5
ཨ༌ནེ༌ མ༌རང༌མོ༌, རྒད༌མི༌ དང༌, ཚེ༌ཡོག༌ གུན༌ནི༌ སྐོར༌ལ༌ ལབ༌ཞ༌།
5:1 ནེ༌ 16
1 རང༌ངི༌ སང༌ ཆི༌མི༌ཞིག༌ག༌ ཁའ༌སྐྱེས༌ཏེ༌ སྤེ༌ར༌ མ༌ཏང༌ང༌, ཁོའ༌ རང༌ངི༌ ཨ༌བ༌ ཙོགས༌ སམས༌ཏེ༌ དེན༌བའེ༌ ལམ༌མི༌ཀ༌ གྲུལ༌ཅེས༌ལ༌ སྤོས༌པ༌ ཏོང༌, ཡང༌ ཞོན༌ནུ༌གུན༌ལ༌ རང༌ངི༌ ནོ༌ ཙོགས༌ སོམ༌།
2 ཏེན༌ན༌ ཙོགས༌ལ༌ བུ༌མོ༌ ཆི༌མི༌གུན༌ལ༌ ཁྱོ༌རང༌ངི༌ ཨ༌མ༌ ཡང༌ བུ༌མོ༌ ན༌ཆུང༌གུན༌ལ༌ སེམས༌ རྩང༌མ༌ ཉམ༌པོ༌ རང༌ངི༌ སྲིང༌མོ༌ ཙོགས༌ སོམ༌།
3 ཨ༌ནེ༌ མ༌རང༌མོ༌ ལྟ༌སྟོག༌ ཅོ༌ཁན༌ མེད༌ཁན༌གུན༌ལ༌, ལྟ༌སྟོག༌ ཅོས༌ཏེ༌ རྩི༌ཝ༌ ཏོང༌།
4 ཨིན༌ནའང༌ གལ༌ཏེས༌ ཏེ༌ ཨ༌ནེ༌ མ༌རང༌མོ༌བོའ༌ ཕྲུ༌གུ༌, ཡ༌ ཚ༌འོ༌, ཚ༌མོ༌ ཡོད༌ན༌, ཏེ༌གུན༌ནི༌ རང༌ངི༌ ནང༌མི༌གུན༌ལ༌ ལྟ༌སྟོག༌ ཅོས༌ཏེ༌ གོ༌མ༌ ཁོ༌རང༌གུན༌ནི༌ ཏད༌པ༌བོ༌ ལག༌ལེན༌ནི༌ ནང༌ང༌ ཁྱོང༌ གོ༌ཤེས༌ ཨིན༌ནོག༌། ཕ༌མ༌, ཨ༌བི༌ དང༌ མེ༌མེ༌ གུན༌ལ༌ ལྟ༌སྟོག༌ ཅོས༌ཏེ༌ ཁོང༌གུན༌ནི༌ ཏྲིན༌ལན༌ ལོག༌ཁན༌གུན༌ནི༌ ལས༌པོའ༌ དཀོན༌མཆོག༌ ཐུགས༌དད༌ད༌ ཛད༌ད༌ནོག༌།
5 ཏ༌ ནང༌ཚངས༌ མེད༌པ༌ ཅིག༌པོ༌ ལུས༌ཁན༌ནི༌ བུ༌མོ༌, ཁོ༌རང༌ངི༌ རེ༌ཝ༌ དཀོན༌མཆོག༌གི༌ ནང༌ང༌ བོར༌ཏེ༌, ཉིན༌ཚན༌ མེད༌པ༌ རོགས༌ ཅོའ༌ ཛད༌ ཟེར༌ཏེ༌ མོས༌ལམ༌ ཞུ༌ཁན༌བོ༌ ནི༌ ངོས༌མའེ༌ ཨ༌ནེ༌ མ༌རང༌མོ༌ ཨིན༌ནོག༌།
6 ཨིན༌ནའང༌ རང༌དོད༌ གྲུབ༌ཅུག༌ཅེས༌སི༌ ནང༌ང༌ མི༌ཚེ༌ ཕུད༌ཁན༌ནི༌ ཨ༌ནེ༌ མ༌རང༌མོ༌གུན༌ སོན༌ཏེའ༌ ཡོད༌ཏེའང༌, སེམས༌ཉིད༌དི༌ ཐོག༌ནེ༌ ཤི༌ཏེ༌ ཨིན༌ནོག༌།
7 སུ༌ཞིག༌གིའང༌ ཏད༌པ༌ཅན༌གུན༌ནི༌ གྱབ༌གལ༌ལ༌ སྐྱོན༌ ཀལ༌ མི༌ཉན༌ཅེས༌སི༌ ཕིའ༌, ཏེ༌ ལབ༌ཞ༌གུན༌ ཏོང༌།
8 ཨིན༌ནའང༌ རང༌ངི༌ ཉེན༌གྲུང༌གུན༌ལ༌, མིག༌སལ༌ལི༌ ཁོ༌རང༌གུན༌ནི༌ ནང༌མི༌གུན༌ལ༌ ལྟ༌སྟོག༌ མ༌ཅོ༌ཁན༌གུན༌ནི༌ ཁོ༌རང༌ངི༌ ཏད༌པ༌ ཕངས༌ཏེ༌ ཨིན༌ནོག༌། འི༌ཙོགས༌སི༌ མི༌གུན༌, ཏད༌པ༌ མེད༌ཁན༌ནི༌ སང༌ ཐུའ༌ ཨིན༌ནོག༌།
9 རོགས༌ ཅོ༌གོ༌ཤེས༌སི༌ ཐོའེ༌ ནང༌ང༌ མིང༌ ཅུགས༌ཏེ༌ ཡོད༌ཁན༌ནི༌ ཨ༌ནེ༌ མ༌རང༌མོ༌བོ༌: ཁོ༌རང༌ངི༌ མག༌པ༌ ཉམ༌པོ༌ ཨིད༌ཤེས༌ཅན༌, ཁོའེ༌ ལོ༌ དྲུག༌ཅུ༌ ཡ༌ མང༌ང༌,
10 ལས༌ ཟང༌པོ༌གུན༌ནི༌ ཞས༌ཏེ༌ མིང༌ཅན༌, སྤེར༌ན༌ ཕྲུ༌གུ༌གུན༌ གྱལ༌ལ༌ ཅོས༌ཏེ༌ ལྡན༌ཅུག༌ཁན༌, བེས༌པ༌གུན༌ལ༌ གའ༌སུས༌ ཞུ༌ཁན༌, ཏད༌པ༌ཅན༌གུན༌ལ༌ པས༌མོ༌ ཉམ༌པོ༌ ཞབ༌སྟོག༌ ཞུ༌ཁན༌, རྡུག༌ངལ༌ལི༌ ནང༌ང༌ ཡོད༌ཁན༌གུན༌ལ༌ རོགས༌ ཅོ༌ཁན༌, ཡང༌ ལས༌ ཟང༌པོའེ༌ རིགས༌ ཚང༌མ༌ ཅོ༌ཅེས༌ལ༌ གྲལ༌གྲིག༌ དུག༌ཁན༌། ཏེ༌ སྕོད༌པ༌ ཚང༌མ༌ ཁོའེ༌ ནང༌ང༌ ཡོང༌གོས༌།
11 ཨིན༌ནའང༌ མིང༌ཐོའེ༌ ནང༌ང༌ ཨ༌ནེ༌ མ༌རང༌མོ༌ ན༌ཆུང༌གུན༌ ཡོང༌ མ༌གོས༌, ཅིའ༌ཟེར༌ན༌ ཁོང༌གུན༌ནི༌ ཟུགས༌པོའེ༌ དོད༌པའེ༌ ཡང༌སྐྱར༌ བག༌སྟོན༌ ཅོ༌ཉིན༌གྲོས༌ པ༌སང༌ མ༌ཤི༌ཀའ༌ ཞབ༌སྟོག༌ ཞུ༌ཅེས༌སི༌ ཁ༌ཆད༌དི༌ ནང༌ང༌ གག༌སྐྱིལ༌ ཁྱོང༌ང༌ནོག༌།
12 ཏེ༌ནེ༌ ཁོང༌གུན༌ནི༌ སྔུན༌ལ༌ ཁ༌ཆད༌ ཅོས༌ཁན༌བོ༌ ཅགས༌པ༌ ཁོ༌རང༌གུན༌ནི༌ཀ༌ ཁྲིམས༌ཅད༌ ཁྱོང༌ང༌ནོག༌།
13 ཡང༌ གལ༌ཏེས༌ ཁོང༌གུན༌ མིང༌ཐོའེ༌ ནང༌ང༌ ཡོད༌ན༌, ཁོང༌གུན༌ ལས༌མི༌ལམ༌ གྱུར༌ཏེ༌ ཁང༌པ༌ ཅིག༌ནེ༌ ཅིག༌གི༌ ནང༌ང༌ སྤེར༌མེན༌ ཏང༌ཨིན༌, ཁོ༌རང༌གུན༌ནི༌ ཏུས༌གུན༌ ཕུད༌ཨིན༌, ཞན༌མ༌ མི༌གུན༌ནི༌ ལས༌སི༌ ནང༌ང༌ ཐེས༌སྟོག༌, ཡང༌ ཏང༌གོས༌ མེད༌ཁན༌ནི༌ སྤེ༌ར༌ རིག༌གའང༌ ཏང༌ཨིན༌།
14 སོང༌པ༌སང༌ ཏེ༌ ཨ༌ནེ༌ མ༌རང༌མོ༌ ན༌ཆུང༌གུན༌ལ༌ ཡང༌སྐྱར༌ བག༌མ༌ ཅོས༌ཏེ༌ ཕྲུ༌གུ༌ ཇོར༌ཅུག༌ཅེས༌, ཡང༌ ཁོ༌རང༌གུན༌ནི༌ ཁང༌པའེ༌ ལྟ༌སྟོག༌ ཅོ༌ཅེས༌ལ༌ ངའེ༌ ཁ༌ད༌ ཏང༌ངད༌། ཏེ༌ནེ༌ གྲ༌འོའེ༌, ཁོང༌གུན༌ནི༌ གྱབ༌གལ༌ལ༌ ཅི༌ཞིག༌གའང༌ ཟེར༌ མི༌ཉན༌།
15 ཅིའ༌ཟེར༌ན༌ ཨ༌ནེ༌ མ༌རང༌མོ༌ ན༌ཆུང༌ ཁ༌ཅིག༌ དཀོན༌མཆོག༌ག༌ གྱབ༌ གྱུར༌ ཚར༌ཏེ༌ ཤེ༌ཏན༌ནི༌ གྱབ༌ནེ༌ གྲུལ༌དུག༌།
16 གལ༌ཏེས༌ བུ༌མོ༌ ཏད༌པ༌ཅན༌ཞིག༌ག༌, ཨ༌ནེ༌ མ༌རང༌མོ༌ ཉེན༌གྲུང༌ རིག༌ ཡོད༌ན༌, ཁོའེ༌ ཏེ༌གུན༌ལ༌ ལྟ༌སྟོག༌ ཅོ༌གོས༌, ཡང༌ ཏེ༌ ཁག༌པོ༌ ཆོས༌ཚོགས༌སི༌ཀ༌ ཀལ༌ མ༌གོས༌། ཏེ༌ནེ༌ ཆོས༌ཚོགས༌སི༌ ངོས༌པོའ༌ ལྟའ༌ཁན༌ མེད༌ཁན༌ནི༌ ཨ༌ནེ༌ མ༌རང༌མོ༌གུན༌ལ༌ ལྟ༌སྟོག༌ ཅོ༌ཉན༌ཨིན༌།
ཆོས༌ཚོགས༌སི༌ འུ༌སྐྱོང༌གུན༌ནི༌ སྐོར༌ལ༌།
5:17 ནེ༌ 6:2
17 ཆོས༌ཚོགས༌སི༌ ལས༌ ཅོ༌ཁན༌ནི༌ འུ༌སྐྱོང༌གུན༌ལ༌ རྩི༌ཝ༌ དང༌ རོགས༌ ཅོ༌གོ༌ཤེས༌ ཨིན༌ནོག༌, མིག༌སལ༌ལི༌ ཆོས༌ཤད༌ཅེས༌ དང༌ ལབ༌ཞ༌ ཏང༌ཅེས༌སི༌ ནང༌ང༌ རྩོན༌གྲུས༌ སྲན༌ཏྲེ༌ ཅོ༌ཁན༌གུན༌ལ༌།
18 ཅིའ༌ཟེར༌ན༌ སུང༌རབས༌སི༌ ནང༌ང༌ "ཁྱོ༌རང༌གུན༌ནི༌ ཡུལ༌ཐག༌ག༌ སྐོར༌ཁན༌ནི༌ ལང༌ཏོའ༌ ཟའ༌ཅེས༌ནེ༌ ཁའ༌ ཀག༌ མ༌གོས༌" ཡང༌ "ལས༌ ཅོ༌ཁན༌གུན༌ལ༌ ཕོགས༌སི༌ འོས༌པ༌ ཨིན༌ནོག༌" མོལ༌ཏེ༌ དུག༌།
19 འུ༌སྐྱོང༌ཞིག༌གི༌ གྱབ༌གལ༌ལ༌ སྐྱོན༌རྗོད༌ ཅོའད༌ན༌, ཏེ༌གུན༌ལ༌ ཏེ༌ཏེ༌ཚོག༌པ༌ མ༌ཉན༌, ནམ༌ཚོག༌པ༌ སྤང༌པོ༌ ཉིས༌ ཡ༌ སུམ༌མི༌ ཏེ༌བོའེ༌ སྐོར༌ལ༌ ཏན༌ཏན༌ མི༌ཅོ༌།
20 སྡིག༌པ༌ ཅོ༌ཁན༌ནི༌ འུ༌སྐྱོང༌གུན༌ལ༌ ཆོས༌ཚོགས༌ གང༌པོའེ༌ དུན༌ལ༌ ཁའ༌སྐྱེ༌གོས༌; འི༌བོ༌ ཞན༌མ༌གུན༌ལའང༌ ལྡམ༌ཞག༌ ཆེན༌མོ༌ཞིག༌ གྱུར༌ཨིན༌།
21 ང༌ པ༌འུ༌ལུའི༌ ཏི༌མོ༌ཐི༌ ཁྱོ༌རང༌ང༌ དཀོན༌མཆོག༌, མ༌ཤི༌ཀ༌ ཡེ༌ཤུ༌ དང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཕོ༌ཉ༌གུན༌ནི༌ དུན༌ལ༌ འི༌ ལབ༌ཞ༌གུན༌ལ༌ ཁའ༌ ཉན༌ཏེ༌ སུ༌ཞིག༌གའང༌ ཆོག༌རིས༌ མ༌ཅོའ༌, ལག༌ལེན༌ ཅོ༌ཅེས༌ལ༌ བཀའ༌ཏང༌ངད༌།
22 ཆོས༌ཚོགས༌སི༌ འུ༌སྐྱོང༌ ལྡམ༌ཅེས༌སི༌ ནང༌ང༌ བང༌གྱུགས༌ མ༌ཏང༌, གལ༌ཏེས༌ ཏང༌ན༌ ཏེ༌ནེ༌ ཁོའེ༌ སྡིག༌པའེ༌ ནང༌ང༌ ཁྱོ༌རང༌ངའང༌ དྲེས༌ཨིན༌། ཁྱོ༌རང༌ རང༌དང༌རང༌ རྩང༌མ༌ བོར༌།
23 ཆུ༌ རྐྱང༌ ཐུང༌ཨིན༌ མི༌དུག༌, ཁྱོ༌རང༌ངི༌ གྲོད༌པའེ༌ ཕན༌ཐོགས༌སི༌ ཕིའ༌ རྒུན༌ཆང༌ ཉུ༌ངུན༌ རིག༌གའང༌ ཐུང༌, ཅིའ༌ཟེར༌ན༌ ཁྱོ༌རང༌ང༌ ཟུ༌མོ༌ ཡོང༌ཨིན༌ དུག༌དུག༌།
24 མི༌ ཁ༌ཅིག༌གི༌ སྡིག༌པ༌གུན༌ སལ༌པོ༌ ཐོང༌ང༌ནོག༌, ཏེ༌གུན༌ནི༌ སྡིག༌པ༌གུན༌ དཀོན༌མཆོག༌གི༌ ཁྲིམས༌ཅད༌ ཛད༌སའེ༌ ནས༌ས༌ ཁོང༌གུན༌ནི༌ སང༌ སྔུན༌ལ༌ ལེབ༌ཨིན༌། ཨིན༌ནའང༌ ཞན༌གུན༌ནི༌ སྡིག༌པ༌གུན༌ སྟིང༌ནེ༌ མ༌ནེ༌ མི༌སྔོན༌།
25 ཏེན༌ན༌ ཙོགས༌ལ༌ མི༌ ཁ༌ཅིག༌གི༌ ལས༌ ཟང༌པོ༌གུན༌ སལ༌པོ༌ ཅོས༌ཏེ༌ ཐོང༌དུག༌། ཨིན༌ནའང༌ གལ༌ཏེས༌ སང༌ཝའེ༌ ནང༌ང༌ ལས༌ ཟང༌པོ༌ ཅོ༌ན༌, འི༌གུན༌ ཏུས༌གྱུན༌ནི༌ ཕིའ༌ སྦས༌ཏེ༌ བོར༌ མི༌ཉན༌།