Ani
Pilemon
Pilemon katapo mangsikei a posongan, na kapo ararai ta nia katapo aiveven a mang kuvkuvulan i lomlomon nei rina ang e Kolosai. Pilemon katapo atogon kana asosokai palau, na kana asan ta Onesimo. Onesimo katala sip pelek kana ainoinoai, na kan lapo ago si mangsikei a rina. Au, e iang si rina ang kanla angruduai ve Paulo, na kala sakol kana to. Au na le si taun ang, Paulo kanla ago nei akangbat kalapo kitmat ania si angmemengenai asung ve Pilemon. Asukang a kala salik a buk ke, na kala alis ia si Onesimo, ani ka pasal tatana na kan alis ia si kana ainoinoai, voiang kata sip pelek aino ia. Si panbuk, Paulo kata sokotuk a Pilemon ani ka sesel pok kana asosokai palau ta vinga marip. Kata atatai amalangas ia kapa ta Onesimo katala sakolai ani kana to ane si Volava. Au na ka aikut aroron a Pilemon ta ka songo angtasimal atutuman luai ve nia le si taun ke.
1
Mengen i angruduai
1 Nau Paulo, nei gogotan marai tung ani Karisto Iesu. Nau ve tungara ta Timoteo, namemlongpo alis a panbuk ke taun ua, Pilemon, numai a tungamemlong roron luai na kamemlong katakai i papakangai.
2 Ane si taura, Apia, na ane si Arkipo vopo tung ke ve tara si visvis. Na ane si petau lomlomon nei kam lu.
3 Roron na marip le si God tamara na Volava Iesu Karisto ka sinong singimi.
Kana lomlomon na ngorem a Pilemon
4 Si kag keve taun ipo sokotuk napo uli lomlomonai anim velai ani posong aro ani God,
5 using natala longong ta kupo lomlomon serei si Volava Iesu, na kupo ngorem kapa velai ani pakangai ani mamain ta vap lomlomon.
6 Napo sokotuk ta kara angtunganan si lomlomon ka polok ani ku nas atutuman na keve bil ro aongos ang Karisto katala alis ira tatana.
7 Ngorem ang kutala alis ia kapo auruk velai ani asum alava anig using si ngorem ang numai tasig kuta lapo atanginang pok a vingaria i ri vap lomlomon.
Sokotuk apok ani angtasimal
8 Asukang a kantanem napo togon a roron ke le si Karisto ani naka asok ua ta ku abis a lau ro ke,
9 sikei napo aikut palau ua si kam lau i ngorem. Io, nau Paulo nau a lapan ke napo ago nei vilvil akui kapa marai Karisto Iesu,
10 napo sokotuk a pakangat im ani ku lomlomonai ani nat ke, kag nat ta Onesimo, kag nat nata luk ia e ke nei gogotan.
11 Aino katapo tav talupus e matam a nat ke, sikei kana kalapo talupus aro luai singirung aongos.
12 Kana vang nia nalapo asok pok ia taun ua, kapo pakangat luai ig.
13 Natapo buk teng akit ania pat konang ka luk kam pangau asi me li kunga anig nei gogotan ke marai akus ro.
14 Sikei tarungta tav angainakai asukang a parik napa angkoai si vil korong ania using napo buk ani ku pakangai anig singina si kam vubuk akorong, na parik si atatai ke.
15 Si pangau kudik ang milongta lapo ago angtaliungai singina, vei kata asereiai nganing ani taun ke, ani ku songo pok ia, asi kana ago luai singim,
16 val igenen kalakala na parik ta vopo abis palau ang. Io, val mang tasim roron. Kakag ta kun tasig ro. Vei singim nganing ka mamaiten luai kana angtasimal. Using kapo mang igenen na kapo tasim e matana i Volava.
17 Au, using napo palpal im, napo sokotuk ua ta ku songo alak aro pok ia, asukang palau val kupo songo alak iau.
18 Man katala bil arikek singim o kata luk palau tav samui, atung a maiten ang singig.
19 Nau kana na Paulo napo salik ta kungag asukang ke, nakan ngenget pok. Napo mengen kana val igenen togon kope, sikei numai, kam to nang kapo tukulai singig.
20 Tasig, si karung angtunganan e matana i Volava, napo buk ta ku using kag lomlomonai. Man asukang, kupo vil atanginang pok a vingag e matana i Karisto.
21 Napo lomon ia ta kula abis korong ia, using napo nas kam lau i longong. Kana napo salik anim using napo malangas ta man kula abis korong ia, kula abis soliu luai ani sokotuk ke.
22 Ku usausa ta oring anig asi kag an rot using napo lomon ia ta nakan serei, using God katala longong kami keve sokotuk anig.
Akamusai i posong ro
23 Epaparas, igenen ke namemlongpo ago nei vilvil akui kuvul marai Karisto Iesu, kapo alis kana posong ro taun imi.
24 Au na ri Marko, Aristarko, Demas na Lukas, volo igenen ipo abis ve nau, ritol kapa.
25 Kana roron a Volava Iesu Karisto ka auai ve malanganto imi.