནི༌ ཀའ༌ལོན༌ ཧེ༌རོ༌དཱ༌ལ༌, ཨ༌ཅོའེ༌ ན༌མ༌ ཧེ༌རོ༌དཱིས༌ ཉམ༌པོ༌ ན༌མ༌ ཅོ༌ཅེས༌ དང༌ ཞན༌ ལས༌ངན༌ ཅོ༌ཁན༌ ཚང༌མའེ༌ ཕིའ༌ སྐྱོན༌རྗོད༌ ཅོའ༌ ཛདས༌,
20 ཏེ༌ མ༌ཚད༌ ཧེ༌རོ༌དཱའི༌ ཡོ༌ཧཱ༌ནན༌ ཙོན༌ལ༌ ཀག༌ཅེས༌པོའང༌ སྡིག༌པ༌ ཅོས༌།
ཡེ༌ཤུའ༌ ཁྲུས༌སལ༌ཁན༌ དང༌ ཁོང༌ངི༌ ཕ༌མེས༌པོ༌གུན༌།
3:21 ནེ༌ 38
21 མི༌ཚང༌མའེ༌ ཁྲུས༌ལེན༌ ཟ༌ནེ༌ གཙོ༌བོ༌ ཡེ༌ཤུའིང༌ ཁྲུས༌ལེན༌ན༌ ཛདས༌། ཁོང༌ངི༌ མོས༌ལམ༌ ཞུའ༌ ཛད༌ ཟ༌ནེ༌ ནམ༌ཁའ༌ བེ༌ཏེ༌
22 དམ༌པའེ༌ ཐུག༌ཉིད༌ ཕུར༌གོན༌ ཙོགས༌ལ༌ ཁོང༌ངི༌ཀ༌ བབས༌། ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, "ཁྱོ༌རང༌ ངའེ༌ བུ༌ཚ༌ ཅེས༌པ༌བོ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།"
23 ཡེ༌ཤུའི༌ དཀོན༌མཆོག༌གི༌ ཞབ༌སྟོག༌ ཛད༌ཅེས༌ གོ༌ཟུག༌ ཟ༌ནེ༌ ཁོང༌ངི༌ གུང༌ལོ༌ སུམ༌ཅུ༌ ཟམ༌ ཆའད༌པིན༌། མི༌གུན༌ནི༌ ཡེ༌ཤུ༌ ཡོ༌སེབ༌བི༌ བུ༌ཚ༌ ཨིན༌ནོག༌ སམ༌མད༌པིན༌།
"ཡོ༌སེབ༌ ནི༌ ཧེ༌ལིའི༌ བུ༌ཚ༌ ཨིན༌པིན༌།
24 ཧེ༌ལི༌ ནི༌ མད༌ཐད༌དི༌ བུ༌ཚ༌,
མད༌ཐད༌ ནི༌ ལི༌ཝིའི༌ བུ༌ཚ༌,
ལི༌ཝི༌ ནི༌ མེལ༌ཀིའི༌ བུ༌ཚ༌,
མེལ༌ཀི༌ ནི༌ ཡན༌ནཱ༌ཡིའི༌ བུ༌ཚ༌,
ཡན༌ནཱ༌ཡི༌ ནི༌ ཡོ༌སེབ༌བི༌ བུ༌ཚ༌ ཨིན༌པིན༌།
25 ཡོ༌སེབ༌ ནི༌ མད༌ཏ༌ཐི༌ཡཱའི༌ བུ༌ཚ༌
མད༌ཏ༌ཐི༌ཡཱ༌ ནི༌ ཨ༌མོས༌སི༌ བུ༌ཚ༌,
ཨ༌མོས༌ ནི༌ ན༌ཧུམ༌མི༌ བུ༌ཚ༌,
ན༌ཧུམ༌ ནི༌ ཨེས༌ལིའི༌ བུ༌ཚ༌,
ཨེས༌ལི༌ ནི༌ ནག༌གཱ༌ཡིའི༌ བུ༌ཚ༌ ཨིན༌པིན༌།
26 ནག༌གཱ༌ཡི༌ ནི༌ མཱ༌འད༌དི༌ བུ༌ཚ༌,
མཱ༌འད༌ ནི༌ མད༌ཏ༌ཐི༌ཡཱའི༌ བུ༌ཚ༌,
མད༌ཏ༌ཐི༌ཡཱ༌ ནི༌ སེ༌མེ༌འིན༌ནི༌ བུ༌ཚ༌,
སེ༌མེ༌འིན༌ ནི༌ ཡོ༌སེག༌གི༌ བུ༌ཚ༌,
ཡོ༌སེག༌ ནི༌ ཡུ༌དཱའེ༌ བུ༌ཚ༌ ཨིན༌པིན༌།
27 ཡུ༌དཱ༌ ནི༌ ཡོ༌འན༌ནན༌ནི༌ བུ༌ཚ༌,
ཡོ༌འན༌ནན༌ ནི༌ རེ༌སཱའི༌ བུ༌ཚ༌,
རེ༌སཱ༌ ནི༌ ཟེ༌རུཔ༌བ༌བེལ༌ལི༌ བུ༌ཚ༌,
ཟེ༌རུཔ༌བ༌བེལ༌ ནི༌ ཤའལ༌ཏི༌ཡེལ༌ལི༌ བུ༌ཚ༌,
ཤའལ༌ཏི༌ཡེལ༌ ནི༌ ནེ༌རིའི༌ བུ༌ཚ༌ ཨིན༌པིན༌།
28 ནེ༌རི༌ ནི༌ མེལ༌ཀིའི༌ བུ༌ཚ༌,
མེལ༌ཀི༌ ནི༌ ཨད༌དིའི༌ བུ༌ཚ༌,
ཨད༌དི༌ ནི༌ ཀོ༌སམ༌མི༌ བུ༌ཚ༌,
ཀོ༌སམ༌ ནི༌ ཨེལ༌མ༌དཱམ༌མི༌ བུ༌ཚ༌,
ཨེལ༌མ༌དཱམ༌ ནི༌ ཨེར༌རི༌ བུ༌ཚ༌ ཨིན༌པིན༌།
29 ཨེར༌ ནི༌ ཡོ༌ཤུ༌ཨའེ༌ བུ༌ཚ༌,
ཡོ༌ཤུ༌ཨ༌ ནི༌ ཨེ༌ལི༌འེ༌ཟེར༌རི༌ བུ༌ཚ༌,
ཨེ༌ལི༌འེ༌ཟེར༌ ནི༌ ཡོ༌རེམ༌མི༌ བུ༌ཚ༌,
ཡོ༌རེམ༌ ནི༌ མད༌ཐད༌དི༌ བུ༌ཚ༌,
མད༌ཐད༌ ནི༌ ལི༌ཝིའི༌ བུ༌ཚ༌ ཨིན༌པིན༌།
30 ལི༌ཝི༌ ནི༌ ཤི༌མི༌འོན༌ནི༌ བུ༌ཚ༌,
ཤི༌མི༌འོན༌ ནི༌ ཡ༌ཧུ༌དཱའེ༌ བུ༌ཚ༌,
ཡ༌ཧུ༌དཱ༌ ནི༌ ཡོ༌སེབ༌བི༌ བུ༌ཚ༌,
ཡོ༌སེབ༌ ནི༌ ཡོ༌ནམ༌མི༌ བུ༌ཚ༌,
ཡོ༌ནམ༌ ནི༌ ཨེ༌ལི༌ཡ༌ཀིམ༌མི༌ བུ༌ཚ༌ ཨིན༌པིན༌།
31 ཨེ༌ལི༌ཡ༌ཀིམ༌ ནི༌ མེ༌ལེ༌འེ༌ བུ༌ཚ༌,
མེ༌ལེ༌འ༌ ནི༌ མེན༌ན༌ནི༌ བུ༌ཚ༌,
མེན༌ན༌ ནི༌ མད༌ཏ༌ཐཱའི༌ བུ༌ཚ༌,
མད༌ཏ༌ཐཱ༌ ནི༌ ན༌ཐན༌ནི༌ བུ༌ཚ༌,
ན༌ཐན༌ ནི༌ དཱ༌བིད༌དི༌ བུ༌ཚ༌ ཨིན༌པིན༌།
32 དཱ༌བིད༌ ནི༌ ཡེ༌ཤེའེ༌ བུ༌ཚ༌,
ཡེ༌ཤེ༌ ནི༌ ཨོ༌བེད༌དི༌ བུ༌ཚ༌,
ཨོ༌བེད༌ ནི༌ བོ༌ཨཟ༌ཟི༌ བུ༌ཚ༌,
བོ༌ཨཟ༌ ནི༌ སལ༌མོན༌ནི༌ བུ༌ཚ༌,
སལ༌མོན༌ ནི༌ ན༌ཧ༌ཤོན༌ནི༌ བུ༌ཚ༌ ཨིན༌པིན༌།
33 ན༌ཧ༌ཤོན༌ ནི༌ ཨམ༌མི༌ན༌དབ༌བི༌ བུ༌ཚ༌,
ཨམ༌མི༌ན༌དབ༌ ནི༌ ཨད༌མིན༌ནི༌ བུ༌ཚ༌,
ཨད༌མིན༌ ནི༌ ཨར༌ནིའི༌ བུ༌ཚ༌,
ཨར༌ནི༌ ནི༌ ཧེས༌རོན༌ནི༌ བུ༌ཚ༌,
ཧེས༌རོན༌ ནི༌ ཕེ༌རེས༌སི༌ བུ༌ཚ༌,
ཕེ༌རེས༌ ནི༌ ཡ༌ཧུ༌དཱའེ༌ བུ༌ཚ༌ ཨིན༌པིན༌།
34 ཡ༌ཧུ༌དཱ༌ ནི༌ ཡ༌ཀོབ༌བི༌ བུ༌ཚ༌,
ཡ༌ཀོབ༌ ནི༌ ཨི༌སཱག༌གི༌ བུ༌ཚ༌,
ཨི༌སཱག༌ ནི༌ ཨབ༌ར༌ཧམ༌མི༌ བུ༌ཚ༌
ཨབ༌ར༌ཧམ༌ ནི༌ ཏི༌རཧ༌ཧི༌ བུ༌ཚ༌,
ཏི༌རཧ༌ ནི༌ ན༌ཧོར༌རི༌ བུ༌ཚ༌ ཨིན༌པིན༌།
35 ན༌ཧོར༌ ནི༌ སེ༌རུག༌གི༌ བུ༌ཚ༌,
སེ༌རུག༌ ནི༌ རེ༌འུའི༌ བུ༌ཚ༌,
རེ༌འུ༌ ནི༌ ཕེ༌ལེག༌གི༌ བུ༌ཚ༌,
པེ༌ལེག༌ ནི༌ ཨེ༌བེར༌རི༌ བུ༌ཚ༌,
ཨེ༌བེར༌ ནི༌ ཤེ༌ལག༌གི༌ བུ༌ཚ༌ ཨིན༌པིན༌།
36 ཤེ༌ལག༌ ནི༌ ཀེ༌ནན༌ནི༌ བུ༌ཚ༌,
ཀེ༌ནན༌ ནི༌ ཨར༌པག༌ཤཱད༌དི༌ བུ༌ཚ༌,
ཨར༌པག༌ཤཱད༌ ནི༌ ཤེམ༌མི༌ བུ༌ཚ༌,
ཤེམ༌ ནི༌ ནོ༌ཨཱའེ༌ བུ༌ཚ༌,
ནོ༌ཨཱ༌ ནི༌ ལ༌མེག༌གི༌ བུ༌ཚ༌ ཨིན༌པིན༌།
37 ལ༌མེག༌ ནི༌ མ༌ཐུ༌ཤེ༌ལག༌གི༌ བུ༌ཚ༌,
མ༌ཐུ༌ཤེ༌ལག༌ ནི༌ ཨེ༌ནོག༌གི༌ བུ༌ཚ༌,
ཨེ༌ནོག༌ ནི༌ ཡེ༌རེད༌དེ༌ བུ༌ཚ༌,
ཡེ༌རེད༌ ནི༌ མ༌ཧ༌ལ༌ལེལ༌ལི༌ བུ༌ཚ༌,
མ༌ཧ༌ལ༌ལེལ༌ ནི༌ ཀེ༌ནན༌ནི༌ བུ༌ཚ༌ ཨིན༌པིན༌།
38 ཀེ༌ནན༌ ནི༌ ཨེ༌ནོཤ༌ཤི༌ བུ༌ཚ༌,
ཨེ༌ནོཤ༌ ནི༌ སེད༌དི༌ བུ༌ཚ༌,
སེད༌ ནི༌ ཨ༌དཱམ༌མི༌ བུ༌ཚ༌,
ཡང༌ ཨ༌དཱམ༌ ནི༌ དཀོན༌མཆོག༌གི༌ ཛད༌ཁན༌ནི༌ མི༌བོ༌ ཨིན༌པིན༌།