กัน ยุฮ โม ไกญกอ ลุกซิก พะเยซู
พะทัม กันไกญกอ มัฮ ป ไซฮ ลูกา ละ ซ เกือฮ อื รติต รเนือง ไม่ ไลลวง ป ไซฮ แตะ นึง พะทัม ลูกา. ป ระ ไล นึง พะทัม กันไกญกอ เฮี มัฮ ไลลวง ตอก ครอฮ โม ลุกซิก พะเยซู ไลลวง กัน ระ ไล ยุฮ พะจาว “นึง เวียง เยรูซาเลม, นึง จังวัต ยูเดี่ย ไม่ จังวัต ซามาเรีย, ฮอยจ ลอยจ เตะ เตือ มะลอง โครยญ โดฮ.” (โบ่ต 1, คอ 8) พะทัม กันไกญกอ มัฮ ไลลวง ตอก โฮลฮ โม ยิว แปน คริซเตียน รกา. ฟวยจ เซ พรุฮแพร โรฮ ฮอยจ ละ ปุย ตังเมือง โฮวน ปะเทต. นึง พะทัม กันไกญกอ เฮี มัฮ ป เกือฮ เอะ คาวไจ ตอก โฮลฮ โม ยิว รัปคัม ปุย ตังเมือง ฮอยจ แปน เอียกปุ แตะ เตือง โอ อื ไอฮ ปซี ปซา ยุฮ โม ยิว. ไลลวง พะเยซู ลอต แปน ไลลวง ปุน ทื ปุย โครยญ ปะเทต.
พะทัม กันไกญกอ ไก ลอวย คัก. (1) ไลลวง เกิต คริตซจัก นึง เมือง เยรูซาเลม ฟวยจ ฮาวก พะเยซู เมือง มะลอง. (2) คริตซจัก พรุฮแพร ฮอยจ เมือง อิซราเอน โครยญ จังวัต. (3) คริตซจัก พรุฮแพร ฮอยจ นึง เมือง โฮวน โดฮ. ลั่ก ก ลอยจ อื ฮอยจ เวียง โรม.
ป ระ ไล นึง พะทัม กันไกญกอ ติ เจือ อื มัฮ กัน รซอฮ ลปุ พะจาว ป ฮอยจ ละ โม ป เจือ นึง เวียง เยรูซาเลม รกา, ไม่ เกือฮ อื อัมนัต ซัมคัน ละ โม ป โฮว ฆรอ ลปุง ตัง พะเยซู. เกือฮ โรฮ รพาวม กา ละ ซ ครอฮ อื ไลลวง พะเยซู ซองนา ปุย โฮวน. ไลลวง ครอฮ อื เซ เอีจ ไซฮ ลูกา อาึง, ตอก ป อัฮ ป มวยญ เปโตร ไม่ ซเทเฟน ไม่ ปาวโล, เดอึม เอะ ซ ยุง ไลลวง ตอก เพอึก โม ป ครอฮ โรง ไลลวง พะเยซู ละ ปุย. อัมนัต พะจาว อาวต นึง จีวิต เปโตร ไม่ ปาวโล ไม่ ปุย ไฮญ. กัน รโจะ โม ป เจือ พะเยซู รพาวม แตะ ไม่ ปุ แตะ ไม่ รพาวม ติ โดฮ แตะ, มัฮ โรฮ ป ระ ไล นึง พะทัม กันไกญกอ เฮี.
1
1 เทโอฟีโล, ป นัปทื เยอะ. นังซื ไซฮ อาึ รโปะ ละ เปอะ ไพรม อื โฮ, มัฮ ไลลวง กัน ยุฮ พะเยซู ไม่ ตอก เพอึก ตอม อื ปุย โครยญ เจือ, เน่อึม เมือ โรง อื ฮอยจ ละ ซเงะ เกือฮ พะจาว อื ฮาวก เมือง มะลอง.
2 กา ฮาวก อื เซ เอีจ ละ อาึง รซอม แตะ เบือ ลปุ พะจาว. ดวน โม ป โฮว ฆรอ ลปุง ตัง แตะ ป เลือก แตะ อาึง เซ เกือฮ อื ยุฮ ตัม ป อัฮ แตะ เซ.
3 ฟวยจ ยุม อื ตัง ปุย เยอ, ไน รปาวน ซเงะ เซ เอีจ เปลีฮ ที ติ แตะ ละ โม ป เลือก แตะ เซ โฮวน โฮน โฮวน แบ่ป, เกือฮ อื ยุง แจง แน เอีจ โกฮ ไอม แม แตะ เน่อึม ลั่ก ยุม แตะ, ไม่ อู อื ไลลวง บั่นเมือง ยุฮ พะจาว ละ อื.
4 พะเยซู เญือม อาวต ลั่ง อื ไม่ อื ดวน อื โอ โอก ฮา เวียง เยรูซาเลม. อัฮ เฮี ละ อื, “ไมจ เปอะ มอง ป ซ เกือฮ เปือะ เกอะ ละ เปอะ ตัม ป ซันญา อื อาึง ละ เปอะ, ตอก เอีจ อัฮ อาึ อาึง ละ เปอะ ไพรม อื โฮ.
5 โยฮัน เอีจ เกือฮ เนอึม ปุย รัป บั่ปติซมา โตะ รอาวม. เฆียง เฮี เญี่ยะ โม เปะ ปังเมอ ซ โฮลฮ เปอะ รัป บั่ปติซมา นึง ลปุ พะจาว,” อัฮ เซ.
พะเยซู ฮาวก เมือง มะลอง
6 ติ โฮน อื เญือม รโจะ ดิ ปุย ไม่ ปุ แตะ, โม ลุกซิก อื เซ ไฮมญ พะเยซู ตอก เฮี, “พะโองจาว, ปเลี่ย เฮี อัม เอีจ เติง เวลา เกือฮ เปอะ โม อิซราเอน เตียง แม ไอฮ เมือง แตะ ตอก ไพรม อื?” อัฮ เซ ละ อื.
7 พะเยซู โลยฮ อื ละ อื, “คาว โตว ละ ยุง โม เปะ อื เวลา ซาวม พัต ซเงะ จี เปือะ เกอะ อาึง นึง อัมนัต โกะ แตะ ไอฮ แฮ.
8 ปัง มัฮ ตอก เซ, โม เปะ ซ โฮลฮ เปอะ อัมนัต แตะ เญือม เอีจ ฮอยจ อาวต ลปุ พะจาว นึง เปอะ. ซ โฮลฮ เปอะ แปน ซกิ พีญัน ละ อาึ นึง เวียง เยรูซาเลม, นึง จังวัต ยูเดี่ย, ไม่ จังวัต ซามาเรีย เตือง โอยจ อื, ฮอยจ ลอยจ เตะ เตือ มะลอง โครยญ โดฮ,” อัฮ เซ.
9 เญือม เอีจ ฟวยจ อัฮ อื ตอก เซ ลไล แก ลั่ง ปุย อื, พะจาว เกือฮ พะเยซู ฮาวก ฮา อื ฮอยจ ละ เดีย ชุต รวู อื.
10 ลไล ฮาวก ลั่ง พะเยซู เยอ, โม เซ งัน แนฮ มะลอง. ฮอยจ ง่อม ป จาวป เครอึง ปิญ รฮอยจ ลอา ปุย ชุง โบ อื.
11 ปุย ลอา เซ อัฮ เฮี, “โม เปะ ป มัฮ ปุย จังวัต กาลิลี เยอ, เมอยุ ชุง แนฮ ลั่ง เปอะ งัน มะลอง เงอ? พะเยซู เฮี เอีจ เกือฮ พะจาว ฮาวก ฮา เปอะ เมือง มะลอง. ซ ฮอยจ แม โรฮ ตอก ชวน เปอะ เญือม ฮาวก อื เมือง มะลอง เซ โรฮ,” อัฮ เซ.
ปุย เลือก มัตเทีย ยุฮ กัน ฆรอ ยูด่า
12 เญือม เซ โม ลุกซิก เกอ เอีญ เน่อึม นึง บลาวง กาวก ฮอยจ นึง เวียง เยรูซาเลม. ซไง ซดิ อื ไก เมาะ ติ กิโลเมต คระ.
13 เญือม เอีจ ฮอยจ อื นึง เวียง เซ, เอีญ ฮาวก เอิน คัก ฮลาวง เญือะ ก เอีจ กอ อาวต แตะ เซ. ป ฮาวก เซ มัฮ เปโตร ไม่ โยฮัน, ไม่ ยาโคโบ่ ไม่ อันดรู, ไม่ ฟีลิป ไม่ โทมา, ไม่ บ่าโทโลโม ไม่ มัตไท, ไม่ ยาโคโบ่ กวน ฮาลาโฟ, ไม่ ซีโมน ป มัฮ พัก ชาตนิโยม ไพรม อื, ไม่ ยูด่า กวน ยาโคโบ่.
14 โม เซ เตือง โอยจ อื รโจะ ดิ ติ โดฮ, ไววอน เลิง เอิน ไม่ ปุ แตะ ไม่ โม ปุ พะเยซู ไม่ มะ อื ไม่ ปรโปวน ไฮญ ง่อน.
15 ฟวยจ เซ ติ ลอา ซเงะ, โม เอียกปุ ไน พะเยซู รโจะ ดิ ไม่ ปุ แตะ. ไก ด่าว ติ รอย ไม่ ง่า ปุย. เญือม เซ เปโตร โกฮ ชุง ลั่กกา ปุย.
16 อัฮ เฮี, “โม เปะ ป มัฮ เอียกปุ อู, ป อัฮ ด่าวิต เบือ ลปุ พะจาว ไพรม อื นึง พะทัม โฮ, จัมเปน อื เกิต เนอึม ตอก อัฮ อื ซ เกิต เซ. มัฮ อัฮ อื อาึง ไลลวง ยูด่า ป ตาว ปุย โฮมวต พะเยซู เซ.
17 ยูด่า เซ ไพรม อื มัฮ มู ติ ไม่ เอะ ละ ซ รซอฮ แตะ ละ พะจาว ไม่ เยอะ.”
18 (มาื โฮลฮ อื นึง ยุฮ แตะ ป ฆอก เซ, ยูด่า รวี เตะ นึง อื ติ โดฮ. มัฮ นา เซ นา ก ดุฮ อื. ลาวป นา แตะ ไม่ เตะ ปอ ลตุฮ เวียก แตะ. ฮลอ ตื เวียกตู โตม โฮมะ อื เตือง โอยจ อื.
19 ไลลวง เฮี ป อาวต นึง เวียง เยรูซาเลม เอีจ ฮมอง ตื อื. เตะ นา เซ, โม เซ อัฮ อาเคด่ามา ไม่ อื นึง ลปุง โกะ แตะ. มัฮ อัฮ อื เตะ นาตี ฮนัม ไม่.)
20 “พะทัม นังซื ลืลาว เอีจ ตึน อัฮ อื ตอก เฮี, ‘ไมจ เปอะ เกือฮ เบือง ก อาวต อื เซ ลอต ฮัง. ปุ เญือะ เกือฮ ปุย อาวต นึง,’ อัฮ เซ.
“อัฮ โรฮ เฮี, ‘ไมจ เปอะ เกือฮ ปุย ไฮญ ยุฮ กัน ยุฮ อื ฆรอ อื,’ อัฮ เซ พะทัม.
21-22 “มัฮ เซ ป ไมจ ลั่ง อื ไก ติ ปุย ป ปุน แปน ดิ พีญัน เอีจ โกฮ ไอม พะเยซู จาว เน่อึม ลั่กยุม แตะ ไม่ เอะ ฆาื อื. ไมจ อื มัฮ ปุย ป กอ โฮมว ดิ ไม่ เอะ ติ เจน โฮว เอะ ไม่ พะเยซูจาว, เน่อึม เญือม เกือฮ โยฮัน ปุย รัป บั่ปติซมา, ฮอยจ ละ ซเงะ เกือฮ พะจาว พะเยซู ฮาวก ฮา เอะ เมือง มะลอง,” อัฮ เซ.
23 โม เซ ลอต เอิน เมก มอยฮ ปุย ลอา ปุย. มัฮ โยเซป ติ ไม่ มัตเทีย ติ. (โยเซป เซ ปุย อัฮ บ่าระซาบ่า ละ อื ง่อน. อัฮ โรฮ ยุซโท ละ อื ง่อน.)
24 โม เซ ไววอน. อัฮ เฮี, “โอ พะโองจาว, ปะ ป ยุง รพาวม ปุย เตือง โอยจ อื. ปัว ปะ เปลีฮ ละ แตะ, ปุย ลอา เฮี มัฮ ปุย ป เอีจ เลือก เปอะ นึง อื?
25 มัฮ ปุย ป ซ ยุฮ กัน ฆรอ ยูด่า ละ ซ รซอฮ แตะ ละ ปะ, ไม่ แปน แตะ ป โฮว ฆรอ ลปุง ตัง เปอะ เฮี? ยูด่า เซ เอีจ ละ อื กัน ยุฮ แตะ, เอีจ โฮว อาวต เบือง โกะ แตะ ไอฮ,” อัฮ เซ.
26 โม ลุกซิก เรียก โคะ นึง ปุย ลอา เซ. เญือม เอีจ ฟวยจ โซวต อื โคะ เซ ปุก มัตเทีย. มัตเทีย เซ ลอต แปน ป โฮว ฆรอ ลปุง ตัง พะเยซู ไม่ ปุย กาว โรฮ ติ เซ.