5
Na toa lulasana pa ekelesia
1 Ego ko qai tei ule vatatale vanisiu tu ara sa na toa lulasana sa sa taroiti pa vaikorapaimiu agou, isa na toa ikikerena vei ira tu na tinoni karovodi ba baike roitinia. Qai vavakato vanisiu sa kai tinoni sa puta tavitia na tinana vakarovo qarigunisiu.
2 Ba agou sake tana gogore tu na miu uana vavalavatai! Sa pada bu takulangania tu agou sa na toa vei isa, beto na tinoni sa roitinia na roiti isa ba bu varijo palea pana miu vaikamu.
3 Ara sa qake suvere tavitigou sagou ba qa korapa tugu suvere tavitigou pana qua roroqu. Ko qa kale pu vei na tinoni sa korapa tugu suvere tavitigou ko qa tei pitua tu ara pana isongona na oda Bangara sa na tinoni sa roitinia na roiti lululasana vei ina.
4 Totonai muna vaikamu pana neqi ta noda Bangara i Jisu, ko ara tonai ba qa korapa suvere tavitigou pa buloqu,
5 sa mu loa lao vania i Setani sa na tinoni vevei isa ko mi tapiara na tinina beto ko na gagalana mi taalo pana rane vaipitu tana noda Bangara.
6 Nake jongana sa na vavaqata qu roitinia agou. Qu tei gigilaimiu tu agou sa iapeki vavakovuruni palava gu ba sa vakovuru vaovulia sa na palava doruna.
7 Mu varijo palea sa na sela sa vei na vavakovuruni palava leluna ko mu lioso vatale. Ko agou sa qu tei vei tu na bereti nake kovuruna, ura na Karisito mekana sa sa tei tavavakukuvu tu isa na oda lami vavolo Alokata.
8 Ko ta toania sa na vavolo Alokata ba take vatavitinia na sela beto na roiti ikikeredi qai vei na bereti qai taroiti pana vavakovuruni palava; goto ta vatavitinia tu na toa liosona beto ta pojai na sosotona, pira tu sa na uana qai vei na bereti nake kovuruna.
9 Pana kai qua leta momoe qa kuti vanigou sa qa vavanaugou ko muke nagoria sira qai toania na toa lulasana.
10 Ba nake vei ko ira doru tinoni lululasadi pa kasia gusu api, babi ira qai doro seiniria na sakasa, babi na tinoni sa iko ragatia nona sakasa na goto tinoni babi ira qai vatarasae tamasa sesekedi sa qaunia ara. Ura muna taloa tu pa kasia gusu api ao beto sa muna boka ukuniria sira.
11 Goto na veveina qa kuti vanigou ara sa muke nagoa sa na tinoni sa gigala mulenia mekana na tinoni tana Karisito sisa sau, ba beto sa toania isa sa na toa lulasana, sa doro seiniria na sakasa, sa vatarasae tamasa sesekedi, sa vaipoja vivikere, sa tinoni bubuku aruna, babi sa iko raragatia nona sakasa na goto tinoni. Muke isongo teteku tavitia sa na tinoni vevei isa.
12 Nake qua totona ara ko mana pituria sira pa peguruna na ekelesia, goto agou tu sa mu pituria sira pa leona na miu ekelesia.
13 Na Tamasa tu mina pituria sira pa peguruna, goto agou sa isa vei sa pojai na Kukuti Tabuna sa: <<Mu varijo palea pana vaikorapaimiu agou sa na tinoni sa toania na toa lulasana,>> sau.