Ubvur
Irhi Uyohana
Utsutson ri itsi ubvur Irhi
Uner uwuku utsɛng ubvur uwurɛ awu ukukũ itsoka iki igburh Uyohana. Abɔɔ ikaifɛrhkɔ ugɛ atsɛng ubvur uwurɛ ugɛɛ ra amɛk aki 95 udzur ru unumkpi umbɔ aka amar Uyesu.
Unga atsɛng ubvur ha ri ivangyɛ abika adɔsa aka awe ra ayetnum utsɛku umbɔ aka ashupa unga ri iker akũ unga azĩmbɔ ru umpfũwã Ubatmo adene unga umɔ. Ra anang hã unga aka ayɛi irhi iyɛrɛ.
Unga atsɛng ubvur uwurɛ afituwe abika adɔsa ugɛ umbɔ adɛ̃ɛ̃ aker ri imangmang ri ivang ayetnum. Ubvur ha udɛyiwe agben irhi unying anying, akirakɛ abika adɔsa ri ivang hã aka adɛ̃ɛ̃ ahwɛng, bɔr awuri iwu aghoghong ra abirabɛ aka asi iwembɔ abika adɔsa. Nu ngge iki iwe ugɛ anera anyangu agben irhi ha ra atsĩndĩa arhɛrhɛ, bɔr rimi hã undzumu agbena awe ra awiya, iwu ugɛ ru ubok Uteijee Uyesu Ukiristo, Unum awuri itsĩme anggamtsaknga kishoo idikũnga unying, nggu Ushaitan. Agãrhãnga awuri ikpombɔ idorh iyi afã aka afa nu abĩ aka afa ri ivangyɛ igha inggbaashe ha iki itsuifɛr.
Abinkɛ aka awe umɔ
Utsutson ri itsi ubvur ha (1.1-3)
Ighwe ri ikikɔng abika adɔsa utɔɔva (1.4-8)
Irhi Ukiristo (1.9-20)
Abvur azĩ ri ikikɔng abika adɔsa utɔɔva (2.1—3.22)
Idzowe igɔng ra afã (4.1-11)
Ubvur uwuku ufeta nggu Ungwɛ̃ Itsurhi (5.1—8.1)
Atsom utɔɔva (8.2—11.19)
Ukutsɛrh nggu ibvui (12.1-17)
Íjuɛ ivaa (13.1-18)
Irhi irhɛirhɛ (14.1—15.8)
Itɛ̃rhĩ utɔɔva iyi avɔm Unum (16.1-21)
Igha inggbaashi ri itsi anggamtsak Unum (17.1—20.10)
Itsu ufai ukpu imaatak (20.11-15)
Afã aka afa nu abĩ aka afa nu Urusharhima uku ufa (21.1—22.5)
Arherhe aki imaatak (22.6-21)
1
Ididɛyiwe
1 Irhi Uyesu Ukiristo, iyiriyɛ Unum aka adzowe unga, adɛyiwe agãrhãnga abinkɛ aka awu ufang asi ídãrhũke na akorhe. Unga atsu umbɔ ahwɛng ake ri idene ipfu itsernga ru ugãrhãnga Uyohana,
2 uwuku uwe ideka ra abina kishoo unga aka anyã, ake awe Arherhu-Num nu ideka Uyesu Ukiristo.
3 Idorh iwe nggu unerwi aka avarhuwe Arherhu-Num akɛrɛ ra anera, nu idorh iwe iyi abirabɛ aka agũ na atɔ̃ itser nggu ake, ubinkutsu ivanga iki iyongge.
Ighwe nu ifɛn-Num
4 Umum Uyohana, itsɛnge ikpui ikikɔng abika adɔsa utɔɔva ra abĩ Uasiya.
Imimuta nu ididɔɔr iwe nggu umbi idzeku unga aka awe icɛrɛ, nu uwu ha aka awe isha, nu uwu ha aka iba, ni idzeku ípfu utɔɔva iki idɛ̃ɛ̃ ra asu anang isei Unum,
5 ni idzeku Uyesu Ukiristo. Unga awu uwuruwi aka awe idzidzɛrhe ri ideka ha, unga awu uner unggbaashi uwuku usok ra akpe, nu uwuruwi aka agha iyɛrhe ra ayɛrhu upfung.
Unga abema umɛn na afɔrh umɛn ra arhimmɛn nggu adzirhnga.
6 Unga atsu umɛn iwe abi Iyɛrhanga na atsu umɛn iwe abika adzowe idɛm-Num abika atɔ̃ itser Unum nu Utɛ. Ru unga ikpikpoi nu ijee iwe ugbagbaa nu ugbagbaa! Iwerimi.
7 Unyã, unga anu iba nggu amɛɛ,
ubɛn asu awuri inyãke unga,
uko abika atar unga ikon.
Nu kishoo idũa ru upfung
awuri idɔngmbɔ amɛn ru unga.
Ngge iwe rimi hã! Iwerimi.
8 Uteijee Unum unga agɔr, <<Umum iwu ititirhi ha nu imimasha ha, umum hã iwe icɛrɛ, umum hã iwe isha, umum hã iwe uwuku ububa ha, Unum Uwu Ijee hã.>>
Uwɔɔ ru nyaku Ungwɛ̃-Ner
9 Umum Uyohana, ungwɛ̃mbi, umɛn iwu urhɔnga ra ayetnum, umɛn iwu urhɔnga ri Iyɛrhe-Num, ikɛi ri idɔngamɛn nu ibibimayɛ umɛn iki iwe ru Uyesu. Atsuke umum ru umpfũwã Ubatmo ri itsi idzowe isarhe Arherhu-Num nu ideka ri itsi Uyesu.
10 Ru Unum ukpu Uteijee, Ipfu-Num iwengge ru umum, ni inggũmum urhɛm ukerketakpɔ ru undzingmum ru nyaki ibar atsom,
11 uku ugɔr ugɛ, <<Utsɛng ru ubvur uku ufeta abinkɛ ungo uku unyã nu udene umgbɔ uzĩ ru ikpui ikikɔng abika adɔsa ha utɔɔva, abi Uafisa, nu abi Usimirina, nu abi Ubirgamum, nu abi Utiyatira, nu abi Usardi nu abi Ufirhadefiya, nu abi Urhawudikiya.>>
12 Umum idzipa ibee inyã urhɛm hã uku urherhe nggu umum. Umum iki idzipa umum inyã anang idɛ̃ɛ̃ irhirhang uzinarhi utɔɔva.
13 Ra ateu anang idɛ̃ɛ̃ irhirhang hã umum inyã uwɔɔ awu ru nyaku Ungwɛ̃-Ner, atsim atorho akika ader aka atsĩ andaidaknga, unga abow uyim uzinarhi ri ikɔknga.
14 Igwar itsinga iwu uku upɛ̃rhɛ̃ng ru nyaka aghwitu urhurhu, iwu iki iterha ugɛɛ ibur, nu ishaa asunga iwu ugɛɛ ikon urha.
15 Adaknga arhang ugɛɛ uzɔu uku ubãrhã umbɔ aka avum ru urha ugbor unai uku umani uku uzhãĩ. Nu urhɛmnga uwu ru nyaku ubvun amɛ̃ azɛ̃ akagɔng.
16 Akpɔm nggu idzɛɛr utɔɔva ru ubok ughanga, ra angwĩnga ikon iki ider ighaigharake ibanga ivaa iki idzeka. Unyɛ̃ɛ̃nga urhang ru nyaki ishaa unum iki irhang kishoo nggu ijee ra atenuma.
17 Ivangyɛ umum iki inyã unga, umum igba inũ ra adaknga ru nyaku ukom. Mɔcɛ unga atsorhu ubok ughanga nu umum na agɛ, <<Niba ugũo iwei. Awu umum iwe Inggbaashia nu Imaataka.
18 Awu umum ibɛk nggu urhɛ, umum iki ikpemum, bɔr icɛrɛ umum iwemum ru urhɛ uwu ugbagbaa! Umum ikpɔm atsak umukurhi akpe nu anang isei abika akpukpe.
19 <<Nggee, utsɛng abinkɛ ungo uku unyã, abinkɛ aka awe icɛrɛ nu abinkɛ aka ikorhe unuma.
20 Unyã agben ídzɛɛr utɔɔva ha ungo uku unyã ru ubok ughamum nu anang idɛ̃ɛ̃ irhirhang uzinarhi utɔɔva ha. Idzɛɛr utɔɔva ha iwu ípfu itser-Num utɔɔva iyi ikpui ikikɔng abika adudɔsa utɔɔva ha, ra anang idɛ̃ɛ̃ irhirhang uzinarhi utɔɔva ha iwu ikpui abika adudɔsa utɔɔva.