8
Ira na Rereko qari Tutia Jisu
1 Ego sa jola gu sa vei inara sa sa lekogo taraeni i Jisu pa gugusu lalavata beto na ikikete sa na nongoro jongana na veveina na binangara tana Tamasa. Ko ira ka manogarua ona sepele ba qai tutia tugu isa,
2 beto ko vei tugu ira kaki rereko sa iju paleria na tomate ikikeredi pa dia toa isa beto sa salanaria tugu kaki dia vagauru. I Mere na koko veina pa gugusu Magadalene sa kame, isa perangana qai kolea mai ka vitu tomate ikikeredi ba sa iju paleria tugu i Jisu.
3 Goto i Joana sa kame, na maqotana i Kuza na nabulu ti Herodi; kame i Susana, beto ko kubo mule sira na rereko. Ko ira aipira sa qai varoitiria na dia isisongo ko qai totokania si Jisu beto ira na ona sepele.
Na Vavakato Vavapadana Na Kiko
(Matiu 13.1-9; Maka 4.1-9)
4 Ego ira na tinoni pa okokoto gugusu sa qaike koroto kakamu tai Jisu. Ko totonai sa vaikamu lame tana sa kai minete lavata, sa pojai isa sa na vavakato vavapada api:
5 <<Koleona sa kai tinoni umuma sa riu vavuvusuria na kiko pa ona inuma. Ko totonai sa kole iparainiria na kiko isa poni sa kaki sa qai vukele lao pa lodaka soana ko qai teteria na tinoni, beto ko qai tatava kamu tobiki betoriagadia na manugu.
6 Kaki sa qai vukele lao pa peso bubuturuna, ko tonai qai pidoko sa qai malei matedia ura sa pidili kepore piena sa na peso pa ia isa.
7 Kaki kiko mule sa qai vukele lao pa gagasoro vavaioka, ko qai toa tavitiria tugu na gasoro vavaioka, beto ko sa pilu vamateria tugu isa.
8 Goto kaki kiko sa qai vukele lao pa peso jongana, ko qai toa vajonga beto qai vua vatale ko sa vuvungu gogoto na vuana,>> sau si Jisu.
Pa liguna isa sa pira sa paranga viva veiniria, <<Na tinoni sa pore talingi nonongorona sa mi vainongoro vatale,>> sau si Jisu.
Na Ginuana sa Vaivagigalainiria Na Vavakato Vavapada si Jisu
(Matiu 13.10-17; Maka 4.10-12)
9 Ego qai lao nanasia ira na ona sepele na sa ginuana sa na vavakato vavapada api,
10 poni sa pira sauniria, <<Agou qu tei taiania tu sa na gigalai paena na veveina na binangara tana Tamasa, goto ira na goto tinoni sa qai tavagigalai pa vavakato vavapada sira, ko
mai dodogorodia
ba maike batia;
mai nonongorodia
ba maike vakaberia,>>
sau i Jisu.
Na Vakaberena na Vavakato Vavapadana na Kiko
(Matiu 13.18-23; Maka 4.13-20)
11 <<Ego na ginuana na vavakato vavapada api sa pira sa vei: na kiko sa na paranga tana Tamasa.
12 Ira na kiko qai vukele lao pa lodaka soana sa ira na tinoni qai nongoriadia tugu na paranga tana Tamasa, ba sa lame na bangaradi na tomate ko sa teku palea sa na paranga isa sa kole pa bulodi, kita mai vasosoto ko mai taalo sau.
13 Ira na kiko qai vukele lao pa peso bubuturuna sa ira isa tugu qai nongoria na paranga tana Tamasa poni qai teku vakatapia pa qeqera. Ba sake kori gore vamauru vei na bagere, ko qai vasosoto mai iapeki totoso ba totonai sa lame na totoke ko sa podekeria sa qai vukele riudia.
14 Ira na kiko qai vukele lao pa ia sa kolea na gasoro vavaiokana sa ira qai nongoriadia tugu na paranga tana Tamasa, ba tonai qai korapa lalaodia poni na takulangadi na roroqudi na isisongo beto na qeqera goborodi pa toa kasia gusu sa sa piluria ko qaike boka vua vamatua.
15 Goto ira na kiko qai vukele pa peso jongana sa ira na tinoni qai nongoria na paranga tana Tamasa ko qai kopu vatalenia pa bulodi beto qai turu vangaju ko qai vua vatale,>> sau si Jisu.
Na Juke sa Opo Taria na Besini
(Maka 4.21-25)
16 <<Kepore sa kai tinoni sa vatoai na juke beto sa vaopo tarinia na besini babi vatoqoa pa kauru sape puputana sa na juke, goto pa ona totoqona tu sa vatoqonia, ko ira na tinoni mai tome lame sa mai batia na kabere.
17 Doru sakasava qai kole vapae sa kode mai tabata votu, beto doru sakasava qai kole golomo sa mai votu lame pa kakaberena.
18 Ko inara sa vei sa mu doro vatalea na soana qu vainongoronia na paranga tana Tamasa. Ura isa na tinoni sa isongo vasoku sa kode na motana mule sa kode mina taiania. Goto isa sake isongia kai sava sa isa tu sa rove veinia sa isongia ba mina tateku variunia tugu,>> sau si Jisu.
Na Tinana beto ira na Tasina Marene i Jisu
(Matiu 12.46-50; Maka 3.31-35)
19 Ego sa lame ti Jisu sa na tinana beto ko ira na boko tasina marene, ba qaike boka kamua sisa ura sa mota jola na minete tinoni.
20 Ko kame ira na tinoni sa sa lao pojania si Jisu, <<Na tinamu beto ira na tasimu marene sa pori, qai korapa turu veranigo pa sesebe. Qai nyorogua dorigo qarigu,>> saunia.
21 Ba sa oeria i Jisu sira, pira sauniria, <<Ira qai nongoria na paranga tana Tamasa ko qai vatabea sa ira sa na tinaqu beto ko na tasiqu marene ara,>> sauniria.
I Jisu sa Vabulea na Ranebongi
(Matiu 8.23-27; Maka 4.35-41)
22 Kai rane tonai sa koi pa koaka si Jisu beto ira nona sepele poni sa pira sauniria sira na ona sepele, <<Aria ko ta karovo lao pa kai karovona na ovuku Qalili,>> sauniria. Poni sa qai toka lao.
23 Totonai qai korapa tetepe lalaodia ira poni sa sa kole ko sa putagana si Jisu. Beto sa gore raja pa kolo isa sa na gava lavata, ko sa pugelia na kolo sa na koaka ko tata bai dururu.
24 Poni qai lao vadoravia ira na sepele si Jisu, pira qarigu, <<Qokolo, Qokolo, taqe tata mate sa gita!>> qarigunia.
Poni sa tatakole si Jisu ko sa tokea sa na gava beto na ololobagea, poni qai noso ko sa bule elava sa neqa.
25 Beto sa pira sauniria i Jisu sira na sepele, <<Kepore na miu rarange sagou?>> sau.
Poni qai gabara beto qai matagutu sira, ko qai kole vavaiparanga mekadi, I sei tu sa na tinoni api? Ko tonai sa parangaria na gava beto na kolo poni qai nongoria tu! qarigu.
I Jisu sa Salania kai Tinoni sa Kolea na Tomate Ikikerena
(Matiu 8.28-34; Maka 5.1-20)
26 Ego pa liguna sa vei inara sa qai tepe gore paro pa gugusu pa Qerasini pa kai kalena pa ovuku Qalili.
27 Isa tugu sa tete paro si Jisu pa paparona pa gusu isa sa sa gore tugu sa kai tinoni isa sa kolea na tomate ikikeredi ko mi lao gosoria sisa sau. Na sovai jolana na gagadona sa na tinoni api, ko sake susuvere pa ruma goto pa bevi vavaigolomodi tu.
28 Isa tugu sa dogoro laoa isa si Jisu sa sa uui, sa lao toqo sori tutungu pa moena i Jisu, ko sa kuku vevela vei pira, <<Na sa qu nyogua roitinia taqu sao Jisu na Tuna na Tamasa ululuna jola? Qa tepaigo ara sao, muke vakilasanisiu na vitigi!>> saunia.
29 Inara sa paranga vei sisa, ura perangana tu sa sogaria i Jisu sa na tomate ikikerena ko mi votu riu tana tinoni isa saunia. Ura kubo totoso sa vavavitulunia tu na tinoni api sa na tomate ikikerena. Ko ai tu qai piu veinia na seni na limana nenena beto qai kole kopu veinia kai tinoni tavatomena pa ruma vaipiu, ba sa kokoroto paleria tugu sa na seni beto sa toni riu pale na tomate ikikerena pa qega sisa.
30 Sa nanasa laoa i Jisu sa na tinoni api, <<I sei na isongomu sao?>> saunia.
Poni sa pira sau, <<I Joatina,>> sau, ura qai soku sira na tomate ikikeredi qai tomea na tinoni api.
31 Ko qai kole tepa totokai i Jisu sira na tomate ikikeredi, ko kita mi garunu laoniria pa ia ketakoi mai tavakilasa ira na gagala ikikeredi qarigu.
32 Ego sake sou pa ia isa sa kai godo borogo lavata, qai korapa nyunyubele gaganigadia pa kai kalena na kubo. Ko qai tepa totokai ira na tomate ikikeredi si Jisu ko mi vamalumuria ko mai lao tomedia tadira na borogo qarigu. Poni sa vamalumuria tugu.
33 Ko qai votu riu tana tinoni api sira na tomate ikikeredi, ko qai lao tomedia tadira na borogo. Poni sa qai tulai gore na taba sa na godo borogo pira ko qai gore tulusu pa kolo ko qai kuju mate betodia.
34 Ego ira na tinoni qai kopuniria na borogo sa totonai qai batia sa vei inara poni sa qai uku. Qai lao vavakato vaniria sira pa gugusu beto ira na tinoni pa vailivutaina na gugusu isa.
35 Poni qai votu lao sira na tinoni ko mai dogoria sisa na manugu sa podo qarigu. Tonai qai kamu tai Jisu sa qai batia sa na tinoni isa sa kolea na tomate ikikerena sa tei tasalana tu. Ko sa korapa toqo vataleona pa kekere nenena i Jisu sisa, sa tei vasae poko tu, beto sa tei tavagigala tu. Ko qai matagutu beto sira na tinoni.
36 Ko ira na tinoni qai batini matadi na manugu sa podo beto isa vei beto sa tasalana sa na tinoni isa, sa qai vavakato vaniria sira na tinoni qai koni kamu.
37 Poni qai tepai ira na tinoni pa Qerasini si Jisu ko mi iolo rijo pa ia ketakoi qarigunia, ura qai matagutu vivitiginia. Poni sa qaqiri lao pa koaka si Jisu ko sa mule riuona.
38 Ba tonai sa oqoro toka si Jisu sa sa lao kole tepa tuti tai Jisu sisa na tinoni sa koni tasalana ani, ba sa garunu vamulea i Jisu sisa, pira saunia,
39 <<Mu mule lao pa mua gugusu, ko mu vavavakatonia sisa vei sa roiti vanigo na Tamasa,>> saunia. Poni sa mule lao sa na tinoni api, ko sa vevelania isa tadira doru pa nona gugusu sisa vei sa roitinia i Jisu tana.
Na Tuna Rereko i Jaerasi beto an Rereko sa Ulia na Poko ti Jisu
(Matiu 9.18-26; Maka 5.21-43)
40 Totonai sa gabala mule lao kamu pa kai karovona na kolo si Jisu, sa qai vera vakamua ira na tinoni sisa. Ura qai kole tugu verania ira doru tinoni sisa.
41 Pana totoso tugu isa sa bola kamu gu sa na kuta tinoni mamata pa ruma vavaikamuna, na isongona i Jaerasi. Sa lao toqo sori tutungu pa nenena i Jisu sisa, ko sa tepa totokai ko mi lao pa ona ruma sau,
42 ura kai memeka tuna ikete tata manogarua aorona sa mi mate gu sau.
Ego totonai sa korapa rerege lalaona i Jisu sa qai jujupe vaikalenia ira na minete tinoni sisa.
43 Na somanana tugu pa vaikamu minete tinoni isa sa kai rereko sa riu gojo na orungu pa tinina ka manogarua aoro. Ira doru vei sa isongoria sa sa tei gona pale betoria tu pa solatadi ira na tinoni vavaisalana, ba kepore kame ira bi boka salania.
44 Ko sa somana rerege tuti pa liguna i Jisu sisa. Ko isa tugu sa lao ulia sa na uquna na poko ti Jisu, poni sa totonai tugu sa noso riu sa na orungu.
45 Tonai sa nanasa si Jisu, <<I sei sa ulisiu ara?>> sau sisa.
Ba qai oso sira doru, <<Ura! Nake agei!>> qarigu.
Poni sa pira sau si Pita, <<Qokolo, qu batiamua ao ko na vaikamu tinoni sa qai jupe vailivutainigo inara!>> saunia.
46 Ba pira sau si Jisu, <<Dai, kai tinoni sa sa ulisiu ara, ura qa vagigilai ara pa tiniqu sa sa votu taloa taqu sa na neqi,>> sau.
47 Totonai sa gigilai na rereko sa sa tei tavotu tu sa na roiti sa roitinia isa sau, poni sa matagutu neneqere vivitigi sisa, ko sa lao toqo sori tutungu pa nenena i Jisu, ko sa ule votunia isa tai Jisu pa moedi ira doru tinoni sa isa vei beto ko sa ulia na poko ti Jisu beto veveina sake ruavo tugu tasalanana sisa.
48 Poni pira saunia i Jisu sisa, <<Tuqu, na mua rarange sa tei salanigo tu. Mu lao pa bule,>> sau sisa.
49 Totonai tugu sa korapa paranga vei inara i Jisu poni sa sa bola kamu gu sa kai tinoni pogoso nongoro, na koko lame veina pa ruma tai Jaerasi na tinoni mamata pa ruma vavaikamuna, ko pira sau, <<Sa tei mate tu sa na tumu rereko. Kita vapavu lame goboria na tinoni vaivagigalai,>> saunia si Jaerasi.
50 Ba tonai sa nongoria i Jisu sa na vavakato tana tinoni pogoso nongoro, poni pira saunia si Jaerasi, <<Muke matagutu. Mu vasosoto gu beto kode mina jonga gu sa na tumu,>> saunia.
51 Totonai sa lao kamu sisa pa ruma tai Jaerasi, sa sake vamalumuria isa ko mai tome tavitia sira na tinoni, goto ira Pita, i Jone, i Jekopi, beto ko ira karu tinana na tamana gu na rereko.
52 Ira doru tinoni sa qai korapa roroma qai lukana takulangania na koburu sa mate. Poni pira sauniria i Jisu sira, <<Muke lukana! Zake mate sa na koburu inana, sa korapa putagana gu,>> sau sisa.
53 Tonai sa paranga vei inara isa poni sa qai avavunia ira doru sisa, ura qai gigila vataleadia sa tei mate tu sa na koburu rereko.
54 Ba sa arua i Jisu sa na limana na koburu beto sa paranga, <<Ngore, mu tatakole!>> saunia.
55 Poni sa toa mule ko sake ruavo tugu tatakolena sa na koburu ko sa garunuria i Jisu sira ko mai vania na gagani ko mi teteku sau.
56 Ko qai gabara vivitigi sira karu na tamana beto na tinana, ba sa paranga vabalauria i Jisu sira ko maike vavavakatonia pa tinoni sisa vei na roiti sa taroiti.