I Jiudasi
1
Na Popodalaina Na Leta
1 Ara Jiudasi kai nabulu ti Jisu Karisito beto na tasina i Jekopi.
Na leta api sa lao tadira na takukudi beto na taroqudi tana Tamasa na Tamada beto na takopu vasaredi ti Jisu Karisito.
2 Na vairoqu vaitokai, na bule beto na toa vairoqu mi vovonu tamugou.
Ira Na Tinoni Ikikeredi
(2 Pita 2.1-17)
3 Ka visa baere jonga, qa kole ngangali vivitiginia ko ba kuti laonia tamugou ara sa na veveina na toa taalona taqe mekarai isongia gita qau, ba kopira sa neqi viva tu pa roququ ara sa na roroqu ko ma kuti lao sa tamugou ko ma paranga vaneneqigou tu sagou ko mu turu varenenia sa na vaivagigalai sosotona veveina na rarange qai tei teku vakarovo betoa tu ira na tinoni tana Tamasa qau.
4 Ura ira kaki tinoni ikikeredi qai tangutinia perangana tu ko mai gosoria na vinakilasa sa qai tei mavo sulopo tome tu pa vaikamu tamugou. Qai peluku vapirua ira sa na vairoqu vaialona ta noda Tamasa ko qai teku veinia na dia vinamalumu roroitidia uana lulasana beto qai kilu palenia ira sa na oda koimata memeka beto na Bangara i Jisu Karisito.
5 Ego qu tei gigilariamiu tugu agou sa aipira ba ara qa nyorogua varoroqunigou mule. Na Bangara sa pa liguna sa alo votuniria perangana pa Ijipi sira na tinoni Izireli poni sa sa vai paleria tugu sira qaike vasosotoa.
6 Ko ira na mateana qaike kopunia na neqi qai isongia goto qai loa pale tu sa na dia susuverena, poni na Tamasa sa piuniria na seni kole jolana ko sa vakoleria pa rodomo kukunina ko tinganai mina kamua na rane lavata tonai mai tavakilasa.
7 Ira pa Sodomo beto pa Qomora beto na gugusu vailivutaidi sa qai toa vei mutugu ira na mateana inara ko qai toania na toa lulasana beto qai vaiaru vabosi lao lame. Ko ira na gugusu ira sa qai korapa gosoria sa na vinakilasa tana iku kole jolana, ko na vinakilasadi ira sa na vinabalau tadira doru tinoni.
8 Ko pa soana vei tugu isa sa, ira na tinoni ikikeredi pa vaikorapaimiu aipira sa qai tutiria sa na dia putagita ko qai vapajia na tinidi mekadi, qai kilu pale na neqi babangara, beto qai poja vivikereria na minete pa noka.
9 Ba i Maekolo tu, isa na kuta mateana, ba totonai qai vaigesonia na veveina na kokobu tinina i Mosese ira karu na bangaradi na tomate, ba sake doro veinia na ona laona isa ko mina vamoroania sa na bangaradi na tomate. Goto i Maekolo sa poja vamomosonia gu sa na bangaradi na tomate, pira saunia, <<Na Bangara mi tokego sao,>> saunia.
10 Goto ira na tinoni aipira sa ira tu na sakasa qaike gigilaria na veveidi sa qai poja vivikereria; beto qai vei na manugu kepore roqudi ko ira na sakasava qai peki vagogovea pa roqudi sa ira tugu sa na sakasava sa teku tariniria na vinakilasa ira.
11 Mai takulangagadia tu! Ura qai tutia na soana ti Keni, qai gonaniria pa isisongo soana piruna ti Balamu beto qai tavakilasania na paranga kakarovo koimata sa vevei i Kora.
12 Ira na tinoni aipira sa qai vei na mati golomodi pa olapana tonai qu vaikamu tekua na vavolo roroquna na Bangara agou, qai gagale ngoja tave kepore na dia pangaga, beto qai vei na tinoni kopu sipi sa kopu mulenia gu mekana. Ira sa na pauku okoro sa kepore na okorona ko sa ivu vatagara jola palea na gava. Ira sa qai vei na gou egorodi ko qaike vua totonai sa kamua na dia totoso vua, qai vei na gou qai ruani mate ko qai tasobulu pale.
13 Ira sa qai vei na tovogo ranebongi qai vadadaoria pa poanana sa na dia roiti lulasa vaivakeadi. Ira sa qai vei na seru qai gona selania na dia soana rereregena ko qai rerege vapiru, ko ira sa korapa takopu vaniria sa na eqa rodomo kukunina ketakoi mai suvere kamua na kamua.
14 Ira tugu na tinoni aipira sa qi ule votunia i Inoke, isa na vitu popodo pa tutina i Adama, tonai pira qiu, <<Vainongoro! Na Bangara sa toniria ira nona soku vuro mateana madidi
15 ko mina tutiniria isa sira doru tinoni beto mina uduku votuniria sira doru roiti vavakepore Tamasa qai toaniria beto mina pituniria isa sira doru paranga ikikeredi qai gonania isa ira na tinoni seladi,>> qiu.
16 Ira na tinoni pira sa qai kole gu ququminiria ira na goto tinoni, qai kole gu nyanyaqo votuniria na sela tadira na goto tinoni sa aipira, ko qai kole gu tutiria na dia nyorogua ikikeredi mekadi. Qai kole gu paranga vapopoto bati kare beto qai paranga valolomosoria ira na goto tinoni ko mai tutiria na dia roroqu ira qarigu.
Na Paranga Vinabalau Beto Na Vavanau
17 Goto agou, ka visa baere jonga, sa mu vakoititiria sira na paranga perangaina tu qai pojaria ira na tinoni tagarunudi ta noda Bangara i Jisu Karisito.
18 Pira qarigunigou sira: <<Pana totoso bebetona sa kode mai lame sira na tinoni vavalededi qai tutia na dia nyorogua vavakepore Tamasa,>> qarigunigou.
19 Ira na tinoni aipira sa qai roitinia na toa vaipikatai, sa gaitiria na dia nyorogua mekadi, beto qaike isongia na Gagalana na Tamasa.
20 Goto agou, ka visa baere jonga, sa mu mekarai vaivaneqi pa miu rarange madina jola, mu vavara pa vaitoni tana Gagala Tabuna,
21 beto mu toania na vairoqu tana Tamasa tonai qu korapa gelenia na vairoqu vaitokai ta noda Bangara i Jisu Karisito isa mina vanigou na toa jola.
22 Ira qai ruarabeke sa mu vadogoroniria na bulo vairoqu.
23 Ira kaki mu saputu votuniria pa memea iku ko mu aloria, goto ira kaki sa mu vadogoroniria na bulo vairoqu ba muna vavabalau ko muke doro roroniria goto muke tavaraguania tugu vei sa na dia poko sa ramatia na pajina na dia uana lulasana.
Na Tamasa sa mi Tavatarasae
24 Na Tamasa isa sa boka kopunigou ko munake tatupe beto isa sa boka vaturugou na tinoni lioso qeqeramiu pa moena na ona kabere lavata,
25 isa na Tamasa memekai na oda inaalo mi isongia, pana roiti ti Jisu Karisito na oda Bangara, sa na vinatarasae, na vinalavata, na neqi binangara beto na neqi totolidi doru sakasava podalai pa popodalaina, kamua kopira ko mi kamua na kamua. Agua.