15
I Jisu sa Lao pa Moena i Paelati
(Matiu 27.1-2, 11-14; Luke 23.1-5; Jone 18.28-38)
1 Ego na vuvugei rorodomo sa qai sisiqarai vaikamu sira na kuta iama, na iviva mamata, ira qai vaivagigalainia na Vavanau beto ira doru iviva pa kauniseli, ko qai mekarai vairovenia sa na vamatena i Jisu. Qai piu vaikamuniria sa na limana i Jisu ko qai toni laonia tai Paelati sisa.
2 Poni sa nanasia i Paelati sisa, <<Ao sa na bangara tadira na Jiu?>> saunia.
Poni sa oe lao si Jisu, <<E, isa qu pojai ao inana!>> sau.
3 Qai kole jutu tarinia soku sakasava ira na kuta iama si Jisu.
4 Beto sa kai nanasia mule i Paelati sisa, <<Ai sa vei ko quke oe tu sao? Doro! Tei kubo sakasava tu sa qu tajutunia ao!>> sau.
5 Ba sake pojai tugu kai sa si Jisu, ko sa gabara vivitigi si Paelati.
I Paelati sa Vaegoa na Vamatena i Jisu
(Matiu 27.15-26; Luke 23.13-25; Jone 18.39-19.16)
6 Ego na ona tutina i Paelati sa doru totoso pa vavolo Alokata sa sa ruvatia sa kai tinoni tapiuna qai nyoroguania ira na tinoni.
7 Ko na totoso isa sa kai tinoni na isongona i Barabasi sa somana tapiu tavitiria ira qai rajai na qavuna beto qai vaitinoni.
8 Ko qai sae vaikamu tai Paelati sira na minete tinoni ko qai tepai sisa ko mi vamalumu vaniria sisa vei sa roroitinia isa pa doru vavolo Alokata qarigu.
9 Poni sa oe lao si Paelati, pira sau, <<Ai vei, qu nyoroguania ko ma ruvata vanigou sa na bangara tadira na Jiu?>> sau.
10 Ura sa tei gigilaiona tu i Paelati sa qai kokonoa gu ira na kuta iama si Jisu, sa vei sa qai loa lamenia tana.
11 Ba qai soriria ira na kuta iama sira na minete tinoni, ko i Barabasi tu sa mi ruvata vaniria qarigu.
12 Ba sa kai nanasa ligu lao mule tadira si Paelati, pira sau, <<Ko ai tu mana aru veinia ara si Jisu, isa qu gigalania na bangara tadira na Jiu agou?>> sau.
13 Poni qai kai vevela mule sira, <<Vamatea pa korosi sisa!>> qarigu.
14 Ba sa nanasa si Paelati, pira sau, <<Ba na sela sa sa sa roitinia isa?>> sau.
Ba tonai sa qai kuku vevela viviva tugu sira na minete tinoni, <<Vamatea pa korosi sisa!>> qarigu.
15 Ko sa nyorogua vaqeraria i Paelati sira na tinoni ko sa ruvata valao vaniria gu si Barabasi. Goto i Jisu sa loa lao vaniria ira na solodia ko mai irirunia na vavaiiruna beto sa mai riu vamatea pa korosi sau.
Qai Ngangulia ira na Solodia si Jisu
(Matiu 27.27-31; Jone 19.2-3)
16 Ego ko qai toni tomenia pa leo kakabarena na ruma tana qavuna ira na solodia si Jisu, beto sa qai kuku vaikamuniria sira na minete solodia doruna.
17 Ko qai vasaenia na poko kala davala beto qai viria kai tarapae vavaioka sa vei na tarapae bangara beto qai vasolapania na batuna.
18 Beto sa qai kole vavabangara leleoniadia ira sisa, beto ko pira qarigunia, <<Mi toa vakakasa na bangara tadira na Jiu!>> qarigunia.
19 Beto sa qai kole vavagore tarini kolu sa na batuna, qai tutue taria, beto qai totoqo sori tutungu vavatarasae leleoniadia ira sisa.
20 Pa liguna qai beto ngangangulu veinia inara sisa, sa qai vagore palea ira sa na poko kala davala ko qai vasae ligunia na ona poko mekana, beto sa qai toni votunia ko mai lao vamatea pa korosi qarigu.
Sa Tavamate pa Korosi si Jisu
(Matiu 27.32-44; Luke 23.26-43; Jone 19.17-27)
21 Ego tonai qai korapa lalaodia pa soana sa qai gosoria sa kai tinoni pa Saerini, na isongona i Saimone, na tamadi ira Alekezada i Ruposi. Na koko lame veina pa ona gusu ko na koni kamuna tugu pa Jerusalema sisa. Qai garunu totokai ira na solodia sisa ko sa pogosia sa na korosi ti Jisu.
22 Beto sa qai tonia si Jisu ko qai lao pa kai ia na isongona pa Qoloqota, na ginuana sa na Eqa Batu Tomate.
23 Ketakoi sa qai vania na vaini pasana isa qai qairi vaisomanainia na moa, ba sa daiona bukua.
24 Beto sa qai patania pa korosi sisa, beto sa qai kole gonania na patu vivile ko mi tagigila sa i sei mina tekua sa na okokoto ririkatana na poko tana qarigu.
25 Ego ko na sia koloko vuvugei tu sa qai patania pa korosi si Jisu.
26 Ko na paranga sa tajutunia isa sa pira sau: NA BANGARA TADIRA NA JIU.
27 Beto qai vamate tavitinia i Jisu sira karu tinoni raja ikikodi, kame pa kale matuana beto kame pa kale merina.
29 Ko ira na tinoni qai rerege jola sa qai poja vivikeria beto qai bebegoloniria na batudi, <<Aha! Ao sa muna jegaria na zelepade madina beto kue rane gu muna vaturu ligua qugu!
30 Ego mu alo mulenigo tu mekana, mu tavisu lageremua tu pa korosi!>> qarigu.
31 Ko ira na kuta iama beto ira qai vaivagigalainia na Vavanau ba qai kole tugu vavagoreni qera, pira qarigu, <<Ira na goto tinoni sa aloria, goto mekana sake boka alo mulenia!
32 Kopira sa mi gore lagere tu pa korosi sa na Karisito, na bangara tadira na tinoni Izireli, ko gita ba ta batia ko ta vasosotoa,>> qarigu. Ira karu qai tavamate tavitinia isa ba qai paranga ngangangulia tugu sisa.
Na Mate Ti Jisu
(Matiu 27.45-56; Luke 23.44-49; Jone 19.28-30)
33 Ego totonai sa kamua na korapa rane sa sa togai na rodomo sa doruna na gugusu, tinganai ko sa kamua tu kue koloko gogore tapo.
34 Tonai sa kamu kue koloko poni sa sa lukana uui si Jisu, pira sau, <<Eloi, Eloi, lama sabakatani?>> sau (na ginuana sa pira sau, <<Qua Tamasa, qua Tamasa, ai sa vei ko qu loa palenisiu tu?>> sau.)
35 Ira kaki qai turu tata ketakoi sa qai nongoria, ko pira qarigu, <<Doro! Sa korapa kukua i Elaija sina!>> qarigu.
36 Tonai sa kame ira sa sa pogoso abutu laonia sa kai pupuqana ko sa vatubulunia na vaini, ko sa suninia pa uquna kai kolu, beto sa alaka saenia tai Jisu ko mi vabukunia sau. Beto sa paranga, <<Loai ko! Ta dodogoroda. Kita pu kamu visu vagorea i Elaija,>> sau.
37 Beto sa vagorea kai uui lavata si Jisu, beto sa loai na singo.
38 Tonai sa sa tarikatarua sa na poko tobana na zelepade madina, sa podalai tarikata pa nulu ko sa gore kamu pa peso.
39 Na tinoni mamata gogoto sa sa korapa tugu turuona pa moena na korosi ko sa batiaona sa vei beto sa loaia na singo si Jisu, ko sa paranga, <<Sosoto! Na tinoni api sa na Tuna na Tamasa,>> sau.
40 Ego qai korapa tugu turudia pa souna ketakoi sira kaki rereko, ko qai kole dodogoro laodia. Qai kole turu vaisomanaidia tugu ketakoi sira Mere Magadalene, i Salome, beto i Mere na tinadi ira Jekopi na tinoni ikete beto i Josesi.
41 Tonai sa susuvere pa Qalili i Jisu sa ira na rereko pira sa qai tututia isa beto qai totokania tugu vei. Ra kaki gogoto rereko mutugu qai mekarai tutia sae i Jisu pa Jerusalema sa qai korapa tugu turudia ketakoi.
Na Vapaena i Jisu
(Matiu 27.57-61; Luke 23.50-56; Jone 19.38-42)
42 Ego sa tei gore tu sa na vevelu, ko na rane Vatana sisa beto sa mina kamua sa na rane Minere,
43 ko i Josepa pa Arimatia sa turu varene ko sa lao vatuvisi tai Paelati ko sa tepai sa na kokobu tinina i Jisu (I Josepa sa kai tinoni tapangagana pa kauniseli tadira na Jiu, beto mekana ba sa korapa tugu verania sa na lamena na binangara tana Tamasa).
44 Poni sa gabara si Paelati totonai sa nongoronia i Jisu sa tei mate tu qarigu. Ko sa kuku tekua sa na tinoni mamata gogoto, ko sa nanasia, <<Ai sa vei, sa tei mate sosoto tugu si Jisu?>> sau.
45 Ko totonai sa nongoro vatalea mai tu tana tinoni mamata gogoto sa isa sa tei mate tu sau, beto sa soni vamalumu vania i Josepa ko mina boka tekua sa na kokobu tinina i Jisu saunia.
46 Ego sa vai tekua i Josepa sa kai poko koregana, beto sa visu vagorea sa na kokobu tinina i Jisu ko sa udenia, beto sa lao vakolenia pa kai bevi takori vakolena pa patu mamavarana. Beto sa bokili vatitolo lao pateinia kai patu lavata sa na atakamanana na bevi.
47 Ko ira Mere Magadalene beto i Mere na tinana i Josesi sa qai batiadia sa na ia ketakoi sa tavakole na kokobu tinina i Jisu.