3
Na Tinoni Sa Kasopia Na Vavanau
1 Ego na dole sa sa babalau vaivagona jolaniria ira doru mamanugu mumuqu sa roitiniria i Iahova Tamasa. Ko pira saunia sa na maqota, <<Ai vei? Sa sosoto tugu sa na Tamasa sa pojai, Munake isongo gania na vuana kai gou pa inuma sau?>> saunia.
2 Poni sa paranga lao tana dole sa na maqota, <<Na vuadi na gou pa inuma sa mene boka ganiria gu,
3 goto na vuana gu na gou sa turu pa vaikorapaina na inuma sa sa pojai na Tamasa munake gania beto munake ulia ura kita mu mate sau,>> sau sisa.
4 Poni sa paranga lao tana maqota sa na dole, <<Minake isongo apulugou na mate sagou!
5 Ura na Tamasa sa gigilaiona sa isa tugu na ranena muna gania agou sa na vuana na gou isa sa kode mina revanga na matamiu ko muna vei na Tamasa, isa sa gigilai na jongana beto na ikerena,>> saunia.
6 Totonai sa doria na maqota sa mina gagani jonga sa na vuana na gou beto sa babata jonga na dorona beto sa vaivanyorogua sa na gou ura sa boka vaivagigalai, poni sa sa tekuria kaki vuana ko sa gania beto sa vania tugu vei na marenena sa korapa suvere tavitia ko sa gania.
7 Ego beto ko sa qai revanga gu sa na matadi ira karu, ko qai gigilai sa na gagadodi gu sira karu. Ko qai mekarai vaiukinia ira karu sa na equru gou piqi beto ko qai ude vapaeniria na gagadodi.
8 Beto qai nongoria ira karu sa na rarakotona i Iahova Tamasa sa korapa lelekogona pa inuma totonai sa lomoso gogore tapo na rane, ko sa ovo vapaeona pa vaikorapai gogou pa inuma sa na tinoni beto na maqotana ko mike batiria i Iahova Tamasa qarigu.
9 Poni sa kukua i Iahova Tamasa sa na tinoni, <<Pai sao?>> saunia.
10 Poni pira sau, <<Na rarakotomu ao sa qa nongoria pa inuma, poni sa qa matagutu ura na gagadoqu sara ko qa ovoqua,>> sau.
11 Poni pira sau sa i Iahova na Tamasa, <<I sei sa pojanigo sa na gagadomu sao sau? Ai vei qu gania ao sa na vuana na gou qa suqutunigo munake gania qaunigo ara?>> saunia.
12 Poni sa paranga sa na tinoni, <<Na maqota qu vasuvere tavitinisiu api sa isa sa vanisiu kaki vuana ko qa gania,>> sau.
13 Poni sa parangia i Iahova Tamasa sa na maqota, <<Na sa sa qu roitinia ao alepi?>> saunia.
Poni sa paranga na maqota, <<Na dole sa vagonasiu ko soni vei sa qa gania,>> sau.
Na Leleve Tana Tamasa
14 Ego ko i Iahova Tamasa sa parangia sa na dole, pira saunia, <<Ura na ginugua vei qu roitinia ao sa na tapata le alepi, sa
Na leleve tamu sa mina mangini jola jolaniria tadira doru papausu
Beto tadira doru mamanugu mamade nene pirudi!
Muna gavere gatolonia na lobamu
Beto muna gani kavuru peso
Doruna na rane na mua toa.
15 Mana vakolea ara sa kai vaikana pa vaikorapaimu ao beto na rereko,
Beto pa vaikorapaina na kikomu ao beto na kikona na rereko.
Isa mina vapalekai na batumu,
Beto ao muna vapalekai na kikijulu nenena,>> saunia.
16 Goto na rereko sa pira saunia,
<<Mana vamotai ara sa na mua vitigi,
Ko pa vitigi muna vapodoria ao sa na koburu.
Muna nyoroguania ao sa na marenemu,
Ba isa mina lalaenigo sao,>> saunia.
17 Pana tana marene sa pira saunia, Ura qu nongoria ao sa na ovovelena na maqotamu ko qu gania na vuana na gou isa qa suqutunigo ara, ko munake gania qaunigo, ko
<<Sa taleve sa na peso pa ginuguamu ao;
Muna gosoria na vitigi beto muna gania na gagani
Doruna na rane pa mua toa.
18 Na buburu beto na gogou vavaioka mina vapidoko vanigo,
Beto ao sa na eqequru pa mumuqu gu sa muna ganiria.
19 Mina ipata na isumatamu beto
Muna gania na gamu gagani
Tinganai muna mule lao pa peso,
Ura ketakoi tugu qu tateku votu sao.
Ura na kavuru peso sao
Ko pa kavuru peso tugu sa muna mule lao,>> saunia.
20 Ko na marene sa vakukunia i Ivi sa na maqotana ura isa sa mina tinadi doruna na tinoni toadi.
21 Ego i Iahova na Tamasa sa roiti vania na poko vuliti manugu mamade nenena sa na marene beto na maqotana.
22 Beto pira sau si Iahova na Tamasa, <<Inana ke! Na tinoni sa kopira sa vei kame gita, sa gigilai na jongana beto na ikerena. Ko kopira kita mi kaqama ko mi lokete mule sa pa gou vaivatoana ko mi gania ko mi toa kamua na kamua,>> sau
23 Ko i Iahova na Tamasa sa iju variua pa inuma pa Idini ko mi roitia sa na peso ketakoi sa koko lame vei sau.
24 Ko sa iju vavotu riua sa na tinoni beto sa vatoqoa pa inuma pa Idini pa kale sagere tapo sa na kerubimi beto kai benisi vuvurungu memea sa kapidolo lao lame ko sa kopunia na soana sa lao pa gou vaivatoana.