15
โคะ อะงุน โอ แปน ป โกว
1 พะจาว เกือฮ แม ลปุง แตะ ฮอยจ ละ อาึ ตอก เฮี,
2 “ปะ ป มัฮ ปุย ปลัฮเตะ เอ, โคะ อะงุน เนอ อัม แกต เปอะ ไมจ ฮา โคะ ไฮญ? ป มัฮ กัก อื อัม แกต โรฮ เปอะ ติ แตะ เกียฮ แพป ไม่ กัก โคะ นึง เพระด่าวก?
3 โคะ อะงุน เซ อัม แกต เปอะ ปุย เกียฮ โกว ละ ยุฮ แตะ โอเอีฮ นึง อื? ปัง มัฮ ละ ยุฮ เปอะ ควน ฟุก เครอึง แตะ บ่ได่ะ อัม แกต เปอะ แปน?
4 กัก โคะ อะงุน เซ คาว ละ แปน แตะ ควน จอป งอ โน่ง. ฟวยจ เซ ดัฮ เอีจ ลอก งอ เตือง ลอา ก บลัฮ อื โฮ, ไม่ โฆรยญ บั่กบ่วน อื นึง ซออฮ แตะ, โฮว ละ โอ แตะ เญาะ ซ ไก ป มัฮ ละ ปุย.
5 ปัง มัฮ เญือม โอ อื ดิ ฮะ, ปุ โรฮ แปน ป โกว เฟือฮ. เญือม เอีจ ฮะ อื ไม่ ซออฮ โฆรยญ แตะ, โฮว ละ โอ แตะ เญาะ เกียฮ แปน ป โกว เฟือฮ เอิน.”
6 มัฮ เซ ป อัฮ พะจาว เยโฮวา อื ตอก เฮี ฆาื อื, “ตุย ปุย โคะ อะงุน พริ เน่อึม โตะ เพระด่าวก ละ ตอง แตะ โปวฮ นึง โตะ งอ ตอก ออฮ, อาึ ซ ตุย โรฮ ปุย เกือฮ โอก ฮา เยรูซาเลม ตอก เซ โรฮ.
7 อาึ ซ ตอซู ปุ แตะ ไม่ โม เซ. ปัง เอีจ โฮลฮ โม เซ ตอ โอก ฮา งอ ติ โฮน, ปังเมอ ซ ฮะ ลั่ง นึง งอ. เญือม เอีจ ตอซู อาึ ไม่ โม เซ เยอ, ปะ ซ ยุง เปอะ ฆาื อื มัฮ อาึ พะจาว เยอ.
8 อาึ ซ เกือฮ เอิน ปะเทต อาวต อื เซ แปน ป ฮัง เยือ, นึง โอ โม เซ เกือฮ ติ แตะ เนอึม รพาวม ละ อาึ เฟือฮ เอิน,” อัฮ เซ พะจาว เยโฮวา.