2
Isarhe ri itsi Ukiristo
umbɔ aka anyapuwe
1 Ivangyɛ umum iki iba ru umbi, umbi angwɛ̃mɛn nu anapumɛn, umum isi ĩbamum nggu ihwɛng arherhe use nggaa itsoi anera ĩdɛyiwa umbi ideka Arherhu-Num.
2 Umum isi ĩbeemum ihwɛng use imesuwe ubin ukpɔɔ ivangyɛ umum iki iwu nggu umbi bɔr Uyesu Ukiristo ukpekũ uwuruwi umbɔ aka anyapuwe.
3 Umum ĩba ru umbi ri ida iker nggu nggaa iwei nu izang iyor.
4 Isarhamum nu udũwãmum isi iwengge arherhe ishishɔ̃rhã use isarasu, bɔr awu nggu ikikorhe ijee iyi Ipfu-Num.
5 Ngge itsú imangmangmbi ima ineke iwe ru itsoi anera, bɔr iwe ru ijee Unum.
Itsoi Unum
6 Umɛn irherha arherhi itsoi ra abika akɔ̃ ri imangmang, bɔr asi iwea ikpũ itsoi iyi ivang iyɛrɛ, use iyi ayɛrhe ivang iyɛrɛ, abirabɛ aka asi íghambɔ iyɛrhe ugbagbaa.
7 Ĩ'ĩ, umɛn irherhe itsoi Unum, iki iwɔk nu Unum aka abee umɛn igasha ri imor iyi Ukiristo ri ivang iyi inggbaashia.
8 Ayɛrhe abi ivang iyɛrɛ asi ihwɛngmbɔ ngge, ubinkutsu ugɛ umbɔ ahwɛngmbɔ, umbɔ asi ínyapukumbɔ Uteijee uwu imor.
9 Rimi hã itsɛng Arherhu-Num igɔr igɛ,
<<Ubinkpi Unum aka agbishuwe abika abema unga
unera anasi inyãã,
unera anasi igũa,
ikɛi unera anasi ikaka ifɛrhkɔngge.>>
10 Bɔr abin hã akɛ Unum adɛyiwa umɛn ake ru ubok Ipfunga.
Ipfu-Num ngge irhisa abina kishoo, uko abinkɛ aka aghong ihwihwɛng aki Unum.
11 Ungaa ahwɛng ifɛrhkɔ unera? Ipfu uner ha ukpekũ ngge ihwɛng. Iwe rimi hã, unera asi ídɛ̃ɛ̃ ahwɛnga ifɛrhkɔ Unum, bɔr Ipfu-Num ukpekũ.
12 Umɛn isi iyɛimɛn ipfu iyi upfung, bɔr umɛn iyɛi Ipfu iki idzeku Unum, nggee itsu umɛn ihwɛng abinkɛ Unum aka adzaa umɛn izũwã.
13 Ubin hã ukpi umɛn iki irherhe, asi iwea irhɛm iyiriyɛ iki imesuwe ri itsoi anera bɔr irhɛmyɛ Ipfu-Num iki imesuwe. Umɛn ikũ irhɛmyɛ Ipfu iki imesuwa umɛn imesuwe idzidzɛrhe iyi Unum.
14 Unerwi aka ashia ri Ipfu-Num hã, asi íyɛisa abinkɛ aka awe aki Ipfu-Num, ubinkutsu awu abin ugugge ru unga. Unga asi ídɛ̃ɛ̃ ahwɛnga ake, ubinkutsu awu Ipfu-Num itsu ihwihwɛng ake ukpekũ.
15 Unerwi aka awe ru Ipfu-Num awuri idɛ̃ɛ̃ ahwɛnga kishoo abinkɛ Ipfu iki idɛyiwe unga, bɔr abirabɛ aka ashimbɔ ri Ipfu-Num hã asi ídɛ̃ɛ̃ ahwɛngmbɔ ifɛrhkɔ unerwi aka awe ru Ipfu-Num.
16 Itsɛng Arherhu-Num igɔr igɛ,
<<Ungaa ahwɛng amɛn Uteijee?
Ungaa idɛ̃ɛ̃ idzowe unga itsũwã?>>
Bɔr umɛn ikaifɛrhkɔ ru nyaku Ukiristo.