2
དེན༌བའེ༌ ལབ༌ཞ༌།
2:1 ནེ༌ 15
1 ཨིན༌ནའང༌ ཁྱོ༌རང༌ངི༌ དེན༌བའེ༌ ལབ༌ཞ༌ ནང༌ཞིན༌ལ༌ ལབ༌གོས༌།
2 ལོ༌ ལྔབ༌ཅུའི༌ སང༌ མང༌ང༌ ཆའ༌ཁན༌ནི༌ བུ༌ཚ༌གུན༌ལ༌ རང༌སེམས༌ ཅུན༌ཅེས༌, རྩི༌ཝའེ༌ འོས༌པ༌ཅན༌ གྱུར༌ཅེས༌ དང༌ མི༌ཚེ༌བོ༌ ཤེས༌རབས༌ཅན༌ཞིག༌ ཕུད༌ཅེས༌པོ༌ ལོབ༌། ཁོང༌གུན༌ནི༌ ཏད༌པ༌བོ༌ དཀོན༌མཆོག༌གི༌ དེན༌བའེ༌ཀ༌ སྟན༌པོ༌ ཡང༌ ཅེས༌པ༌ དང༌ ཟོད༌པ༌ ཉིས༌ཀོའེ༌ གངས༌ཏེ༌ ཡོང༌གོས༌།
3 ཏེན༌ན༌ ཙོགས༌ལ༌ ལོ༌ ལྔབ༌ཅུའི༌ སང༌ མང༌ང༌ ཆའ༌ཁན༌ནི༌ བུ༌མོ༌གུན༌ལ༌, དཀོན༌མཆོག༌ག༌ རྩི༌ཝ༌ ཁྱོང༌ཁན༌ནི༌ མི༌ཚེ༌ཞིག༌ ཕུད༌ཅེས༌ ལོབ༌། ཁོང༌གུན༌ ཞན༌མ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཁན༌, ཡ༌ ཆང༌ མང༌པོ༌ ཐུང༌ཁན༌ཞིག༌ ཡོང༌ མ༌གོས༌། ཨིན༌ནའང༌ ཁོང༌གུན༌ནི༌ ཟང༌པོ༌ ཨིན༌ཁན༌བོ༌ ཞན༌མ༌གུན༌ལ༌ ལབ༌གོ༌ཤེས༌ ཨིན༌ནོག༌།
4 ཏེ༌ བུ༌མོ༌གུན༌ནི༌ བུ༌མོ༌ ན༌ཆུང༌གུན༌ལ༌ རང༌ངི༌ མག༌པ༌ དང༌ ཕྲུ༌གུ༌ གུན༌ལ༌, ཅམས༌པ༌ ཅོ༌ཅེས༌སི༌ ནང༌ང༌ སྤོས༌པ༌ ཏང༌གོས༌།
5 མ༌ཚད༌ ཏེ༌གུན༌ རང༌སེམས༌ ཅུན༌ཉན༌ཁན༌ དང༌ སེམས༌ ལག༌མོ༌, ནང༌ཚངས༌སི༌ ལྟ༌སྟོག༌ ཅོ༌ཅེས༌, ལས༌ ཟང༌པོ༌ ཅོ༌ཅེས༌, ཡང༌ རང༌དང༌རང༌ ཁོ༌རང༌གུན༌ནི༌ མག༌པའེ༌ ཝང༌ངི༌ ཡོག༌ག༌ བོར༌ཅེས༌ གུན༌ ལབ༌གོས༌། ཏེ༌ནེ༌ དཀོན༌མཆོག༌གི༌ བཀའ༌, སུ༌ཞིག༌གིའང༌ ངན༌པ༌ ཟེར༌ མི༌ཉན༌།
6 ཏེན༌ན༌ ཙོགས༌ལ༌ ཁྱོག༌ཏོང༌གུན༌ནའང༌, རང༌སེམས༌ ཅུན༌ཏེ༌ བོར༌ཅེས༌ལ༌ སྤོས༌པ༌ ཏོང༌།
7 ཡང༌ ཁྱོ༌རང༌ངིའང༌ ལས༌ ཟང༌པོ༌གུན༌ ཅོས༌ཏེ༌ ཁོང༌གུན༌ནི༌ ཕིའ༌ སྤེ༌ཞིག༌ གྱུར༌གོས༌། ཁྱོ༌རང༌ངི༌ ལབ༌ཞ༌བོ༌ དྲང༌པོ༌ དང༌ སེམས༌སི༌ ཐིལ༌ནེ༌ ཡོང༌ཁན༌བོ༌ སྟོན༌།
8 ཁྱོ༌རང༌ངི༌ ལབ༌ཁན༌བོའ༌ སྐྱོན༌རྗོད༌ མི༌ཡོང༌ཅེས༌སི༌ ཕིའ༌, དེན༌བ༌བོ༌ ལོབ༌། ཏེ༌ནེ༌ ང༌དང༌གུན༌ལ༌ གྱབ༌གལ༌ ཅོ༌ཁན༌གུན༌ ཁྲེལ༌བ༌ སོང༌ཏེ༌ ང༌དང༌གུན༌ལ༌ ཅའང༌ ངན༌པ༌ ཟེར༌ མི༌ཉན༌།
9 ཏད༌པ༌ཅན༌ ཚེ༌ཡོག༌གུན༌ནི༌ ཏུས༌གྱུན༌ ཁོ༌རང༌གུན༌ནི༌, སྤོན༌བོའེ༌ ཁའ༌ཉན༌ཏེ༌ ཁོང༌གུན༌ ཐད༌ཅུག༌ཅེས༌ལ༌ རྩོན༌གྲུས༌ ཅོ༌ཤིག༌། ཁོང༌གུན༌ལ༌ ལན༌ལོག༌ མ༌ཏང༌ཤིག༌,
10 ཡ༌ རྐུ༌ མ༌རྐུ༌, ཨིན༌ནའང༌ ཁོ༌རང༌གུན༌ ཅི༌ས༌ཐོག༌ནེ༌ ཨིད༌ཤེས༌ཅན༌ དང༌ ཟང༌པོ༌ ཨིན༌ཁན༌བོ༌ ལྟན༌གོས༌། ཏེ༌ནེ༌ ཏེ༌གུན༌ལ༌ དཀོན༌མཆོག༌ ང༌དང༌གུན༌ནི༌ སྐྱབ༌གོན༌ནི༌ ལབ༌ཞ༌ ཧ༌གོ༌ཅེས༌སི༌ དོད༌པ༌ སྐྱེ༌ཅུག༌ཨིན༌།
11 མི༌ཚང༌མ༌ལ༌ ཐར༌པའེ༌ ལམ༌ སལ༌ལ༌ ཛད༌ཏེ༌ དཀོན༌མཆོག༌གི༌ ཁོང༌རང༌ངི༌ ཐུག༌རྗེ༌བོ༌ སྔོན༌ ཅུག༌ག༌ ཛདས༌།
12 ཡང༌ ང༌དང༌གུན༌ལ༌ "ངན༌པའེ༌ མི༌ཚེ༌ ཕུད༌ཅེས༌ དང༌, སྡིག༌པའེ༌ དོད༌པ༌གུན༌ལ༌ གྱབ༌གྱུར༌གོས༌" ཟེར༌ཏེ༌ ཤད༌ད༌ ཛདས༌། ང༌དང༌གུན༌ནི༌ འི༌ ཇིག༌རྟེན༌ ངན༌པའེ༌ ནང༌ང༌ རང༌སེམས༌ ཅུན༌ཉན༌ཁན༌, དྲང༌པོ༌ དང༌, དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ནི༌ མི༌ཚེ༌ཞིག༌ ཕུད༌གོ༌ཤེས༌ ཨིན༌ནོག༌།
13 འི༌ཙོགས༌སི༌ མི༌ཚེ༌ ཕུད༌ ཟ༌ནེ༌, རེ༌ཝ༌ ཉམ༌པོ༌ ང༌དང༌གུན༌ནི༌ ཀུན༌ཝང༌ དཀོན༌མཆོག༌ དང༌ སྐྱབ༌གོན༌ ཡེ༌ཤུ༌ མ༌ཤི༌ཀའེ༌ ཟིར༌རྗིད༌ སྔོན༌ཅེས༌ཅན༌ནི༌ ཏེ༌ ཧ༌ལས༌ཤེས༌སི༌ ཞག༌པོའ༌ སྲུང༌ཨིན༌།
14 ང༌དང༌གུན༌ རྩང༌མ༌ ཅོ༌ཅེས༌ དང༌ སྡིག༌པའེ༌ རིགས༌ ཚང༌མ༌ནེ༌ ཐར༌ཅུག༌ཅེས༌ མ༌ཚད༌, སྙིང༌ནེ༌ ལས༌ ཟང༌པོ༌ ཅོ༌ཅེས༌ལ༌ རིངས༌ཨིན༌ ཡོད༌ཁན༌ནི༌ ཁོང༌རང༌ངི༌ མི༌གུན༌ ཅོ༌ཅེས༌སི༌ ཕིའ༌ ཁོང༌ངི༌ ཁོང༌རང༌ངི༌ སྲོག༌པོ༌ སལ༌ལ༌ ཛདས༌།
15 ཁྱོ༌རང༌ངི༌ ཏེ༌གུན༌, ཏད༌པ༌ཅན༌གུན༌ལ༌ ལབས༌ཏེ༌ ལག༌ལེན༌ནི༌ ནང༌ང༌ ཁྱོང༌ཅེས༌ལ༌ སྤོས༌པ༌ ཏོང༌། ཁོང༌གུན༌ནི༌ འི༌ ལབ༌ཞ༌གུན༌ནི༌ གྱབ༌གལ༌ ཅོ༌ ཟ༌ནེ༌, ཁྱོ༌རང༌ང༌ ཁོང༌གུན༌ལ༌ སྤོས༌པ༌ ཏངས༌ཏེ༌ སྐྱོང༌ཅེས༌སི༌ ཝང༌ཆ༌ ཡོད༌ཏེ༌ ཨིན༌ནོག༌། ཁྱོ༌རང༌ངི༌ ལབ༌ཁན༌གུན༌ལ༌ སུ༌ཞིག༌གའང༌ སྣང༌མེད༌ ཅོ༌ མ༌ཅུག༌།