2
1 ཏེན༌ན༌བོའེ༌ཕིའ༌ ཟུན༌ ཏང༌ཅེས༌, ཁ༌ཆོས༌ ཅོ༌ཅེས༌, ཚིག༌ཅེས༌, མིའི༌ སྕོད༌པའེ༌ སྐོར༌ལ༌ སྤེ༌ར༌ རྩོག༌པོ༌ ཟེར༌ཅེས༌སི༌ སྕོད༌པ༌ ངན༌པ༌ ཚང༌མ༌ ཕང༌གོས༌།
2 ཐར༌པའེ༌ ཅིན༌ལབས༌ གང༌པོ༌ ཐོབ༌ཅེས༌སི༌ ཕིའ༌ ཕྲུ༌གུ༌ ཆུ༌ངུན༌ སྐྱེས༌ཁན༌ ཙོགས༌ལ༌ ཐུག༌ཉིད༌དི༌ འོ༌མ༌ ལག༌མོ༌ ཐུང༌ཅེས༌ལ༌ སྲན༌ཏྲེ༌ དོད༌པ༌ ཅོ༌ཤིག༌།
3 ཏ༌ གཙོ༌བོ༌ ཟང༌པོ༌ ཨིན༌ཁན༌ནི༌ བྲོད༌པོ༌ ཁྱོ༌ཞའེ༌ ཉངས༌ཏེ༌ ཨིན༌ནོག༌།
རྡོའ༌ སོན༌པོ༌ དང༌ མི༌ ལྡམ༌མ༌ ཛད༌ཁན༌གུན༌།
2:4 ནེ༌ 12
4 སོན༌པོ༌ ཀྲུ༌རྡོ༌ ཞུགས༌ཁན༌ གཙོ༌བོའེ༌ཀ༌ ཁྱོ༌ཞ༌གུན༌ ཡོང༌ཤིག༌, ཀ༌བོ༌ མི༌གུན༌ནི༌ ཕང༌ནའང༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཁོང༌ངི༌ ཕིའ༌ རིན༌ཅན༌ ཨིན༌།
5 ཁྱོ༌ཞའ༌ རྡོའ༌ སོན༌པོ༌ དཀོན༌མཆོག༌གི༌ ཐུག༌ཉིད༌དི༌ ཆོད༌ཁང༌ རྩིག༌ཅེས༌ལ༌ ཀོལ༌ལ༌ ཛད༌ཁན༌གུན༌ ཨིན༌ནོག༌, ཡང༌ ཁྱོ༌ཞའ༌ ཁོང༌ངི༌ བླ༌མ༌ དམ༌པ༌, ཀ༌གུན༌ནི༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ འོས༌པ༌ ཨིན༌ཁན༌ནི༌ སེམས༌ཉིད༌དི༌ ཆོད༌པ༌ ཕུལ༌ལ༌ནོག༌།
6 དམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌།
"ལྟོས༌ཤིག༌ ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌
ངའེ༌ ལྡམས༌ཁན༌ནི༌ ཀྲུ༌རྡོ༌ རིན༌ཅན༌ཞིག༌ བོར༌རད༌།
སུ༌ཞིག༌གི༌ ཁོང༌ངི༌ཀ༌ ཏད༌པ༌ ཅོ༌ཨིན༌
ཏེ༌ མི༌བོ༌ མ༌ནེ༌ ཁྲེལ༌བ༌ མི༌ཆ༌།"
7 ཏ༌ ཁྱོ༌ཞའ༌ ཏད༌པ༌ ཅོ༌ཁན༌གུན༌ནི༌ ཕིའ༌ ཏེ༌ རྡོའ༌བོ༌, མ༌ རིན༌ཅན༌ཞིག༌ ཨིན༌། ཨིན༌ནའང༌ ཏད༌པ༌ མ༌ཅོ༌ཁན༌གུན༌ནི༌ ཕིའ༌,
"ཀ༌ རྡོའ༌བོ༌ རྩིགས༌པོན༌གུན༌ནི༌ རིན༌མེད༌ སམས༌ཏེ༌ ཕངས༌ཏངས༌,
ཏེ༌ རྡོའ༌བོ༌ ཀྲུ༌རྡོ༌ རིན༌ཅན༌བོ༌ གྱུར༌།"
8 ཡང༌
"ཁོང༌ ནི༌ མི༌གུན༌ སྒག༌གྱབས༌ ཅུག༌ཁན༌ནི༌ རྡོའ༌ དང༌
ཏེ༌གུན༌ གྱེལ༌ཅུག༌ཁན༌ནི༌ ཕོ༌ལོངས༌ ཙོགས༌ ཨིན༌ནོག༌།"
ཏེ༌གུན༌ནི༌ དཀོན༌མཆོག༌གི༌ བཀའ༌ ཁའ༌ མི༌ཉན༌ཅེས༌པོའེ༌, སྒག༌གྱབ༌བ༌ནོག༌, ཏེན༌ན༌བོ༌, ཁོང༌གུན༌ནི༌ ཕིའ༌ དཀོན༌མཆོག༌གི༌ ཐུག༌གོངས༌ ཨིན༌པིན༌།
9 ཨིན༌ནའང༌ ཁྱོ༌ཞ༌གུན༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མི༌གུན༌, གྱལ༌རིགས༌སི༌ བླ༌མ༌, གྱལ༌ཁབ༌ དམ༌པ༌ དང༌ དཀོན༌མཆོག༌ ཁོང༌རང༌ངི༌ མི༌གུན༌ ཨིན༌ནོག༌, ཏེན༌ན༌བོའེ༌ ཞས༌ཏེ༌ ཁྱོ༌ཞ༌གུན༌ལ༌ མུན༌གྲིག༌ནེ༌ ཁོང༌ངི༌ ཧ༌ལས༌ཤེས༌སི༌ འོད༌དི༌ ནང༌ང༌ བོད༌ད༌ ཛད༌ཁན༌ནི༌ དཀོན༌མཆོག༌གི༌ ཆག༌ལས༌ ཟང༌པོ༌གུན༌ལ༌ ཁྱོ༌ཞའེ༌ སྟོད༌པ༌ ཕུལ༌ ཉན༌ཨིན༌།
10 སྔུན༌ལ༌ ཁྱོ༌ཞའ༌ དཀོན༌མཆོག༌གི༌ མི༌ མན༌པིན༌,
ཏ༌ དཀོན༌མཆོག༌གི༌ མི༌གུན༌ གྱུར༌ཏེ༌ ཨིན༌ནོག༌།
སྔུན༌ལ༌ ཁྱོ༌ཞ༌གུན༌ལ༌ སྙིང༌རྗེ༌ མ༌ཐོབ༌བ༌ ཨིན༌པིན༌,
ཏ༌ སྙིང༌རྗེ༌ ཐོབ༌ཏེ༌ ཨིན༌ནོག༌།
11 ཅེས༌པའེ༌ སྤུན༌གུན༌, ཁྱོ༌ཞ༌རང༌གུན༌ སེམས༌ཉིད༌དི༌ གྱབ༌གལ༌ལ༌ ནོལ༌ཨིན༌ དུག༌ཁན༌ནི༌ སྡིག༌པའེ༌ དོད༌པ༌གུན༌ནེ༌ ཐག༌རིང༌ང༌ བོར༌ཏེ༌ འི༌ ཇིག༌རྟེན༌ནི༌ ནང༌ང༌ གྲོན༌པོ༌ དང༌ བེས༌པ༌ གུན༌ ཙོགས༌ལ༌ མི༌ཚེ༌ ཕུད༌ཅེས༌ལ༌ སྤོས༌པ༌ ཏང༌ངད༌།
12 ཏད༌པ༌ མེད༌ཁན༌ནི༌ ཁྱིམ༌ཚེས༌པ༌གུན༌ནི༌ ཕྲོའ༌, ཁྱོ༌ཞ༌གུན༌ནི༌ མི༌ཚེ༌ ཟང༌པོ༌ཞིག༌ ཕུད༌ཤིག༌, ཞན༌ ཁོང༌གུན༌ནི༌ ཁྱོ༌ཞ༌གུན༌ལ༌ ངན༌པ༌ ཅོས༌ཏེ༌ ཨིན༌ནོག༌ ཟེར༌ཏེ༌ ཉད༌གལ༌ ཏང༌ནའང༌, ཁོང༌གུན༌ནི༌ ཁྱོ༌ཞ༌གུན༌ནི༌ ལས༌ ཟང༌པོ༌གུན༌ ཐོང༌ཅེས༌པོའེ༌, དཀོན༌མཆོག༌ག༌ སྟོད༌པ༌ ཕུལ༌ཨིན༌, ནམ༌ ཁོང༌ ཇིག༌རྟེན༌ནི༌ཀ༌ ཁྲིམས༌ཅད༌ ཛད༌ད༌ལ༌ སྐྱོད༌ཨིན༌།
ཝང༌སྲུལ༌པ༌གུན༌ནི༌ ཁའ༌ཉན༌ཅེས༌།
2:13 ནེ༌ 25
13 དཀོན༌མཆོག༌གི༌ རྩི༌ཝའེ༌ ཕིའ༌ ཁྱོ༌ཞ༌གུན༌ འི༌ ཇིག༌རྟེན༌ནི༌ཀ༌ ཝང༌ ཡོད༌ཁན༌གུན༌ནི༌ ཡོག༌ག༌ དུག༌ཤིག༌: ཚང༌མའེ༌སང༌ ཝང༌ ཆེ༌ཤོག༌ ཡོད༌ཁན༌ གྱལ༌པོ༌,
14 ཡ༌ གྱལ༌པོའེ༌ ཀའ༌ལོན༌, ཀ༌གུན༌ མི༌འོས༌པ༌ ཅོ༌ཁན༌གུན༌ལ༌ ཆད༌པ༌ ཅད༌ཅེས༌ དང༌, འོས༌པ༌ ཅོ༌ཁན༌གུན༌ལ༌ སྟོད༌པ༌ ཏང༌ཅེས༌སི༌ ཕིའ༌ ཁྱོ༌ཞའ༌ ཡོད༌ས༌ ཀལ༌ཏེ༌ ཨིན༌།
15 དཀོན༌མཆོག༌གི༌ ཐུག༌གོངས༌པོ༌ ཁྱོ༌ཞ༌གུན༌ནི༌ ལས༌ ཟང༌པོ༌ ཅོས༌ཏེ༌, སམ༌བ༌ མེད༌ཁན༌གུན༌ནི༌ ཏོན༌ཏག༌ མེད༌ཁན༌ནི༌ སྤེ༌ར༌གུན༌ སྒག༌ཅེས༌པོ༌ ཨིན༌ནོག༌།
16 ཁྱོ༌ཞའེ༌ རང༌ཝང༌ཅན༌ནི༌ མི༌གུན༌ ཙོགས༌ལ༌ མི༌ཚེ༌ ཕུད༌ཤིག༌, ཨིན༌ནའང༌ དཀོན༌མཆོག༌གི༌ ཞབ༌སྟོག༌པ༌ ཨིན༌ པ༌སང༌, ཁྱོ༌ཞ༌གུན༌ནི༌ རང༌ཝང༌བོ༌ ངན༌པ༌ ཅོ༌ཅེས༌སི༌ ནང༌ང༌ མ༌ཀོལ༌ཤིག༌།
17 ཚང༌མ༌ལ༌ ཀུས༌པ༌, སྤུན༌གུན༌ལ༌ ཡ༌ཤ༌, དཀོན༌མཆོག༌ག༌ ཇིགས༌ཤེས༌ དང༌ གྱལ༌པོའ༌ རྩི༌ཝ༌ ཅོ༌ཤིག༌།
18 དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ ཁྱོ༌ཞའ༌ ཚེ༌ཡོག༌གུན༌ནི༌ སྤོན༌བོ༌ ཟང༌པོ༌ དང༌ བོལ༌མོ༌ ཡོད༌ཁན༌ ཅིག༌པོ༌ མན༌པ༌ ངན༌པ༌ སྤོན༌པོ༌གུན༌ནི༌ ཝང༌ངི༌ ཡོག༌གའང༌ དུག༌ཤིག༌།
19 གལ༌ཏེས༌ འོས༌པ༌ མན༌ཁན༌ནི༌ ནགས༌ དང༌ བར༌དོ༌ གུན༌ ཟོད༌པ༌ ཉམ༌པོ༌ ཁུར༌ཨིན༌ ཁྱོ༌ཞ༌གུན༌ནི༌ འོས༌པའེ༌ ལས༌པོ༌ ཅོའད༌ན༌, དཀོན༌མཆོག༌ ཐུགས༌ཐད༌ད༌ ཛད༌ད༌ནོག༌།
20 ཨིན༌ནའང༌ གལ༌ཏེས༌ ཁྱོ༌ཞའེ༌ ངན༌པ༌ ཅོས༌ཏེ༌ ཁྱོ༌ཞའ༌ རྡུངས༌ཁན༌བོ༌ ཟོད༌པ༌ ཉམ༌པོ༌ ཁུར༌ན༌, ཏེ༌ནེ༌ ཁྱོ༌ཞའ༌ སྟོད༌པ༌ ཅིའ༌ ཐོབ༌ཨིན༌? ཏ༌ ཟང༌པོ༌ ཅོས༌ཏེ༌ ནགས༌ ཁུར༌ཏེ༌ ཟོད༌པ༌ བོར༌རད༌ན༌, ཏེ༌བོའ༌ དཀོན༌མཆོག༌གི༌ སྟོད༌པ༌ སལ༌ལ༌ ཛད༌ཨིན༌།
21 ཁྱོ༌ཞ༌གུན༌ ཏེན༌ན༌ ཙོགས༌སི༌ མི༌ཚེ༌ ཕུད༌ཅེས༌ལ༌ དཀོན༌མཆོག༌གི༌ བོད༌ད༌ ཛད༌ཏེ༌ ཨིན༌ནོག༌, ཅིའ༌ཞུ༌ན༌ ཁྱོ༌ཞ༌གུན༌ནི༌ ཕིའ༌ མ༌ཤི༌ཀའེ༌ རྡུག༌ངལ༌ ནམས༌། ཁོང༌, ཁྱོ༌ཞ༌གུན༌ནི༌ ཕིའ༌ སྤེ༌ཞིག༌ ཨིན༌, ཀ༌བོའེ༌ཀ༌ ཁྱོ༌ཞའ༌ གྲུལ༌གོ༌ཤེས༌ ཨིན༌ནོག༌།
22 "ཁོང༌ངི༌ ཅའང༌ སྡིག༌པ༌ མ༌ཛདས༌,
ཡང༌ ཁོང༌ངི༌ སུ༌ཞིག༌གའང༌ གོབ༌སྐོར༌ར༌ མ༌ཛདས༌།"
23 ཁོང༌ང༌ ངན༌པ༌ ཟེར༌ཁན༌གུན༌ནི༌ ལན༌ལ༌,
ཁོང༌ངི༌ ཏེན༌ན༌ ཙོགས༌ ཅོའ༌ མ༌ཛདས༌།
ཡང༌ ཁོང༌ང༌ རྡུག༌ངལ༌ ཐོང༌ ཟ༌ནེ༌
སུ༌ཞིག༌གའང༌ ལན༌ཏང༌ཨིན༌ མ༌མོལས༌།
ཨིན༌ནའང༌ ཁོང༌ངི༌ ཁོང༌རང༌ དཀོན༌མཆོག༌གི༌ ཆག༌ག༌ སྟད༌ད༌ ཛདས༌,
ཀ༌བོའེ༌ འོས༌པའེ༌ ཁྲིམས༌ཅད༌ ཛད༌ད༌ནོག༌།
24 ང༌དང༌གུན༌ནི༌ སྡིག༌པའེ༌ དོད༌པ༌གུན༌ མེད༌ཁན༌ དང༌
མི༌ཚེ༌ དྲང༌པོ༌ཞིག༌ ཕུད༌ཅེས༌སི༌ ཕིའ༌,
ཁོང༌ངི༌ ཁོང༌རང༌ངི༌ སྐུ༌ཟུགས༌སི༌ཀ༌
ང༌དང༌གུན༌ནི༌ སྡིག༌པའེ༌ ཁུ༌རུ༌བོ༌ ནམས༌ཏེ༌,
རྐྱང༌ཤིང༌ངི༌ཀ༌ ཀྲོངས༌།
ཡང༌ མ༌ཤི༌ཀའེ༌ མ༌ཁའ༌ གྱུད༌ཏེ༌
ང༌དང༌གུན༌ ཕན༌ཅུག༌ག༌ ཛདས༌།
25 ཏུས༌ཤིག༌ག༌, ཁྱོ༌ཞ༌གུན༌ ལམ༌ སྟོར༌ཁན༌ནི༌
ལུག༌ ཙོགས༌ ཨིན༌པིན༌།
ཨིན༌ནའང༌ དག༌ས༌ ཁྱོ༌ཞ༌གུན༌ནི༌ སེམས༌སི༌ དག༌པོ༌,
རང༌ངི༌ ལུག༌རྫི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ དུན༌ལ༌ ལོགས༌ཏེ༌ ཡོངས༌ཏེ༌ ཨིན༌།