7
Na iama pana soana vei sa iama i Melekizedeki
1 I Melekizedeki api sa kai bangara pa gugusu pa Salemi beto kai iama tana Tamasa ululuna jola. Pa liguna sa riu rapata si Ebarahami ko sa vakilasaria ira na goto bangara beto ko totonai sa korapa mule, poni sa i Melekizedeki sa gosoria ko sa manania sisa.
2 Ko i Ebarahami sa iania i Melekizedeki sa kame pa manoga pana dorudi na sakasa sa tekuria isa pana totoso vaipera. Na ginuana momoe na isongona i Melekizedeki sa Na Bangara Tuvisi; na vinaruana sa na bangara pa Salemi tugu vei, ko na ginuana na isongona sa Na Bangara Bule.
3 Sake tagigila na tamana na tinana beto na tututi ketakoi sa podo lame vei sisa. Ko na rane sa podo beto totonai sa mate ba sake tagigila. Isa sa kai iama kole jolana, ko sa vei na Tuna na Tamasa sisa.
4 Ko kopira sa qu batia sa na tinoni poreveveina sisa. Ura i Ebarahami isa tu na tamada momoe gita ba sa vania tugu isa sa kame pa manoga pa dorudi na sakasava sa tekuria pana vaipera.
5 Ira doru iama qai podo lame vei pa tutina i Livai sa koleria sa na garunu pa Vavanau ko mai tekua sa kame pa manoga tadira doru tinoni Izireli, ira na turadi gu. Ba ira na turadi gu pira ba na podo lame veidi tugu tai Ebarahami.
6 Goto i Melekizedeki api sa nake podo lame veina pa tutina i Livai ba sa tekuria gu isa pana tai Ebarahami sira na kame pa manoga beto sa manania si Ebarahami, i Ebarahami isa sa isongia na taringunguti tana Tamasa.
7 Taqe gigila vataleaoda gita doru sa isa tu na tinoni poreveveina sa sa vamadia sa na tinoni nake loka poreveveina, ko sa vei sa i Melekizedeki sa sa poreveveina jolania si Ebarahami.
8 Pana totoso tadira na iama tuti lame veidi ti Livai sa ira na tinoni qai boka mate gu sa qai tekua na kame pa manoga. Ba pana totoso tai Melekizedeki isa sa tekuria sira na kame pa manoga pana ti Ebarahami sa korapa toaona sisa vei sa ulenia na Kukuti Tabuna.
9 Ko pira tana boka paranga vei sa gita. Tonai sa valaoa i Ebarahami sa na kame pa manoga poni sa i Livai ba sa valaoa tugu sa na kame pa manoga.
10 Ura i Livai sa oqoro podo sa totonai, ba sa tei korapa tu pa tinina i Ebarahami sisa tonai sa gosoria i Ebarahami si Melekizedeki.
11 Ego pana ginugua vei qai kole sira na iama bubutu Livai poni sa qai taiania ira na tinoni Izireli sa na Vavanau ti Mosese. Ko vei na roiti tadira na iama bubutu Livai sa bi okoto vatale, poni sa bike tanyogua mule sa kai goto iama isa sa iama pana soana vei sa iama i Melekizedeki, nake iama pana tutina i Eroni isa na tite tadira na tutina i Livai.
12 Ba qaike pada sira na iama veveidi inara, ura tonai sa bei sa na tututi iama, poni sa na Vavanau ba sa tabei tugu.
13 Ko na oda Bangara i Jisu, isa sa tapoja na veveina pira, sa na podo lame veina pa goto bubutu tu, ko kepore kame pa bubutu isa sa bi roiti vei na iama.
14 Taqe gigila vataleaoda gita sa na veveina api ura na oda Bangara sa podo lame vei pa bubutu ti Jiuda tu sisa. Ko i Mosese sake gigalia sa na bubutu alepi tonai sa vavakatonia na veveidi ira na iama.
15 Ko pana soana vei tugu isa sa i Jisu sa tavatoqo iama pana soana vei sa iama i Melekizedeki.
16 Ko i Jisu sa tavatoqo iama, nake pana garunu tana Vavanau na veveina pai bubutu sa pidoko lame vei sisa, goto sa tavaiama pana neqina na toa kepore vinabetona.
17 Ura pira sau sa na Kukuti Tabuna,
<<Ao sa kai iama kole jolamu
pana soana vei sa iama i Melekizedeki,>> sau.
18 Ko na garunu leluna na veveidi ira iama tutina i Livai sa sa tavakole kale pale ura sake ngongo beto sa kepore na veveina.
19 Ura na Vavanau ti Mosese sake boka valiosia kai sa. Ko kopira sa isa taqe korapa verania sa jongana jola beto ko sa boka vatata lamegita tana Tamasa.
20 Ko koleona mule sa na maulu tana Tamasa. Ba na Tamasa sake maulu tonai qai tavaiama sira kaki goto tinoni.
21 Goto tonai sa iama si Jisu poni sa maulu sa na Tamasa, pira saunia,
<<Na Bangara sa maulu ko kode minake beia sa na roquna,
ko ao sa na iama kole jolamu,>> sau.
22 Ko pana ginugua vei api sa i Jisu sa sa tamaulu tarinia sa na vinaego tana Tamasa, isa na vinaego sa jongana jolania na vinaego leluna.
23 Beto ko isa mule vei sa goto sa pira sa vei. Ira na iama pa vinaego leluna sa qai soku, ura qai boka mate ko qaike boka iama lalaodia.
24 Ba i Jisu sa toa laona gu, ko na ona roiti vei na iama sa sake karovo lao tana kai goto tinoni.
25 Ko sa vei sa kopira sa doru totoso gu sa boka aloria isa sira qai lame tana Tamasa tonai qai rangea na Karisito, ura isa sa kole jola ko sa turu vaniria pa moena na Tamasa sira.
26 Ko sa gosoro gu beto sa pada sa taqe isongia gita sa na kuta iama lavata vevei isa. Isa sa sa vaegoa na Tamasa sisa, sa lioso, kepore kai sela bi roitinia, sa tapikata kale sisa pana tadira na tinoni seladi, beto sa taovulu sae pa noka sisa.
27 Isa sake vei kaki goto kuta iama lavata pa moa. Ira na iama pa moa sa doru rane qai vavakukuvunia mai tu ira sa na dia sela mekadi beto sa qai vavakukuvuniria sira na sela tadira na goto tinoni. Goto isa sa roitinia sa kai vavakukuvu pana kai memeka totoso gu tonai sa vaivanania isa sa nona toa mekana.
28 Na Vavanau ti Mosese sa vatoqo iamaria ko qai kuta iama lavata sira na tinoni sela ko qaike boka roiti vataleniria doru roiti. Goto na taringunguti tana Tamasa sa tavitia na maulu beto ko sa tuti lame pa liguna na Vavanau isa sa sa vilea sa na Tuna, isa sa boka roiti vataleniria doru sakasa kamua na kamua.