4
མི༌ཚེ༌ དམ༌པ༌ཞིག༌ ཕུད༌།
4:1 ནེ༌ 11
1 ཟུགས༌སི༌ ཐོག༌ནེ༌ མ༌ཤི༌ཀའེ༌ ནགས༌ དང༌ བར༌དོ༌ ཉོའ༌ ཛད༌ པ༌སང༌, ཁྱོ༌ཞ༌གུན༌ནི༌ སམ༌ཚུལ༌ལའང༌ ཁོང༌ ཙོགས༌ ཡོང༌ཅེས༌ལ༌ གྲལ༌གྲིག༌ ཅོ༌ཤིག༌, ཅིའ༌ཟེར༌ན༌ མ༌ཤི༌ཀའེ༌ ཕིའ༌ ཟུགས༌སི༌ ཐོག༌ནེ༌ རྡུག༌ངལ༌ ཉོང༌ཁན༌གུན༌ནི༌ སྡིག༌པ༌ ཅོ༌ཅེས༌སི༌ དོད༌པ༌ ཕངས༌ཏེ༌ ཨིན༌ནོག༌།
2 ཏེ༌བོའེ༌ ཞས༌ཏེ༌ ཁྱོ༌ཞ༌གུན༌ནི༌ ཇིག༌རྟེན༌ནི༌ ནང༌ང༌ ལུས༌ཁན༌ནི༌ མི༌ཚེ༌བོ༌, ཇིག༌རྟེན༌ནི༌ དོད༌པ༌ ནང༌ཞིན༌ མ༌ཕུད༌ད༌, དཀོན༌མཆོག༌གི༌ ཐུགས༌ཐད༌ ནང༌ཞིན༌ ཕུད༌ད༌ནོག༌།
3 ཁྱོ༌ཞའེ༌ རང༌ངི༌ མི༌ཚེ༌ ཏད༌པ༌ མེད༌ཁན༌གུན༌ ཙོགས༌ལ༌ ཕུད༌ཅེས༌པོ༌ ཏ༌ ཕང༌གོས༌, སྤེར༌ན༌ ཐའ༌མེད༌པའེ༌ ལུས༌བྲེལ༌ལི༌ དོད༌པ༌, ལུས༌བྲེལ༌ལི༌ དོད༌པ༌ སྲན༌ཏྲེ༌ ཅོ༌ཅེས༌, ར༌རོས༌རོས༌ ཆང༌ ཐུང༌ཅེས༌, གྲོན༌ཏང༌ཨིན༌ ར༌རོས༌ཤེས༌སི༌ ཟས༌གུན༌ ལེན༌ཏེ༌ ཀྲན༌བ༌ སྟོར༌ཅེས༌ དང༌, སྐུན༌དྲ༌ གུན༌ལ༌ ཅོལ༌ཅེས༌སི༌ ཁམ༌ལོག༌ ལས༌གུན༌།
4 ཁྱོ༌ཞའ༌ སྔུན༌མའེ༌ ཛ༌འོ༌གུན༌ནི༌ ལོབས༌ ངན༌པ༌གུན༌ནི༌ སྟིང༌རང༌ནེ༌ བང༌ མི༌ཏང༌ཅེས༌པོའེ༌ ཁོང༌གུན༌ ཧ༌ལས༌ཏེ༌ ཁྱོ༌ཞ༌གུན༌ནི༌ སྐོར༌ལ༌ སྤེ༌ར༌ ངན༌པ༌ ཟེར༌ར༌ནོག༌།
5 ཨིན༌ནའང༌ ཤི༌ཁན༌ དང༌ སོན༌ཏེ༌ ཉིས༌ཀོའེ༌ཀ༌ ཤགས༌ ཛད༌ད༌ལ༌ གྲལ༌གྲིག༌ ཡོད༌ཁན༌ནི༌ དཀོན༌མཆོག༌གི༌ དུན༌ལ༌ ཁོང༌གུན༌ལ༌ རྩི༌རུག༌ ཏང༌གོས༌ཨིན༌།
6 ཏེན༌ན༌བོའེ༌ཕིའ༌ ཤི༌ཁན༌གུན༌ལའང༌, གའ༌མོའེ༌ ནས༌ཚུལ༌བོ༌ ཤད༌ཏེ༌ ཨིན༌པིན༌, ཞན༌ མིའི༌ ཚུལ༌ལ༌ ཏེ༌གུན༌ལ༌ ཤི༌ཅེས༌སི༌ ཁྲིམས༌ ཕོག༌ཏེ༌ ཨིན༌ནའང༌, ཐུག༌ཉིད༌དི༌ ནང༌ང༌ ཁོང༌གུན༌ དཀོན༌མཆོག༌ ཉམ༌པོ༌ སོན༌ཏེའ༌ ལུས༌ཏེ༌ ཨིན༌ནོག༌།
7 ཇིག༌རྟེན༌ནི༌ ནང༌ང༌ ཡོད༌ཁན༌ ཚང༌མ༌ མེད༌ཁན༌ ཆ༌ཅེས༌སི༌ ཏུས༌ ཉེ༌མོའ༌ ལེབས༌ཏེ༌ ཨིན༌པ༌, མོས༌ལམ༌ ཞུ༌ཅེས༌ལ༌ སྣང༌ང༌ སྟན༌པོ༌ ཏངས༌ཏེ༌ རང༌སེམས༌ ཅུན༌ཏེ༌ བོར༌ཤིག༌།
8 ཚང༌མའེ༌སང༌ ཁག༌ཅན༌ སྤེ༌ར༌བོ༌ ནི༌, ཅིག༌ དང༌ ཅིག༌གི༌ ནང༌ང༌ ཅམས༌པ༌ ཅོ༌ཤིག༌, ཅིའ༌ཟེར༌ན༌ ཅམས༌པའེ༌ སྡིག༌པ༌ མང༌པོ༌ཞིག༌ ཀབ༌བ༌ནོག༌།
9 ཁྱོ༌ཞའེ༌ ཁང༌པའེ༌ ནང༌ང༌ ཡོང༌ཁན༌གུན༌ལ༌ སྙིང༌ ཕེས༌ཏེ༌ གའ༌སུས༌ ཞུ༌ཤིག༌།
10 དཀོན༌མཆོག༌གི༌ ཐུག༌རྗེ༌ མང༌པོའེ༌ ནང༌ནེ༌, ཁྱོ༌ཞའ༌ ཁྱུད༌ སལ༌ཁན༌བོ༌ ཁྱོ༌ཞའ༌ རེ༌རེ༌ གྱལ༌ལ༌ ཅོས༌ཏེ༌ ཅིག༌ དང༌ ཅིག༌ག༌ ཞབ༌སྟོག༌ ཅོ༌ཅེས༌སི༌ ནང༌ང༌ ཀོལ༌ཤིག༌།
11 ཆོས༌ཤད༌ཅེས༌སི༌ ཁྱུད༌ ཡོད༌ཁན༌གུན༌ནི༌, དཀོན༌མཆོག༌ ཁོང༌རང༌ངི༌ བཀའ༌ ཁྱོ༌ཞའ༌ གྱུད༌ཏེ༌ ཤད༌ད༌ ཛད༌ད༌ ཙོགས༌ལ༌ ཤོད༌ཤིག༌། ཡང༌ ཞབ༌སྟོག༌ ཞུ༌ན༌, དཀོན༌མཆོག༌གི༌ སལ༌ཁན༌ནི༌ སྟོབས༌པོ༌ ཉམ༌པོ༌ ཞུ༌ཤིག༌། ཏེ༌ནེ༌ ཁྱོ༌ཞའེ༌ ཅོ༌ཁན༌ ཚང༌མའེ༌ དཀོན༌མཆོག༌ག༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ སྟོད༌པ༌ ཁྱོང༌ཨིན༌། ཁོང༌ང༌ སྤལ༌ དང༌ ཝང༌ ཚང༌མ༌ ཏུས༌གྱུན༌ནེ༌གྱུན༌ ཐོབ༌ཤིག༌, ཨ༌མེན༌།
མ༌ཤི༌ཀ༌པ༌ ཨིན༌ཅེས༌པོའེ༌ ནགས༌ ཐོང༌ཅེས༌།
4:12 ནེ༌ 19
12 ཅེས༌པའེ༌ ཛ༌འོ༌གུན༌, ཁྱོ༌ཞ༌གུན༌ལ༌ མེའེ༌ ནང༌ང༌ བུད༌ཁན༌ ཙོགས༌ རྡུག༌ངལ༌ལི༌ ཚོད༌ལྟ༌ ཐོང༌ཁན༌བོའ༌, ཡམ༌ཚན༌ ཨིན༌ནོག༌ སམས༌ཏེ༌ ཁྱོ༌ཞའ༌ ཧ༌ མ༌ལས༌ཤིག༌།
13 ཨིན༌ནའང༌ གའ༌མོ༌ ཅོ༌ཤིག༌, ཏེ༌ ཚོད༌ལྟའེ༌ ཁྱོ༌ཞ༌གུན༌ མ༌ཤི༌ཀའེ༌ རྡུག༌ངལ༌ལི༌ ནང༌ང༌ དྲེས༌ཅུག༌ག༌ནོག, ཏེ༌བོའེ༌ ཞས༌ཏེ༌ ཁོང༌ངི༌ ཟིར༌རྗིད༌ ཇིག༌རྟེན༌ གང༌པོའ༌ སྔོན༌ ཅུག༌ག༌ ཛད༌ ཟ༌ནེ༌, ཁྱོ༌ཞ༌གུན༌ ཧ༌ལས༌ཤེས༌སི༌ ཐད༌པོ༌ ཆེན༌།
14 གལ༌ཏེས༌ མ༌ཤི༌ཀའེ༌ཀ༌ ཨིད༌ཤེས༌ ཅོ༌ཅེས༌པོའེ༌, སྤེ༌ར༌ རྩོག༌པོ༌ ཟེར༌ཏེ༌ ཁྲེལ༌པ༌ ཅོ༌ན༌, ཁྱོ༌ཞའ༌ ཅིན༌ལབས༌ཅན༌ ཨིན༌, ཅིའ༌ཟེར༌ན༌ དཀོན༌མཆོག༌གི༌ སྤལ༌ཅན༌ནི༌ ཐུག༌ཉིད༌བོ༌ ཁྱོ༌ཞ༌གུན༌ ཉམ༌པོ༌ ཞུགས༌ཏེ༌ ཨིན༌ནོག༌།
15 ཁྱོ༌ཞ༌གུན༌ལ༌ རྡུག༌ངལ༌ བྱུང༌ཁན༌བོ༌, མི༌ སད༌ཏེ༌, རྐུན༌མ༌ རྐུས༌ཏེ༌, ཁྲིམས༌ ཅགས༌ཏེ༌, ཡ༌ ཞན༌མའེ༌ ལས༌སི༌ ནང༌ང༌ ཐེས༌སྟོག༌ ཏང༌ཅེས༌པོའེ༌ ཡོང༌ མ༌གོས༌།
16 གལ༌ཏེས༌ ཁྱོ༌ཞའ༌ མ༌ཤི༌ཀ༌པ༌ ཨིན༌ཅེས༌པོའེ༌ རྡུག༌ངལ༌ བྱུང༌ན༌, ཁྲེལ༌བ༌ མ༌ཚོར༌, ཨིན༌ནའང༌ མི༌ཚང༌མའེ༌ ཁྱོ༌ཞའ༌ མ༌ཤི༌ཀའེ༌ ཨིན༌ཁན༌ ཤེས༌ཤེས༌པོའ༌, དཀོན༌མཆོག༌ག༌ སྟོད༌པ༌ ཕུལ༌ཤིག༌།
17 ཏ༌ དཀོན༌མཆོག༌གི༌ རང༌ངི༌ མི༌གུན༌ནི༌ ཀ༌ནེ༌ གོ༌ཟུག༌ ཛད༌ཏེ༌ ཁྲིམས༌ཅད༌ ཛད༌ཅེས༌སི༌ ཞག༌པོ༌ ལེབས༌ཏེ༌ ཨིན༌ནོག༌། གལ༌ཏེས༌ ང༌དང༌ མ༌ཤི༌ཀ༌པ༌གུན༌ནེ༌ གོ༌ཟུག༌ན༌, དཀོན༌མཆོག༌གི༌ གའ༌མོའེ༌ ནས༌ཚུལ༌ལ༌ ཁའ༌ མ༌ཉན༌ཁན༌གུན༌ནི༌ ནས༌ལུག༌པོ༌ ཀ༌ཟུག༌ཤིག༌ ཡོང༌ཨིན༌?
18 ཀ༌ཟུག༌ དམ༌པའེ༌ སུང༌རབས༌སི༌ ནང༌ང༌ མོལ༌ལ༌ ཛད༌ཏེ༌ དུག༌།
"ཏ༌ དྲང༌པོ༌གུན༌ལ༌ མ༌ ཀགས༌པོ༌ ཉམ༌པོ༌ ཐར༌པ༌ ཐོབ༌ན༌,
སྡིག༌ཅན༌ དང༌ དཀོན༌མཆོག༌ག༌ མ༌ཇིགས༌ཁན༌ གུན༌ལ༌ ཅི༌ མི༌ཆའ༌།"
19 ཏེན༌ན༌བོའེ༌ཕིའ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ རྡུག༌ངལ༌ དང༌ བར༌དོ༌ ཁུར༌ཁན༌གུན༌ནི༌ ལས༌ ཟང༌པོ༌ ཅོ༌ཨིན༌ རང༌ངི༌ སྲོག༌པོ༌ ཨིད༌ཤེས༌ཅན༌ ཛམ༌བུ༌ལིང༌ ཞངས༌ཁན༌, དཀོན༌མཆོག༌གི༌ ཆག༌ག༌ སྟད༌གོ༌ཤེས༌ ཨིན༌ནོག༌།