याकूब की पत्री
याकूब की चिट्ठी
परिचय
याकूब की किताब याकूब नाम को कोयी लोग सी लिख्यो होतो। ऊ शायद यीशु को भाऊ याकूब होतो। जो उन आराधना मण्डली को मुखिया होतो अऊर यरूशलेम परिषद प्रेरितों १५:१३, को हिस्सा होतो प्रेरित पौलुस न ओख गलातियों २:९ म आराधना मण्डली को खम्बा भी कह्यो विद्वानों को माननो हय कि याकूब की किताब मसीह को जनम को ५० साल बाद लिख्यो होतो, तब याकूब यरूशलेम म आराधना मण्डली को मुखिया होतो, येकोलायी ओन उत रहतो हुयो शायद किताब लिख्यो होतो।
ओन अपनी किताब म राज्य को बीच बिखरी बारा जातियों ख सम्बोधित करयो १:१। याकूब को सबक सब मसीहियों पर लागु होवय हय पर बारा जाती शब्दों को उपयोग यो बतावय हय सम्भव हय की याकूब सीधो यहूदी मसीहियों ख लिख रह्यो हय बल्की या किताब पढ़न वालो को एक व्यापक झुण्ड तक केंद्रित करय हय। सच्चो विश्वास कार्यवाई म दिखायो हय। २:१७ ऊ धनवान लोगों ख २:१-४ पक्षपात दिखान को खिलाफ चेतावनी देवय हय अऊर हम्ख बतावय हय कि जो हम कहजे हय अऊर का कहजे हय ऊ बतावय हय। ३:१-१२
रूप-रेखा
१. याकूब अपनो पढ़न वालो ख धन्यवाद देवय हय। १:१
२. ऊ मसीहियों ख सहन करन लायी प्रोत्साहित करय हय जब हि दु:ख म रह्य हय। १:२-२७
३. तब ऊ कह्य हय कि विश्वासियों को माध्यम सी विश्वास हय। २:१-२६
४. शक्तिशाली शब्द कसो होय सकय हय। ३:१-१२
५. याकूब बतावय हय परमेश्वर को ज्ञान जगत को ज्ञान अलग हय। ३:१३–४:१०
६. घमण्डी होन को खिलाफ चेतावनी। ४:११–५:६
७. सामान्य निर्देश दे क अपनी किताब लिखनो बन्द करय हय। ५:७-२०
1
1 परमेश्वर को अऊर प्रभु यीशु मसीह को सेवक याकूब को तरफ सी, उन बारा गोत्रों ख जो तितर-बितर हुयो हंय उन्ख नमस्कार।
विश्वास अऊर बुद्धि
2 हे मोरो भाऊवों अऊर बहिनों, जब तुम नाना तरह की परीक्षावों म पड़ो, त येख अपनो आप म बहुत आनन्द कि बात समझो,
3 तुम जानय हय कि तुम्हरो विश्वास ख परख्यो जानो सी धीरज तैयार होवय हय।
4 पर धीरज ख अपनो पूरो काम करन देवो कि तुम पूरो अऊर सिद्ध होय जावो, अऊर तुम म कोयी बात की कमी नहीं रहे।
5 पर यदि तुम म सी कोयी ख बुद्धि की कमी हय त परमेश्वर सी मांगो, जो अनुग्रह अऊर उदारता सी देवय हय, अऊर ओख दियो जायेंन।
6 पर विश्वास सी मांगे, अऊर कुछ शक मत करो, कहालीकि शक करन वालो समुन्दर की लहर को जसो हय जो हवा सी बहय अऊर उछलय हय।
7 असो आदमी यो नहीं समझे कि मोख प्रभु सी कुछ मिलेंन,
8 ऊ आदमी शक्की हय अऊर अपनी बातों म अस्थिर हय।
गरीबी अऊर अमीरी
9 गरीब विश्वासियों जब परमेश्वर तुम्ख ऊचो पद देवय हय तब खुशी मनाये,
10 अऊर धनवान आदमी घास को फूल को जसो हय जो नाश होय जावय हय।
11 कहालीकि सूरज निकलतो समय कड़ी धूप पड़य हय अऊर पौधा मुरझाय जावय हय, अऊर ओको फूल झड़ जावय हय अऊर ओकी शोभा कम होत जावय हय। योच तरह धनवान भी अपनो कार्य म चलतो चलतो नाश होय जायेंन।
परख अऊर लुभावनो
12 धन्य हय ऊ आदमी जो परीक्षा म स्थिर रह्य हय, कहालीकि ऊ खरो निकल क जीवन को ऊ मुकुट पायेंन जेकी प्रतिज्ञा प्रभु न अपनो प्रेम करन वालो सी करी हय।
13 परीक्षा की घड़ी म कोयी ख यो नहीं कहनो चाहिये कि परमेश्वर मोरी परीक्षा ले रह्यो हय, कहालीकि बुरी बातों सी परमेश्वर ख कोयी लेनो देनो नहाय। ऊ कोयी की परीक्षा नहीं लेवय।
14 पर हर एक आदमी अपनी बुरी इच्छा सी खिच क अऊर फस क परीक्षा म पड़य हय।
15 तब बुरी इच्छा गर्भवती होय क पाप ख जनम देवय हय अऊर जब पाप पूरी रीति सी बढ़ जावय हय त मृत्यु ख पैदा करय हय।
16 हे मोरो प्रिय भाऊवों अऊर बहिनों, धोका मत खावो।
17 कहालीकि हर एक अच्छो दान अऊर हर एक अच्छो परिपूर्ण उपहार स्वर्ग सीच आवय हय, अऊर ऊ परमेश्वर को द्वारा जेन स्वर्गीय प्रकाश ख बनायो हय, ओख खल्लो लायो जावय हय, ऊ हमेशा बदलतो रहन वाली छाव को जसो नहीं बदलय।
18 ओन अपनीच इच्छा सी हम्ख सच को वचन को द्वारा पैदा करयो, ताकि हम ओकी सृष्टि करी हुयी चिजों म सी एक तरह को पहिलो फर हो।
सुननो अऊर करनो
19 हे मोरो प्रिय भाऊवों अऊर बहिनों, या बात तुम जान लेवो: हर एक आदमी सुनन लायी तत्पर अऊर बोलन म धीमो अऊर गुस्सा म भी धीमो हो,
20 कहालीकि आदमी को गुस्सा परमेश्वर को सच्चो उद्देश्य हासिल नहीं कर सकय।
21 येकोलायी पूरी मलिनता अऊर कपट पन की बढ़ती ख दूर कर क्, ऊ वचन ख नम्रता सी स्वीकार कर लेवो जो दिल म बोयो गयो अऊर जो तुम्हरो उद्धार कर सकय हय।
22 केवल सुनन वालो नहीं जो अपनो आप ख धोका देवय हंय पर वचन पर चलन वालो बने।
23 कहालीकि जो कोयी वचन ख सुनन वालो हय अऊर ओको पर चलन वालो नहीं हो, त ऊ आदमी को जसो हय जो अपनो स्वाभाविक मुंह आरसा म देखय हय।
24 ऊ अपनो आप ख देख क चली जावय अऊर तुरतच भूल जावय हय कि मय कसो होतो।
25 पर जो आदमी स्वतंत्रता की सिद्ध व्यवस्था पर ध्यान करतो रह्य हय, ऊ सुन क भूलय नहीं पर वसोच काम करय हय, येकोलायी परमेश्वर ओको काम म आशीष देयेंन।
26 का कोयी अपनो आप ख सच्चो समझय हय? अऊर यदि खुद अपनी जीबली ख वश म नहीं कर सकतो त अपनो आप ख धोका दे रह्यो हय, त ओकी भक्ति बेकार हय।
27 हमरो परमेश्वर अऊर बाप को जवर शुद्ध अऊर निर्मल भक्ति यो हय कि अनाथों अऊर विधवावों को कठिनायी म ओकी सुधि ले, अऊर अपनो आप ख जगत सी निष्कलंक रखे।