นังซื รโปะ โยฮัน ปัป ติ เฮี ไก ลอา เจือ ป เนน อื. (1) มัฮ ฆวต เกือฮ อื ปุย รโจะ ดิ รพาวม แตะ ไม่ พะจาว, ไม่ พะเยซูคริต ป มัฮ กวน พะจาว เซ. (2) มัฮ ซตอก รเง่อึม อื ปุย เกือฮ แฮน ติ แตะ ฮา ลปุง เพอึก ตอม โอ เนอึม, นึง มัฮ อื ป ซ ไลจ ยุฮ กัน รโจะ ดิ ปุย รพาวม แตะ ไม่ พะจาว เซ. เจน โยฮัน เซ กัน เพอึก ปุย ลปุง โอ เนอึม เซ มัฮ เกิต อื เน่อึม นึง ไลลวง อัฮ ปุย โอเอีฮ ทัมมด่า ป ไก นึง ปลัฮเตะ เฮี มัฮ ป โอ ไมจ โครยญ เจือ. โม เซ อัฮ พะเยซู ป มัฮ กวน พะจาว เซ โอ เกียฮ แปน เนอึม ปุย ปลัฮเตะ ฆาื อื. ดัฮ ไอฮ เนอึม เนะซอัง แตะ ตอก ปุย ปลัฮเตะ เกียฮ แปน โตว พะจาว, อัฮ อื ตอก เซ โม เซ เยอ.

โม ป เพอึก โอเอีฮ ตอก เซ อัฮ โม ป โปน เนอึม มั่ป เซ โอ เญือะ ไก รพาวม นึง โอเอีฮ ปลัฮเตะ เฮี เฟือฮ เอิน. อัฮ โรฮ ไลลวง พะจาว โอ เกว ไม่ ไลลวง จีวิต ซง่ะ ซงอม, ไม่ โอ ปุย จัมเปน ฮรัก เอียกปุ แตะ. กัน เพอึก ป โอ เนอึม ตอก เซ ซ เกียฮ ไลจ ยุฮ คริตซจัก. มัฮ เซ ป จัมเปน โยฮัน ตอซู ไม่ กัน เซ ฆาื อื.

โยฮัน เนน ไลลวง มัฮ เนอึม พะเยซู ปุย ปลัฮเตะ เนอึม. โยฮัน เอีจ โฮลฮ ยุ, โฮลฮ ฮมอง, ไม่ โฮลฮ อื ไปญ นึง เตะ แตะ. เอีจ ที นึง เซ. เมาะ ป อัฮ ติ แตะ เจือ พะเยซู ไมจ โรฮ อื ฮรัก ปุ แตะ โรฮ, นึง มัฮ อื เอียกปุ ปุ แตะ เบือ พะจาว. นังซื รโปะ โยฮัน เฮี เนน โรฮ ไลลวง ตอก เกียฮ ยุง เนอึม ปุย เอีจ ไก จีวิต โอ เญาะ ไก ลอยจ นึง แตะ.