Ubvur uwu inggbaashia
Uyohana
aka atsɛng
Utsutson ri itsi ubvur uwu inggbaashia Uyohana aka atsɛng
Awu Uyohana uner itser Uyesu atsɛng ubvur uwurɛ. Abɔɔ akaifɛrhkɔ ugɛ atsɛng ubvur uwurɛ ra amɛk aki 85-95 udzur ru unumkpi umbɔ aka amar Uyesu.
Uyohana atsɛng undzumu itsi arherhe avaa ru ubvur uwurɛ. Unga afituwe abika avarhu ubvur ha umbɔ asisei ri iwɛrhɛ nggu Unum nu Ungwɛ̃nga Uyesu Ukiristo, nu ikɛi igbiir ato umbɔ ri itsi abika amesuwe imesi igbɛrangwĩ iyiriyɛ iki idakuwe iwɛrhɛmbɔ nggu Unum. Imesa iyɛrɛ ha imesuwe ugɛ abinkɛ aka awe ru upfung anera aka adɛ̃ɛ̃ abanga, awu abin arhim, ikɛi igɛ Uyesu, Ungwɛ̃ Unum asi iwea unera. Abika amesuwe imesa ha agɛ ififɔrh iwu ri itsũwe amɛn ru ibibɛk ru upfung ukpirɛ, ikɛi imesuwe igɛ ififɔrh isi iwengge iyi amɛn aka aze use ibema adɔka.
Bɔr uner uwuku utsɛng ubvur uwurɛ amesuwe ugɛ Uyesu awu unera, ikɛi agɛ ubɛn unerwi aka awe ru imangmang ru Uyesu na abemunga Unum awu ufang umbɔ abema adɔka ikɛi.
Abinkɛ aka awe umɔ
Utsutson ri itsi ubvur ha (1.1-4)
Irhirhang nggu uzĩ (1.5—2.29)
Awɛkaci Unum nggu awɛkaci Undenggũ (3.1-24)
Idzidzɛrhe nggu igbɛrangwĩ (4.1-6)
Ibibema adɔka (4.7-21)
Ikpũ imangmang (5.1-21)
1
Urhɛm urhɛ
1 Umɛn ĩdũwũwa umbi Urhɛm ukpuku udzowe urhɛ, uwu ha aka awe ri inggbaashia, uwu ha umɛn iki igũ, uwu ha umɛn iki inyã ra asumɛn, uwu ha umɛn iki inyã ni ibanga nggu abokmɛn.
2 Urhɛ ha udzeka. Umɛn inyãmɛn umgbɔ ni idzowe ideka umgbɔ. Umɛn ĩdũwũwa umbi urhɛ uwu ugbagbaa, uku uwe nggu Utɛ nu udzeka ru umɛn.
3 Umɛn ĩdũwũwa umbi ubinkpi umɛn iki inyã ni igũ, ngge ima itsu umbi awe ri ikikɔng iwɛrhɛ nggu umɛn. Iwɛrhamɛn iwu nggu Utɛ nu Ungwɛ̃nga Uyesu Ukiristo.
4 Umɛn itsɛng akɛrɛ ngge itsú anggɔmmɛn atsuafɛr.
Uzɛ̃rhã ri irhirhang
5 Isarhe ha iyɛ umɛn iki igũ ru unga ni ĩdũwũwa umbi, Unum awu irhirhang. Ru unga uzĩ ushikpɔ uko ukunjiir.
6 Umɛn ĩba ĩgɔr ugɛ umɛn iwemɛn ri iwɛrhɛ nggu unga bɔr ni izɛ̃rhã ru uzĩ, umɛn igbɛrangwĩ ni isi ikorhumɛn idzidzɛrhe.
7 Bɔr umɛn ĩba izɛ̃rhã ri irhirhang, ru nyaka unga aka awe ri irhirhang, umɛn iwemɛn ri iwɛrhɛ nggu adɔka, nu adzirh Uyesu, Ungwɛ̃nga, asorh umɛn ra arhimmɛn kishoo.
8 Umɛn ĩba ĩgɔr ugɛ umɛn ishimɛn ra arhim, umɛn irhɛm atsimɛn nu idzidzɛrhe ishingge ru umɛn.
9 Bɔr umɛn ĩba isɔmmɛn arhimmɛn, Unum awu uner idzidzɛrhe na arhika, awuri itsũwũka arhimmɛn na asorhuwa umɛn ri kishoo ida irhirhikamɛn.
10 Umɛn ĩba igɔr ugɛ umɛn isi ikorhumɛn arhim, umɛn itsu unga awu uner igbɛrangwĩ nu arherhanga ashike ra amɛnmɛn.