23
Bigus Kolok Eroloklok Ebung Parasi Ti Kolox I
(Mak 12:38-40, Luk 11:39-52, 20:45-47)
1 Memu ren, ne Iesu ga xoran ti emixi vuruk eburu mi exulau lekleke anasa ren kodek,
2 “Exulau loklok asa re Erokoxora Xis se ne Moses ma ebung Parasi ti mugaga nimi ma ti lox asa nimi mi erokoxora xis langan ne Moses ga kolox i.
3 Koren ma binan tonga axava eropanga ti xoxorai tirimi ma bina mumu asu axavai. Mado bigus mumu asu erutuvuk kindi, teia tixo mumu tarasu te erokoxora nidi ee ti vavang min.
4 Tin tebe emomono mi eromumuat mevana tero kexeak kindi, mado nidi ee ti xopara ri lok toro emomono ti kiv mo eromumuat mi erokumadi o tevesipsip pindi.
5 Eropanga axava ti kolox i kusu emomono tibop mik di. Tiga lok erobokis lixiteng mi eropempen te Manang Kaala ren ti etara rutui tero mangak ma tero kumak kindi. Tiga lok balom gok erokonos i tukbe su tero singsiga rindi.
6 Ti vavara xasan ti erokot kikis te emomono mi eroasing puruk tanak kero uxa, ma eronin kikis se xulau tutu mugaga konong ke erounu singsing.
7 Ma ti vavara xasan loxo emomono tibo kolok ngangao rindi tanak ke erokot etaga, ma tibo orong di ‘Rabai.’ ”
8 Ma ne Iesu ga xoran bok kindi xodek, “Ixo lok pukat loxo tera na orong nimi loxo ‘Rabai,’ teia bi ruuna egese Radi Loklok Asa Vuruk ma nimi axava engametak mi enganinuxu.
9 Ma bigus orong tera ren na evua loxo ni ‘Tamak,’ teia bi ruuna egese Tamami ma i kolok pana re exalibet.
10 Ma ixo lok pukat loxo tera na orong nimi loxo ‘Eradi loklok asa’ tevangasa egese Radi Loklok Asa mun tirimi nini Eun Loklok Ukuing.
11 Era i vuruk kitibukot tirimi nini nabo langan eradi tutuki tirimi.
12 Ma loxo nege i kolok avurux i, ne Moroa nabo lok alixiteng i, ma nege i lox alixiteng i, ne Moroa nabo lox avurux i.”
Iesu Ga Xora Sok Exulau Mugaga
(Mak 12:40, Luk 11:39-42,44,52, 20:47)
13-14 “Exulau loklox asa re Erokoxora Xis se ne Moses eburu minimi ebung Parasi, nabo miningot lexengepe tirimi. Nimi exulau ngusekula. Bi kolok pie emusarugu re eninto re exalibet tero marak ke emomono, mado nimi bixo beles seren ma tindi gok emomono ti kolok tongot kusu tina beles.
15 Exulau loklox asa re Erokoxora Xis se ne Moses eburu minimi ebung Parasi, nabo lok miningot lexengepe tirimi. Nimi exulau ngusekula. Bi pas onno re evua ma mevana re eras kusu bibo leke tera na mumu eroloklok asa rimmi. Ma bibo lok asa i mi eroloklok miningot tirimi ma ni na lok eroloklok miningot lamba xasan ti eroloklok miningot tirimi ma nini nabo epovo tutuna ri pas pios lanak ti exot songsongot.
16 Nimi emomono mugaga mi erokatli gun! Nabo lok miningot lexengepe tirimi. Bi xora i xodek, ‘Loxo era i lok avevereng exapie ren mi easing ke eunu lalavang, mo exapie i langan evanga gamasa. Mado loxo nini i lok avevereng exapie ren mi easing ke egol i kolok konong ke eunu lalavang, ni na mumu asu mun exapie ren.’
17 Nimi exulau etaba ma erokatli gun. Evangasa i vuruk ke emanna ne Moroa, egol o eunu lalavang i lok axaala mo egol?
18 Bi xora box i xodek, ‘Loxo era i lok avevereng exapie ren mi easing ke exonin lalavang tanak ke eunu lalavang, mo exapie nini evanga gamasa. Mado loxo nini i lok avevereng exapie ren mi easing ke erentebe i kolok pana ren nom exonin lalavang, ni na mumu asu mun exapie ren.’
19 Nimi erokatli gun, evangasa i vuruk ke emanna ne Moroa, erentebe o exonin lalavang i kolok axaala mo erentebe?
20 Koren ma loxo tera na lok avevereng exapie ren mi easing ke exonin lalavang, nini i lok avevereng exapie ren mi erotentebe mo i kolok bok keren.
21 Ma loxo i lok avevereng exapie ren mi easing ke eunu lalavang, nini i lok avevereng exapie ren mi easing ke ne Moroa i kolok konong keren.
22 Ma loxo i lok avevereng exapie ren mi easing ke exalibet, nini i lok avevereng exapie ren mi easing ke exonin orong ke ne Moroa ma nini i kis seren.
23 Exulau loklox asa re Erokoxora Xis se ne Moses eburu minimi ebung Parasi, nabo lok miningot lexengepe tirimi. Nimi exulau ngusekula! Bin tebe ne Moroa mi exot i sev asongoi teren mo eropanga anaan lixiteng i sooso mavak konong ke ramang, mado bixo mumu asu eroloklok puruk ke Erokoxora Xis se ne Moses, i langan eloklok momoton ma ebearun ma eloklok rutuna ti erokoxora runu. I vukat loxo bina ruuna na eroloklok puruk eburu min mo eloklok tin tebe ne Moroa mi exot i sev asongoi.
24 Nimi emomono mugaga mi erokatli gun! Bi mumu asu erongas koxora lixiteng ke Erokoxora Xis se ne Moses mado bixo mumu asu erongas koxora vuruk. I langan loxo bi sip asu evemaxamang kasinge esup pirimi ma bi puxupe ekamel konong keren ma bi ra vitoi.
25 Exulau loklox asa re Erokoxora Xis se ne Moses eburu minimi ebung Parasi, nabo lok miningot lexengepe tirimi. Nimi exulau ngusekula! Bi gogoso pukat kalamang kero kap ma erobangtingtigon, mado konong i umsu lexengepe mi eloklok ti minorong ma eloklok ti mumu evavara rimmi ee.
26 Nimi ebung Parasi katli gun! Bina gogoso pukat mugaga konong kero kap ma erobangtingtigon, ma memu kalamang nabo lok pukat baxa.
27 Exulau loklox asa re Erokoxora Xis se ne Moses eburu minimi ebung Parasi, nabo lok miningot lexengepe tirimi. Nimi exulau ngusekula! Bi langan ero maut tiga mo i mi evempen mupmuxut, ti mik pukat kalamang, mado konong i umsu mi erosi tongan ma eropanga bilinga axava.
28 Teren na engas ma kalamang tirimi, emomono tip mik nimi langan emomono momoton, mado konong ke ebeak kirimi bi umsu mi eroloklok ngusekula ma eroloklok miningot.
29 Exulau loklox asa re Erokoxora Xis se ne Moses eburu minimi ebung Parasi, nabo lok miningot lexengepe tirimi. Nimi exulau ngusekula! Bi kolok eromaut ti exulau xoxora livi, ma bi sinang eromaut te emomono momoton,
30 ma bi xoxora xodek, ‘Loxo nida tigi kolok keren mo exonaleng evalabat tanda tiga roro ren, nida tigixo kolok eburu mindi ti sep amere exulau xoxora livi.’
31 Koren ma bi xoxora asu i loxo nimi evipisik livi teren mo emomono sepsep amere tadi, tiga sep amere exulau xoxora livi.
32 Nimi bina kolok epasum na eminingot te evalabat tirimi ma bina umsu min.
33 Nimi erosisi miningot! Nimi examadak ke erosisi tit sep! Ixo epovo loxo bibo sixiro re leng ne Moroa nabo ruki nimi lanak ki exot songsongot.
34 Koren ma anabo ruki emomono xoxora livi eburu mi emomono doxoma molonga ma exulau loklok asa parap nimi. Exup binabo sep amere di, ma exup binabo rukbe di re xaba, ma exup binabo pixis kara di tanak konong ke erounu singsing kirimi ma binabo xexeia asu mi di kasinge erokot kolonu tindi ma lanak ti erokot kolonu ves.
35 Koren ma binabo kip tu mi eminere re emomono momoton axava teren na evua, ga ruke re eminere re ne Abel iepovo ri eminere re ne Sakaria, emadak ke ne Berakaia, evalabat tirimi tiga sep amere i kitibukot te eunu lalavang ma exonin lalavang.
36 Nia xora tutuna i tirimi, eromumuat teren na erominingot axava nabo vot parap na erunut ti roro ningina.”
Iesu Ga Xora Asu Ebeamu Ren Ti Emomono Me Israel
(Luk 13:34-35)
37 Ma ne Iesu ga ukodek, “Eme Jerusalem, eme Jerusalem. Biga sev amere emomono xoxora livi re ne Moroa ma biga iu amere emomono ne Moroa ga ruki di. Eroleng lamba agara vavara loxo ana kuxu nimi mi evupapa rak, i langan evapeak kaxak i kuxu ero kedede kaxak keren, mado bigoxo maxara.
38 Rongai na. Exot tirimi nabo miningot ma nabo kolok gamasa.
39 A xora tutuna i tirimi loxo binoxo mik bok ia, se teren nom eleng nabo vot ma binabo xoxora xodek, ‘Era i vot konong ke easing ke Eradi Vuruk nini i leke eloklok anarong.’ ”