Nan kalin Apo Dios 2 Corinto 3

Nan iCorinto nan Kail-an nan Kinatet-ewan nan Chonon cha Pablo

1 Idwani, away nget kananyo ay cha mi pas-eten kannay nan awakmi. Ay ke kami kag isnan tapina'y mimistolo, ay ensapol si solat ay ipailacha ken chakayo ta mangiyam-ammowancha isnan awakcha, paymo ensapol cha is solatyo ay ipailacha isnan tapina? Ad-i. 2 Naisolat isnan semekmi ay chakayo nan kag tongon solatmi ay mangipaammo isnan chonomi, ya nalatak ay ammowen ya fasaen si takho. 3 Nalatak isnan fiyagyo ay chakayo kannay nan solat Cristo ay inpapaw-itna ken chakami. Ngem egay naisolat na isnan tinta mod-i ket isnan Ispiriton nan matatakho ay Dios, ya egay akhes naiyokhes isnan fato ay chap-ay, mod-i ket isnan semek si takho.*

4 Mabfalin ay takchekhak nan inangnenmi khapo isnan talekmi ken Apo Dios maichalan ken Cristo. 5 Ad-ik kanan en kafaelanmi nan kag tona ay chono mo chakchakkami yangkhay. Ngem tay wad-ay si Apo Dios ay omagtan is kafaelanmi, mabfalin ay angnenmi. 6 Siya nan nanganay isnan kafaelanmi ay en mangipaawat isnan falo ay tolagna. Nan nay ay tolagna et faken san sikhod ay lentegna ay inpaisolatna id sangad-om ya mangischo isnan chosa ay etey, mod-i ket nan infakhan nan Ispirito Santo ay mangichawchaw isnan eng-engkhana ay fiyag.

7 Semken tako nan nangipail-an Apo Dios isnan langlangna ay naitapiyan Moises issan nangiyokhesana isnan lentegna is kabfato. Ya olay mo cha et mamaid nan langlang nan kames Moises, egay kayet nakaisin-eng nan cheycha'y Israelitas ken siya tay somili.† Idwani mo siya chi nan kaidchayawan nan nangigwaana isnan lenteg ay mangischo isnan chosa ay etey, 8 ad-i ngen am-am-amed kayet nan kaidchayawan nan chonon nan Ispirito Santo? 9 Tay mo siya chi nan kaidchayawan nan nangigwaana isnan lenteg ay mangischo isnan chosan si takho, wadwad-ay achi is solit nan kaidchayawan nan mangipalentekhana isnan takho. 10 Nan kinatet-ewana et tay wadwad-ay nan kaidchayawan nan naisokat idwani, namaid et nan kaidchayawan san chey sikhod. 11 Tay mo naichayaw nan chey lenteg ay ad-i omannong, ad-i ngen wadwad-ay is solit nan kaidchayawan nan naisokat ay wad-ay is eng-engkhana?

12 Idwani tay wad-ay chi ay namnamaenmi, natoled kami, 13 ad-i kag ken Moises, ay nangapongot isnan kamesna ta ad-i isin-eng nan Israelitas nan cha mamaichan nan langlang nan kamesna. 14 Ngem inkekedsecha nan nemnemcha, ya engkhana idwani siya kayet ay kag masasalinan nan semekcha mo fasaencha nan chaan ay lenteg. Tay makaan yangkhay nan kag manasalin isnan semek nan takho isnan maiyornosancha ken Cristo.‡ 15 Siya, olay idwani mo fasaen nan Judio nan lenteg Moises, kag sisya'y maaapongotan nan semekcha. 16 Ngem mo somakhong nan takho ay mangafolot isnan Apo, at makaan nan chey ay kag manasalin ken siya.§ 17 Idwani, nan makmakwani isna ay Apo, et siya nan Ispirito Santo. Ya mo sino nan kawad nan Ispiriton Apo Jesus, nawayawaya siya. 18 Tay siya chi, am-in tako ay nakaanan nan kag somasalin, et kag tako sarming ay ensis-ilap isnan chayaw ya langlang Apo Jesus.* Siya nan langlang ay nalpo isnan Apo tako ay Ispirito Santo, ay cha mamab-aliw ken chatako ta am-amed tako kag ken siya isnan langlang nan chayawna.

* 3:3 Inpaisolat Apo Dios nan sikhod ay lentegna ken Moises isnan fato ay chap-ay, ngem nay et ipaisolatna isnan Ispirito Santo nan falo ay lentegna is kasemek tako. † 3:7 Id sangad-om, issan nangigwaan Apo Dios isnan sinpoo ay filina ken Moises, wad-ay cha isnan katokyaw nan filig ay Sinai. Osto'y khinomwab si Moises, somili nan kamesna tay isnan cha na nakitottot-oyyan ken Apo Dios. Ngem ad-ina ammo ay somili nan kamesna. Adi kad issan nangil-an nan cheycha'y takho isnan somili ay kamesna, ya ke cha't omegyat ay somag-en ken siya. Sa na't inokopan nan kamesna ay nangitafon. Ilaenyo nan Exodo 34:29-35. ‡ 3:14 Nan osto ay naisolat isnan Griego isna et, “Tay engkhana idwani ad-i makaan nan chey siya met laeng ay apongot mo fasaencha nan chaan ay tolag, tay makaan yangkhay chi maichalan ken Cristo.” § 3:16 Chwa nan mabfalin ay ayen nan nakwani isna. Mabfalin ay kag tona nan laychena ay kanan: 16 Nay met achi mabfalin ay makaan nan manasalin, tay wad-ay isnan naisolat ay kalin Apo Dios, “Nakaan nan manasalin isnan kamesna mo somakhong siya ay manot-oya ken Apo Dios.” Siya chi nan inangnen Moises. Issan nanakhangana isnan takho sinalinana nan kamesna, ngem isnan nanakhongana ken Apo Dios kinaana nan salin nan kamesna. Ilaenyo nan Exodo 34:33-35. * 3:18 Mabfalin ay chwa nan ayen nan nay ay nakwani. Mabfalin ay kananan, “Tay siya sa, am-in tako ay nakaanan nan kag somasalin, et iilan tako ay kag isnan sarming nan chayaw ya langlang Apo Jesus.”