Isarhe Iyiki Ize iyi
Umatta
aka atsɛng
Utsutson ri itsi ubvur Umatta
Awu Umatta atsɛng ubvur uwurɛ. Unga awu utsa Uyahuda, unying ra angwɛ̃ imesu Uyesu.
Ubvur uwurɛ udɛyiwe ugɛ Uyesu unga awu Ukiristo ha umbɔ aka abemuwa ru ibibemuwe-Num iyiki igbe, unga awu unerwi abi Uyahuda aka atsu amɛnmbɔ ugɛ ibanga. Idikinga irhɛirhɛ ubvur uwurɛ uku uyisu Uyesu ugɛ, <<Ungwɛ̃ Udauda>>. Nu ngge iki iwe ugɛ Isarhe Iyiki Ize ha isi ikpongge iyiyɛi akarhãrhã ra abi Uyahuda, rimi hã icicang ishingge Isarhe Iyiki Ize iyi Uyesu Ukiristo iwu iyi anera kishoo ru upfunga, ra abi Uyahuda nu abirabɛ aka asi iwembɔ abi Uyahuda.
Ru ubvur Umatta, atsɛng imesu Uyesu ra agbɛr akagɔng atɔ̃ɔ̃. Aki inggbaashia awu imesu Uyesu ni itsi igũ, iyiriyɛ iki idɛyiwe ikpũ isisei ha abika adɔsa aka isei ri ibibɛkmbɔ (arherhe aki 5—7). Ikɛi imesa iyɔɔ iwengge ri itsi itseryɛ uner itser Uyesu iki imɛ̃ɛ̃ unga akorhe (arherhe aki 10). Ikɛi atsɛngmbɔ nyaka arherhe urhɛrhɛ ri itsi iyɛrha afã (arherhe aki 13). Nu imesa ri itsi amɛnkɛ aka amɛ̃ɛ̃ uner uku udɔsa awerake nu ikpũ ifɛrhɛ ha iki imɛ̃ɛ̃ unga akorhe (arherhe aki 18). Ra arherhe aki imaataka, Umatta adɛyiwe nggaa itseryɛ Uyesu aka adzowe abika adɔsa, ngge iwu itser iyiki idzowe Isarhe Iyiki Ize.
Abinkɛ aka awe umɔ
Atoku Uyesu nu imarnga (1.1—2.23)
Udũwã Uyohana Uner Ubɔtisima (3.1-12)
Isorhu ubɔtisima Uyesu nu iviviranga (3.13—4.11)
Itser Uyesu ru Ugarhirhi (4.12—18.35)
Izizĩ Uyesu ru Urusharhima (19.1—20.34)
Usati Uyesu ukpu imaatak ru Urusharhima (21.1—27.31)
Inyinyapuwe Uyesu nu akpenga (27.32-66)
Isisok Uyesu nu idzidzekanga (28.1-20)
1
Ubvur atoku Uyesu
1 Ubvur unang Uyesu Ukiristo, ungwɛ̃ Udauda uwuruwi aka awu ungwɛ̃ Uibrahim.
2 Uibrahim unga awu utɛ Uishaku,
Uishaku unga awu utɛ Uyakubu,
Uyakubu unga awu utɛ Uyahuda nu angwɛ̃mbɔ,
3 Uyahuda unga awu utɛ Ufereza nu Uzera, uyisumbɔ aka awu Utamar,
Ufereza unga awu utɛ Uhezuron,
Uhezuron unga awu utɛ Uaram,
4 Uaram unga awu utɛ Uamminadab,
Uamminadab unga awu utɛ Unashon
Unashon unga awu utɛ Usarhmon,
5 Usarhmon unga awu utɛ Ubo'aza. Urahab unga amar Ubo'aza,
Ubo'aza unga awu utɛ Uobida. Urut unga amar Uobida,
Uobida unga awu utɛ Ujesse,
6 Ujesse unga awu utɛ Uyɛrhe Udauda.
Udauda unga awu utɛ Usorhomon. Utsɛrha Uriya unga amar Usorhomon,
7 Usorhomon unga awu utɛ Urhehobowam,
Urhehobowam unga awu utɛ Uabijah,
Uabijah unga awu utɛ Uasa,
8 Uasa unga awu utɛ Uyehoshafat,
Uyehoshafat unga awu utɛ Uyoram,
Uyoram unga awu utɛ Uazariya,
9 Uazariya unga awu utɛ Uyotam,
Uyotam unga awu utɛ Uahaz,
Uahaz unga awu utɛ Uhezekiya,
10 Uhezekiya unga awu utɛ Umanasse,
Umanasse unga awu utɛ Uaman,
Uaman unga awu utɛ Uyosiya,
11 Uyosiya unga awu utɛ Uyekoniya nu angwɛ̃mbɔ ri ivangyɛ umbɔ aka akarha umbɔ azĩ abĩ akase ru Ubabirha.
12 Umbɔ aka akarha umbɔ azĩ atsĩ abĩ akase ru Ubabirha,
Uyekoniya unga awu utɛ Usheyarhtiyerh,
Usheyarhtiyerh unga awu utɛ Uzerubaberh,
13 Uzerubaberh unga awu utɛ Uabihudu,
Uabihudu unga awu utɛ Uerhiyakim,
Uerhiyakim unga awu utɛ Uazor,
14 Uazor unga awu utɛ Uzadak,
Uzadak unga awu utɛ Uakim,
Uakim unga awu utɛ Uarhiyud,
15 Uarhiyud unga awu utɛ Uerhiyeza,
Uerhiyeza unga awu utɛ Umatana,
Umatana unga awu utɛ Uyakubu,
16 Uyakubu unga awu utɛ Uyusuf utsaka Umaryamu, uya Uyesu, umbɔ aki iyisa Ukiristo.
17 Kishoo andanna udzur ri Uibrahim uba utsĩ Udauda awu usɔka na anaa. Udzur nu Udauda uba utsĩ ri ivangyɛ umbɔ aka akarha abi Uisrairha azĩ abĩ akase ru Ubabirha, andanna awu usɔka na anaa. Udzur umɔ uba utsĩ Ukiristo, andanna awu usɔka na anaa.
Imar Uyesu Ukiristo
(Irh 2.1-7)
18 Imar Uyesu Ukiristo iwe riminɛ. Uyanga Umaryamu awu ukarh Uyusuf. Umbɔ anasi ipfunumbɔ, nu umbɔ anyã unga awu ra anaa ru ubok Ipfu Isarsatangge.
19 Ukarhnga Uyusuf arhiku uner asi ibeenga idzowe unga atsa ra asu anera, unga akaifɛrhkɔ iyiki ibɔre unga ri iwɔk.
20 Bɔr unga ana akaifɛrhkɔ akɛrɛ ha na arheyirhɔ anyã ipfu itser Uteijee kapɛɛng ru unga ni igɔr unga igɛ, <<A Uyusuf ungwɛ̃ Udauda, niba ugũo iwei iyɛi Umaryamu unga awu utsɛ̃ngo, ubinkutsu anaa hã unga aka akɔ̃ adzeki Ipfu Isarsatangge.
21 Awuri imar ungwɛ̃ nu ungo utare itsoknga igburh Uyesu, ubinkutsu unga awuri ifɔrh anernga ra arhimmbɔ.>>
22 Kishoo akɛrɛ ha akorhe rimi ngge itsuifɛr ubinkpi Uteijee aka arherhe ra angwĩ uwuku usɔm Arherhu-Num agɛ,
23 <<Unakugbĩrhĩ awuri ikɔ̃ anaa na amar ungwɛ̃ umbɔ ayisi itsoknga Uimmanuwerh,>> agbena agburh <<Unum awu nggu umɛn.>>
24 Ivangyɛ Uyusuf aka azir ru urhɔ, unga adɔsa arherhe ha ipfu itser Uteijee iki irherhe na ayɛi Umaryamu unga awea utsɛ̃nga.
25 Bɔr asi irhaa nggu unga utsɛku unga aka amar ungwɛ̃nga. Uyusuf atare itsoknga igburh Uyesu.