Pa Kolosi
1
Na Popodalaina na Leta
1 Ara Paula, pana nyorogua tana Tamasa qa tinoni tagarunuqu tana Karisito i Jisu, beto i Timote na tasida.
2 Na leta api sa lao tamugou pa Kolosi, agou na tinoni liosomiu beto na tinoni tarangemiu pana miu tutina na Karisito.
Na vairoqu vaialona beto na bule tana Tamasa na Tamada mi somana tamugou.
Na Vavara Paranga Jongana
3 Agei sa doru totoso qe paranga jongana lao tana Tamasa na Tamana na oda Bangara i Jisu Karisito totonai qe vavara tokanigou agou,
4 ura qe nongoroniria agei sa na veveina na miu rarange tana Karisito i Jisu beto na miu vairoqu lao tadira na tinoni liosodi tana Tamasa.
5 Na miu rarange beto na vairoqu aipira sa qai pidoko votu pana miu vera ngangalina isa sa korapa takopu vatale vanigou pa noka, ko na vera ngangali isa sa perangana qu nongoronia agou totonai qu nongoria na sosoto sa kole pa nongoro jongana
6 sa lame kamugou agou. Sa korapa vua beto sa korapa rerege pa doru eqa pa kasia gusu sa na nongoro jongana isa, ko tamugou ba sa korapa tugu vei isa podalai vei tu na rane qu nongoronia ko qu gigila vatalea agou sa na vairoqu vaialona tana Tamasa sa tatarae pana sosoto.
7 Ko na vairoqu vaialona tana Tamasa api sa qu tei nongoro vakarovia tu agou tai Epaparasi kai tinoni jongana sa mekarai nabulu tavitigei agei, beto kai tinoni roiti tarangena tana Karisito sa tokanigei agei,
8 beto isa sa ule vanigei agei na veveina na vairoqu sa vanigou na Gagala Tabuna agou.
Na Karisito Beto na Ona Roiti
9 Ko sa vei aipira sa agei sa podalai tugu na rane qe nongoronia na veveimiu agou, poni sa qeke noso vavara tokanigou beto qe tetepa vanigou sa agou ko na Tamasa mi vapugelenigou na gigalaina na ona uana tonai muna isongia agou sa na tavagigala beto na vinakabere tana Gagala.
10 Ko mu boka toania agou sa na toa sa garo beto sa qerania na Bangara, ko mu vuania doru roiti jongana beto mu ijoko pana miu gigalaina na Tamasa.
11 Beto ko mu tavaneqinia doru neqi tinamasa tana ko mu vangajuria na tapata beto muke kilasa munyala. Pana qeqera
12 mu paranga jongana lao tana Tamada isa sa vasomana isonginigita na kobuna na isisongo sa vatana vaniria ira nona tinoni qai suvere pa kabere.
13 Isa sa na Tamasa sa alogita pana neqi tana rodomo ko sa vakarovogita pana binangara tana Tuna isa sa roroqua,
14 na Tuna isa sa ruvatagita ko qai taleoso sira noda sela.
Na Karisito sa Poreveveina Jola
15 Na Tuna isa sa na kirena na Tamasa paena,
na podo kimanaqedi doru vinapodaka.
16 Ko pana Tuna sa sa vapodakaniria na Tamasa
sa doru sakasava pa noka beto pa peso-
ira na sakasava tabatadi beto na paedi,
ira na okokoto neqi beto na babangara,
ira qai totoli beto ira qai poredia viva.
Doru sakasava sa vapodakaria na Tuna,
ko qai podaka vania isa.
17 Na Tuna sa tei suvereona tu tonai qai oqoro podaka doru kai sa,
ko isa tugu sa aru vaikamuniria sira doru sakasava.
18 Na Tuna sa na batuna na ekelesia,
isa na tinina isa.
Isa sa na popodalaina,
na podo kimanaqe sa turu mule pana mate,
ko isa sa sa momoeniria doru sakasava.
19 Ura pana nyorogua jongana tana Tamasa
sa sa kolea na tinamasa pugelena sa na Tuna,
20 ko pana Tuna isa sa vaipuku tari laoniria tana mekana isa
sira doru sakasa.
Na orunguna isa sa nyoa pa korosi
sa sa vaibuleniria sira doru sakasava pa peso beto pa noka.
21 Na totoso qai jola lao pori sa qu tapikata vasou pale ko qu kanai agou sa na Tamasa, ko na miu roroqu beto na miu roiti qai gagale ikeredi.
22 Ba kopira pana matena na tinonina na tinina na Karisito sa na Tamasa sa vaipuku tari mulenigou sagou, ko qu turu pa moena mekana isa na tinoni madimiu, na liosomiu, beto na tinoni kepore miu pake.
23 Ko agou ba mu aru tamania na rarange, ura qu tei tavatogasa vamauru vatale tu ko quke tavakanoko pana vera ngangalina qu isongia tonai qu nongoria na nongoro jongana. Ko na nongoro jongana isa sa sa tatarae pa doru eqa pa kauruna noka, ko na nongoro jongana isa sa qa nabulunia ara Paula.
Na Roiti tai Paula pa Ekelesia
24 Ego qa qeraniria ara sira na tapata qa gosoro talenigou agou ko ira na vitigi sa oqoro vaokotoria na vitigi tana Karisito sa qa vaokotoria pana tiniqu ko qa gosoro vania na ekelesia, isa na tinina na Karisito.
25 Na ekelesia isa sa qa tavilenia ara ko qa nabulunia pana roiti poreveveina tana Tamasa, isa na roiti poreveveina sa vanisiu isa ko ma vagore votua ara sa na paranga tana Tamasa ko mi tokanigou sa agou sau.
26 Ko isa tugu na paranga tana Tamasa api sa na nongoro golomona sa kole golomo na totoso beto na sasae tinoni qai jola lao pori, ba kopira sa sa vabola votua isa tadira nona tinoni.
27 Ira sa na Tamasa sa nyogua vagigilaniria sa na vagiso poreveveina beto na vaivagabarana jola na nongoro golomona api sa tadira na tinoni karovodi tugu vei. Na nongoro golomona isa sa api: na Karisito sa kole pa bulomiu, isa na vera ngangalina kode muna somana isongia na toa jojonga tana Tamasa.
28 Ko isa sa na Karisito qe korapa vavaqatania agei tadira doru tinoni. Doru boboka qe varoitiria ko qe paranga vabalauria sira doru tinoni beto qe vagigalairia sira doru tinoni, ko mai turu na tinoni matuadi tana Karisito tonai mai turu pa moena na Tamasa sira doru tinoni qeu.
29 Ko sa vei sa qa pavu tale vaipera vivivania ara sa na viva tana isa sa korapa roiti vaneqi viviva taqu.