8
ཡེ༌ཤུའ༌ ཞབ༌སྟོག༌ ཞུ༌ཁན༌ནི༌ བུ༌མོ༌གུན༌།
8:1 ནེ༌ 3
1 སྟིང༌མ༌ ཞག༌ག༌ གཙོ༌བོ༌ ཡེ༌ཤུ༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌ཅེས༌ལ༌ གྲོང༌ཁྱེར༌ དང༌ གམ༌ཡུལ༌ ཅིག༌ནེ༌ ཅིག༌ག༌ སྐྱོདས༌, ཡང༌ ཁོང༌ ཉམ༌པོ༌ ལོབ༌ཕྲུགས༌ ཅུག༌ཉིས༌པོ༌ ཡང༌
2 རྡུད༌ ཞུགས༌ཁན༌ དང༌ ནད༌ གུན༌ནེ༌ གྱལ༌ཅུག༌ག༌ ཛད༌ཁན༌ནི༌ བུ༌མོ༌ ཁ༌ཅིག༌ ཡོད༌པིན༌: རྡུད༌ རྡུན༌ ཕིང༌ང༌ ཛད༌ཁན༌ནི༌ མིར༌ཡམ༌ མག༌དལ༌ལ༌མ༌,
3 ཧེ༌རོ༌དཱའི༌ ཆག༌ཟོད༌ ཀུ༌ཟཱའེ༌ ན༌མ༌ ཡོ༌འན༌ནཱ༌, སུ༌སན༌ནཱ༌ དང༌ ཡང༌ བུ༌མོ༌ མང༌པོ༌། ཁོང༌གུན༌ནི༌ རང༌ངི༌ ནོར༌ གྱུད༌ཏེ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌ ཅུག༌ཉིས༌པོའེ༌ སྒོས༌དོམ༌གུན༌ རིག༌གད༌པིན༌།
ཞིང༌བད༌པའེ༌ ས༌འོན༌ ཏབ༌ཁན༌ནི༌ རུངས༌།
8:4 ནེ༌ 15
4 གྲོང༌ཁྱེར༌ སོ༌སོ༌ནེ༌ མི༌གུན༌ ཡོང༌ཏེ༌ གཙོ༌བོ༌ ཡེ༌ཤུ༌ ཡོད༌ས༌ མི༌ཆོགས༌ ཆེན༌མོ༌ ཛོམ༌ཨིན༌ ཡོད༌ ཟ༌ནེ༌ ཁོང༌ངི༌ འི༌ རུངས༌པོ༌ ཤད༌ད༌ ཛདས༌,
5 "ཞིང༌བད༌པ༌ཞིག༌ ས༌འོན༌ ཏབ༌བ༌ལ༌ སོང༌། ཞིང༌ང༌ ས༌འོན༌ ཏབ༌ ཟ༌ནེ༌ ཁ༌ཅིག༌ ལམ༌མི༌ཀ༌ བུད༌, ཏེ༌གུན༌ མིའི༌ རྐང༌པའེ༌ ནནས༌ ཡང༌ ཅི༌པ༌ ཡོངས༌ཏེ༌ ཟོས༌།
6 ས༌འོན༌ ཁ༌ཅིག༌ བྲག༌གི༌ཀ༌ བུད༌ ཡང༌ སྐྱེའ༌ཅིག༌, སའེ༌ ནང༌ང༌ ཧུས༌ མེད༌པ༌ སྐམས༌ཏེ༌ ཤི༌།
7 ས༌འོན༌ ཁ༌ཅིག༌ ཚེར༌མང༌ངི༌ ཕྲོའ༌ བུད༌ ཡང༌ ས༌འོན༌ ཉམ༌པོ༌ ཚེར༌མང༌ སྐྱེས༌ཏེ༌ ནན༌པ༌ ཞིང༌བོ༌ ལྡན༌ མ༌ཐུབ༌།
8 ཞན༌ ས༌འོན༌གུན༌ ས༌ གྱལ༌ལ༌ ཡོད༌སའེ༌ ཞིང༌ངི༌ཀ༌ བུད༌པ༌, སྐྱེས༌ཏེ༌ སྟོན༌ཐོག༌ སྨིན༌, ཀ༌བོ༌ ས༌འོན༌ ཏབ༌ཁན༌ ནི༌ སང༌ 100 གྱུར༌ སྨིན༌།" ཏེ༌བོ༌ མོལ༌ ཚར༌ར༌ཅིག༌ ཁོང༌ངི༌ ཤེད༌ནའང༌ མོལས༌, "ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།"
9 ཏེ༌ནེ༌ ཡེ༌ཤའི༌ ལོབ༌ཕྲུགས༌གུན༌ནི༌ ཁོང༌ངི༌ ཤད༌ད༌ ཛད༌ཁན༌ནི༌ རུངས༌སི༌ ཏོན༌བོ༌ ཁོང༌ང༌ ཏྲིས༌།
10 ཁོང༌ངི༌ ཁོང༌གུན༌ལ༌ མོལས༌, "དཀོན༌མཆོག༌གི༌ གྱལ༌སྲིད༌དི༌ སང༌ཝ༌གུན༌ ཁྱོ༌ཞའ༌ ཧ༌གོ༌ཅེས༌ལ༌ གོངས༌པ༌ སལ༌ལ༌ ཛད༌ཏེ༌ ཨིན༌ནོག༌, ཨིན༌ནའང༌ དམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌བོ༌ དྲན༌དྲ༌ གྲུབ༌ཅེས༌ལ༌ ངའེ༌ ཞན༌གུན༌ལ༌ རུངས༌ གྱུད༌ཏེ༌ ཤད༌དད༌, ཏེ༌བོ༌ ནི༌,
"ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌,
ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌། "
11 "ཏེ༌ རུངས༌སི༌ ཏོན༌ ནི༌ འི༌བོ༌ ཨིན༌, ས༌འོན༌བོ༌ ནི༌ དཀོན༌མཆོག༌གི༌ བཀའ༌ ཨིན༌།
12 ལམ༌མི༌ཀ༌ ས༌འོན༌ བུད༌ཁན༌གུན༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌, ཨིན༌ནའང༌ ཏད༌པ༌ ཅོས༌ཏེ༌ ཐར༌པ༌ མི༌ཐོབ༌ཅེས༌ལ༌ ཤེ༌ཏན༌ ཡོངས༌ཏེ༌ ཁོང༌གུན༌ནི༌ སྙིང༌ངི༌ ནང༌ནེ༌ ཏེ༌བོ༌ ཀོགས༌ཏེ༌ ཁྱེར༌ར༌ནོག༌།
13 བྲག༌གི༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཚོར༌ར༌ཅིག༌ ཐད༌པོ༌ ཉམ༌པོ༌ ཏད༌པ༌ ཅོ༌ཁན༌གུན༌ ཨིན༌ནོག༌། ཏེ༌བོའ༌ པ༌ཀྲག༌ ཏིང༌ཅན༌ མེད༌ པ༌སང༌ ཁོང༌གུན༌ནི༌ ཏུས༌ ཉུ༌ངུན༌ཞིག༌གི༌ ཕིའ༌ ཏད༌པ༌ ཅོ༌རུག༌, ཡང༌ ཚོད༌ལྟའེ༌ ཏུས༌ལ༌ ཏད༌པ༌ ཕང༌ཨིན༌།
14 ཚེར༌མངས༌སི༌ ཕྲོའ༌ བུད༌ཁན༌ནི༌ ས༌འོན༌གུན༌ ནི༌, དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌ ཨིན༌ནའང༌ མི༌ཚེ༌ ཚེར༌ཁ༌, གྱུ༌ནོར༌ དང༌ སྐྱིད༌པོ༌ གུན༌ནི༌ ནན༌ཏེ༌ ཁོང༌གུན༌ནི༌ ཏད༌པ༌ ལྡན༌ན༌ མ༌ནོག༌།
15 ཨིན༌ནའང༌ ས༌ ཟང༌པོའེ༌ཀ༌ ས༌འོན༌ བུད༌ཁན༌བོ༌ ནི༌ སྙིང༌ ཟང༌པོ༌ དང༌ དྲང༌པོ༌ ཉམ༌པོ༌ དཀོན༌མཆོག༌གི༌ བཀའ༌ ཉན༌ཁན༌གུན༌ ཨིན༌ནོག༌ ཡང༌ ཟོད༌པ༌ ཉམ༌པོ༌ ཏེ༌བོ༌ སྟན༌པོ༌ ཐམས༌ཏེ༌ དུགས༌པ༌ བྲས༌བུ༌ མང༌པོ༌ སྨིན༌ན༌ནོག༌།"
འོད༌ དང༌ འོད༌སྟགས༌སི༌ རུངས༌།
8:16 ནེ༌ 18
16 "མི༌གུན༌ནི༌ འོད༌ ཏུགས༌ཏེ༌ གོར༌མོའེ༌ ཡོག༌ག༌ སྦས༌ཏེ༌ ཡ༌ ཉལ༌ཁྲི༌ ཡོག༌ག༌ མ༌བོར༌ར༌ ནང༌ང༌ ཡོང༌ཁན༌གུན༌ནི༌ ཏེ༌བོའེ༌ ལྡངས༌སི༌ ནང༌ང༌ ཐོང༌ཅེས༌ལ༌ འོད༌སྟགས༌སི༌ཀ༌ བོར༌ཨིན༌།
17 སྦས༌ཏེ༌ བོར༌ཁན༌ ཚང༌མ༌ ཕི༌ལོག༌ག༌ ཕིང༌ང༌ ཛད༌ཨིན༌, ཡང༌ ཀབས༌ཏེ༌ བོར༌ཁན༌ ཚང༌མ༌ འོད༌དི༌ ནང༌ང༌ ཁྱོང༌ང༌ ཛད༌ཏེ༌ ཚང༌མ༌ སྔོན༌ཅུག༌ག༌ ཛད༌ཨིན༌།
18 ཏེ༌བོའེ༌ཕིའ༌ ཁྱོ༌ཞའེ༌ ཉན༌ཚུལ༌བོའེ༌ཀ༌ སྣང༌སྟག༌ ཏོང༌། ངའེ༌ ལབ༌ཞ༌ ཉན༌ཁན༌གུན༌ལ༌ མང༌ང༌ ཧ༌གོ༌ཅུག༌ག༌ ཛད༌ཨིན༌, ཨིན༌ནའང༌ མ༌ཉན༌ཁན༌གུན༌ནེ༌ ཧ༌གོ༌ཏེ༌ ཨིན༌ སམ༌ཁན༌བོའང༌ ཁྱེར༌ར༌ ཛད༌ཨིན༌།"
ཡེ༌ཤུའི༌ དེན༌བའེ༌ ནང༌མི༌
8:19 ནེ༌ 21
19 ཏེ༌ནེ༌ གཙོ༌བོ༌ ཡེ༌ཤུའི༌ ཨ༌མ༌ དང༌ ནོ༌གུན༌ ཁོང༌ ཐུག༌ག༌ ཡོངས༌, ཨིན༌ནའང༌ མི༌ཚོགས༌ ཆེན༌མོ༌ ཡོད༌ཅེས༌པོའེ༌ ཁོང༌ངི༌ དུན༌ལ༌ ལེབ༌ མ༌ཐུབ༌།
20 མི༌ཞིག༌གི༌ ཁོང༌ང༌ ཟེརས༌, "ཉེ༌རང༌ངི༌ ཨ༌མ༌ དང༌ ནོ༌གུན༌ ཉེ༌རང༌ ཐུག༌ག༌ ཕི༌ལོག༌ག༌ སྲུང༌ཏེ༌ དུག༌།"
21 ཡེ༌ཤུའི༌ ལན༌སལས༌, "དཀོན༌མཆོག༌གི༌ བཀའ༌ ཉན༌ཏེ༌ ལག༌ལེན༌ ཅོ༌ཁན༌གུན༌ ངའེ༌ ཨ༌མ༌ དང༌ ནོ༌གུན༌ ཨིན༌།"
ཡེ༌ཤུའི༌ ལུང༌རག༌ མེད༌ཁན༌ ཛདས༌།
8:22 ནེ༌ 25
22 ཞག༌ཤིག༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, "ང༌དང༌ ཚོའེ༌ ཕར༌ཀ༌ ཆེན༌།" ཏེ༌ནེ༌ ཁོང༌གུན༌ གྲུ༌ཟིང༌ཞིག༌གི༌ ནང༌ང༌ ཞོན༌ཏེ༌ སྐྱོདས༌།
23 གྲུ༌ཟིང༌ངི༌ ནང༌ང༌ ཆའ༌ ཟ༌ནེ༌ ཡེ༌ཤུ༌ ནལ༌ལ༌ སྐྱོདས༌། ནམ༌ཚུབས༌ཏེ༌ ཚོའེ༌ ནང༌ང༌ ལུང༌རག༌ ཀྲག༌པོ༌ ཡོངས༌ཏེ༌ གྲུ༌ཟིང༌ ཆུའི༌ གངས༌ཏེ༌ ནུབ༌ཅེས༌སི༌ ཇིགས༌ནང༌ ཡོད༌པིན༌།
24 ལོབ༌ཕྲུགས༌གུན༌ སོང༌ཏེ༌ ཡེ༌ཤུའི༌ ཉིད༌ཚད༌ད༌ ཛད༌ཏེ༌ ཟེརས༌, "སྤོན༌བོ༌ལེ༌, སྤོན༌བོ༌ལེ༌, ང༌ཞ༌གུན༌ ཆུའི༌ ནང༌ང༌ ནུབ༌ཏེ༌ ཤི༌ཅེས༌ དུག༌།" ཁོང༌ ཞངས༌ཏེ༌ ལུང༌རག༌ དང༌ ཆུལ༌བག༌ གུན༌ལ༌ ཁའ༌སྐྱེའ༌ ཛདས༌, ཏེན༌ན༌མལ༌ལ༌ ཏེ༌གུན༌ མེད༌ཁན༌ སོང༌ཏེ༌ ཞི༌དེ༌ བྱུང༌།
25 ཁོང༌ངི༌ ཁོང༌གུན༌ལ༌ མོལས༌, "ཁྱོ༌ཞའེ༌ ཏད༌པ༌ ཀ༌རུ༌ སོང༌།"
ལོབ༌ཕྲུགས༌གུན༌ ཇིགས༌ཨིན༌ ཧ༌ལས༌ཏེ༌ ཅིག༌ དང༌ ཅིག༌ག༌ ཟེརས༌, "ཁོང༌ སུ༌ ཨིན༌ནོག༌? ཁོང༌ངི༌ བཀའ༌ སལ༌ལ༌ཅིག༌ ལུངས༌པོ༌ དང༌ ཚོའིང༌ ཁའ༌ ཉན༌དུག༌།
ཡེ༌ཤུའི༌ མི༌ཞིག༌ནེ༌ རྡུད༌གུན༌ ཕིང༌ང༌ ཛདས༌།
8:26 ནེ༌ 39
26 ཏེ༌ནེ༌ ཁོང༌གུན༌ གྲུ༌ཟིང༌ངི༌ ནང༌ང༌ གཱ༌ལིལ༌ལི༌ ཡུལ༌ཇོངས༌ནེ༌ ཚོའེ༌ ཕར༌ཀ༌ ཡོད༌ཁན༌ནི༌ ག༌ད༌རཱའེ༌ ཡུལ༌ཇོངས༌ལ༌ ལེབ༌།
27 གཙོ༌བོ༌ ཡེ༌ཤུ༌ གྲུ༌ཟིང༌ནེ༌ བིང༌ང༌ ཛད༌ད༌ཅིག༌, ཏེན༌ན༌ གྲོང༌ཁྱེར༌རི༌ མི༌, རྡུད༌ ཞུགས༌ཁན༌ ཞིག༌ ཁོང༌ ཇལ༌ལ༌ལ༌ ཡོངས༌། ཁོ༌ ཏུས༌ མང༌པོ༌ཞིག༌ནེ༌ ཕར༌ལ༌ ཁང༌པ༌ མ༌དུག༌ག༌ རོམ༌ཁང༌གུན༌ནི༌ ནང༌ང༌ ལྗེར༌ཉལ༌ལ༌ དུག༌གད༌པིན༌།
28 ཁོའེ༌ ཡེ༌ཤུ༌ ཇལ༌ལ༌ཅིག༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཡེ༌ཤུའི༌ ཞབས༌སི༌ དུན༌ལ༌ གྱེལ༌ཏེ༌ ཟེརས༌, "ཡེ༌ཤུ༌ དཀོན༌མཆོག༌ ཀུན༌ཝང༌ངི༌ སྲས༌, ཉེ༌རང༌ ངའེ༌ ལས༌སི༌ ནང༌ང༌ ཅིའ༌ དྲེས༌སད༌? ཇུ༌ཇུ༌ ང༌ ནགས༌ ལྟན༌ན༌ མ༌ཛད༌"
29 ཅིའ༌ཟེར༌ན༌ ཡེ༌ཤུའི༌ རྡུད༌པོའ༌, མི༌བོའེ༌ ནང༌ནེ༌ བིང༌ཏེ༌ ཡོང༌ མོལ༌ཏེ༌ བཀའ༌ སལས༌། ༼མི༌བོའེ༌ རྐང༌ལག༌ ལྕག༌ཐགས༌ ཉམ༌པོ༌ ཅིངས༌ཏེ༌ སྲུང༌ཁན༌ དུགས༌ཏེའང༌ རྡུད༌པོའེ༌ ལན༌ མང༌པོ༌ ཁོའེ༌ཀ༌ ཝང༌ སྲུལ༌ཏེ༌ ལྕག༌ཐགས༌ ཅགས༌ཏེ༌ ཁོ༌ རི༌སྟོང༌ང༌ ཁྱེར༌རད༌པིན༌༽།
30 ཡེ༌ཤུའི༌ ཁོའ༌ ཏྲིའ༌ ཛདས༌, "ཁྱོ༌རང༌ངི༌ མིང༌ ཅི༌ ཨིན༌།"
ཁོའེ༌ ལན༌ཏངས༌, "རྡུད༌ཚོགས༌" ཅིའ༌ཟེར༌ན༌ མི༌བོའེ༌ ནང༌ང༌ རྡུད༌ མང༌པོ༌ ཞུགས༌ཏེ༌ ཡོད༌པིན༌།
31 ཡང༌ ཏེ༌གུན༌ནི༌ ལན༌ མང༌པོ༌ ཡེ༌ཤུའ༌ ཁོང༌གུན༌ ཐའ༌ མ༌ནེ༌ མེད༌ཁན༌ནི༌ ས༌དོང༌ ཏིང༌ཅན༌ནི༌ ནང༌ང༌ ཕང༌ང༌ མི༌ཛད༌ཅེས༌ལ༌ ཇུ༌ཇུ༌ ཞུས༌།
32 ཏེ༌རུ༌ རི༌ཀ༌ ཕག༌གི༌ ཁྱུ༌ ཆེན༌མོ༌ཞིག༌ རྩཱ༌ ཟེན༌ ཡོད༌པིན༌། རྡུད༌གུན༌ནི༌ ཡེ༌ཤུའ༌ ཇུ༌ཇུ༌ ཞུས༌ཏེ༌ ཁོང༌གུན༌ ཏེ༌ ཕག༌གུན༌ནི༌ ནང༌ང༌ ཆ༌ཅུག༌ག༌ ཛད༌ཅེས༌ལ༌ ཟེརས༌, ཡེ༌ཤུའི༌ ཏེ༌གུན༌ལ༌ གོངས༌པ༌ སལ༌ལ༌ ཛདས༌།
33 ཏེ༌ནེ༌ རྡུད༌གུན༌ མི༌བོའེ༌ ནང༌ནེ༌ བིང༌ཏེ༌ ཕག༌གུན༌ནི༌ ནང༌ང༌ ཞུགས༌། ཡང༌ ཕག༌གི༌ ཁྱུ༌ རི༌ནེ༌ ཐུར༌ལ༌ བང༌ཏངས༌ཏེ༌ ཚོའེ༌ ནང༌ང༌ བུད༌ ཡང༌ ཆུའི༌ ནང༌ང༌ ནུབ༌ཏེ༌ ཤི༌།
34 ཕག༌ཚོ༌ཁན༌གུན༌ནི༌ བྱུང༌ཁན༌གུན༌ ཐོང༌ང༌ཅིག༌, གྲོང༌ཁྱེར༌ དང༌ ཉེ༌ཁོར༌རི༌ ནས༌ས༌གུན༌ལ༌ བང༌ཏངས༌ཏེ༌ སོང༌ ཡང༌ ཏེ༌གུན༌ ཤདས༌།
35 ཏེ༌ནེ༌ བྱུང༌ཁན༌གུན༌ ལྟའ༌ལ༌ མི༌གུན༌ སོང༌, ཡེ༌ཤུ༌ ཡོད༌ས༌ ལེབ༌བ༌ཅིག༌, རྡུད༌གུན༌ ཕིང༌ཁན༌ནི༌ མི༌བོ༌ ཡེ༌ཤུའི༌ ཞབས༌སི༌ དུན༌ལ༌ ཀོས༌ལག༌ གོན༌ཏེ༌ སྙོ༌ མ༌སྙོའ༌ དུགས༌ཏེ༌ ཐོང༌པ༌ ཁོང༌གུན༌ ཇིགས༌།
36 ཏེ༌ ཚང༌མ༌ ཐོང༌ཁན༌གུན༌ནི༌ རྡུད༌གུན༌ ཞུགས༌ཁན༌ནི༌ མི༌བོ༌ ཡེ༌ཤུའི༌ ཀ༌ཟུག༌གི༌ གྱལ༌ཅུག༌ག༌ ཛདས༌ཁན༌བོ༌ མི༌གུན༌ལ༌ ཞིབ༌སལ༌ ཅོས༌ཏེ༌ ཤདས༌།
37 ག༌ད༌རཱ༌ ཡུལ༌ཇོངས༌སི༌ མི༌ཚང༌མ༌ མ༌སྲན༌ཏྲེ༌ ཇིགས༌པ༌, ཁོང༌གུན༌ནི༌ ཡེ༌ཤུའ༌ ཁོང༌གུན༌ནི༌ ཡུལ༌ནེ༌ བིང༌ཏེ༌ སྐྱོད༌ ཟེརས༌། ཏེ༌ནེ༌ ཡེ༌ཤུ༌ དང༌ ལོབ༌ཕྲུགས༌གུན༌ གྲུ༌ཟིང༌ང༌ ཞོན༌ཏེ༌ ལོགས༌ཏེ༌ སྐྱོདས༌།
38 རྡུད༌གུན༌ ཕིང༌ཁན༌ནི༌ མི༌བོའེ༌ ཡེ༌ཤུའ༌, ཁོ༌ ཁོང༌ ཉམ༌པོ༌ ཡོང༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌, ཨིན༌ནའང༌ ཡེ༌ཤུའི༌ ཁོ༌ ལོགས༌ཏེ༌ ལམ༌ཅུག༌ག༌ ཛད༌ཏེ༌ མོལས༌,
39 "ཁང༌པ༌ ལོགས༌ཏེ༌ སོང༌, ཡང༌ མི༌ཚང༌མ༌ལ༌ ཁྱོ༌རང༌ངི༌ ཕིའ༌ དཀོན༌མཆོག༌གི༌ ཛད༌ཁན༌ ཚང༌མ༌ ཤོད༌།" ཏེ༌ནེ༌ ཁོ༌ སོང༌ཏེ༌ གྲོང༌ཁྱེར༌ གང༌པོའེ༌ ནང༌ང༌ ཡེ༌ཤུའི༌ ཁོའེ༌ ཕིའ༌ ཛད༌ཁན༌ ཚང༌མ༌ ཤདས༌།
བུ༌མོ༌ ཆུ༌ངུན༌ ཤི༌ཁན༌ དང༌ ན༌ཆུང༌ ཟུ༌མོ༌ ཡོང༌ཁན༌།
8:40 ནེ༌ 56
40 ཚོའེ༌ འ༌ངོ༌ ཆོགས༌སི༌ ཕར༌ཀ༌ ལེབ༌བ༌ཅིག༌ མི༌ཚོགས༌ ཆེན༌མོ༌ཞིག༌གི༌ ཡེ༌ཤུའ༌ གའ༌སུས༌ ཞུས༌ ཅིའ༌ཟེར༌ན༌ ཁོང༌གུན༌ ཁོང༌ སྐྱོད༌ཅེས༌ལ༌ སྲུངས༌ཏེ༌ ཡོད༌པིན༌།
41 ཏེ༌ནེ༌ ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌ ཡའེ༌རས༌ ཟེར༌ཁན༌བོ༌ ཡོངས༌ཏེ༌ ཡེ༌ཤུའི༌ ཞབས༌སི༌ དུན༌ལ༌ གྱེལ༌ཏེ༌ ཇུ༌ཇུ༌ ཞུ༌ཨིན༌ ཁོའེ༌ ཁང༌པ༌ སྐྱོད༌ཅེས༌ལ༌ ཟེརས༌,
42 ཅིའ༌ཟེར༌ན༌ ཧ༌ལམ༌ ལོ༌ ཅུག༌ཉིས༌ ཆའ༌ཁན༌ནི༌ ཁོའེ༌ བུ༌མོ༌ ཅིག༌ཅིག༌པོ༌ ཤི༌ཀྱིས༌ ཡོད༌པིན༌།
ཡེ༌ཤུ༌ ཁོ༌ ཉམ༌པོ༌ སྐྱོད༌ ཟ༌ནེ༌ མི༌ཚོགས༌ ཆེན༌མོའེ༌ ཁོང༌ང༌ ནན༌ཏེ༌ ཁྱོངས༌,
43 བུད༌ཁན༌ནི༌ ལོ༌ ཅུག༌ཉིས༌ནེ༌ ཕར༌ལ༌ ཏུས༌གྱུན༌ ཟུགས༌པོ༌ ཞིག༌ཅེས༌སི༌ ཟུ༌མོ༌ ཡོངས༌ཁན༌ནི༌ བུ༌མོ༌ཞིག༌ མི༌ཚོགས༌སི༌ ཕྲོའ༌ ཡོད༌པིན༌། སུ༌ཞིག༌གའང༌ ཁོ༌ ནད༌པོ༌ནེ༌ ཕན༌ཅུག༌ མ༌ཉན༌།
44 ཁོ༌ ཡེ༌ཤུའི༌ གྱབ༌ནེ༌ ཡོངས༌ཏེ༌ ཁོང༌ངི༌ ནམ༌ཟའེ༌ གྲུ༌ཞིག༌ག༌ ལག༌པ༌ ཏུག༌ག༌ཅིག༌, ཁོའེ༌ ཁྲག༌པོ༌ ཆད༌།
45 ཡེ༌ཤུའི༌ མོལས༌, "ངའ༌ སུའི༌ ལག༌པ༌ ཏུགས༌།"
མི༌ཚང༌མའེ༌ ལག༌པ༌ མ༌ཏུགས༌པིན༌ ཟེརས༌, ཏེ༌ནེ༌ པི༌ཏྲར༌རི༌ ཟེརས༌, "སྤོན༌བོ༌ལེ༌, མི༌ཚོགས༌སི༌ ཉེ༌རང༌ ནན༌ཨིན༌ ཕུལ༌ཨིན༌ ཁྱོང༌དུག༌།"
46 ཨིན༌ནའང༌ ཡེ༌ཤུའི༌ མོལས༌, "སུ༌ཞིག༌གི༌ ང༌ ལག༌པ༌ ཏུགས༌ ཅིའ༌ཟེར༌ན༌ ངའེ༌ ནང༌ནེ༌ ཕན༌ཅུག༌ཁན༌ནི༌ སྟོབས༌ བིང༌ཏེ༌ ཆའ༌ཁན༌བོ༌ ང༌ ཚོར༌།"
47 ཏེ༌ནེ༌ བུ༌མོ༌བོའེ༌ ཏེ༌བོ༌ སྦས༌ཏེ༌ བོར༌ མི༌ཉན༌ན༌ནོག༌ སམ༌ཏེ༌, དར༌ཨིན༌ ཡེ༌ཤུའི༌ དུན༌ལ༌ ཡོངས༌ཏེ༌ ཁོང༌ངི༌ ཞབས༌སི༌ཀ༌ གྱེལས༌། མི༌ཚང༌མའེ༌ དུན༌ལ༌ ཁོའེ༌ ཡེ༌ཤུའ༌ ལག༌པ༌ ཅིའ༌ རྩེས༌པིན༌ ཡང༌ ལག༌པ༌ ཏུག༌ག༌ཅིག༌ ཏེན༌ན༌མལ༌ལ༌ ཁོའེ༌ ཟུ༌མོ༌ ཕན༌ཁན༌བོ༌ ཤདས༌།
48 ཏེ༌ནེ༌ ཡེ༌ཤུའི༌ ཁོའ༌ མོལས༌, "བུ༌མོ༌ ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌། ཞི༌དེའེ༌ ཉམ༌པོ༌ སོང༌།"
49 ཁོང༌ངི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌, དུ༌ཁང༌ངི༌ འུ༌སྐྱོང༌ ཡའེ༌རས༌སི༌ ཁང༌པ༌ནེ༌ མི༌ཞིག༌ ཡོངས༌ཏེ༌ ཁོའ༌ ཟེརས༌, "ཉེ༌རང༌ངི༌ བུ༌མོ༌བོ༌ ཤི༌། ཏ༌ ལོབ༌པོན༌ལེའ༌ འོབ༌གྱལ༌ ལྟན༌ན༌ མ༌ཛད༌།"
50 ཏེ༌བོ༌ ཚོར༌ར༌ཅིག༌, ཡེ༌ཤུའི༌ ཡའེ༌རས༌ལ༌ མོལས༌, "ཇིགས༌ མ༌ཇིགས༌, ཏད༌པ༌ རང༌ ཅོས༌ ཁྱོ༌རང༌ངི༌ བུ༌མོ༌ གྱལ༌ཨིན༌།"
51 ཡེ༌ཤུ༌ ཡའེ༌རས༌སི༌ ཁང༌པ༌ ལེབ༌བ༌ཅིག༌, པི༌ཏྲར༌, ཡ༌ཀོབ༌, ཡོ༌ཧཱ༌ནན༌ དང༌ བུ༌མོའེ༌ ཕ༌མ༌ མ༌སྟོགས༌ ཞན༌སུ༌ཞིག༌གའང༌ ཁོང༌ ཉམ༌པོ༌ ཡོང༌ ཅུག༌ག༌ མ༌ཛདས༌།
52 ཏེན༌ན༌ ཏུས༌ལ༌ མི༌ཚང༌མ༌ ངུ༌ཨིན༌ ཉ༌ངན༌ ཅོའད༌པིན༌, ཡེ༌ཤུའི༌ ཁོང༌གུན༌ལ༌ མོལས༌, "མ༌ངུ༌, ཁོ༌ མ༌ཤིའ༌ ཉིད༌ལོགས༌ཏེ༌ ཨིན༌།"
53 ཁོང༌གུན༌ནི༌ ཁྲེལ༌གོད༌ ཏངས༌ ཅིའ༌ཟེར༌ན༌ ཁོང༌གུན༌ལ༌ བུ༌མོ༌ ཤི༌ཏེ༌ ཨིན༌ཁན༌ གྱུས༌ཡོད༌པིན༌།
54 ཨིན༌ནའང༌ ཡེ༌ཤུའི༌ བུ༌མོའེ༌ ལག༌པ༌ ཐམས༌ས༌ ཛད༌ཏེ༌ ཁོའ༌ མོལས༌, "ངའེ༌ ཕྲུ༌གུ༌, ལོངས༌།"
55 ཏེན༌ན༌མལ༌ལ༌ བུ༌མོའེ༌ སེམས༌ཉིད༌ ལོགས༌ཏེ༌ ཡོངས༌པ༌ ཁོ༌ ཀོའག༌ ལངས༌ ཡང༌ ཡེ༌ཤུའི༌ ཁོང༌གུན༌ལ༌ བུ༌མོ༌བོའ༌ ཅི༌ཏོང༌ཤིག༌ ཟའ༌ ཏང༌ཅེས༌ལ༌ མོལས༌།
56 ཕ༌མ༌གུན༌ མ༌སྲན༌ཏྲེ༌ ཧ༌ལས༌ ཨིན༌ནའང༌ ཡེ༌ཤུའི༌ ཁོང༌གུན༌ལ༌ བྱུང༌ཁན༌བོ༌ སུའང༌ མི༌ཤད༌ཅེས༌ལ༌ བཀའ༌ སལས༌།