9
Isa sa tavamalumunia na tinoni tagarununa beto nona roiti
1 Na tinoni taruvataqu ko mana boka vei isa sa nyoguanisiu na Bangara sara. Kai tinoni tagarunuqu sara! Qa batini mataqu ara si Jisu na oda Bangara! Ko agou tugu sa na vuana na qua roiti qa roiti vania na Bangara ara!
2 Vei ira na goto tinoni baike doro veinisiu kai tinoni tagarunuqu sara, ba pana tamugou sa ara qu doro veinisiu tugu kai tinoni tagarunuqu sara. Ura na veveimiu agou qu kole kame tavitia na Bangara sa ulenia gu sa ara sa kai tinoni tagarunuqu.
3 Api sa na qua nanaqe mulenisiu tadira qai nyorogua pitu vilotosiu ara.
4 Ai vei sake garo sa agei mene taiani gagani na buku sa na roiti ninabulu qe roitiniria?
5 Ai vei sake garo sa agei be toniria sira na maqotamei tonai be lekogo, qai vei ira kaki tinoni tagarunudi, ira na tasina na Bangara beto i Pita?
6 Ba ai vei agei kao Banabasi gu mekamei sa mene roiti tu pa limamei beto sa mene tekua sisa mene toania?
7 Na solodia sake tabara mulenia mekana pana ona roitina. Na tinoni sa umuma sa kode mina somana teku tugu sa pana vuana na qurepi sa umaniria. Ba i sei mai sa kopuniria na sipi beto kepore tugu iapeki meleke bi tekua pana ona sipi?
8 Nake kilu veveidi na sakasa pana uana tadagita tinoni sa mana pojaria ara, ura na Vavanau sa tei uleniria tu sa aipira.
9 Na takuti kolena pana Vavanau ti Mosese sa pira sau, <<Muke piko ngujupukua na okeseni tonai sa korapa tete vovoragaria na kiko, ko mi boka gaganigana,>> sau.
10 Ko na veveidagita sa sa pojai isa? E, na laedagita tugu sa sa takuti sisa, ko na tinoni sa varoitiria na manugu qai ragataria na gegelina beto na tinoni sa lolokete sa mai roiti pana rorovena kode mai somana isongia ira sa na vuana na umuma.
11 Ko agei sa qe tei umania tu tamugou sa na kiko pana Gagala, ko na beina sa nake savana mene abua tugu agei tamugou sa kaki sakasa pana toa tini.
12 Vei ira kaki sa bai doro veinia na dia tuvisina ko mai somana isongo tekudia pana tamugou barigu, poni sa sa garo vivitigi gu sa agei tu sa na mei tuvisina ko mene vei.
Na mei tuvisina gu sa be boka tekua gu pana tamugou agei sa kaki sakasa vaitokai, ba qeke isongo vei sagei. Goto qe pogoso golomoria gu agei sira doru takulanga ko vei ko meke suqutia na reregena na nongorona na veveina na Karisito qeu.
13 Qu tei gigila vataleamiu tu agou sa ira na tinoni qai roiti pa zelepade sa pa zelepade tugu qai tekunia sa na dia gagani, beto ko ira qai jujunoniria na vaivana vavakukuvu sa pa vaivana tugu ira qai tekunia sa na iadi.
14 Ko pana soana vei tugu isa sa na Bangara sa vaigarununia ko ira qai taraenia na nongoro jongana sa mai toa tugu pana nongoro jongana.
15 Ko na qua tuvisina gu ba boka roiti vei sara ba qake isongo roiti vei pira sara. Ko kopira ba qa korapa kutiria ara sa na veveidi aipira nake vei ko kopira ma boka isongia sa na vaitokai tamugou qau sa. Sake jongana tugu sa ba mate talenia ara sa na ginuana vei bake isongia kai vaitokai tamugou; ba ara vei bake boka vaqatania sa na veveina qa tarae gagalenia na nongoro jongana poni sa ba matequa gu ba sa jongana jola.
16 Kepore na qua totona ko mana vaqatania ara sa na veveina ara qa taraenia na nongoro jongana. Ura na Tamasa tu sa garunusiu sara ko qa tarae. Ko ma gosoriagaqu tu na takulanga sara vei manake taraenia na nongoro jongana!
17 Vei ba roitinia ara pana qua vivile mekaqu sa na roiti api, poni sa ara ba boka verania sa na tabara. Ba qa roiti nake pana qua vivile mekaqu sara, ura na Tamasa tu sa garununisiu sa na vareregena na roiti api.
18 Ko na sa tu sa na tabara taqu sa vei? Api gu sa na tabaraqu ara: tonai qa taraenia na nongoro jongana sa qake tepani tabara ara sa na roiti isa, ko na qua tuvisina sa ba tatoka sara ba ara qake vei tonai qa taraenia na nongoro jongana.
19 Na tinoni taruvataqu ko nake pinausu tadira na tinoni sara, ba ara qa vapinaususiu mekaqu lao pana tadira doru tinoni ko vei ko ma aburia sira soku tinoni qau.
20 Pana tadira na Jiu sa ara qa toa vei tugu ira na Jiu, ko ma boka aburia sira na Jiu qau. Ko ara mekaqu sa qake kole pana totoli tana Vavanau ti Mosese, ba pana tadira qai tatotoli pana Vavanau ti Mosese sa ara qa toa vei tugu ira, ko vei ko ma aburia ira qau.
21 Ko pana tadira na tinoni karovodi ira qai kole pa peguruna na Vavanau tadira na Jiu sa ara qa suvere vei tugu kai tinoni ira ko qake tutia na Vavanau tadira na Jiu. Qa roiti vei pira sara ko ma aburia sira na tinoni karovodi qau. Ba nake vei ko ara qa suvere pa peguruna na vavanau tana Tamasa sa, goto qa tuti sosotoa ara sa na vavanau tana Karisito.
22 Tonai qa suvere tavitiria ira qai munyala pana dia rarange sa ara ba qa munyala tugu, ko vei ko ma aburia sira qai munyala qau. Qa suvere vei tugu qai okokoto susuvere vei ira na doru tinoni sara, ko vei ko ma aloria sira kaki qau.
23 Dorudi aipira sa qa roitiniria ara ko vei ko ma vareregia na nongoro jongana, beto ko ara ba somana isongia tugu sa nona mana qau.
24 Qu tei gigila vataleamiu tu agou sa pana vaivose abutu sa soku sira qai somana vaivose abutu, ba kai memekana gu sa sa tekua na pinia. Ko sa vei sa agou mu abutu vei na tinoni mi tekua na pinia sau.
25 Doru tinoni leleo qai vaipera viviva sa qai tuti pulisiria sa na vavanaudi na leleo. Qai roiti vei sira ko qai tekua sa na pinia kode mina manyao gu, ba gita tu sa taqe korapa roiti ko tana tekua sisa mina kole jola.
26 Ko sa vei sa ara qake abutu ilalo lao lame, beto ko qake vei na tinoni bokeseni sa kole gugumai na gagale eqa gu.
27 Goto qa vapatukuria beto qa kopunia sa na tiniqu ko sa vatabesiu vei na qua pinausu, ura kita pa liguna ma taraenia na nongoro jongana poni sa ao quke pada miunisiu na Tamasa qau.