11
1 Mu dogoro tutisiu ara kai muqisi podeke vei ara qa dogoro tutia na Karisito.
Na veveina na vapaena na batu pa totoso vatarasae
2 Qa vatarasaegou ara sagou ura quke mumaniria sira na toa beto na uana taqu, beto ko qu aru tamaniria sira na uana tututidi qa vakarovo vanigou ara.
3 Ba qa nyoroguanigou ko mu gigila vatalea sa na batuna na marene sa na Karisito, na batuna na rereko sa na marenena, beto ko na batuna na Karisito sa na Tamasa.
4 Na marene sa udea na batuna tonai sa vavara babi tonai sa ule votunia na nongoro tana Tamasa sa sa vakepore veveinaia na batuna.
5 Ba na iviva rereko sake udea na batuna tonai sa vavara babi ule votunia na nongoro tana Tamasa sa sa vakepore veveinaia na batuna. Sa vaitoto vei tugu bi tavadadalu sa na batuna isa.
6 Ura vei minake udea na rereko sa na batuna mekana, poni sa mi lomoto palea tu ropi na vurunguna. Ba vei mina kai sakasa vaivakeana sa na rereko sa lomoto babi vadadalua na batuna, sa ego mi udea ropi sa na batuna.
7 Na marene sa minake udea sa na batuna, ura isa sa na kirena beto na malakapina na Tamasa. Ba na rereko sa na kapina na marene.
8 Ura na marene sa sake taroiti pana rereko, goto na rereko tu sa sa taroiti pana marene.
9 Beto ko nake marene sa sa tavapodaka vania na rereko, goto na rereko tu sa sa tavapodaka vania na marene.
10 Ko inara sa vei sa na rereko sa mina udea tugu sa na batuna ko na vinagigilana na ona neqi, ko ira na mateana mai boka gigilai sa na rereko isa sa isongia sa na neqi isa.
11 Ba pana tana Bangara sa na rereko sa sake pikata kaleona pana tana marene, beto ko na marene sa sake pikata kaleona tana rereko.
12 Ura na rereko sa sa taroiti pa marene, ba na marene sa sa podo lame vei gu tana rereko. Ko ira karu doru sa qai koko lame vei gu tana Tamasa, vei gu qai vei doru sakasa.
13 Mu rove pikatia moko mekamiu. Ai vei na tuvisina gu ko sake vaivakea sa na rereko minake pavu udea na batuna tonai mina vavara lao tana Tamasa?
14 Na uana kolena tana tinoni sa ulenia sa vei na marene mina vakakasia na vurunguna sa sa vaivakea sisa,
15 ba vei kai rereko sa bi vakakasia na vurunguna sa isa sa vavania sisa. Ura na Tamasa sa vania na vurungu kakasa sisa ko na udena na batuna.
16 Ba vei kaki tinoni sa baike vajonganai sa na sakasa qa korapa pojai ara api, poni sa isa gu ma pojai ara sa kepore mule sa kai goto tuti be gigilai agei babi ira na ekelesia tana Tamasa.
Sake tatuti vatale na vavolo ta Bangara
17 Pana vavanau mana paranga vaneneqinigou kopira sa ara qake vatarasaegou sagou, ura totonai qu vaikamu sa nake vajonganai na goto tinoni sa qu roitinia agou goto na ikerena tu.
18 Momoe sa, tonai qu vaikamu vei na ekelesia sagou sa qa tei nongoronia tu ara sa koledia sa kaki vavaipikatai pa vaikorapaimiu mekamiu. Ko qa nyoro vasosotoa tu ara sa na vavakato isa.
19 Ura mai koledia tugu sira na vavaipikatai pa vaikorapaimiu ko vei tugu sa mai boka tadogoro pikata sira qai turu vanabu pana podeke.
20 Totonai qu vaikamu sagou, sa nake vavolo ta Bangara sa qu tekua.
21 Ura tonai qu teteku sa quke vaivera goto qu okoto rajamiu tu, ko kaki sa qai korapa burana goto kaki sa qai tei buku vadigereniria tu.
22 Kue qokolo! Sa kepore na miu ruma ketakoi qu teteku na buku sa? Ba ai vei, qu vakepore veveinaia agou sa na ekelesia tana Tamasa ko qu vakearia ira sa keporeniria kai sava? Na sa sa qu rove veinia agou kode mana pojanigou ara? Kode mana vatarasaegou? Dai, na veveina api sa ara qake isongo vatarasaegou sagou!
Na vavolo ta Bangara
(Matiu 26.26-29; Maka 14.22-25; Luke 22.14-20)
23 Ura ara qa teku vakarovia pana tana Bangara sa isa qa vakarovia tamugou. Na Bangara i Jisu, sa pana bongina sa tagabala kana, sa tekua sa na bereti.
24 Ko pa liguna sa paranga jonganania na Bangara, sa sa kipai isa sa na bereti beto pira sau, <<Api sa na tiniqu isa tamugou. Mu roitinia sapi na vinaroroququ ara,>> sau.
25 Pana soana vei mutugu isa, sa pa liguna na teteku sa tekua isa sa na kapa beto pira sau, <<Na kapa api sa na vinaego koregana tana Tamasa sa tavatoqo vamauru pana orunguqu ara. Doru totoso muna bukua, sa mu roitinia pana roroququ ara,>> sau.
26 Ko doru totoso muna tekua sa na bereti beto muna bukua sa na kapa, poni sa qu ule votunia agou sa na mate tana Bangara tinganai mina mule lame sisa.
Mu tekua na vavolo ta Bangara pana uana sa garo
27 Ko sa vei sa na tinoni sa tekua na bereti babi sa bukua na kapa tana Bangara pana uana sake garo, sa sa vakepore veveinaia isa sa na tinina beto na orunguna na Bangara ko sa sela.
28 Ko sa vei sa agou mu okoto doro viloto mulenigou mai mekamiu, beto sa mu tekua sa na bereti beto mu bukua sa na kapa.
29 Ura na tinoni sake doro gigalia sa na ginuana na tinina na Bangara tonai sa tekua na bereti beto sa bukua na kapa, poni sa sa teku beto sa buku tarinia mekana sa na vaipitu tana Tamasa.
30 Ko sa vei isa sa sokumiu agou sa qai munyala, qai mo beto kaki qai tei mate tu.
31 Ba vei tana pitu mulenigita mai sa mekada, poni sa na Bangara minake pitugita.
32 Ba na Bangara sa tonai sa pitugita sa sa vatavagigalagita, ko vei ko take somana tapitu tavitia na kasia gusu sau.
33 Ko inara sa vei sa, ka visa tavitiqu, totonai mu vaikamu ko mu teteku mugu, sa mu vaivera.
34 Na tinoni sa burana sa mi tetekuona mai tu pa ruma mai, ko tonai mu vaikamu sa mike roitinia kaki uana kode mina gosoronia isa sa na vaipitu tana Tamasa. Ego ko na veveidi kaki ginugua sa totonai tu mana lame sa kode mana vavanaunigou na veveidi.